Nonro mag Chenro mar Chokruok mar Ngimawa kod Tijwa
NOVEMBA 4-10
MWANDU MA YUDORE E WACH NYASAYE | 1 JOHANA 1-5
“Kik Uher Piny Kata Gik Manie Piny”
w05-SW 1/1 10 ¶13
Luw Ranyisi mar Yesu
13 Jomoko nyalo paro ni nitie gik moko e pinyni ma ok richo. Kata ka en kamano, pinyni kod gik ma ni e iye nyalo galowa mi wawe tiyo ne Jehova. Bende, onge gimoro amora e piny marachni molos mondo ochwalwa machiegni gi Jehova. Kuom mano, ka po ni wachako hero gik ma ni e pinyni, moriwo nyaka gik ma nenore ni ok richo, wanyalo po ka wahinyore. (1 Timotheo 6:9, 10) E wi mano, thoth gik manie pinyni nyalo ketho timbewa mabeyo. Ka po ni warango sinembe kod progambe mag TV ma nyiso mana timbe gero, manyo mwandu, kata terruok, mosmos wabiro chako yie gi timbe marichogo, kae to wanyalo chako timogi. Ka po ni wamako osiep gi joma gombogi maduong’ en loso ngimagi e pinyni kata timo ohelni madongo, wan be wanyalo chako neno gik ma kamago ka gik madongo e ngima.—Mathayo 6:24; 1 Jo-Korintho 15:33.
Onego Ibed Ng’at Machalo Nade?
18 Gimachielo manyalo konyowa kwedo “gik manie piny” en ka waketo e paro weche ma Johana nondikogi: “Piny kadho, gi gombone: to ng’a ma timo gi ma Nyasaye dwaro osiko nyaka chieng’.” (1 Joh. 2:17) Nyalo nenore ka gima piny Satanni biro siko nyakachieng’. Kata kamano, chieng’ moro gikone nochopi. Gimoro amora ma Satan nyalo miyowa e pinyni ok bi siko. Keto wachno e paro biro konyowa mondo kik walwar e tembe mag Jachien.
Nono Puonj Manie Wach Nyasaye
Weche ma Jehova Paronwa Gin Migeno
14 Ndiko mag dho-Grik opong’ gi weche mang’eny miparonwa mondo omi waherre ng’ato gi ng’ato. Yesu nowacho ni chik maduong’ mar ariyo en ni, “her wadu kaka iherori iwuon.” (Math. 22:39) Jakobo owadgi Yesu bende nowacho ni hera en “chik Ruoth.” (Jak. 2:8) Jaote Johana nondiko niya: “Johera, ok andikonu chik manyien, to andikonu chik machon ma ne un go nyaka a chakruok.” (1 Joh. 2:7, 8) “Chik machon” ma Johana ne wuoyoe, tiende ne en ang’o? Nowuoyo e wi chik mar hera. Ne en chik “machon” nikech Yesu noyudo osechiwo chikno “nyaka a chakruok” tiendeni higini pieche ma nosekalo. Kata kamano, bende ne en chik “manyien” nikech ne dwarore ni jopuonjrego ochiwre e nyiso herano, nikech ne gidhi romo gi gik mopogore opogore e ngimagi mapile. Wan kaka jopuonjre Yesu, be wakawo mapek siem mimiyowa ni kik wabed joma ohero mana gik makonyogi giwegi kaka ji mathoth timo e piny masani?
it-1-E 862 ¶5
Weyo Richo
Ok rach ka wakwayo mondo Nyasaye owe ne ji richogi, moriwo nyaka kwayo mondo owe ne jo kanyakla richogi. Mano e gima Musa notimo e lo oganda Jo-Israel. Nokwayo Jehova mondo owe ne ogandano richogi, kendo Jehova nodwoke. (Kwa 14:19, 20) Bende, ka ne iwalo hekalu, Solomon nokwayo Jehova mondo owe ne ji richogi sama giloko chunygi bang’ ketho. (1Ru 8:30, 33-40, 46-52) Ezra bende nolemo e lela kokwayo mondo Jehova owe ne Jo-Yahudi ma noa e tuech kethogi. Lamoneno nomulo chuny jogo ahinya mi gikawo okang’ mowinjore mondo Jehova owenegi richogi. (Ezr 9:13–10:4, 10-19, 44) Jakobo nowacho ni ng’at motimo richo onego oluong jodong-kanyakla mondo olemne, kendo bang’ lamono, “kapo ni nitie richo moko mosetimo, ibiro wene.” (Jak 5:14-16) Kata kamano, “nitie richo ma kelo tho,” ma en richo motim ne roho maler, tiende ni, dhi nyime timo richo goyiem, ma en richo ma ok nyal we ne ng’ato. Jakristo ok onego olem e lo joma dhi nyime timo richo goyiem.—1Jo 5:16; Mat 12:31; Hib 10:26, 27; ne bende SIN, I; SPIRIT.
NOVEMBA 11-17
MWANDU MA YUDORE E WACH NYASAYE | 2 JOHANA 1–JUDA 1
“Nyaka Waked Matek Mondo Wasik e Adiera”
w04-SW 9/15 11-12 ¶8-9
“Dhiuru Nyime Yudo Teko Kuom Ruoth”
8 Wang’eyo riekni ma Satan tiyogo nikech Muma oseelonwagi. (2 Jo-Korintho 2:11) Kuom ranyisi, Satan notiyo gi yore mopogore opogore mondo onyosgo chuny Ayub. Nomaye mwandune, nonego nyithinde, notiyo gi jaod Ayub e kwede, nokelone tuo malich, kendo nochwalo osiepene moko mondo onyos chunye. Ayub nobedo gi parruok mochopo kama noparo ni Nyasaye nosejwang’e. (Ayub 10:1, 2) Kata obedo ni nitie seche ma Satan ok kelnwa chandruoge ma kamago achiel kachiel e kindewagi, chandruogego yudo Jokristo mang’eny, kendo Satan nyalo tiyo kodgi e nyoso chuny Jokristogo.
9 Gik ma nyalo ketho winjruokwa gi Jehova ng’eny e kinde mag gikogi. Wadak e kinde ma ji mang’eny ohero mwandu moloyo weche Nyasaye. Gige fwambo gi keyo osemiyo ji neno terruok mana ka gima kelo mor, to ok lit. Kendo ji mang’eny tinde gin “joma ohero mor mag piny kar hero Nyasaye.” (2 Timotheo 3:1-5) Ka po ni ‘ok wakedo matek ne yiewa,’ paro ma kamago nyalo ketho winjruokwa gi Nyasaye.—Juda 3.
Nono Puonj Manie Wach Nyasaye
it-2-E 279
Nyasi mag Hera
Muma ok lernwa ni nyasi mag herago ne gin ang’o kata nitimogi didi. (Juda 12) Ruoth Yesu Kristo kata jootene ne ok owacho ni ji otim nyasi ma kamago, kendo nenore maler ni ne ok gin gik mochuno, to bende ne ok gidhi siko. Jomoko wacho ni ne gin kinde ma Jokristo momewo ne loso nyasi kae to gigwelo Jokristo wetegi modhier. Nyithi kiye, mond liete, joma omewo, kod jodhier ne chiemo e mesa achiel ka ginyisogo ni ne gin owete kuom Ruoth.
it-2-E 816
Lwanda
Wach machielo mar dho Grik, spi·lasʹ, nenore ni nitiyogo kiwuoyo kuom lwanda moimore e i pi. Juda tiyo gi wachno e yor ranyisi kowuoyo kuom chwo moko ma nodonjo e i kanyakla mar Jokristo ka dwachgi ok ber. Mana kaka lwendni moimore e i pi ne nyalo ketho meli kata bare, e kaka chwogo bende ne nyalo ketho jomamoko e kanyakla. Nowuoyo kuomgi kama: “Gin lwendni mopondo piny e bwo pi sama gichiemo kodu e nyasiu mag hera.”—Juda 12.
“Ne Osemoro Nyasaye e Yo Malong’o”
Enok nokoro wach mane? Nokoro kama: “Neuru! Jehova nobiro gi ogandane maler tara gi tara mondo ong’ad bura ne ji duto kendo mondo onyis ni bura oseloyo jogo duto ma ok oluoro Nyasaye nikech timbegi duto ma ok nyis luoro Nyasaye, ma ne gitimo e yo ma ok nyis luoro Nyasaye, kendo nikech gik ma kelo bwok ahinya ma joma richo ma ok oluoro Nyasaye nowacho marach kuome.” (Juda 14, 15) Nenore maler e ndikono ni Enok ne wuoyo ka gima gik ma nowachogo ne osetimore, tiende ni ne chalo ka gima Nyasaye ne osekawo okang’ mar chopo weche ma ne okorgo. Weche mang’eny ma ne oduog okor bang’e, ne okor e yo machalo kamano. Wach maduong’ e ma: Janabino ne ni gadier ni gima nowachono ne nyaka timre, omiyo nokoro wechego mana gima ne gisetimore.—Isaiah 46:10.
“Ne Osemoro Nyasaye e Yo Malong’o”
Yie ma Enok nonyiso nyalo chwalowa mondo wanonre ka be wan gi paro kaka ma Nyasaye nigo e wi piny marachni. Siem ma Enok nochiwono wan bende omakowa. Kaluwore gi siem ma ne Enok ochiwo, Jehova nokelo ataro maduong’ e ndalo Noa mokethogo joma timbegi ne richogo. Kaka noketh piny e kinde Noa nyisowa ni ibiro keth piny e kinde mabiro. (Mathayo 24:38, 39; 2 Petro 2:4-6) Mana kaka e kinde Noa, Nyasaye oikore kaachiel gi ogandane maler mondo ging’ad bura ne jogo ma ok oluore. Waduto onego wakaw mapek siem ma Enok nochiwono kendo wanyis jomamoko bende. Samoro joma wadakgo nyalo tamore riwowa lwedo. Mano nyalo nyoso chunywa. Kata kamano, mana kaka Jehova ne ok oweyo Enok, wan bende ok obi weyowa ka wadhi nyime makore kode.
NOVEMBA 18-24
MWANDU MA YUDORE E WACH NYASAYE | FWENY 1-3
“Ang’eyo Timbeni”
Inyiso Chuny Machalo Nade?
8 Mondo kik wabed gi chuny machalo kamano, onego wapar ni Muma wuoyo kuom Yesu kaka Jal ma nigi “sulue abiriyo e luete korachwich.” Ei ndikono, “sulue” ochung’ne jodongo mowal gi roho, kendo weche mag ndikono pod inyalo tigo kuom jodongo mamoko duto manie kanyakla. Yesu nyalo chiko “sulue” manie lwetego e yo moro amora moneno ni ber. (Fwe. 1:16, 20) Omiyo, Yesu ma en Wi kanyakla mar Jokristo, ong’eyo gik moko duto ma timore kuom Jodongo. Kapo ni en adier ni dwarore orie achiel kuom jodong-kanyakla, Jal ma nigi ‘wang’ marieny kaka ligek mach’ biro neno ni otim mano e kindene owuon kendo e yo ma en ema odwaro. (Fwe. 1:14) Kapok okaw okang’, we wadhiuru nyime nyiso luor ne jogo moyier gi roho maler, nimar Paulo nondiko kama: “Winjuru jotendu, kendo migiuru duong’; nikech girito chunyu ma ok giyue, kaka jo ma biro dwoko wach kuom tich ma gisetiyonu. To tichgi mondo gitim gi mor, ok ka gijurgo, nimar mano ok dikonyu.”—Hib. 13:17.
Jehova Miyowa Rit Mondo Wabed gi Warruok
11 E fweny ma ne ondik wechege e bug Fweny sula 2 kod 3, inyisowa ni bang’ yudo duong’ e polo, Yesu Kristo ne nono chal mar kanyakla abiriyo ma ne ni e Asia Matin. Fwenyno nyiso ni Kristo ok ng’i chal mar gik moko mana e wiyewiye, to onono chalgi e yo matut. Nitie kinde mohulo nyaka nyinge jomoko, kendo e moro ka moro kuom kindego, ochiwo puoch kata siem. Mano nyisowa ang’o? Kaluwore gi fwenyno, kanyakla abiriyo ochung’ ne Jokristo mowal bang’ higa 1914, kendo puonj moting’o siem ma ne omi kanyakla abiriyogo nyalo tiyo bende kuom kanyakla duto mag oganda Nyasaye mandalogi, e piny mangima. Kuom mano, wanyalo ng’ado ni Jehova tayo joge kokalo kuom Wuode. Ere kaka yo ma otayowago nyalo konyowa?
w01-SW 1/15 20-21 ¶20
Dhi Riat gi Riwruok mar Oganda Jehova
20 Dhiyo riat gi riwruok mar oganda Jehova dwaro ni wachiw luor ne migawo ma Nyasaye omiyo Yesu Kristo kaka “wi kanyakla.” (Jo-Efeso 5:22, 23) Muma nyisowa e Isaiah 55:4 kama: “Neuru, [an Jehova] asemiye doko janeno ni ogendini, kod jatelo ni ogendini, mamiyogi chik.” Onge kiawa ni Yesu ong’eyo tayo ji. Bende, ong’eyo rombene kod dwachgi. Ka ne owuoyo gi kanyakla abiriyo ma ne ni Asia Minor, nowacho nyadibich niya: “Ang’eyo timbeni.” (Fweny 2:2, 19; 3:1, 8, 15) Mana kaka Jehova Wuon-gi, Yesu ong’eyo gik ma wachando. Ka ne pok opuonjo ji lamo mar Ruodh, nowacho kama: “Wuonu ong’eyo gik muchando kata ka pok ukwaye.”—Mathayo 6:8-13.
Nono Puonj Manie Wach Nyasaye
Kaka Pinyruodh Nyasaye Biro Tieko Jowasike Duto
10 Ng’ado bura. Jowasik Pinyruodh Nyasaye duto biro neno wach moro kendo ma biro medonegi lit nyowuoyo. Yesu nowacho niya: “Ginine Wuod dhano ka biro e boche polo ka en gi teko mang’ongo kod duong’.” (Mar. 13:26) Wach malich ma biro timoreno biro nyiso ni koro Yesu osebiro mondo ong’ad bura. E weche ma ne okoro e wi ndalo mag giko, Yesu bende wacho gik ma obiro timo sama ong’ado bura. Wayudo wechego e ngero mar rombe kod diek. (Som Mathayo 25:31-33, 46.) Joma omakore chuth gi Pinyruodh Nyasaye ibiro ng’adnegi bura ni gin “rombe,” kendo gibiro ‘ting’o wigi malo’ ka gifwenyo ni ‘resruokgi okayo machiegni.’ (Luka 21:28) Kata kamano, joma kwedo Pinyruoth ibiro ng’adnegi bura ni gin “diek,” kendo gibiro “goyo korgi gi kuyo maduong’ ” ka gifwenyo ni “kethruok mochwere” ochomogi.—Mat. 24:30; Fwe. 1:7.
Puonj Mayudore e Bug Fweny—I
2:7—“Puoth Nyasaye” en ang’o? To nikech wechegi gin kuom Jokristo mowal kuom roho, nyaka bed ni puoth Nyasaye miwuoyo kuome kae, en ngima maber machalo kaka paradis e polo—e nyim Nyasaye owuon. Jokristo mowal kuom roho biro yudo mich mar chamo olemb “yadh ngima.” Giniyud ngima ma ok nyal tho.—1 Kor. 15:53.
NOVEMBA 25–DESEMBA 1
MWANDU MA YUDORE E WACH NYASAYE | FWENY 4-6
“Joidh Farese Ang’wen Man e Ng’wech”
Joidh Farese Ang’wen Gin Jomage?
Jaidh faras ma rachar en ng’a? Bug Fweny e ma nyalo konyowa ng’eyo jaidh faras ma racharno. Jalo iluongo ni “Wach Nyasaye.” (Fweny 19:11-13) Yesu Kristo e ma iluongo ni Wach nikech en e ma owuoyo e lo Nyasaye. (Johana 1:1, 14) E wi mano, iluonge ni “Jal Migeno kendo Madier” kendo iluonge bende ni “Ruoth manie wi ruodhi kendo Jaloch manie wi joloch.” (Fweny 19:11, 16) Onge kiawa ni en gi ratiro mar bedo ruoth ma locho e lweny nikech ok oti marach gi teko ma en-go, kendo ok en ja mibadhi. Kata kamano, nitie penjo moko mowinjore wayud dwokogi.
wp17.3 4 ¶5
Joidh Farese Ang’wen Gin Jomage?
Joidh faresego nochako idhogi kar ang’o? Ne ni jaidh faras mokwongo, ma en Yesu, noidho faras ma racharno ka ne osesidhne osimbo mar loch. (Fweny 6:2) Yesu nobedo Ruoth kar ang’o e polo? Ne ok obedo ruoth ma piyo ka nosedok e polo bang’ chier. Muma wacho ni norito kuom kinde moro. (Jo-Hibrania 10:12, 13) Yesu nonyiso jolupne gik ma ne dhi konyogi ng’eyo ni kindeno oserumo kendo ni osechako locho e polo. Nowacho ni ka ochako locho, to gik ma timore e piny ne dhi medo bedo maricho moloyo. Yesu nowacho ni lwenje, nok mar chiemo, kod tuoche ne dhi betie. (Mathayo 24:3, 7; Luka 21:10, 11) Mapiyo ka ne Lweny Mokwongo mar Piny ochakore e higa mar 1914, nonenore maler ni dhano koro ne odak e kinde mag chandruok ma Muma luongo ni “ndalo mag giko.”—2 Timotheo 3:1-5.
Joidh Farese Ang’wen Gin Jomage?
Jaidh farasni ochung’ ne lweny. Ne ni ogolo kuwe e piny ma ngima, to ok mana kuonde manok e piny. Higa mar 1914 e ma lweny nohango kwakoe piny ma ngima. Bang’e, lweny mar ariyo mar piny ma ngima noluwe, ma bende ne rachie moloyo. Jotim nonro moko wacho ni joma osetho e lweny chakre higa mar 1914 okalo milion 100! E wi mano, ji mang’eny bende osehinyore marach nikech lwenje.
wp17.3 5 ¶4-5
Joidh Farese Ang’wen Gin Jomage?
“Ne ang’iyo mi ne aneno faras ma rateng’, to jal ma ne oidhe ne nigi ratinde ariyo mag pimo e lwete. Ne awinjo gimoro ma chal gi dwol mowuok e kind chuech mangima ang’wen-go ka wacho niya: ‘Kilo mar ngano nengone en dinari achiel, kendo kilo adek mag shairi nengone en dinari achiel; to kik iketh mor zeituni kata divai.’ ”—Fweny 6:5, 6.
Jaidh farasni ochung’ ne nok mar chiemo. Weche manie ndikono nyiso kaka nok mar chiemo ni malo ahinya ma miyo kilo mar ngano iuso dinari achiel, ma en pesa ma ne ichulo ng’ato bang’ tiyo odiechieng’ ma ngima e kinde Jokristo mokwongo! (Mathayo 20:2) Dinari bende ne nyalo ng’iewo kilo 3 mag shairi, ma ne en cham ma nengone ni piny kopim gi ngano. Be cham ma romo kamano ne nyalo pidho joot mang’eny? Osebed ka ijiwo ji mondo okung chiemo ma pile, mana kaka ndiko mar Fweny nyiso sama owuoyo kuom chiemo ma pile e kinde machon kaka mor zeituni kod divai.
wp17.3 5 ¶8-10
Joidh Farese Ang’wen Gin Jomage?
Jaidh faras mar ang’wen ochung’ ne tho ma yudo ji nikech masiche kod gik mamoko. Mapiyo bang’ higa mar 1914, tuwo miluongo ni Spanish flu nonego ji milionde modhuro. Nyalo bedo ni ji ma dirom milion 500 noyudo tuwono, ma nyiso ni ng’ato achiel e kind ji adek ne tuwono omako e piny mangima e kindeno!
Kata kamano, tuwono ne en mana chakruok mar tuoche. Jotim nonro wacho ni tuwo mar smallpox nonego ji milionde modhuro e higni mag 1900. E kindegi bende, tuoche kaka ayaki, kahera, kod malaria pod nego ji mang’eny kata obedo ni osetim nonro matut e wi tuochego.
Lweny, nok mar chiemo, kod tuoche pod dhi nyime nego ji. Liel choko jogo duto kendo onge geno moro amora ma ochiwonegi.
Nono Puonj Manie Wach Nyasaye
re-SW 77 ¶8
Duong’ ma Kom-Loch mar Jehova Nigo
8 Johana nong’eyo ni e kinde machon, jodolo ne tiyo e tabenakel. Omiyo, nyalo bedo ni gima ne oneno nomako dhoge. Owacho kama: “Bende, ne nitie kombe 24 mag loch molworo kom-lojno koni gi koni, kendo ne aneno jodongo 24 morwakore gi nengni ma rochere kobet e kombe mag lochgo, to ne gisidho osimbo mag dhahabu e wiyegi.” (Fweny 4:4) Kar neno jodolo, noneno jodongo 24 mobet e kombe mag loch kendo mosidhnegi osimbo kaka ruodhi. Jodongogo gin jomage? Gin Jokristo mowal mosechier mi odhi e polo, mobet e kombegi mag loch mana kaka Jehova nosingonegi. Ere kaka wang’eyo wachno?
re-SW 80 ¶19
Duong’ ma Kom-Loch mar Jehova Nigo
19 Chuech mangimago ochung’ ne ang’o? Wanyalo yudo dwoko ka wanono gima Ezekiel noneno e fweny. Ezekiel noneno Jehova kobet e gari ma ni e polo kolwore gi chuech moko ma nigi kido ma chal gi ma ne Johana oneno. (Ezekiel 1:5-11, 22-28) Bang’e, Ezekiel noneno kendo ka garino olwor gi chuech mangimago. Kata kamano, wang’ni to noluongo chuech mangimago ni jo kerubi. (Ezekiel 10:9-15) Nyaka bed ni chuech mangima ma ne Johana oneno e fweny ochung’ ne jo kerubi mag Nyasaye, ma gin chuech ma omi migawo ma malo ahinya e riwruok mar oganda Jehova ma ni e polo. Neno jo kerubigo machiegni ahinya gi Jehova ne ok en gima wendo ahinya ne Johana, nikech e tabenakel machon, ne nitie jo kerubi ariyo molos gi dhahabu e wi raum mar sandug singruok ma nochung’ ne kom-loch mar Jehova. Jehova ne chikoga Jo-Israel ka dwonde winjore koa e kind jo kerubi ariyogo.—Wuok 25:22; Zaburi 80:1.
cf-SW 36 ¶5-6
“Ne! Sibuor Moa e Dhood Juda”
5 Kinde mang’eny, sibuor ochung’ga ne chir. Be isegachomori wang’ gi wang’ gi sibuor maduong’ ma dichwo? Ka en kamano, nyalo bedo ni ning’iye tir mana nikech nichung’ e tok chiel molorone. To kata kolorne kamano, pod nyaka ibwogi. Sama ichomo wengeni kuome ka en bende ong’iyi tir, ok inyal paro kata matin ni nitie gimoro amora ma nyalo bwogo le ma ratego kamano mi oring. Muma wuoyo kuom sibuor ‘moloyo gik me thim gi teko, mak ring gimoro.’ (Ngeche 30:30) Chir ma kamano e ma Kristo nigo.
6 Wanon ane yore adek ma Yesu nonyisogo ni ojachir ka sibuor. Yorego gin: Kedo ne adiera, siro bura makare, kod chung’ motegno e akwede. Wabiro neno bende ni waduto—bed ni nonyuolwa ka wan jochir kata ooyo—wanyalo luwo ranyisi mar Yesu e nyiso chir.