Kaka Nyasaye ne Dwaro ni Ngima Dhano Obed

1. Nyasaye ne dwaro ni dhano odag e ngima ma chalo nade?

NYASAYE nigi chenro maber ne dhano. Nochueyo Adam gi Hawa moketogi e puodho ma jaber. Nodwaro ni gibed gi nyithindo, gilos piny duto obed paradiso, kendo girit le duto.​—Chakruok 1:28; 2:8, 9, 15; som Weche Momedore namba 6.

2. (a) Wang’eyo nade ni Nyasaye biro timo gima osewacho? (b) Gin jo mage ma Nyasaye dwaro mondo odag e piny, to kuom kinde ma romo nade?

² Be iparo ni chieng’ moro wabiro dak e paradiso? Jehova wachonwa niya: “Asechano mano kendo abiro chope.” (Isaya 46:9-11; 55:11) Obiro timo gima osewacho kendo onge gima nyalo geng’e. Jehova wacho ni nitie gimomiyo nochweyo piny. “Ne ok ochueye kayiem nono.” (Isaya 45:18) To nochueye mondo ji odagie. Gin jo mage ma Nyasaye dwaro mondo odag e piny, to odwaro ni gidag kuom kinde maromo nade? Muma wacho niya: “Jo makare nobed weg piny, kendo ginidagie nyaka chieng’.”​—Zaburi 37:29; Fweny 21:3, 4.

3. Nikech dhano tuore kendo tho, mano nyalo miyo ibed gi penjo mane?

³ Ndalogi dhano tuore kendo githo. Kuonde mopogore opogore ji kedo e lweny kendo ginegore. Kuom adier, mano ok e kaka Nyasaye ne dwaro ni dhano odagi. Kare ang’o ma ne otimore, to nikech ang’o? Muma kende e ma nyalo lero wachno.

JASIK NYASAYE

4, 5. (a) En ng’a ma ne owuoyo gi Hawa kotiyo gi thuol e puodho mar Eden? (b) Ler ane kaka ng’at maber nyalo lokore ma bed jakuo.

⁴ Muma nyisowa ni nitie jasik Nyasaye “miluongo ni Jachien kendo Satan.” Satan nowuoyo gi Hawa e puodho mar Eden kotiyo gi thuol. (Fweny 12:9; Chakruok 3:1) Ne omiyo onenre ka gima thuol e ma ne wuoyo.​—Som Weche Momedore namba 7.

⁵ Be Nyasaye nochueyo Satan Jachien? Ooyo! Malaika moro ma ne nitie e polo ka Nyasaye ne loso piny mondo Adam gi Hawa odagie e ma nolokore mobedo Jachien. (Ayub 38:4, 7) Ere kaka mano ne nyalo timore? Par ane ranyisini: Ere kaka ng’at maber nyalo lokore ma bed jakuo? Wang’eyo ni ok nyuolga ng’ato ka en jakuo. Kata kamano, ng’ato nyalo chako gombo gima ok mare. Kaka omedo dhi nyime gombo gino, e kaka gombo marach ma en-gono medore. To koyudo thuolo, okwalo gino. Ng’atno oselokore mobedo jakuo.​—Som Jakobo 1:13-15; som Weche Momedore namba 8.

6. Ere kaka malaika moro nolokore mobedo jasik Nyasaye?

⁶ Mano e gima malaikano notimo. Ka Jehova nosechueyo Adam gi Hawa, nowachonegi ni ginyuolre mondo ‘gipong’ piny.’ (Chakruok 1:27, 28) Nyaka bed ni malaikano nowacho e chunye niya: ‘Jogo duto nyalo lama kar lamo Jehova!’ Kaka nomedo paro wachno, e kaka nomedo bedo gi gombo mar dwaro gima Jehova kende e ma nigi ratiro mar bedogo. Malaikano ne dwaro ni ji olame. Omiyo, ne owuondo Hawa mondo otim gima ok kare. (Som Chakruok 3:1-5.) Kuom timo kamano, malaikano nobedo Satan Jachien kendo jasik Nyasaye.

7. (a) Ang’o momiyo Adam gi Hawa ne otho? (b) Ang’o momiyo wabedo moti kendo watho?

⁷ Adam gi Hawa ne ok owinjo Nyasaye kendo ne gichamo olemo ma ne okwergi. (Chakruok 2:17; 3:6) Ne gitimo richo e nyim Jehova, kendo bang’ kinde ne githo mana kaka Jehova nosewachonegi. (Chakruok 3:17-19) Nyithindo ma Adam gi Hawa nonyuolo ne gin joricho, omiyo gin bende ne githo. (Som Jo-Rumi 5:12.) Mondo wang’e gimomiyo nyithindo ma Adam gi Hawa nonyuolo bende ne obedo joricho, we wane ane ranyisini. Par ane ni iloso matafari gi bao ma nigi mbala. Donge matafari duto mibiro los gi baono biro bedo gi mbala? E yo machalo kamano, ka ne Adam otamore winjo Nyasaye, ne obedo jaricho. To nikech wan nyithind Adam, waduto wan joricho kendo inyalo wach ni wan gi mbala mar richo ma ne wayudo kuom Adam. Waduto wabedo moti kendo watho nikech wan joricho.​—Jo-Rumi 3:23; som Weche Momedore namba 9.

8, 9. (a) Satan ne dwaro ni Adam gi Hawa oyie gi ang’o? (b) Ang’o momiyo Jehova ne ok onego jong’anyogo gi kanyo?

⁸ Satan nochako tim mar ng’anyo ne Jehova sama nowuondo Adam gi Hawa mondo kik giluw chike Jehova. Nodwaro mondo Adam gi Hawa one Jehova kaka ja miriambo, kendo jaloch marach ma ok dwar ni dhano owinj maber. Satan ne temo wacho ni dhano nyalo timo gima gidwaro ma ok ochuno ni Nyasaye ochikgi, kendo ni Adam gi Hawa ne nyalo yiero kendgi gima ber kod gima rach. Kuom mano, Nyasaye ne nyalo timo ang’o e wi wachno? Ne onyalo nego Jachien, kod Adam gi Hawa mondo wachno orum gi kanyo. Kata kamano, be timo kamano dine onyiso ni Satan en ja miriambo adier? Ooyo.

⁹ Omiyo, Jehova ok nonego jong’anyogo gi kanyono. Kar mano, noweyo dhano mondo oloch e wigi giwegi. Mani ne dhi miyo onere ayanga ni Satan en ja miriambo kendo ni Jehova ong’eyo gima nyalo kelo ne dhano ber. Wabiro puonjore mathoth e wi wachno e Sula mar 11. Ineno nade yiero ma Adam gi Hawa ne otimo? Be ne en gima kare yie gi gima Satan ne owachonegi ka koni to giweyo winjo Nyasaye? Jehova e ma nomiyogi gik moko duto ma ne gin-go. Nomiyogi ngima makare, kama ber ma ne ginyalo dakie, kaachiel gi tich ma ne dhi kelonegi mor. Onge gimoro amora maber ma Satan nosetimonegi e ngimagi. In to dine iwinjo ng’a, Satan, koso Jehova?

10. En yiero mane maduong’ ma ng’ato ka ng’ato kuomwa nyaka tim?

¹⁰ Wan bende wan gi thuolo mar timo yiero machal kamano, kendo ngimawa otenore kuom yiero ma watimo. Wanyalo yiero winjo Jehova kaka Jaloch kendo nyiso ni Satan en ja miriambo. Kata wanyalo yiero mondo Satan oloch e wiwa. (Zaburi 73:28; som Ngeche 27:11.) Kata obedo ni Nyasaye ok e ma loch e wi piny sani, pod en gi joma winje. Ka Nyasaye ok e ma loch e wi piny sani, kare en ng’a ma locho e wi piny sani?

NG’ANO MA LOCHO E WI PINY SANI?

11, 12. (a) Bedo ni Satan ne dwaro miyo Yesu pinjeruodhi duto, puonjowa ang’o? (b) Gin ndiko mage ma nyiso ni Satan en jaloch mar piny?

¹¹ Yesu nong’eyo ng’at ma locho e wi piny. Chieng’ moro, Satan “ne onyise pinjeruodhi duto mag piny kod duong’ ma gin-go.” Kae to Satan nosingo ne Yesu niya: “Magi duto abiro miyi kigoyo chongi piny milama.” (Mathayo 4:8, 9; Luka 4:5, 6) Penjri ane kama: ‘Dine bed ni pinjeruodhigo ok gin mag Satan, be dine oikore miyogi Yesu?’ Ooyo. Sirkande duto mag pinyni gin mag Satan.

¹² Inyalo penjori niya: ‘Ere kaka Satan nyalo bedo jaloch mar pinyni? Donge Jehova en Nyasaye Manyalo Duto kendo en e ma nochueyo polo gi piny?’ (Fweny 4:11) Mano en adier. Kata kamano, Yesu noluongo Satan ni “jaloch mar pinyni.” (Johana 12:31; 14:30; 16:11) Jaote Paulo noluongo Satan Jachien ni “nyasach pinyni.” (2 Jo-Korintho 4:3, 4) Jaote Johana to nondiko niya: “Piny duto ni e teko mar ng’at marach.”​—1 Johana 5:19.

IBIRO KETH PINY MA SATAN LOCHOENI E YO MANE?

13. Ang’o momiyo wadwaro piny manyien?

¹³ Pinyni medo mana bedo marach moloyo. Lwenje, mibadhi, wuondruok, kod timbe mahundu opong’o piny. Dhano ok nyal tieko chandruogego kata gitem matek machalo nade. Kata kamano, Nyasaye chiegni ketho piny marachni e lweny mar Har–Magedon, kae to okelo piny manyien.​—Fweny 16:14-16; som Weche Momedore namba 10.

14. En ng’a ma Nyasaye oseyiero mondo obed Ruoth e Pinyruodhe? Muma ne okoro ang’o e wi Yesu?

¹⁴ Jehova noyiero Yesu Kristo mondo obed Ruoth e Pinyruodhe. Higni mang’eny mokalo, Muma nokoro ni Yesu biro locho kaka “Ruodh Kuwe” kendo ni sirkande biro siko nyaka chieng’. (Isaya 9:6, 7) Yesu nopuonjo jolupne mondo gilem niya: “Pinyruodhi mondo obi. Dwaroni mondo otimre e piny kaka timore e polo.” (Mathayo 6:10) E Sula mar 8, wabiro puonjore kaka Pinyruodh Nyasaye biro ketho pinjeruodhi mag dhano. (Som Daniel 2:44.) Kae to Pinyruodh Nyasaye biro loso piny obed paradiso.​—Som Weche Momedore namba 11.

PINY MANYIEN CHIEGNI CHOPO!

15. “Piny manyien” en ang’o?

¹⁵ Muma wacho niya: “Warito polo manyien gi piny manyien, ka ma tim makare nobedie.” (2 Petro 3:13; Isaya 65:17) Seche moko ka Muma wuoyo e wi “piny,” to owuoyo e wi dhano ma odak e piny. (Chakruok 11:1) Omiyo, “piny manyien” ochung’ ne ji duto ma Nyasaye oyiego kendo ma winje.

16. En mich mane ma jaber ma Nyasaye biro miyo ji e piny manyien, to ang’o ma nyaka watim mondo wabi wayud michno?

¹⁶ Yesu nosingo ni joma biro dak e piny ma Nyasaye nolos manyien biro yudo “ngima mochwere.” (Mariko 10:30) En ang’o ma nyaka watim mondo wayud michno? Som Johana 3:16 kod 17:3 mondo iyud dwoko. Koro we wane ane gima Muma wacho e wi ngima ma biro betie e Paradiso.

17, 18. Ere kaka wang’eyo ni kuwe nobedie e piny duto kendo ni ji nodag ma onge luoro?

¹⁷ Gik maricho kaka lwenje, mahundu, kod timbe mag gero biro rumo. Onge joma richo ma biro dong’ e piny. (Zaburi 37:10, 11) Nyasaye biro ‘tieko lwenje e piny duto.’ (Zaburi 46:9; Isaya 2:4) Piny biro pong’ gi joma ohero Nyasaye kendo ma luwo chikene. Kuwe nobedie nyaka chieng’.​—Zaburi 72:7.

¹⁸ Jotich Jehova nodag gi kuwe ma onge luoro. Chon ka ne Jo-Israel oluwo chike Nyasaye, ne gibedoga gi kuwe kendo Nyasaye ne ritogiga. (Tim Jo-Lawi 25:18, 19) E Paradiso, ok wabi luoro gimoro amora. Kinde duto wabiro dak gi kuwe ma onge luoro!​—Som Isaya 32:18; Mika 4:4.

19. Ang’o momiyo wanyalo bedo gadier ni chiemo nobed mang’eny e piny manyien?

¹⁹ Chiemo nobed mang’eny. “Cham nobed mang’eny e piny; cham nochieg nyaka e wi gode.” (Zaburi 72:16) Jehova “Nyasachwa biro guedhowa,” kendo “piny biro chiek maber.”​—Zaburi 67:6.

20. Ang’o momiyo wanyalo bedo gadier ni piny biro bedo paradiso?

²⁰ Piny duto nobed paradiso. Ji biro dak e ute mabeyo kendo gibiro bedo gi puothe mabeyo. (Som Isaya 65:21-24; Fweny 11:18.) Piny duto biro bedo ma jaber kaka puodho mar Eden. Kinde duto Jehova biro miyowa gigo duto ma wadwaro. Muma wacho e wi Nyasaye kama: “Iyawo lweti kendo imiyo gik mangima duto gik ma gidwaro.”​—Zaburi 145:16.

21. Ang’o ma nyiso ni kuwe biro betie e kind dhano gi le?

²¹ Kuwe biro betie e kind dhano gi le. Le ok bi hinyo dhano. Nyithindo matindo ok bi luoro le ma sani kwiny.​—Som Isaya 11:6-9; 65:25.

22. Yesu biro timo ang’o ne joma tuo?

²² Onge ng’at ma biro bedo matuo. Kinde ma Yesu ne nie piny, nochango ji mang’eny. (Mathayo 9:35; Mariko 1:40-42; Johana 5:5-9) Kata kamano, kaka Ruoth mar Pinyruodh Nyasaye, Yesu biro chango ji duto. Onge ng’at ma nowach niya: “Atuo.”​—Isaya 33:24; 35:5, 6.

23. Ang’o ma Nyasaye biro timo ne jogo mosetho?

²³ Jomotho nobed mangima kendo. Nyasaye singo ni obiro chiero ji milionde mosetho. “Chier nobedie mar jo ma kare gi jo ma ok kare.”​—Som Johana 5:28, 29; Tich Joote 24:15.

24. Ineno nade wach dak e Paradiso?

²⁴ Waduto wan gi yiero monego watim. Wanyalo yiero mar puonjore e wi Jehova kendo tiyone, kata wanyalo yiero mar timo atima gima wadwaro. Ka wayiero tiyo ne Jehova, ngimawa biro bedo maber e kinde mabiro. Yesu nosingo ne jal ma ne ogur e bathe niya: “Inibed koda e Paradiso.” (Luka 23:43) We wapuonjre weche momedore e wi Yesu Kristo kendo wane kaka obiro miyo singo mag Nyasaye ochop kare.