Nonro mag Chenro mar Chokruok mar Ngimawa kod Tijwa
MEI 3-9
MWANDU MA YUDORE E WACH NYASAYE | KWAN 27-29
“Luw Ranyisi mar Jehova, Nyasaye ma Ok Bwon Ji”
Nyis ni Ihero Chuth Kido mag Jehova
14 Nyiri abichgo ne odhi ir Musa ma gipenje niya: “Nang’o nying’ wuonwa ogol kuom libambane nikech oonge wuoi?” Ne gikwayo Musa niya: “Miwa mwandu kaachiel gi omine wuonwa.” Be Musa nokwerogi kawachonegi ni ‘Chik ok oyiena timo kamano.’ Ooyo, “nokelo wachgi e nyim Jehova.” (Kwan 27:2-5) Jehova noneno wachno nade? Nowacho ne Musa kama: ‘Nyi Zelofehad owacho gi makare: mich to nomigi mwandu kaachiel gi omine wuon-gi; koro inimigi mwandu mag wuon-gi.’ Jehova ne ok oweyo wachno mana gi kanyo. Nonyiso Musa mondo wachno obed kaka chik konyise kama: “Ka ng’ato otho, to oonge wuoi, eka nimi nyare mwandune.” (Kwan 27:6-8; Josh. 17:1-6) Chakre kanyo, nyi Israel duto ma ne nie chal makamano ne dhi yudo gikeni kuom wach lowo.
Nyis ni Ihero Chuth Kido mag Jehova
15 Kuom adier gima Jehova notimono nonyiso maler ni ok obwon ji. Nyiri abichgo ne onge gi ng’ama ne nyalo konyogi to Jehova nonyiso ni odewogi gadier komiyogi duong’ kuom timonegi mana kaka Jo-Israel mamoko. (Zab. 68:5) Ma en mana achiel kuom ranyisi mathoth mayudore e Muma manyiso kaka adier Jehova dewo jotichne duto kendo otimonegi machal.—1 Sam. 16:1-13; Tich 10:30-35, 44-48.
Nyis ni Ihero Chuth Kido mag Jehova
16 Ere kaka wanyalo luwo ranyisi mar Jehova mar timone ji duto e yo machal? Ng’e ni kinde duto, nitie gik moko ariyo makonyo ng’ato mondo otimne ji duto e yo machal. Ka wayie e chunywa ni onge ng’ato ang’ata monego obwon, eka wanyalo timone ji duto e yo machal. En adier ni waduto wajoparo ni wan ok wabwon ji. Kata kamano, seche moko nyalo bedo matek ng’eyo paro ma wan-go e wi jomoko. Omiyo, ere kaka inyalo ng’eyo kabe itimone ji duto machal maok ibwono ng’ato? Yesu ketonwa ranyisi maber kuom wachni. Kane odwaro ng’eyo gima ji wacho kuome, nopenjo osiepene ma nogeno niya: “Ji wacho ni Wuod dhano en ng’a?” (Math. 16:13, 14) Donge wanyalo timo kamano wan bende? Inyalo yiero osiepni moro ming’eyo ni ok bi luor nyisi adier, kae to ipenje kama, ‘Be iparo ni ajatimo ne ji duto e yo machal? Be jomoko ong’eya kaka ng’at maok bwon ji?’ Kuom ranyisi, samoro onyalo nyisi ni seche moko ijadewo oganda moro moloyo ogendini mamoko, kata ni ijadewo joma nigi pesa kata joma sombgi ni malo moloyo jomamoko. Kapo ni mano e dwoko momiyi, onego itim ang’o? Kwa Jehova e lamo mondo okonyi itim lokruok kuom kaka ineno jomoko, mondo iluw ranyisine mar timone ji duto e yo machal.—Math. 7:7; Kol. 3:10, 11.
Nono Puonj Manie Wach Nyasaye
it-2-E 528 ¶5
Chiwo
Chiwo miolo. Chiwo miolo ne ichiwo kanyachiel gi chiwo mamoko, to ahinya ahinya bang’ ka Jo-Israel nosedonjo e Piny Manosingi. (Kwa 15:2, 5, 8-10) Chiwo miolo noriwo divai ma ne iologa e kendo mar misango. (Kwa 28:7, 14; pim gi Wu 30:9; Kwa 15:10.) Jaote Paulo nondiko ne Jokristo ma ne Filipi niya: “Kata ka iola piny mana kaka chiwo miolo e wi misango kod tich maler ma yieu osejiwou mondo utim, ail kendo amor.” Notiyo gi ranyisi mar chiwo miolo mondo onyisgo kaka nochiwore chuth mondo okony Jokristo wetene. (Fil 2:17) Kodong’ mana ndalo matin to otho, ne ondiko ne Timotheo niya: “Sani koro iola piny kaka chiwo miolo e kendo mar misango, kendo ndalo mibiro gonyae osekayo.”—2Ti 4:6.
MEI 10-16
MWANDU MA YUDORE E WACH NYASAYE | KWAN 30-31
“Tim Mana Kaka Isesingori”
it-2-E 1162
Singruok
Ne Ok Chun-go Ng’ato, to Ka Ng’ato Nosesingore, Nyaka Notim Mana Kaka Osingo. Singruok ne ok chun-go ng’ato. Kata kamano, ka ng’ato ne osesingore, chik Nyasaye ne dwaro ni nyaka ochop singruokne. Omiyo singruok ne ikawo kaka gima duong’ ahinya ma ka ng’ato ne ok nyal timo kaka nosesingore, ne obedo ng’at mowinjore gi tho. (Kwa 30:2; ne bende Rum 1:31, 32.) Mano e momiyo Ndiko ne jiwo ji ni kik girikni timo singruok kapok giparo matut gik moko duto motudore gi singruok ma ne gidwa timo. Chik ne wacho niya: “Ka ikuong’ori ne Jehova Nyasachi ni ibiro timo gimoro, to kik idigni chopo kuong’ruoknino, nimar Jehova Nyasachi biro dwaro ni itim kaka isewachono. Ka ok itimo kamano to nokwanni mano kaka richo. Kata kamano, ka ok ikuong’ori to ok bi kwanni richo.”—Rap 23:21, 22.
it-2-E 1162
Singruok
En gima ng’ato timo ne Nyasaye konyise ni obiro golone chiwo moro, kata ni obiro timo migawo moro, kata ni nitie gik ma ok obi timo kata obedo ni gigo ok gin gik maricho e wang’ Nyasaye. Singruok ne en gima ng’ato ne timo kowuok e chunye ma ok ochune. Singruok ne chalo mana gi kuong’ruok to mano e momiyo Muma tiyo gi wechego kanyachiel.—Kwa 30:2; Mat 5:33.
w04-SW 8/1 27 ¶3
Puonj Mayudore e Bug Kwan
30:6-8—Be dichwo ma Jakristo nyalo ketho singruok ma chiege otimo? Kodok korka weche mag singruok, e kindegi Jehova odich ahinya mana gi singruok ma jatichne ka jatichne timo. Kuom ranyisi, ka ng’ato osingore ni odwa tiyo ne Jehova, mano mare e kinde gi Jehova. (Jo-Galatia 6:5) Dichwo onge gi ratiro mar ketho singruok ma kamano. Kata kamano, dhako bende onego otang’ mondo kik otim singruok ma ok luwre gi Wach Nyasaye kata ma biro miyo kik otim gik ma dwarore ni otim ne chwore.
Nono Puonj Manie Wach Nyasaye
it-2-E 28 ¶1
Jeftha
Ji ne nyalo chiwore gi ngimagi duto mondo gidhi giti ne Jehova e ode mar lamo. Jonyuol ne nigi ratiro mar yiero ngima ma kamano ne nyithindgi. Samuel ne en achiel kuom nyithindo ma kamago nimar min-gi ma Hana nosingore kata kapok onyuole ni obiro chiwe mondo oti ne Jehova e hema mar lamo. Elkana ma ne en chwor Hana noyie gi singruok ma Hana notimo. Ka ne Samuel oseweyo dhoth, Hana nochiwe mondo oti ne Jehova e hema mar lamo. Ka ne Hana tere kuno, nodhi nyaka gi nyaruath ma ne odhi chiwo kaka misango. (1Sa 1:11, 22-28; 2:11) Samson bende ne en nyathi machielo ma jonyuolne noyie mondo oti ne Nyasaye kaka Ja-Nazir.—Bur 13:2-5, 11-14; pim gi gima wuoro ne nyalo timo ka nyare otimo singruok e ndiko mar Kwa 30:3-5, 16.
MEI 17-23
MWANDU MA YUDORE E WACH NYASAYE | KWAN 32-33
“Riemburu Ji Duto Modak e Pinyno”
w10-SW 8/1 23
Be Ing’eyo?
Kuonde “moting’ore malo” ma iwuoyoe nyading’eny e Ndiko mag Dho-Hibrania gin ang’o?
Ka ne Jo-Israel chiegni donjo e Piny Manosingi, Jehova nonyisogi ni giketh kuonde lamo duto ma Jo-Kanaan ma ne odak kanyo ne tiyogo. Nyasaye nonyisogi kama: “Nyaka . . . uketh kido duto ma gilamo, bed ni gin mag kite mopa, kata sanamu mag chuma, kendo uketh kuondegi duto moting’ore malo.” (Kwan 33:52) Kuonde lamo mag miriambogo ne nyalo bedo e wi gode kata ne inyalo gergi e bwo yiende kata e taonde. (1 Ruodhi 14:23; 2 Ruodhi 17:29; Ezekiel 6:3) Ne ginyaloga bedo gi kendo mag misango, sirni mag kite kata mag yien, sanamu, kuonde miketoe ubani, kod gik mamoko ma ne gitiyogo e lamo.
w08-SW 2/15 27 ¶5-6
Puonjri Kuom Richo mag Jo-Israel
E kindegi, waromo gi pek mopogore opogore machalo gi ma Jo-Israel noromogo. Ji lamo sanamu e yore mopogore opogore. Sanamugo oriwo pesa, jothum, jotugo mong’ere, josiasa, jotend din moko, kata wede. Ka ok watang’ wanyalo chako keto pachwa ahinya e achiel kuom gigo. Mako osiep gi joma ok lam Jehova nyalo miyo waketh winjruokwa kode.
Timbe mag terruok ne en gima duong’ ahinya e lamo mar Baal kendo timbego ne oywayo Jo-Israel mang’eny. Jotich Jehova ma kindegi bende pod nyalo donjo e obadho ma kamago. Kuom ranyisi, gimoro marach ma ng’ato nyalo ng’iyo kata mana kuom dakika matin e kompyuta ka en kar kende nyalo miyo obed gi chuny ma chandore. En gima lit ahinya ka Jakristo nyalo neno ponografi!
it-1-E 404 ¶2
Kanaan
Ka ne Jehova ochiko Musa mondo Jo-Israel oketh Jo-Kanaan, Joshua notimo gik moko duto ma Jehova nochiko Musa. (Jos 11:15) Kata kamano, Jo-Israel ne ok otimo kaka Jehova nonyisogi nikech ne ok giketho Jo-Kanaan duto. Jo-Kanaan ma ne odhi nyime dak gi Jo-Israel nokelonegi rach mang’eny nikech bang’ kinde, timbe Jo-Kanaan nomiyo Jo-Israel mang’eny otho (ka ok okwan rach mamoko kaka timbe mahundu, terruok, kod lamo sanamu). Mano dine ok otimore ka dine Jo-Israel tiek Jo-Kanaan chuth kaka Jehova nochikogi. (Kwa 33:55, 56; Bur 2:1-3, 11-23; Za 106:34-43) Jehova nosenyiso Jo-Israel ni ok obwon ng’ato ang’ata sama ong’ado bura. Omiyo, ka Jo-Israel ne dhi mako osiep gi Jo-Kanaan, kendore kodgi, donjo e lamo mar Jo-Kanaan kaachiel gi timbegi modwanyore, mano ne dhi miyo Jehova otiekgi mana kaka notieko ogendni mamoko ma ne ok lame kendo ne dhi miyo ‘ong’oggi oko’ e pinyno.—Wu 23:32, 33; 34:12-17; Law 18:26-30; Rap 7:2-5, 25, 26.
Nono Puonj Manie Wach Nyasaye
it-1-E 359 ¶2
Tong’
Bang’ ka ombulu ne osenyiso kama dhoot ka dhoot ne yudoe lowo, gimachielo ma ne ing’iyo en ni ne imiyogi lowo maduong’ maromo nade ka luwore gi kwan mar ji. Muma wacho niya: “Ubiro pogo pinyno e kind dhoutu gi ombulu. Dhoot ma nigi ji mang’eny noyud lowo maduong’, to dhoot ma nigi ji matin to noyud lowo matin. Ng’ato ka ng’ato biro yudo lowo ka ma ombulu onyiso.” (Kwa 33:54) Kama ne idhi miye dhoot ka dhoot lowo ne ing’ado gi ombulu kendo ne ok nyal loki, kata kamano, lach mar lowo ma ne idhi migi to ne nyalo lokore. Mano e momiyo ka ne oyud ni lowo ma ne omi dhood Juda ne duong’ mokalo, ne okaw bathe moko mi omi dhood Simeon.—Jos 19:9.
MEI 24-30
MWANDU MA YUDORE E WACH NYASAYE | KWAN 34-36
“Yud Resruok Kuom Jehova”
Be Ineno Jehova Kaka Kar Resruokni?
4 To nade ka ng’ato ne oneko kobothne, en to ne ikawone okang’ mane? Ng’ama kamano bende pod ne nigi ketho mar chuero remb dhano wadgi. (Cha. 9:5) To nikech ng’wono mar Nyasaye, ne oyiene mondo oring odhi e achiel kuom taonde auchiel mag resruok mondo jachul kuor kik nege. Ne ok oyiene ng’ato ang’ata mondo onege ka en kuno. Ne nyaka osik e i taon ma nodonjoeno nyaka chieng’ moro jadolo maduong’ tho.—Kwan 35:15, 28.
Be Ineno Jehova Kaka Kar Resruokni?
6 Ng’at moneko kobothne ne nyaka ‘nyis jodongo gima osetimorene’ ka pok odonjo e taon moringoeno. Jodongogo ne nyaka rwake maber. (Jos. 20:4, The Bible in Luo, 1976) Bang’ ka kinde moko osekalo, niore ir jodongo ma ne nitie e gweng’ ma ne onekoeno mondo giyale. (Som Kwan 35:24, 25.) Ne inyalo duoke e taon ma noringo odhiyeno mana bang’ ka jodongogo oyudo ni noneko koporene gadier.
Be Ineno Jehova Kaka Kar Resruokni?
13 Ka ng’ato ne odonjo e taon mar resruok, onge gima ne nyalo time ka en kuno. Jehova ne owacho kama e wi taonde mag resruok: “Ginibednu kar geng’ruok.” (Jos. 20:2, 3) Jehova ne ok dwar ni ochak oyal ng’at monekono e wach achiel achielno, kendo jachul kuor ne ok onego odonj e taon ma janek noringoeno mondo onege. Omiyo ne ok onego oluor kata matin ni samoro ne inyalo duogne. Ka ne en e taondno, Jehova ne dhi rite maber. Taondego ne ok gin jela. Ka ne en kuno, ne onyalo tiyo, ne onyalo konyo jomamoko, kendo ne onyalo lamo Jehova ka en gi kuwe. Adier, pod ne onyalo dak e ngima maber!
Nono Puonj Manie Wach Nyasaye
w91-SW 2/15 13 ¶13
Misango ma ne Ochiw ne Ji Mang’eny
13 Misango ma Yesu nochiwo ok bi konyo Adam gi Hawa. Chik Musa ne wacho niya: “Kik ukaw gimoro amora mondo uwar janek mowinjore tho.” (Kwan 35:31) Adam ne ok owuondi, omiyo, notimo richo goyiem. (1 Timotheo 2:14) Ne ochalo ng’at ma nonego nyithinde nikech ne idhi nyuolgi gi richo ma ne dhi miyo githo. Adam nowinjore gi tho nikech noyiero ketho chik Nyasaye goyiem. Ka di ne Jehova oyie mondo misango mar Yesu owar Adam, di ne oketho chikene makare. Kata kamano, misango ma Yesu nochiwo nochulo richo mar Adam mondo ores nyithind Adam ka igologi e tho. (Jo-Rumi 5:16) Misango ma nochiwno tieko teko mar richo. Yesu ‘nobilo tho ne ji duto’ mondo ogolne nyithi Adam gik malit ma richo kelo.—Jo-Hibrania 2:9; 2 Jo-Korintho 5:21; 1 Petro 2:24.
MEI 31–JUN 6
MWANDU MA YUDORE E WACH NYASAYE | RAPAR MAR CHIK 1-2
“Nyasaye Ema Ng’ado Bura”
w96-SW 3/15 23 ¶1
Jehova Ohero Tim Makare kod Ng’ado Bura Kare
Jodong’-kanyakla e ma nigi ting’ mar ng’ado bura sama ng’ato otimo richo maduong’. (1 Jo-Korintho 5:12, 13) Sama gitimo kamano, onego gipar ni Nyasaye nyisoga ng’wono ka mano dwarore sama ong’adoga bura. To ka jaricho ok oloko chunye, ok bi nyise ng’wono. Jodongo biro golo jarichono e kanyakla, to ok gibi timo kamano e yo makwiny. Gin gi geno ni gole e kanyakla biro miyo pache oduogi. (Pim gi Ezekiel 18:23.) Ka itayogi gi Kristo, jodongo ng’adoga bura makare kendo gibedo ne joma nie kanyakla kaka “kar pondo ne yamo mager.” (Isaya 32:1, 2) Kuom mano, ok onego gibwon ng’ato ang’ata, kar mano, onego gibed gi paro malong’o sama ging’ado bura.—Rapar mar Chik 1:16, 17.
w02-SW 8/1 9 ¶4
Bolri e Bwo Loch mar Nyasaye gi Chunyi Duto
4 Bedo jang’ad bura noriwo gik mathoth to ok mana ng’eyo gima ne chik wacho kende. Nikech jodongo ma ne ng’ado bura ne gin dhano morem, ne nyaka gitem matek mondo gitang’ gi nyawo mag dhano kaka bwono ji, kod temo moro jomoko nikech gik ma gin-go. Musa nonyisogi niya: “Sa ma ung’ado bura, kik ubwon ng’ato ang’ata. Winjuru ng’at modhier mana kaka uwinjo jamwandu. Kik uluor wang’ ng’ato, nimar Nyasaye e ma ng’ado bura.” Ee, jong’ad bura e piny Israel ne ng’ado bura e lo Nyasaye. Mano ne en migawo makende.—Rapar mar Chik 1:16, 17.
Nono Puonj Manie Wach Nyasaye
Weche ma Jehova Paronwa Gin Migeno
9 Kane Jo-Israel ochako wuoth ma ne okawogi higini 40 ‘e thim maduong’ kendo malich,’ Jehova ne ok onyisogi achiel kachiel kaka ne odhi tayogi kendo ritogi. Kata kamano, pod nonyiso e yore mopogore opogore ni ne odhi ritogi ka gigeno kuome kendo luwo kaka nochikogi. Kotiyo gi bor polo matayogi godiechieng’ kod mach maliel ei bor polo ka tayogi gotieno, Jehova noparone Jo-Israel ni ne en kodgi mondo okonygi ging’ad thimno. (Rapar 1:19; Wuok 40:36-38) Bende nochiwonegi gik mochuno e ngima. “Nenggi ok noti, kata tiendegi ok nokuot.” Kuom adier, ‘ok ne giremo gimoro.’—Neh. 9:19-21.
JUN 7-13
MWANDU MA YUDORE E WACH NYASAYE| RAPAR MAR CHIK 3-4
“Chike Jehova ni Kare Kendo Inyalo Gen-gi”
it-2-E 1140 ¶5
Ng’at ma Weche Donjone
Puonjruok Wach Nyasaye kod chikene gi kinda nyalo miyo ng’ato obed mariek moloyo kata joma onego opuonje, kendo nyalo miyo weche odonjne moloyo jomoti. (Za 119:99, 100, 130; pim gi Luk 2:46, 47.) Mano en nikech rieko kod ng’eyo gin gik ma ng’ato bedogo mana ka oluwo chike makare mag Nyasaye. Omiyo, ka di ne Jo-Israel oluwo chikego, mano ne dhi miyo ogendni ma ne olworogi onegi kaka joma ‘riek kendo ma weche donjonegi.’ (Rap 4:5-8; Za 111:7, 8, 10; pim gi 1Ru 2:3.) Ng’at ma weche donjone ong’eyo ni Wach Nyasaye ler, kendo odwaro ni timbene oluwre gi Wach Nyasaye, omiyo okwayo Nyasaye mondo okonye timo kamano. (Za 119:169) Oyie mondo Wach Nyasaye ochop e chunye (Mat 13:19-23), ondikogi e kite mopamore manie chunye (Nge 3:3-6; 7:1-4), to mano miyo osin gi “yore duto maricho” (Zab 119:104). Ka ne Wuod Nyasaye nie piny ka, nonyiso ni weche donjone ka noyie tho e yadh sand mondo ochop weche duto ma Ndiko nokoro e wi thone.—Mat 26:51-54.
w99-SW 11/1 20 ¶6-7
Sama Ng’wono Ogundho
Ka ne ruoth ma dhako ma Sheba owinjo kendo neno rieko duto mag Solomon, nowuoro ahinya mowacho niya: “Mano kaka oguedh jogi gi jotich ma chung’ e nyimi kinde duto ka giwinjo riekoni!” (1 Ruodhi 10:4-8) Ruoth ma dhakono ne ok owacho mana ni jotich Solomon ne mor mana nikech mwandu kod nyadhi ma ne gin-go. Kar mano, nowacho ni jotich Solomon ne gin joma oguedhi nikech ne giwinjo rieko ma Nyasaye ne omiyo Solomon. Ruoth ma dhako ma Sheba noketo ranyisi maber ahinya ne jotich Jehova ma kindegi ma sani neno rieko mar Jachuech kod mar Wuode Yesu Kristo e okang’ malach!
Gimachielo ma ruodhno nowacho ne Solomon bende en gima duong’ ahinya, nowacho kama: “Opak Jehova Nyasachi.” (1 Ruodhi 10:9) Onge kiawa ni noneno maler ni Jehova e ma nomiyo Solomon rieko kod mwandu. Mano noluwore gi gima Jehova nosingo ni nodhi timo ne Jo-Israel. Nowachonegi kama e wi chikene: “Ne ni uritogi adimba, nimar mano biro nyiso ogendni mamoko ni un jo mariek kendo ma weche donjonegi. Ka giniwinj chikegi eki, to giniwach ni, ‘Onge kiawa ni oganda maduong’ni riek kendo weche donjonegi.’”—Rapar mar Chik 4:5-7.
w07-SW 8/1 29 ¶13
Be In “Jamwandu e Wang’ Nyasaye”?
13 Sama Jehova guedho jotichne, omiyogiga gik mabeyo mogik. (Jakobo 1:17) Kuom ranyisi, ka ne Jehova omiyo Jo-Israel piny ma ne gidhi dakie, ne omiyogi “piny mopong’ gi chak kod mor kich.” Kata obedo ni piny Misri bende ne nigi chak kod mor kich, piny ma Jehova nomiyo Jo-Israel to ne opogore e yo moro makende. Musa nonyiso Jo-Israel ni pinyno ne ‘en piny ma Jehova Nyasaye norito maber.’ Ngimagi ne dhi bedo maber nikech Jehova e ma ne dhi ritogi. Ka Jo-Israel ne dhi makore gi Jehova, Jehova ne dhi guedhogi kendo ne gidhi dak e ngima maber moloyo ogendni mamoko ma ne olworogi. Kuom adier, gueth mag Jehova e ma ‘kelo mwandu’!—Kwan 16:13; Rapar mar Chik 4:5-8; 11:8-15.
Nono Puonj Manie Wach Nyasaye
w04-SW 9/15 25 ¶3
Puonj Mayudore e Bug Rapar mar Chik
4:15-20, 23, 24—Be chik ma ne kwero loso kido moro amora mopa mitiyogo e lamo ne nyiso ni ng’ato ne ok onego olos gimoro amora mopa mar duso ot? Ooyo. Chik ne kwero loso kido mopa ma ng’ato ‘kulorene kata lamo.’ Ndikono ok kwer loso gik mopa mitiyogo e yore mamoko mopogore gi lamo.—1 Ruodhi 7:18, 25.
JUN 14-20
MWANDU MA YUDORE E WACH NYASAYE | RAPAR MAR CHIK 5-6
“Puonj Nyithindi Mondo Giher Jehova”
w05-SW 6/15 20 ¶11
Un Jonyuol, Chiwuru Gik Mochuno ne Joodu
11 Ndiko ma iwuoyega ahinya e wachni en Rapar mar Chik 6:5-7. Wakwayi ni iel Mumbi mondo isom ane ndikono. Ne ni jonyuol e ma inyiso ni okwong olos winjruokgi gi Nyasaye, giher Jehova kendo wechene obed e chunygi. Jonyuol onego osom wach Nyasaye pile ka pile gi kinda mondo ging’e tiend hero yore Jehova, puonjge, kod chikene. Ka gitimo kamano, gibiro pong’o chunygi gi adiera manie Muma kendo gibiro hero Jehova ahinya. Gibiro bedo gi gik mabeyo ma gibiro puonjo nyithindgi.—Luka 6:45.
w07-SW 5/15 15-16
Ere Kaka Anyalo Konyo Nyithinda Mondo Oyud Somo Maber Moloyo?
Wecheni kod timbeni nyiso maler gik ma ihero, paro ma in-go, kod kaka ineno wach somo. (Jo-Rumi 2:21, 22) Nyithindo chako puonjore ka pod gitindo kuom ranyisi ma jonyuolgi ketonegi. Nyithindo nyalo fwenyo gik ma jonyuolgi okawo mapek e ngima, to mago e gik ma gin bende gikawo mapek e ngimagi. Ka ihero Jehova gadier, nyithindi biro neno mano maler. Kuom ranyisi, ka ikawo somo Muma kod puonjruok mapek, gibiro neno mano maler. Gibiro fwenyo ni iketo Pinyruoth mokwongo e ngimani. (Mathayo 6:33) Ka ok ibari ne chokruoge mag kanyakla kendo ihero tij lendo, gibiro ng’eyo ni tiyo ne Jehova en gima igeno ahinya.—Mathayo 28:19, 20; Jo-Hibrania 10:24, 25.
w05-SW 6/15 21 ¶14
Un Jonyuol, Chiwuru Gik Mochuno ne Joodu
14 Rapar mar Chik 6:7 nyiso ni jonyuol nigi thuolo mang’eny ahinya mag wuoyo gi nyithindgi e weche motudore gi lamo Nyasaye. Jonyuol nyalo wuoyo gi nyithindgi e weche Nyasaye sama gin e wuoth kanyachiel, sama gitiyo tije mag ot, kata sama giyueyo. En mana ni dwarore ni jonyuol otang’ mondo kik giol nyithindgi kuom kasogi gi puonj manie Muma seche te. Kar mano, temuru mondo ugo kodgi mbaka e yo ma jiwogi kendo ma miyo gihero weche Nyasaye. Kuom ranyisi, gaset mar Amkeni! oting’o sula mopogore opogore modhuro ma unyalo goye mbaka gi nyithindu. Sula kaka mago nyalo konyou mondo uwuo e wi chuech mag Jehova, kuonde mabeyo beyo mayudore e piny ngima, kod kit ngima mopogore opogore mag dhano kod timbegi. Wuoyo gi nyithindu e yo ma kamano nyalo miyo gimed hero buge ma igoyonwa gi jatich mogen kendo mariek.—Mathayo 24:45-47.
Nono Puonj Manie Wach Nyasaye
Hera kod Tim Makare e Piny Israel Machon
11 Puonj ma wayudo en ma: Jehova neno gik mathoth kuom dhano, to ok mana kaka ng’ato nenore gi oko kende. Oneno nyaka gik ma ni e chunywa. (1 Sa. 16:7) Onge paro moro kata tim moro amora mopondo e wang’e. Orangowa mondo one gimoro maber kuomwa kae to ojiwowa mondo watim gino. Kata kamano, odwaro ni wafweny paro maricho ma wanyalo bedogo, kae to wageng’gi ka pok wadonjo e richo.—2 We. 16:9; Mat. 5:27-30.
JUN 21-27
MWANDU MA YUDORE E WACH NYASAYE | RAPAR MAR CHIK 7-8
“Kik Ukendru Kodgi”
w12-SW 7/1 29 ¶2
Ang’o Momiyo Nyasaye Nochiko ni Jotichne Okendre Mana e Kindgi Giwegi?
Jehova ne ong’eyo ni gima duong’ ma Satan ne dwaro ne en ketho oganda ma ne osechanono kuom rwakogi e lamo mar nyiseche manono. To mano e momiyo Jehova nomedo chiwo siemni e wach kendruok gi joma ok lame, “gibiro loko yawuotu owe lama ma gichak lamo nyiseche mamoko.” Mano ne ok en wach matin. Ka dine Jo-Israel donj e tem mar lamo nyiseche mamoko, Nyasaye ne ok dhi yie kodgi kendo ne ok odhi ritogi, to mano ne dhi miyo jowasikgi omonjgi mayot. Ka dine mano otimre, ere kaka ogandano ne dhi nyuolo Mesia? Kare mano e momiyo Satan ne dwaro ni mondo Jo-Israel okendre gi joma ne ok lam Jehova.
Be Kendruok “Mana Kuom Ruoth” Pod Nyalore?
Jehova pod jiwowa kokalo kuom Wachne ni wadonj e kend to mana kuom Ruoth. Nikech ang’o? Nikech ong’eyo gima ber ma biro konyo joge. Otimo kamano mondo ogeng’nwa lit ma nyalo yudowa ka ok watimo yiero makare, kendo odwaro ni wabed mamor. E kinde Nehemia, kane Jo-Yahudi okendo nyiri ma ne ok lam Jehova, Nehemia nowacho ni ne gitimo kamano nikech ranyisi marach ma Suleman noketo. Kata obedo ni Suleman ‘ne en ng’a ma Nyasaye ohero, nyi mwa ma nonyuomo nomiyo oketho.’ (Neh. 13:23-26) Omiyo, mondo jotichne oyud ber, Nyasaye nyisogi ni gikendre mana gi Jokristo madier. (Zab. 19:7-10; Isa. 48:17, 18) Jokristo madier mor gi hera ma Nyasaye nyisogi kendo gigeno puonj mochiwonegi. Ginyiso mano kuom luwo kaka ochikogi ka gibolorene kaka Jatendgi, kendo kaka Jaloch mar piny gi polo.—Nge. 1:5.
Tang’ ne Osiepe Maricho e Ndalo Gikogi
12 Jokristo ma pok okendo kata ma pok okendi onego otang’ ahinya gi osiepe ma gibedogo. Wach Nyasaye chiwonwa siem e yo maler niya: “Kik utueru e jok achiel gi joma ok ni e yie. Nikech en lalruok mane ma nitie e kind tim makare kod ketho chik? Koso, en winjruok mane ma nitie e kind ler kod mudho?” (2 Kor. 6:14) Muma chiwo puonj ne jotich Nyasaye ma manyo joma gidwaro kendorego, ni gikendre “mana kuom Ruoth,” ma tiende ni, gikendre mana gi jotich Jehova mosechiworene, ma osebatisi kendo modak kaluwore gi puonj ma yudore e Muma. (1 Kor. 7:39) Ka Janeno okendore gi Janeno wadgi oyudo osiep mochiwore ne Jehova kendo ma biro konye chung’ motegno e tiyo ne Nyasaye.
Nono Puonj Manie Wach Nyasaye
w04-SW 2/1 13 ¶4
Jehova Miyowa Gik Mochuno e Ngimawa Mapile
4 Sama wakwayo Jehova mondo omiwa chiembwa mapile, mano onego oparnwa ni dwarore wayud chiemb chuny bende pile ka pile. Kata obedo ni Yesu nodenyo ahinya bang’ riyo kech kuom ndalo mogwaro, ne okwedo tem mar Satan mar loko kite obed makate. Ne onyiso Satan niya: “Ondik kama: ‘Dhano ok bed mangima mana kuom chiemo kende, to kuom weche duto ma wuok e dho Jehova.’” (Mathayo 4:4) E ndikono, Yesu nonwoyo weche janabi Musa ma nonyiso Jo-Israel niya: “[Jehova] noduokou piny ma omiyo kech okayou, ma opidhou gi manna, chiemo ma ne ok ung’eyo, kendo ma kwereu bende ne ok ong’eyo. Nodwaro ni ung’e ni dhano ok bed mangima mana kuom chiemo kende, to obedo mangima kuom weche duto ma wuok e dho Jehova.” (Rapar mar Chik 8:3) Yo ma Jehova ne omiyogo Jo-Israel manna, nokonyogi fwenyo ni bedo gi winjruok maber gi Jehova en gima duong’. Ne owachnegi ni “ng’ato ka ng’ato biro dhi choko chiemo morome odiechieng’ kodiechieng’.” Ka ne gichoko mang’eny moloyo mar odiechieng’ achiel, chiemo modong’ ne bedo gi kudni kendo ne golo tik marach. (Wuok 16:4, 20) Kata kamano, e odiechieng’ mar auchiel, chiembgi ne ok kethre kata obedo ni ne gichoko chiemo ma romo odiechienge ariyo nikech ne ok onego gichoke chieng’ Sabato. (Wuok 16:5, 23, 24) Omiyo, manna ne paronegi ni ngimagi ne ok otenore mana kuom chiemo kende, to ne otenore kuom “weche duto ma wuok e dho Jehova.”
JUN 28–JULAI 4
MWANDU MA YUDORE E WACH NYASAYE | RAPAR MAR CHIK 9-10
“Jehova Nyasachi Dwaro ni Mondo Itim Ang’o?”
w09-SW 10/1 10 ¶3-4
Ang’o ma Jehova Dwaro ni Mondo Watim?
En ang’o ma nyalo chwalowa mondo wawinj Nyasaye? Musa nowacho achiel kuomgi ka nonyiso Jo-Israel niya: ‘Luoruru Jehova Nyasachu.’ (kwan matindo 12) Mano ok en luoro ma ng’ato bedogo nikech hinyruok ma onyalo yudo ka otimo marach, to en luoro Nyasaye nikech wahere kendo wahero chikene. Luor ma kamano bende miyo watang’ gi gimoro amora ma nyalo chwanye.
Kata kamano, ang’o momiyo onego waluor Nyasaye? Musa nonyiso Jo-Israel ni giher Jehova kendo ‘giti ne Jehova Nyasachgi gi chunygi duto kod ngimagi duto.” (kwan matindo 12) Hero Nyasaye ok en gima ng’ato winjo awinja e chunye kende. Ka wahero Nyasaye gadier, wabiro timo gik ma more.—Ngeche 27:11.
w09-SW 10/1 10 ¶6
Ang’o ma Jehova Dwaro ni Mondo Watim?
Wayudo gueth mang’eny sama waluwo kaka ichikowa. Musa nowacho niya: “Umak chike . . . ma amiyou kawuononi mondo ngimau odhi.” (kwan matindo 13) En adier ni chike Jehova duto, tiende ni gimoro amora ma onyisowa ni watim, konyowa. Chikene ok nyal hinyowa nikech Muma wacho ni “Nyasaye en hera.” (1 Johana 4:8) Kuom mano, omiyowa chikego nikech ong’eyo ni ka waluwogi to ngimawa medo dhi maber. (Isaya 48:17) Timo duto ma Jehova chikowa konyowa mondo kik wadonj e chandruok mang’eny ma ok ochuno, to bende chikenego biro konyowa mondo wadonj e bwo loch mar Pinyruodhe.
Be Inyalo ‘Sudo Machiegni gi Nyasaye’ Kuom Adier?
2 Ibrahim en achiel kuom joma ne gin osiepe Nyasaye. Jehova owuon noluongo Ibrahim ni ‘osiepne.’ (Isaiah 41:8) Ee, Jehova ne oneno Ibrahim kaka osiepne. Ibrahim nobedo gi winjruok machiegni kamano gi Nyasaye nikech “noyie” kuom Nyasaye. (Jakobo 2:23) Kindegi bende, Jehova ‘mor’ bedo machiegni gi joma tiyone nikech gihere. (Rapar mar Chik 10:15) Muma jiwowa kama: “Suduru ir Nyasaye, to nosud iru.” (Jakobo 4:8) Ndikono gwelowa mondo wasud machiegni gi Nyasaye kendo singonwa ni Nyasaye biro sudo machiegni kodwa.
Nono Puonj Manie Wach Nyasaye
it-1-E 103
Jo-Anakim
Ne gin joma roboche kendo robede ma nodak e alwora motimo gode, kod yo milambo mar nam e piny Kanaan. Kinde moko, Ahiman, Sheshai, kod Talmai e ma ne gin Jo-Anakim ma nong’ere. Ne gidak e piny Hebron. (Kwa 13:22) Hebron kanyo e ma Jo-Hibrania 12 ma noor mondo odhi onon Piny Manosingi nokwongo nenoe Jo-Anakim. Ji 10 kuomgi nochiwo ripot ma nobwogo oganda ka ne giwacho ni jogo ne gin yawuot Jo-Nefili ma nodak e kinde Noa kendo ni Jo-Israel ne gichalonegi mana dede. (Kwa 13:28-33; Rap 1:28) Nikech ne gin joma roboche, mano nomiyo oti kodgi e pimo jomamoko ma bende ne robede kaka Jo-Emim kod Jo-Refaim. Nikech ne gin joma roteke, mano nomiyo olosnegi ngeroni: “Be nitie jo ma dinyal nyikwa Anak?”—Rap 2:10, 11, 20, 21; 9:1-3.