Nonro mag Chenro mar Chokruok mar Ngimawa kod Tijwa
JULAI 5-11
MWANDU MA YUDORE E WACH NYASAYE | RAPAR MAR CHIK 11-12
“Kaka Jehova Dwaro ni Joge Olame”
7 Wan bende onego waher Jehova. Yesu nonyiso jopuonjrene ni nyaka giher Jehova gi chunygi duto, gi ngimagi duto, kendo gi pachgi duto. (Som Mathayo 22:37.) Mano tiende en ang’o?
8 Be wacho awacha gi dhowa ni wahero Jehova oromo? Ooyo. Gik ma watimo biro nyiso ni wahero Jehova gi chunywa duto, gi ngimawa duto, kendo gi pachwa duto. (Mathayo 7:16-20) Muma wacho maler ni wabiro luwo chike Jehova ka wahere gadier. Be timo kamano tek? Ooyo, nikech “chikene ok tek luwo.”—Som 1 Johana 5:3.
it-1-E 84 ¶3
Kendo mar Misango
Ne onyis Jo-Israel ni gimuk kendo mag misango kendo giketh sirni mag kite kod mag yien mag nyiseche manono. (Wu 34:13; Rap 7:5, 6; 12:1-3) Ne ok oyienegi timo timbe ma Jo-Kanaan ne timo kaka wang’o nyithindo e mach ka gichiwogi mondo gibed misango. (Rap 12:30, 31; 16:21) Kar bedo gi kendo mang’eny mag misango, Jo-Israel ne onego obed mana gi kendo achiel mar misango ma en kama ne idhi lamee Nyasaye madier kendo ne idhi lose mana kama Jehova ne dhi yiero.—Rap 12:2-6, 13, 14, 27.
Puonj Manie Wach Nyasaye
it-1-E 925-926
Got Gerizim
Jo-Israel nochokore e nyim Got Gerizim kod Got Ebal bang’ loyo Jo-Ai ka otelnegi gi Joshua, mana kaka Musa nochikogi. Ka gin kanyo, ne osomnegi gueth ma ne gidhi yudo ka giluwo chike Jehova kod kuong’ ma ne dhi yudogi ka ok giluwo chikego. Dhoudi mag Simeon, Levi, Juda, Isakar, Josef, kod Benjamin ne ochung’ e nyim Got Gerizim. Jo-Lawi nochung’ e hoho ka gin gi sandug singruok to dhoudi mamoko auchiel nochung’ e nyim Got Ebal. (Rap 11:29, 30; 27:11-13; Jos 8:28-35) Nenore ni dhoudi ma ne ochung’ e nyim Got Gerizim e ma ne odwoko ka ne osomnegi gueth, to dhoudi ma ne ochung’ e nyim Got Ebal e ma ne odwoko ka ne osomnegi kuong’. Jomoko neno ni ne osom gueth ne joma ne ochung’ e nyim Got Gerizim nikech ne en got ma jaber kendo momewo kopime gi Got Ebal ma ne en got maduong’ kendo motwo, kata kamano onge gimoro amora ma nyiso ni Muma riwo lwedo parono. Ne osom chike Musa “gi dwol maduong’ e nyim oganda Jo-Israel moriwo mine, nyithindo, gi jodak ma ne odak e kindgi.” (Jos 8:35) Oganda maduong’no ne nyalo winjo weche ma ne isomonegi bed ni ne gichung’ e nyim got mane.—Ne GOT EBAL.
JULAI 12-18
MWANDU MA YUDORE E WACH NYASAYE | RAPAR MAR CHIK 13-15
“Kaka Chik ne Nyiso ni Jehova Dewo Jochan”
it-2-E 1110 ¶3
Achiel Kuom Apar
Nenore ni ne nitie achiel kuom apar ma ne igologa ne tich machielo kopogore gi ma ne ikonyogo Jo-Lawi kendo Jo-Lawi bende ne gologa achiel kuom aparno. Kinde mang’eny ne itiyoga kode e siro Jo-Israel ka ne gidhi e chokruoge madongo. Ka ne ng’ato odak mabor ahinya gi Jerusalem ma cham ma ne ochiw kaka achiel kuom apar ne ok nyal chopo maber, ne iusogi kae to joma ne odak maboyogo ne dhi gi pesa Jerusalem mondo gidhi gikonyrego kuno ka gin e chokruok. (Rap 12:4-7, 11, 17, 18; 14:22-27) E higa mar adek ka mar adek kod mar auchiel ka mar auchiel ka pok higa mar abiriyo mar sabato ochopo, cham ma ne ichiwo kaka achiel kuom apar ne ok tigo e chokruoge madongogo, to kar mano, ne ikonyogo Jo-Lawi, jodak, mond liete, kod nyithi kiye.—Rap 14:28, 29; 26:12.
it-2-E 833
Higa mar Sabato
Higa mar Sabato bende ne iluongoga ni ‘higa mar weyo ne ji gopegi.’ (Rap 15:9; 31:10) E higano, ne ok purga puothe; ne iweyogi mondo giyue. (Wu 23:11) Bende ne iweyonega ji gopegi duto te. Ne iweyo gopego mondo omigo Jehova duong’. Jomoko wacho ni gopego ne ok wene ji chuth, kar mano, Jo-Israel ma ne oholo Jo-Israel ne ok onego okasgi mondo gichul gope nikech higano ji ne ok ka cham. Kata kamano, Jo-Israel ne nyalo kaso jodak mondo ochul gope ma ne gin-go. (Rap 15:1-3) Jopuonj din mag Jo-Yahudi wacho ni gope ma ne iweyo ne gin mag konyo jochan kata kamano gope mag ohala to nyaka ne chul achula.
it-2-E 978 ¶6
Misumba
Chike ma ne rito wasumbni. E piny Israel machon, gik ma ne itimo ne wasumbni ma Jo-Hibrania ne opogore gi gik ma ne itimo ne wasumbni ma jodak kata ma welo. Wasumbni ma ne ok gin Jo-Israel ne bedo mwandu mar joot ma wuoro ne nyalo wene wuode (Law 25:44-46), to wasumbni ma Jo-Hibrania ne igonyo e higa mar abiriyo kata e higa mar 50 kaluwore gi sabato ma ne okwongo chopo. Misumba ma Ja-Hibrania ne ikawo kaka jatich michulo. (Wu 21:2; Law 25:10; Rap 15:12) Ja-Hibrania ma ne ousore mondo obed misumba ne jadak ne nyalo warore sa asaya kodwaro kata ng’at ma ne nigi ratiro mar ware ne nyalo timo kamano. Nengo mar ware ne luwore gi higni ma ne odong’ to higa mar 50 chopo kata higa mar abiriyo chopo. (Law 25:47-52; Rap 15:12) Ka ne Ja-Hibrania weyo misumba thuolo, ne onego omiye gik ma ne odhi konyorego kosegonye. (Rap 15:13-15) Ka misumba ne nigi dhako, dhako ne dhi kode. Kata kamano, ka ruodhe ne omiye dhako (ma ne en jadak ma ne ok dhi ket thuolo e higa mar abiriyo), dhakono gi nyithinde ne dong’ ne ruodhe. Misumba ma Ja-Hibrania to ne nyalo yiero ka odwaro siko gi ruodhe. Ne itucho ite gi riwi mondo onyis ni ng’atno ne dhi bedo misumba ruodhe e ngimane duto.—Wu 21:2-6; Rap 15:16, 17.
Puonj Manie Wach Nyasaye
w06-SW 4/1 31
Penjo Moa Kuom Josombwa
Ang’o ma wanyalo puonjore e chik ma ne omi Jo-Israel e Wuok 23:19 ma wacho ni: “Kik uted ring nyadiel e chag min-gi”?
Chik ma yudore didek e Mumani nyalo konyowa ng’eyo ni Jehova en Nyasaye ma ng’won kendo ma jahera. E wi mano, okonyowa ng’eyo ni Jehova osin gi lamo mar miriambo.—Wuok 34:26; Rapar mar Chik 14:21.
Tedo ring nyadiel kata ring le machielo e chag min-gi kwedo chenro ma Jehova noketo. Nyasaye noloso chak mondo okony nyithi le mondo odong maber. Ka luwore gi jasomo moro, tedo nyathi le e chag min-gi nyiso “achaya maduong’ ne chenro maber ma Nyasaye noketo e kind miyo gi nyathine.”
Jomoko bende wacho ni tedo nyadiel e chag min-gi nyalo bedo ni ne en tim ma joma ne ok lam Jehova ne timo sama ne gidwaro ni koth ochue. Ka po ni en kamano, to kare chikno ne konyo Jo-Israel mondo kik gidonj e timbe maricho ma ogendni ma ne olworogi ne timo. Chik Musa ne okwero Jo-Israel ni kik giluw timbe mag ogendnigo.—Tim Jo-Lawi 20:23.
Mogik, chikni konyowa ng’eyo ni Jehova en Nyasaye ma kecho ji. Chik ne oting’o chike mamoko mathoth ma ne konyo e rito le mondo kik hinygi. Kuom ranyisi, Chik ne kwero ni ok nyal chiw le kaka misango ka pok obedo gi min-gi kuom ndalo abiriyo, ne ok nyal neg le gi min-gi kaka misango e odiechieng’ achiel, kendo chik ne ok oyiene ng’ato kawo winyo gi nyithinde kata gi tonge.—Tim Jo-Lawi 22:27, 28; Rapar mar Chik 22:6, 7.
Nenore maler ni Chik Musa ne ok gin mana chike ma nyiso ji gik monego gitim kod ma ok onego gitim kende. Puonj ma yudore e chikego konyowa ng’eyo kido mabeyo ma Jehova nigo kod kaka odwaro ni wabed gi timbe mabeyo.—Zaburi 19:7-11.
JULAI 19-25
MWANDU MA YUDORE E WACH NYASAYE | RAPAR MAR CHIK 16-18
“Gik ma Konyo e Ng’ado Bura Makare”
it-1-E 343 ¶5
Bedo Muofu
Ng’at ma ne ng’ado bura e yo marach nikech asoya ne ipimo gi ng’at ma muofu, to mano e momiyo Chik ne kwero nyadinwoya kawo asoya, mich, kata buono jomoko, nikech gik ma kamago ne nyalo umo wang’ jang’ad bura ma mone ng’ado bura e yo maber. “Asoya umo wang’ ji.” (Wu 23:8) “Asoya dino wang’ ng’at mariek.” (Rap 16:19) Mich ne nyalo miyo kata mana jang’ad bura maber kendo mariek ong’ad bura e yo marach bed ni ong’eyo kata okiya. Kata obedo ni chik Nyasaye wacho ni mich nyalo umo wang’ ng’ato, owacho bende ni hero ng’ato e yo mokalo tong’ nyalo miyo ng’ato ong’ad bura e yo marach. Chik ne wacho kama: “Kik idog ne jachan e bura mana nikech ojachan, kata dok ne jamwandu mana nikech ojamwandu.” (Law 19:15) Omiyo, jang’ad bura ne ok onego ong’ad ne jamwandu bura marach nikech ohero jachan mokalo tong’ kata nikech odwaro moro oganda.—Wu 23:2, 3.
it-2-E 511 ¶7
Namba, Kwan
Ariyo. Kwanno itiyogago ahinya e weche mag ng’ado bura. Ka ne ji ariyo ochiwo neno machal, mano ne miyo iyie gi wachgino. Neno mar ji ariyo kata adek e ma ne miyo jong’ad bura yie ni wach moro en adier. Mano bende e yo ma itiyogago e kanyakla mar Jokristo. (Rap 17:6; 19:15; Mat 18:16; 2Ko 13:1; 1Ti 5:19; Hib 10:28) Nyasaye bende notiyo mana gi yorno ka ne okonyo ji ng’eyo ni Wuode e Jawar. Yesu nowacho kama: “Ondik e Chiku uwegi niya: ‘Neno mar ji ariyo en madier.’ An achiwo neno kuoma awuon, kendo Wuora ma ne oora chiwo nenda.”—Joh 8:17, 18.
it-2-E 685 ¶6
Jadolo
Jodolo e ma ne nigi migawo mar puonjo oganda wach Nyasaye, kendo ne gikonyo ahinya e wach ng’ado bura e piny Israel. E mier ma nomi jodolo mondo gidagie, ne gikonyo ahinya jong’ad bura e buche ma ne iyalo kendo ne gitiyo kanyachiel gi jong’ad bura e yalo buche ma korgi ne tek. (Rap 17:8, 9) Ne dwarore ni giti kanyachiel gi jodong dala e buche mag nek ma yalo ne tek, kendo ne gineno ni oluw weche duto mondo oganda Nyasaye kik bed gi buch remo.—Rap 21:1, 2, 5.
Puonj Manie Wach Nyasaye
it-1-E 787
Golo Jaricho
Chike Musa ne dwaro ni wach mowuok e dho joneno ariyo e ma ne miyo ing’ado ne ng’ato buch tho. (Rap 19:15) Joneno ariyogo e ma ne nyaka kwong go jarichono gi kite. (Rap 17:7) Timo mano ne dhi nyiso ni gihero chike Nyasaye, ne gidwaro ni oganda Nyasaye osik kaler, kendo mano ne chiwo siem ne ng’ato ang’ata ma ne nyalo paro mar chiwo neno mar miriambo.
JULAI 26–AGOST 1
MWANDU MA YUDORE E WACH NYASAYE | RAPAR MAR CHIK 19-21
“Ngima Dhano En Gima Duong’ e Wang’ Jehova”
Luw Ranyisi mar Jehova—Nyis Ji Ng’wono Kendo Iher Bura Makare
4 Taonde auchiel ma noyiedhgo ne ni kuonde ma ng’ato ang’ata ne nyalo chopoe mayot. Jehova nochiko Jo-Israel ni giyier taonde adek e bath Aora Jordan konchiel kendo adek e loka machielo. Nikech ang’o? Mondo ng’ama oneko kobothne oyud resruok mapiyo kendo mayot. (Kwan 35:11-14) Nderni ma ne dhi e taondego ne olos maber. (Rap. 19:3) Ka luwore gi buge moko machon mag Jo-Yahudi, ne iketoga alama mang’eny e yorego mondo ota jonek ma ne ringo kochomo taondego. Chenro mar bedo gi taondego ne miyo ng’at moneko kobothne dhi nyime dak e piny Israel kar ringo dhi e piny ma wendo kama nonyalo chako lamoe nyiseche manono.
Luw Ranyisi mar Jehova—Nyis Ji Ng’wono Kendo Iher Bura Makare
9 Achiel kuom gik momiyo ne oket chenro mar bedo gi taonde ma jonek mobothnegi ne nyalo ringoe ne en ni mondo Jo-Israel kik bed gi buch remo. (Rap. 19:10) Jehova neno ngima kaka gima duong’ ahinya, kendo osin gi ng’ato ang’ata ma ‘chuero remb joma onge ketho.’ (Nge. 6:16, 17, Luo, 1976) Nikech en Nyasaye ma ng’ado bura kare kendo oler, ok okaw wach nek e yo mayot kata mana ka ng’ato oneko kobothne. Kata obedo ni ng’at ma noneko kobothne ne inyiso ng’wono, ng’atno pod ne nyaka ter wach ne jodongo mondo ginon ka be noneko kobothne adier, kendo koyud ni en kamano, ne nyaka osik e i taon modhiyeno nyaka jadolo maduong’ tho. Okenge ma kamago ne paro ne Jo-Israel ni ngima dhano en gima duong’ ahinya ma ok onego tuggo. Mondo ne gimi Jachiw ngima luor, ne dwarore ni gitang’ gi timbe duto ma ne nyalo hinyo jowetegi kata negogi.
it-1-E 344
Remo
Nyasaye e ma nomiyo dhano ngima kendo ng’ato ang’ata ma otieko ngima nyawadgi nyaka bed gi bura e nyim Nyasaye. Mano nonenore ratiro ka ne Nyasaye owuoyo gi Kain bang’ ka nosenego owadgi. Nyasaye ne onyiso Kain niya: “Remb owadu ywakna e lowo.” (Cha 4:10) Kata mana ng’at ma osin gi nyawadgi, kata ma gombone tho, kata ma ketho nyinge, kata ma chiwo neno mar miriambo kuome, bende bedo gi buch remo nikech gik maricho kaka mago.—Law 19:16; Rap 19:18-21; 1Jo 3:15.
Puonj Manie Wach Nyasaye
it-1-E 518 ¶1
Kot, Ng’ado Bura
Buche ne ing’adoga e dho ranga dala. (Rap 16:18; 21:19; 22:15, 24; 25:7; Rut 4:1) Dho rangach e kama ne ji chokoree mondo osomnegi chike. (Neh 8:1-3) Ne yot yudo joneno e dho rangach ka ne ng’ato nigi wach motudore gi uso mwandu, nikech ji mang’eny ne donjo e dala kendo wuok odiechieng’ ma ngima. Bende, nikech ne iyalo buche e pap kama ji duto ne nyalo neno gima timore, mano ne konyo mondo jong’ad bura obed mang’won kendo ging’ad buche e yo makare.
AGOST 2-8
MWANDU MA YUDORE E WACH NYASAYE | RAPAR MAR CHIK 22-23
“Kaka Chik ne Nyiso ni Jehova Dewo Le”
it-1-E 375-376
Osigo
E kinde machon, ne itiyo gi le e ting’o osigo, kendo ne onyis Jo-Israel ni ka ng’ato ang’ata oneno ka punda jasike onindo piny gi osigo, to ok onego gikal akala. Kar mano, ‘nyaka ne gikony wuon-go chunge.’—Wuo 23:5.
it-1-E 621 ¶1
Rapar mar Chik
Rapar mar Chik oting’o chike ma ne miyo irito le maber. Ne ok oyiene Jo-Israel mako winyo manie ode. Ne onego giwe winyono oring odhi, kata kamano, ne ginyalo kawo nyithind winyono. Mano ne miyo winyono thuolo mar nyuolo tong’ mamoko kendo. (Rap 22:6, 7) Ne ok oyiene japur tueyo punda gi dhiang’ e jok achiel nikech mano ne nyalo hinyo le ma yomyom e kind le ariyogo. (Rap 22:10) Ne ok onego otue dho ruath sa ma oywayo lodi ma idiemogo cham mondo kik kech nege to cham ne ni machiegni kode.—Rap 25:4.
w03-SW 10/15 32 ¶1-2
“Kik Utueru e Jok Achiel gi Joma Ok ni e Yie”
MANA kaka uneno kae, ngamia kod ruath ma puro kanyachiel hinyore. Jok ma otueyogi kanyachiel miyo lego hinyore nikech ok giromre. Nikech Nyasaye ne dewo le ahinya, mano e momiyo nonyiso Jo-Israel niya: “Kik ipur gi ruath kod punda e jok achiel.” (Rapar mar Chik 22:10) Ruath kod ng’amia bende ne ok onego otue e jok achiel.
Nikech dend lego opogore to tekogi bende ok rom, ka otuegi kanyachiel e jok, mano ne dhi miyo le ma nyap ohinyre kotemo romore gi le maduong’, to le maduong’ bende ne dhi hinyore nikech koro noting’o ting’ mapek.
Puonj Manie Wach Nyasaye
it-1-E 600
Gowi, Jagowi
Gowi en gima ng’ato oholo nyawadgi kendo ma nyaka ochul. E piny Israel machon, dhier e ma ne miyo ji bedo gi gowi. Bedo jagowi e piny Israel ne en gima rach ahinya, nikech mano ne miyo jagowi bedo misumba ng’at mohole. (Nge 22:7) Kuom mano, ne onyis Jo-Israel ni mondo gibed jochiwo kendo ni kik gikaw ohala sama giholo jowetegi. (Wuo 22:25; Rap 15:7, 8; Za 37:26; 112:5) Kata kamano, ne ginyalo kawo ohala kuom welo ma ne giholo.—Rap 23:20.
AGOST 9-15
MWANDU MA YUDORE E WACH NYASAYE | RAPAR MAR CHIK 24-26
“Kaka Chik ne Nyiso ni Jehova Dewo Mon”
it-2-E 1196 ¶4
Dhako
Chike mag lweny ne rito dhako gi dichwo ma ne eka oa kendore kuom miyo dichwo thuolo mar bedo pacho gi jaode kuom higa achiel ma ok odhi e lweny. Mano ne miyogi thuolo mar nyuolo nyathi ma ne dhi miyo dhako kik parre ahinya ka jaode odhi olweny kendo ne miyo ok obed gi kuyo mokalo tong’ ka po ni chwore otho e lweny.—Rap 20:7; 24:5.
it-1-E 963 ¶2
Hulo
Kata obedo ni ma ne en chenro maber ma ne konyo joma odhier kendo ma ne jiwo ji mondo gibed jochiwo kendo giket genogi kuom Jehova, ne ok en chenro ma miyo ji bedo jonyawo. Onyiso adiera mag weche ma Daudi nowacho niya: “Pok aneno kojwang’ ng’at makare, kata mana nyithinde ka kwayo chiemo.” (Za 37:25) Ka joma odhier notiyo gi chenroni maber kendo gitiyo gi kinda, mano ne miyo ok giri kech gi nyithindgi kendo ok gibed joma kwayo chiemo.
Be Ing’eyo?
E piny Israel machon, ka ng’ato notho ma ok onyuolo nyathi ma wuoyi, owadgi ne kendo chiege mondo onyuolnego nyithindo mondo kare kik lal. (Chakruok 38:8) Chenrono ne oduog oket e chike Musa. (Rapar mar Chik 25:5, 6) Gima Boaz notimo kaka owach e bug Ruth, nyiso ni chwo mamoko ma bende ne gin wede ng’at motho ne nyalo kendo chiege ka po ni owetene monyuolego nosetho te.—Ruth 1:3, 4; 2:19, 20; 4:1-6.
Ndiko mar Mariko 12:20-22 nyiso ni chenroni pod ne dhi nyime e kinde Yesu nikech Jo-Sadukai nowuoyo kuome. Flavius Josephus ma nono weche machon mag Jo-Yahudi nowacho ni chenrono ne miyo nying ng’at motho ok lal kendo ne miyo mwandune bende dong’ ne jaode. E kindego, dhako ne onge gi ratiro mar dong’ gi mwandu chwore. Kata kamano, nyathi ma dhakono nonyuolo gi owadgi chwore ne miyo obedo gi ratiro mar dong’ gi mwandu chwore.
Puonj Manie Wach Nyasaye
it-1-E 640 ¶5
Ketho Kend
Barup Ketho Kend. Chik Musa ne ok oyie ne Ja-Israel ketho kend mare e yo mayot mana nikech ketho moko matindo tindo. Nitie okenge ma nyaka ne okaw. Dichwo ma ne ketho kendno ne nyaka ‘ndik ne dhakono barup weruok mi oket e lwete, kae to oriembe owuog e ode.’ (Rap 24:1) Kata obedo ni Muma ok wach weche momedore e wi okenge ma ng’ato ne onego okaw, nenore maler ni ng’atno ne nyaka kwong wuo gi chwo ma ne yalo buche kaka mago nikech jogo ne nyaka tem konyo dichwono gi chiege loso weche mondo kendno kik kethre. Thuolo mar manyo barup ketho kend kaachiel gi luwo okenge duto ma ne dwarore ne nyalo miyo dichwono opar matut e wi gima ne odwa timono. Ng’ato ne nyaka bed gi wach mapek ma ne miyo odwaro ketho kend kendo okenge ma ne iluwo mondo oketh kend ne miyo ng’ato kik rikni kawo okang’ mar ketho kend mare. Mano bende ne konyo mondo orit ratiro mag joma mon. Muma ok nyiswa gik ma ne ondik e “barup weruok.”
AGOST 16-22
MWANDU MA YUDORE E WACH NYASAYE | RAPAR MAR CHIK 27-28
“Guethgi Duto Nobinu”
Yud Gweth Kokalo Kuom Ruoth ma Roho mar Nyasaye Tayo!
18 Kuom adier, winjo dwonde oriwo rwako ei chunywa gigo ma inyisowa ei Wach Nyasaye koda chiemb chuny mochiwonwa. (Math. 24:45) Tiend winjo bende en luwo kendo timo kaka Nyasaye koda Wuode chiko. Yesu nowacho kama: ‘Ok ni ji duto ma luonga ni, “Ruoth, Ruoth,” e ma nodonji e pinyruodh polo; to mana ng’atno matimo gima Wuora me polo dwaro.’ (Math. 7:21) Kendo tiend winjo Nyasaye en bedo moikore luwo chenro moseloso, ma en kanyakla mar Jokristo kaachiel gi jodongo moseketi, ma gin ji mosechiwo kaka “mich.”—Efe. 4:8.
w01-SW 9/15 10 ¶2
Be Ibiro Yudo Gueth mag Jehova?
2 Wach motigo e Dho-Hibrania ni “udhi nyime winjo” e Rapar mar Chik 28:2 nyiso gima onge giko. Jotich Jehova onego owinje kinde duto to ok mana dichiel ka dichiel. Ka gitimo kamano eka Jehova nyalo guedhogi.
Dwar Gweth mag Jehova gi Kinda
4 Ne dwarore ni Jo-Israel owinj Nyasaye gi chuny mane? Chik Nyasaye nowacho ni ne odhi sin kapo ni ogandane notamore tiyone ‘gi mor, kendo gi ilo e chunygi.’ (Som Rapar mar Chik 28:45-47.) Ok owinjore waluw aluwa chike Jehova maok waketoe chunywa, nimar kata mana le koda jochiende nyalo timo kamano. (Mari. 1:27; Jak. 3:3) Winjo Nyasaye koa e chunywa gadier, nyiso ni wahere. Timo kamano nyiso ni wail nikech wan gi yie ni chike Jehova ok tek kendo ni, “en gi mich momiyo jogo ma dware.”—Hib. 11:6; 1 Joh. 5:3.
Puonj Manie Wach Nyasaye
it-1-E 360
Kiewo
Chik Jehova ne okwero Jo-Israel choro kiewo mag jowetegi. (Rap 19:14; som bende Nge 22:28.) Ng’at ma ne choro “kiep nyawadgi” ne en ng’at mokuong’. (Rap 27:17) Nikech ji nogeno cham ma ne gigolo e puothe mondo eka giyud kaka gikonyore, choro kiep ng’ato ne chalo mayo ng’ato gima siro ngimane. Choro kiewo mar ng’at machielo ne ineno kaka kuo. (Ayu 24:2) Kata kamano, ne nitie joma ne nigi tim marachno kendo jotend Juda e kinde Hosea ne chalo gi joma choro kiewo.—Hos 5:10.
AGOST 23-29
MWANDU MA YUDORE E WACH NYASAYE | RAPAR MAR CHIK 29-30
“Tiyo ne Jehova En Gima Nyalore”
Jehova Miyowa Thuolo mar Yiero
Be en gima tek ng’eyo kendo timo gima Nyasaye dwaro? Kotiyo gi Musa, Jehova nowacho kama: “Nikech chikni eni machikoi tinende, ok tek ahinya matamoi, bende ok obor kodi.” (Kwan matindo 11) Jehova ok nyiswa ni watim gik maok wanyal timo. Dwaro mage owinjore kendo gin mwanyalo timo. Bende wanyalo ng’eyogi. Ok ochuno ni nyaka wadhi “e polo” kata “loka nam” eka mondo wapuonjre gima Nyasaye dwaro. (Kwan matindo 12, 13) Muma wachonwa maler kaka onego wadag e ngima.—Mika 6:8.
Jehova Miyowa Thuolo mar Yiero
NYAMINWA moro ma Jakristo ma nokalo e chandruoge mapek kane otin, ne paro ni gigo ma nokaloe, ne dhi mone bedo ng’at makare e wang’ Nyasaye. Ne owacho kama: “Asegabedo gi luoro maok owinjore ni anyalo ketho winjruokna gi Jehova.” Be en kamano adier? Be en adier ni gik maricho manyalo bedo ni wasekaloe nyalo monowa bedo jomakare? Ooyo. Jehova Nyasaye osemiyowa thuolo mar timo yiero, omiyo, wanyalo yiero kaka wabiro tiyo gi ngimawa. Odwaro mondo watim yierono e yo makare, kendo Wachne ma en Muma, nyisowa kaka wanyalo timo kamano. Par ane weche mag Musa, mayudore e Rapar mar Chik sula 30.
Jehova Miyowa Thuolo mar Yiero
Be Jehova dewo yo ma wayiero luwo? Ee, odewo! Kowuoyo kokalo kuom much Nyasaye, Musa nowacho kama: “Iyier ngima.” (Kwan matindo 19) Kata kamano, wanyalo yiero ngima nade? Musa nolero kama: ‘Her Jehova Nyasachi, winj dwonde, kendo padori kuome.’ (Kwan matindo 20) Ka wahero Jehova, wabiro luwo chikene, kendo makore kode chuth, kata ang’o matimore. Kuom timo kamano, wanyiso ni wayiero ngima—ma en kit ngima maberie moloyo gie sani, kendo wageno bedo gi ngima ma nyaka chieng’ e piny manyien mabiro mar Nyasaye.—2 Petro 3:11-13; 1 Johana 5:3.
Puonj Manie Wach Nyasaye
it-1-E 665 ¶3
It
Jehova nowacho kokalo kuom jotichne ni Jo-Israel ne gin joma wigi tek kendo ma ‘itgi ne ok oter nyangu.’ (Jer 6:10; Tic 7:51) Ne chalo ka gima ne nitie gimoro e itgi ma monogi winjo wach. Jehova ne pok oyawo itgi nimar en e ma omiyo joma manye it ma winjo wach, to joma ok manye odino itgi e yor ranyisi. (Rap 29:4; Rum 11:8) Jaote Paulo nokoro kinde ma joma luongore ni Jokristo ne dhi weyo adiera nikech ok gidwar winjo adiera manie Wach Nyasaye to gombo margi en chiko itgi ne weche ma morogi ma wuok kuom jopuonj mag miriambo.—2Ti 4:3, 4; 1Ti 4:1
AGOST 30–SEPTEMBA 5
MWANDU MA YUDORE E WACH NYASAYE | RAPAR MAR CHIK 31-32
“Yud Puonj e Ranyisi Motigo e Wer Moro Manie Muma”
“Riw Chunya Obed Achiel Mondo Aluor Nyingi”
8 Matin nono ka pok Jo-Israel nodonjo e Piny ma Nosingi, Jehova nopuonjo Musa wer moro. (Rap. 31:19) Ne dwarore ni Musa opuonj ogandano wendno. (Som Rapar mar Chik 32:2, 3.) Ka waparo matut e wi weche ma yudore e wes mar 2 kod 3, waneno maler ni Jehova ok dwar ni opand nyinge, kata ni ji opar ni nyinge duong’ ahinya ma ok onego gitigo. Kar mano, odwaro ni ji duto ong’e nyinge. Mano kaka Jo-Israel ne oyudo thuolo makende mar winjo ka Musa puonjogi e wi Nyasaye kod nyinge monego omi duong’! Weche ma Musa nopuonjogigo noduogo chunygi kendo tegogi mana ka koth ma nyidho e lum. Ere kaka wan be wanyalo puonjo ji e yo ma kamano?
9 Sama walendo ot ka ot, e nderni, chirni, kod kuonde ma kamago, wanyalo tiyo gi Mumbwa e nyiso ji nying Nyasaye ma en Jehova. Wanyalo miyogi bugewa, nyisogi vidio magwa, kata gik mamoko ma yudore e websaitwa. Sama wan kuonde ma watiye, e skul, kata e wuoth, wanyalo manyo thuolo mag wuoyo gi ji e wi Nyasachwa kod kido ma en-go. Ka wanyiso joma waromogo gimomiyo Nyasaye nochueyo dhano kod piny, wakonyogi fwenyo gik ma ok ging’eyo e wi Jehova. Bende, sama wanyiso ji adiera e wi Wuonwa ma jahera, wakonyo e pwodho nyinge, nikech wakonyogi fwenyo miriambo mang’eny ma osekethgo nying Nyasaye. Sama watimo kamano, waduogo chuny ji gi puonj mabeyo ma ni e Muma.—Isa. 65:13, 14.
w09-SW 5/1 14 ¶4
Be Iwinjo Tiend Ranyisi Motigo e Muma?
Muma pimo Jehova gi gik ma onge ngima. Iluonge ni “Lwanda mar Israel,” “lwanda,” kod “kar geng’ruok.” (2 Samuel 23:3; Zaburi 18:2; Rapar mar Chik 32:4) Ang’o momiyo ipimo Jehova gi gigo? Mana kaka lwanda ok chorre kendo ok nyal yienge, Jehova Nyasaye bende nyalo miyowa rit mosiko.
w01-SW 10/1 9 ¶7
Luw Ranyisi mar Jehova Sama Itiego Nyithindi
7 Tem ane paro gik ma Jehova notimo ne Jo-Israel nikech hera mare. Musa notiyo gi ranyisi maber e lero kaka Jehova nonyiso hera ne Jo-Israel ka ne gibedo ogandane. Muma wacho niya: “Mana kaka otenga yiengo ode mondo nyithinde owuogi, koyaro buombene mondo okawgi, kendo oting’ogi e buombene, e kaka Jehova owuon ne telonegi.” (Rapar mar Chik 32:9, 11, 12) Mondo otenga opuonj nyithinde fuyo, ‘oyiengo ode,’ oyaro buombene, kae to ogoyo buombenego kojiwo nyithinde mondo ofu. Sama nyathi otenga owuok e odgi ma kinde mang’eny bedoga e wi lwanda man malo ahinya, min-gi fuyo e wiye. To ka po ni nyathi winyono dwa lwar piny, min-gi chako fuyo e bwoye mondo ‘oting’e e buombene.’ Kamano bende e kaka Jehova norito Jo-Israel ka ne gichako bedo oganda. Nomiyogi Chike Musa. (Zaburi 78:5-7) Jehova nodhi nyime ritogi maber kendo noikore resogi ka ne gin e chandruok.
Puonj Manie Wach Nyasaye
w04-SW 9/15 27 ¶12
Puonj Mayudore e Bug Rapar mar Chik
31:12. Nyithindo onego obed gi joma dongo sama gin e chokruok kendo onego gichik itgi maber mondo giyud puonj.