Yesu kod jopuonjrene osenindo adek Bethania nyaka nyocha giwuog Jeriko. Koro kochopo Wuok Tich gokinyi ma en Nisan 10, giwuok mondo gidhi Jerusalem. Yesu winjo ni odenyo. Omiyo, bang’ neno yadh ng’owo moro, owuok mondo odhi ong’iye. Be odhi yudo olemo e yadhno, koso?

Sani koro dwe mar Mach dhi ka rumo, to yiend ng’owo nyagoga olembegi e dwe mar Jun. Kata kamano, oboke mag yadhno oseloth chon moloyo kaka pile. Omiyo, Yesu neno ni nyalo bedo ni yadhno nigi olemo monyak chon. Kata kamano, ok oyud olemo moro amora e yadhno. Oboke osemiyo yadhno onenore ka gima en gi olemo. Kae to Yesu wacho kama: “Ng’ato ang’ata kik cham olemo moa kuomi kendo ngang’.” (Mariko 11:14) Gikanyono, yadhno chako ner. Tiend weche ma Yesu owachogo biro nenore ayanga kinyne gokinyi.

Bang’ kinde machuok, Yesu kod jopuonjrene chopo Jerusalem. Odhi e hekalu ma nyoro osenono iye godiechieng’. Kawuono to obiro mondo okaw okang’ ma chal gi ma nosekawo higni adek motelo e sap Pasaka mar higa 30. (Johana 2:14-16) Gie kindeni, Yesu riembo oko ‘joma uso kod ma ng’iepo e i hekalu.’ Bende, oloko ataro ‘mese mag jowil pesa kod kombe mag joma uso akuche.’ (Mariko 11:15) Yesu ok yie kata ne ng’ato ang’ata moting’o gimoro kodhigo kama chielo e taondno mondo ong’ad laru mar hekalu.

Ang’o momiyo Yesu kawo okang’ mar riembo jowil pesa kod joma uso jamni e hekalu? Owacho kama: “Donge ondik ni, ‘Oda ibiro luong ni od lamo mar ogendni duto’? To un useloke rogo mar jomecho.” (Mariko 11:17) Oluongo jogo ni jomecho nikech ging’awo nengo mag le ma ji onego ong’iew mondo gichiwgo misango. Yesu neno timbegigo kaka mecho kata kuo.

En adier ni jotend-jodolo, jondiko, kod jodongo mag oganda owinjo gima Yesu osetimono. Mano miyo gimedo bedo gi chuny mar nege. Kata kamano, nitie gima geng’ogi. Ok ging’eyo kaka ginyalo nego Yesu nikech ji mang’eny olworo Yesu koni gi koni mondo giwinje.

Joma obiro e sawo mar Pasaka gin Jo-Yahudi kod jomamoko ma bende oselokore morwako din mar Jo-Yahudi. Jomamoko ma ni kanyo gin Jo-Grik ma bende obiro lemo e sawono. Jo-Grikgo dhi ir Filipo ka gikwayo mondo gine Yesu. Nyalo bedo ni giyiero dhi ir Filipo nikech nyingeno en nying Jo-Grik. Nenore ni Filipo ok nigi adier kabe neno Yesu gie sechego en gima nyalore. Omiyo, odhi ir Andrea mondo owinj pache. Kae to gitero wachno e nyim Yesu, to nenore ni Yesu pod ni e hekalu.

Yesu ong’eyo ni odhi tho bang’ odiechienge manok. Omiyo, mano ok en kinde mar moro wang’ ji kata manyo huma. Odwoko jootene ariyoka kotiyo gi ngero kama: “Sa osechopo ma Wuod dhano onego omi duong’. Adier, adier, awachonu ni, ka koth ngano ok olwar e lowo mi otho, osiko mana kodhi achiel; to ka otho, bang’e onyago olemo mang’eny.”​—Johana 12:23, 24.

Koth ngano achiel nyalo nenore ka gima tin ahinya. Kata kamano, ka ochuoye e lowo “mi otho,” onyalo twi mi odong kendo onyag ngano mang’eny. E yo ma chalo kamano, Yesu en dhano achiel kende makare kendo ma onge richo. Kata kamano, ka omakore gi Nyasaye nyaka e thone, en e ma odhi bedo yo ma ji mang’eny biro yudogo ngima mochwere. Joma biro yudo ngimago gin joma bende nigi chuny kaka mare mar bedo moikore tho nikech tij Nyasaye. Omiyo, Yesu wacho kama: “Ng’ato ang’ata mohero ngimane ahinya, okethe, to ng’at mosin gi ngimane e pinyni, norit ngimaneno nyaka chop oyud ngima ma nyaka chieng’.”​—Johana 12:25.

Yesu ok wuo mana kuome owuon, nimar owacho niya: “Ka ng’ato dwaro tiyona, to mondo oluwa, kendo kama antieree, kanyo bende ng’at ma tiyona nobedie. Ka ng’ato dwaro tiyona, Wuora biro miye duong’.” (Johana 12:26) Mano doko gueth! Joma Wuoro miyo duong’ biro locho kanyachiel gi Kristo e Pinyruoth.

Nikech Yesu ong’eyo sand mager kod tho malit ma dhi yude, owacho kama: “Sani chunya chandore, to awach ang’o? Wuora, resa kuom sa mosechoponi.” Wechego ok nyis ni Yesu ok dwar chomore tir gi chopo dwaro mar Nyasaye. Kar mano, omedo wacho niya: “Kata kamano, mano e momiyo asechopo e sa nogo.” (Johana 12:27) Yesu oyie gi gimoro amora motudore gi dwach Nyasaye, moriwo nyaka tho modhi thogo kaka misango.

Ka Yesu ni e hekalu chieng’ Wuok Tich, Nisan 10, owuoyo kuom thone ma koro okayo machiegni. Nikech oparo ahinya kaka nying’ Nyasaye biro kethore, Yesu wacho kama: “Wuora, mi nyingi duong’.” Kae to dwol maduong’ wuok e polo ka dwoke niya: “Asemiye duong’, kendo abiro miye duong’.”​—Johana 12:27, 28.

Joma ni machiegni kode bwok miwuoro. Jomoko paro ni gima giwinjono en mor polo. Moko to wacho ni: “Malaika moro owuoyo kode.” (Johana 12:29) Kata kamano, ng’at ma giwinjo ka wuoyono en Jehova! To ma ok e kinde ma dhano ohango winjoe dwond Nyasaye e wach motudore gi Yesu.

Higni adek gi nus motelo kane ibatis Yesu, Johana Jabatiso nowinjo ka Nyasaye wuoyo e wi Yesu kama: “Ma en Wuoda ma ahero kendo ma aseyiego.” Bang’e, ka sap Pasaka mar higa 32 noserumo, kit Yesu nolokore e nyim Jakobo, Johana, kod Petro. Ji adekgo nowinjo ka Nyasaye wacho ayanga kama: “Ma Wuoda ma ahero, ma aseyiego. Winjeuru.” (Mathayo 3:17; 17:5) To koro e kinde mar adekni, Jehova wuoyo e yo ma ji mang’eny nyalo winjo dwonde!

Yesu wacho niya: “Dwolno osewinjore, ok nikech an, to nikech un.” (Johana 12:30) Wechego nyiso ni adier Yesu e Mesia Wuod Nyasaye ma ne okor wachne.

E wi mano, yie motegno ma Yesu nyiso kuom Nyasaye e ngimane duto, keto ne dhano ranyisi kaka onego gidag. To yiene motegnono bende nyiso ni Satan Jachien ma en jaloch mar pinyni, owinjore oketh. Yesu wacho kama: “Koro nitie bura ming’ado ne pinyni, kendo jaloch mar pinyni ibiro wit oko.” Tho ma Yesu chiegni thogo ok dhi nyiso ni orem. Kar mano, en gima dhi nyiso ni olocho. E yo mane? Olero niya: “To e ma bang’ koseng’awa malo aa e piny, abiro ywayo kit ji duto ira.” (Johana 12:31, 32) Kokalo kuom thone e yath, Yesu biro ywayo jomamoko ire ka oyawonegi yo mar yudo ngima ma nyaka chieng’.

Ogandano dwoko Yesu kuom wach moa wacho ni ibiro ‘ng’awe malo.’ Giwachone kama: “Ne wawinjo koa e Chik ni Kristo siko nyaka chieng’. Ere kaka inyalo wacho ni Wuod dhano nyaka ng’aw malo? Wuod dhanono to e ng’a?” (Johana 12:34) Kata obedo ni jogo oseneno ranyisi mang’eny moriwo nyaka winjo dwond Nyasaye owuon ka wuoyo, thothgi ok rwak Yesu kendo ok gikwane kaka Wuod dhano adier, kendo kaka Mesia ma ne osing wachne.

Mana kaka Yesu nosewacho e kinde moro motelo, sani bende owacho ni en e “ler.” (Johana 8:12; 9:5) Ojiwo ogandano niya: “Ler biro dhi nyime bedo e kindu kuom ndalo matin. Wuothuru sama pod un gi ler, mondo mudho kik lou . . . Ka pod un gi ler, nyisuru yie kuom ler, mondo eka ubed nyithind ler.” (Johana 12:35, 36) Kae to Yesu wuok kanyo nikech ok onego otho chieng’ Nisan 10. Chieng’ sawo mar Pasaka mar Nisan 14 e ma ibiro ‘ng’awee malo’ kigure e yath.​—Jo-Galatia 3:13.

Ka wanono adimba tije ma Yesu notimo e piny, nenore maler ni nitiere weche ma ne okor ma ne chopo sama Jo-Yahudi ne ok nyis yie kuome. Janabi Isaya nokoro ni wenge ji ne dhi bedo muofu kendo chunygi ne dhi bedo matek mondo kik gilokre mi changgi. (Isaiah 6:10; Johana 12:40) Ee, thoth Jo-Yahudi tokgi tek kendo gikwedo gik ma nyiso ayanga ni Yesu e Jawar ma tero ji e ngima.

Nikodemo, gi Josef ma Ja-Arimathea, kod jotelo mamoko mang’eny ‘oseketo yie kuom’ Yesu. Kata kamano, be gibiro timo gik ma nyiso ni gin gi yie, koso gibiro dok chien ka samoro giluor ni ibiro riembgi e sunagogi kata nikech “gihero duong’ moa kuom dhano”?​—Johana 12:42, 43.

Yesu owuon lero tiend keto yie kuome. Owacho kama: “Ng’ato ang’ata ma keto yie kuoma, ok oket yie kuoma kende, to oketo yie bende kuom Ng’at ma ne oora; kendo ng’at ma nena, oneno bende Ng’atno ma noora.” Adiera ma Nyasaye nochiko Yesu mondo opuonj ji kendo ma Yesu dhi nyime lando gin adiera ma dwarore ni ji ong’e ahinya. To mano e momiyo owacho niya: “Ng’ato ang’ata ma chaya kendo ma ok rwak wechenagi, en gi gima ng’adone bura. Wach ma asewacho e ma biro ng’adone bura e chieng’ giko.”​—Johana 12:44, 45, 48.

Kae to Yesu tieko kowacho kama: “Pok awuoyo kuom dwacha awuon, to Wuora ma ne oora e ma osemiya chik owuon kuom gima onego awach kod gima onego apuonj. Kendo ang’eyo ni chikne en ngima ma nyaka chieng’.” (Johana 12:49, 50) Yesu ong’eyo ni odong’ mana ndalo manok kae to rembe dhi chuer kaka misango ne dhano ma nyiso yie kuome.​—Jo-Rumi 5:8, 9.