Mano kaka mon modhi e liend Yesu bwok ka giyudo ni liel odong’ nono! Maria Magdalin wuok ng’wech kae to oyudo “Simon Petro gi japuonjre machielo ma Yesu” nohero ma en jaote Johana. (Johana 20:2) Kata kamano, mon modong’ e dho liel to oneno malaika moro. Kendo e i liel nitiere malaika machielo ‘morwakore gi kandho ma rachar.’​—Mariko 16:5.

Achiel kuom malaikego wachonegi niya: “Kik ubed maluor, nikech ang’eyo ni umanyo Yesu ma nogur e yath. Oonge kae nimar osechiere mana kaka nowacho. Biuru une kama ne oketee. Omiyo, dhiuru mapiyo kendo uwach ne jopuonjrene ni osechiere oa kuom joma otho, nimar neuru! otelonu odhi Galili.” (Mathayo 28:5-7) Kuom mano, mon-go wuok ng’wech “ka gihum nono” mondo giter wachno ne jopuonjre.​—Mariko 16:8.

Chop sani, Maria oseyudo Petro gi Johana. Ogamo muya kowachonegi kama: “Gisegolo Ruoth e liel, to ok wang’eyo kama giketee.” (Johana 20:2) Petro kod Johana wuok ng’wech. Johana nigi ng’wech mohingo Petro, omiyo okwongone chopo e liel. Ong’iyo i liel ka pod ochung’ gi oko kendo oneno lewni ma ne onalgo ringre Yesu.

Ka Petro chopo, en to odonjo iye achiel kachiel. Oneno lewni mag kitani kod law ma ne onalgo wi Yesu. Johana bende donjo iye kae to oyudo ni gima Maria oa wachonegi en adier. Kata obedo ni Yesu nosewuoyo motelo e wi chierne, Petro gi Johana pok oyie ni osechiere. (Mathayo 16:21) Gidok pacho ka dhogi omoko, to Maria ma koro oseduogo e liel to dong’ kanyo.

Gie kindeno, mon mamokoka ni e yo ka gidhi nyiso jopuonjre ni osechier Yesu. Sama giringo ka gidhi timo kamano, Yesu romo kodgi kendo omosogi niya: “Misawauru!” Gipodho piny e tiende kendo “gikulorene ka gimiye luor.” Kae to Yesu wachonegi kama: “Kik ubed gi luoro! Dhiuru unyis owetena mondo gidhi Galili kendo kuro gibiro nenae.”​—Mathayo 28:9, 10.

Motelo ne mano, piny ne oyiengni, malaike nofwenyore mi askeche ma ne ni e dho liel “nokirni mi gibedo mana ka joma otho.” Ka pachgi noduogo, ne gidhi mi gidonjo nyaka e taon kendo “ne ginyiso jodong-jodolo gik moko duto ma nosetimore.” Kae to jodologo noriwo paro kanyachiel gi jodongo mag Jo-Yahudi, kae to ging’ado ni onego omi askeche asoya mondo gipand wachno kendo giwach kama: “Jopuonjrene nobiro gotieno mi gikwale ka wan to wanindo.”​—Mathayo 28:4, 11, 13.

Jo-Rumi ne negoga askeche monindo e tich. Omiyo, jodolo singonegi kama: “Ka wachno [tiende ni riambo ni ne ginindo sama gino a otimore] ochopo e it gavana, wabiro leronego, omiyo kik chunyu chandre.” (Mathayo 28:14) Askechego kawo asoyano kendo giyie timo kaka jodologo onyisogi. Kuom mano, miriambo mar ni okwal ringre Yesu kere ne Jo-Yahudi modak kuonde mopogore opogore.

Maria Magdalin pod ywak e dho liel. Okulore mondo ong’i i liel to opo koneno malaike ariyo morwakore gi nengni ma rochere! Achiel kuom malaikego obet yo kuma wi ringre Yesu ne nitie to machielo yo ka tiende. Gipenjo Maria niya: “Dhako, ang’o momiyo iywak?” Odwokogi kama: “Gisegolo Ruodha, to ok ang’eyo kama giketee.” Ka Maria lokore, opo ka ogo wang’e kuom ng’at moro. Ng’atno nwoyo penjo ma malaikego oa penjo Maria kae to omedo kama: “En ng’a ma imanyo?” Maria paro ni ng’atno en mana ng’at ma rito puodhono, omiyo owachone kama: “Jaduong’, kapo ni isegole kae, to nyisa kama iketee, kendo abiro kawe.”​—Johana 20:13-15.

Adier en ni Maria wuoyo gi Yesu ma koro osechier en mana ni gie sani pok ofwenyo ni mano Yesu. Kata kamano, sama Yesu luonge ni, “Maria!” gi dwol ma ne ojaluongegago pile, eka Maria fwenyo ni mano en. Maria kok gi mor kod ilo niya: “Raboni!” (ma tiende en ni, “Japuonj!”) To nikech Maria ong’eyo ni Yesu chiegni idho malo e polo, omoko kuome. Omiyo, Yesu jiwe kama: “We moko kuoma, nikech pok aidho ir Wuora. To dhi ir owetena mondo iwachnegi ni, ‘Aidho adhi ir Wuora kendo Wuonu, ir Nyasacha kendo Nyasachu.’”​—Johana 20:16, 17.

Maria ringo nyaka kama joote kod jopuonjre mamoko ochokoree. Onyisogi kama: “Aseneno Ruoth!” kendo mano medo jiwo weche ma mon mokwongoka nosewacho. (Johana 20:18) To e ma pod wechegigo ‘nenorenegi ka oyuma.’​—Luka 24:11.

Chieng’ Jumapil, Nisan 16, jopuonjre Yesu chunygi onyosore ahinya. Gidhier nono nimar gikia gimomiyo liel ni nono. (Mathayo 28:9, 10; Luka 24:11) Bang’e godiechieng’, Kleopa gi japuonjre machielo wuok Jerusalem ka gichomo Emau ma en gimoro kilomita 11 kama.

Giwuotho ka gigoyo mbaka kuom gima oa timore. Kae to gipo ka ng’at moro bende wuotho kanyachiel kodgi. Ng’atno penjogi niya: “Magi gin weche mage ma ugoyoe mbaka ka uwuotho?” Kleopa dwoke kama: “Dibed ni in wendo modak kar kende e Jerusalem ma ok ing’eyo gik mosetimore e Jerusalem e kindegi, koso?” Ng’atno penjogi ni: “Gik mage?”​—Luka 24:17-19.

Giwachone ni: “Weche motudore gi Yesu Ja-Nazareth.” Gimedo kama: “Ne wageno ni ng’atni e ma ne dhi waro Israel.”​—Luka 24:19-21.

Kleopa kod nyawadgi medo gano ne ng’atno weche ma notimore odiechieng’no. Giwachone ni mon moko nyoro odhi e liel ma ne oyikie Yesu to giyudo ka liel ni nono kendo ni mon-go noneno hono moro. En hono ma nyoro ginenoe malaike ma nowachonegi ni Yesu koro ngima. Ginyise ni jomamoko bende nodhi e liel to “giyudo mana kaka mon-go nosewacho.”​—Luka 24:24.

Nenore maler ni jopuonjre ariyogo odhier nono nikech gik moa timorego. Ng’at ma gikiano dwokogi gi chir korieyo pachgi ma ok kare mosemiyo chunygi onyosoreno. Owachonegi kama: “Yaye, un joma onge rieko kendo ma chunyu kawou kinde mondo uyie gi gik moko duto ma jonabi nokoro! Donge ne dwarore ni Kristo oyud sandgo duto kendo donjo e duong’ mare?” (Luka 24:25, 26) Kae to omedo leronegi tiend weche mang’eny ma ne okor e Muma motudore gi Kristo.

Gikone, ji adekgo chopo machiegni gi Emau. Jopuonjre ariyogo gombo ng’eyo weche momedore. Kuom mano, gijiwo ng’at ma gikiano niya: “Bed kodwa kae, nimar koro en odhiambo kendo piny oseyuso.” Ng’atno yie bet kodgi kendo gichiemo kanyachiel. Gima miyo gifwenyo ng’at ma gikiano en sama olemo, ong’ingo makate, kendo omiyogi. Bang’ mano to olalnegi apoya. (Luka 24:29-31) Koro ging’eyo gadier ni Yesu ngima!

Jopuonjre ariyogo goyo mbaka e wi gima oa timoreno ka gin gi ilo ahinya. Giwacho kama: “Donge a chunywa oil ahinya sama ne owuoyo kodwa e ndara, ka noelonwa tiend Ndiko?” (Luka 24:32) Gireto mondo gidog Jerusalem. To ka gichopo kuro, giyudo joote gi jomamoko. Ka Kleopa gi nyawadgi pok owachonegi gima oa timore, giwinjo ka jomamoko wacho ni: “Kuom adier osechier Ruoth kendo osenenore ne Simon!” (Luka 24:34) Eka Kleopa gi nyawadgi bende wacho kaka Yesu nende ofwenyorenegi. Koro gin bende gin joma oseneno gi wang’gi ni adier Yesu osechier.

Koro nitie gimoro ma timore ma bwogogi giduto e ot kama gintiereno. Yesu fwenyorenegi kanyo! Mano en hono nimar luoro ma gilurogo Jo-Yahudi omiyo giloro dhoudi, to e ma pod Yesu odonjo mochung’ e diergi! Yesu hoyogi kama: “Kuwe mondo obed kodu.” Gibwok mana kaka ne gisetimo kinde motelo ka “giparo ni ne en mana ka lek.”​—Luka 24:36, 37; Mathayo 14:25-27.

Yesu konyogi ng’eyo ni gima ginenono ok en lek. Onyisogi lwetene kod tiendene kowachonegi kama: “Ang’o momiyo chunyu chandore, kendo ang’o momiyo ubedo gi kiawa e chunyu? Neuru lwetena kod tiendena, ni en an; mulauru mondo une nimar gima en kaka lek ok dibed gi ringruok kod choke mana kaka uneno ni an-go.” (Luka 24:36-39) Gimor ma tamre gi nono ka giwuoro. Kata kamano, chunygi to pod tek-tek.

Yesu medo konyogi mondo ging’e ni en ie en kuom penjogi niya: “Be un gi gimoro kanyo minyalo cham?” Gimiye rech mothol kendo ochamo. Kae to owachonegi kama: “Magi gin wechena ma nawachonu kane pod an kodu [ka pok atho], ni gik moko duto mondik kuoma e Chik Musa kod weche Jonabi gi Zaburi nyaka timre.”​—Luka 24:41-44.

Yesu nosekonyo Kleopa gi nyawadgi winjo tiend weche me Muma, to koro sani otimo kamano ne joma ochokore kanyo duto kowachonegi niya: “Ma e gima ondik: ni Kristo ne dhi yudo sand kendo ne odhi chier a kuom joma otho e odiechieng’ mar adek, to kokalo kuom nyinge, ne idhi yal e ogendni duto wach loko chuny a e richo mondo owe ne ji richogi​—kochakore gi Jerusalem. Unubed joneno mag gigo.”​—Luka 24:46-48.

Nenore ni Thoma to onge kanyo. Bang’ odiechienge moko, jowetene nyise gi ilo kama: “Waseneno Ruoth!” Thoma dwokogi ni: “Ka pok aketo lweta kama musmal nochwowo, mi aketo lith lweta kuonde ma musmal nochwowo, kendo keto lweta e ng’etne, to ok abi yie ngang’.”​—Johana 20:25.

Odiechienge aboro bang’e, jopuonjre lorore kendo e ot moro ka wang’ni to Thoma ni kodgi. Yesu fwenyore e diergi kendo omosogi kama: “Kuwe mondo obed kodu.” Kae to Yesu nyiso Thoma ni: “Ket ane lith lweti kae, kendo ng’i lwetena kendo iket lweti e ng’etna mondo iwe bedo gi kiawa, to ibed ng’at ma yie.” Thoma kok niya: “Ruodha kendo Nyasacha!” (Johana 20:26-28) Ee, koro Thoma onge gi kiawa moro amora ni Yesu ngima kendo ni en e jal ma Jehova Nyasaye oseoro.

Yesu wacho ne Thoma ni: “Nikech isenena, be koro iyie? Joma mor gin joma yie kata obedo ni pok gineno.”​​—Johana 20:29.