Nonro mag Chenro mar Chokruok mar Ngimawa kod Tijwa
© 2024 Watch Tower Bible and Tract Society of Pennsylvania
SEPTEMBA 2-8
MWANDU MA YUDORE E WACH NYASAYE ZABURI 79-81
Nyis ni Ihero Nying Jehova
Rawar en “Chiwo Malong’o” Moa Kuom Nyasaye
5 Wanyalo nyiso nade ni wahero nying Jehova? Wanyalo timo kamano kokalo kuom timbewa. Jehova dwaro ni wabed joma ler. (Som 1 Petro 1:15, 16.) Mano nyiso ni Jehova kende e ma onego walam kendo wawinje gi chunywa duto. Kata mana sama isandowa, onego watem matek mondo waluw puonj mag Jehova kod chikene. Timbewa mabeyo miyo ler marwa rieny e nyim ji duto, to mano miyo nying Nyasaye duong’. (Mat. 5:14-16) Kaka joma ler, kit ngimawa nyiso ni luwo chike Nyasaye en gima ber kendo ni weche ma Satan nowacho gin miriambo. Sama waboth, waloko chunywa gadier kae to waweyo timbe ma ok mi Jehova duong’.—Zab. 79:9.
Jo-Rumi 10:13—“Luongo Nying Ruoth”
E Muma, “luongo nying Jehova” oriwo gik mathoth, to ok mana ng’eyo nying Nyasaye kod tiyo kod nyingno e lamo kende. (Zaburi 116:12-14) Oriwo keto geno kuom Nyasaye, kendo bedo gadier ni en e ma onyalo konyowa.—Zaburi 20:7; 99:6.
Yesu nokawo nying Nyasaye kaka gima duong’ ahinya. Weche ma notiyogo kochako alam mar Ruodhwa nyiso mano. Wechego wacho kama: “Wuonwa manie polo, nyingi mondo obed maler.” (Mathayo 6:9) Bende, Yesu nowacho ni mondo wayud ngima mochwere, nyaka wang’e Wuon nyingno, wawinje, kendo wahere.—Johana 17:3, 6, 26.
Puonj Manie Wach Nyasaye
it-2-E 111
Josef
Imiyo Nying Josef Duong’. Nikech ne omi Josef luor ahinya e kind yawuot Jakobo, mano e momiyo kinde moko ne itiyo gi nyinge kiwuoyo kuom dhoudi duto mag Israel (Za 80:1) kata dhoudi mag Israel ma nodak yo nyandwat. (Za 78:67; Amo 5:6, 15; 6:6) Nyingeno bende ne otigo e weche mokor e Muma. E fweny ma Ezekiel noneno, ne omi Josef pok ariyo (Eze 47:13), achiel kuom rangeye mag dala miluongo ni “Jehova ni Kanyo” nigi nying Josef (Eze 48:32, 35), kendo sama iwuoyo e wi riwo jotich Jehova, iwuoyo kuom Josef kaka jatend oganda achiel to Juda jatend oganda machielo. (Eze 37:15-26) Weche ma Obadia ne okoro nonyiso ni “od Josef” ne dhi riwo lwedo kethruok mar “od Esau” (Oba 18), kae to weche ma Zekaria nokoro nowacho ni Jehova ne dhi reso “od Josef.” (Zek 10:6) Josef ikwano e kind dhoudi mag Israel mar Nyasaye kar Efraim.—Fwe 7:8.
Nikech nying Josef bende yudore e Fweny 7:8, mano nyiso ni wach ma Jakobo nokoro ka pok otho otudore gi Israel mar Nyasaye. Mano e momiyo Jal ma Ratego ma Konyo Jakobo, ma en Jehova Nyasaye, nochiwo Yesu kaka Jakwath Maber mondo otho ne “rombe.” (Joh 10:11-16) Kristo Yesu bende e mise mar kidi ma hekalu mar Nyasaye kata Israel mar Nyasaye ochung’ie. (Ef 2:20-22; 1Pe 2:4-6) Jakwadhno gi Kidino nigi Nyasaye Manyalo Duto.—Joh 1:1-3; Tic 7:56; Hib 10:12; pim gi Cha 49:24, 25.
SEPTEMBA 9-15
MWANDU MA YUDORE E WACH NYASAYE ZABURI 82-84
Bed Mamor gi Migepe ma In-go
Puonj ma Wayudo Kuom Winy
Joma nodak e dala mar Jerusalem nong’eyo maber winj opija, ma kinde mang’eny ne ohero gero utegi e bwo tat udi. Moko nogero utegi e hekalu ma Solomon nogero. Nyalo bedo ni winj opija ma ne gero utegi e hekalu, ne timo kamano nikech ne en kama ginyalo ritoe nyithindgi maber ma onge gima chandogi.
Jandik Zaburi sula mar 84 ma ne en achiel kuom yawuot Kora ma ne tiyo e hekalu ne hinyo neno ute winygo e alworano. Nogombo bedo kaka winj opija ma ne siko kadak e od Jehova. Nowacho kama: “Tabanakel magi oher manadi, A Jehova mar ogend lweny! Siso oloya gi laru mag Jehova, ee, nyaka aol . . . Ee, winyo mar opija oseyudo ode, opija bende oseyudo ode kama onyalo ketoe nyithinde, mana kendoni mag misango, A Jehova mar ogend lweny!” (Zaburi 84:1-3) Be wan kaachiel gi nyithindwa, wanyiso gombo machalo kamano mar bedo e kanyakla mar jotich Jehova ma ok wabare?—Zaburi 26:8, 12.
w08-SW 7/15 30 ¶3-4
Gen Gik ma Nyalore Kendo Ibed Mamor
Sama wabedo moti kata watuore, ok wanyal timo mathoth e tij Jehova. Ka in janyuol, samoro inyalo neno ni ok iyud ber mathoth e puonjruok ma mari iwuon kata e chokruoge, nikech itiyo gi thuolo mang’eny e konyo nyithindi. Kata kamano, dibed ni keto pachi ahinya kuom gik ma ok inyal timo moni neno gik ma pod inyalo timo?
Higni mang’eny mokalo, Ja-Lawi moro nochako gombo gima ne ok onyal yudo. Ne en gi thuolo maber mar tiyo e hekalu kuom jumbe ariyo higa ka higa. Kata kamano, nonyiso kaka nogombo dak machiegni gi kendo mar misango kinde duto. (Za 84:1-3) Ang’o ma nokonye bedo moromo gi gik ma ne en-go? Nofwenyo ni bedo e laru mar hekalu kata mana kuom odiechieng’ achiel kende ne en gueth maduong’ ahinya. (Za 84:4, 5, 10) E yo ma kamano bende, kar keto pachwa e gik ma ok wanyal timo, onego wabed mamor gi gik mathoth ma wanyalo timo.
Jehova Nyasachi Ogeni Ahinya!
12 Ka po ni inyagori gi tuo moro, bed gadier ni Jehova ong’eyo gima ikaloe. Saye mondo okonyi bedo gi paro makare e wi tuoni. Kae to som Muma mondo ine weche mabeyo mokanoni e iye kanyo. Non ahinya-ahinya ndiko ma nyiso kaka Jehova ogeno jotichne. Timo kamano biro konyi neno kaka Jehova nyiso ng’wonone ne joma tiyone gi chunygi duto.—Zab. 84:11.
Puonj Manie Wach Nyasaye
it-1-E 816
Nyithi Kiye
Nikech ne yot ahinya mondo wich owil gi joma kamago, Jehova notiyo gi wach mar “nyithi kiye” mondo onyisgo kaka Jo-Israel ne nyalo bedo joma kare kata joma ok kare e wachno. Jo-Israel ne ritoga nyithi kiye e yo maber e kinde ma ne gin gi winjruok maber gi Nyasaye. Ka ne tim makare onge e piny, ne ijwang’o nyithi kiye, to mano ne nyiso kaka ogandano ne osebalo. (Za 82:3; 94:6; Isa 1:17, 23; Jer 7:5-7; 22:3; Eze 22:7; Zek 7:9-11; Mal 3:5) Joma ne sando nyithi kiye ne yudo kuong’ mowuok kuom Jehova. (Rap 27:19; Isa 10:1, 2) Jehova owuon wacho ni en e Jawar (Nge 23:10, 11), Jakony (Za 10:14), kendo Wuon (Za 68:5) joma kamago. En ema ong’ado bura e logi (Rap 10:17, 18), onyisogi ng’wono (Hos 14:3), okonyogi (Za 146:9), kendo orito ngimagi.—Jer 49:11.
Achiel kuom gik ma ifwenyogo kanyakla mar Jokristo madier en kaka gidewo mond liete kod nyithi kiye. Jakobo nondiko ne Jokristo niya: “Lamo maler kendo ma ok ochido e wang’ Nyasachwa kendo Wuoro en ma: ni warit nyithi kiye kod mond liete e chandruokgi, kendo waritre wawegi mondo kik wabed gi mbala moro amora moa e pinyni.”—Jak 1:27.
SEPTEMBA 16-22
MWANDU MA YUDORE E WACH NYASAYE ZABURI 85-87
Lamo Konyowa Nano
Be Imiyo Duong’ mar Jehova Onenre?
10 Mondo wami duong’ mar Nyasaye onenre, dwarore bende ni ‘waketre kuom lamo.’ (Rumi 12:12) Wuoyo gi Jehova e lamo en gima nyalorenwa kendo onego watim kamano mondo okonywa tiyone e yo moyiego. Kuom mano, wanyalo kwaye omiwa roho maler, yie momedore, teko mar kwedo tem, koda nyalo mar ‘puonjo kare wachno mar adiera.’ (2 Tim. 2:15; Math. 6:13; Luka 11:13; 17:5) Mana kaka nyathi ketore e lwet wuon mare mondo okonye, e kaka wabende waketore e lwet Wuonwa me polo, Jehova. Ka wakwaye mondo okonywa tiyone e okang’ maber chuth, wanyalo bedo gadier ni obiro timo kamano. Mad kik wapar ngang’ ni wachande! Kar mano, wati gi lamo e pake, goyone erokamano, kwaye mondo otawa, to moloyo, ka wan e bwo tem kata chandruok, kendo wakwaye mondo okonywa tiyone e yo mabiro miyo wakel duong’ ne nyinge maler.—Zab. 86:12; Jak. 1:5-7.
Kaka Jehova Dwokoga Lamo Magwa
17 Som Zaburi 86:6, 7. Daudi ma ne en jandik-zaburi ne ni gadier ni Jehova ne dwokoga lamoge. In bende inyalo bedo gadier gi wachno. Ranyisi mopogore opogore ma wasenono e sulani konyowa bedo gadier ni Jehova nyalo miyowa rieko kod teko mondo wanan. Onyalo tiyo gi Jokristo wetewa kata, onyalo tiyo gi joma ok lame mondo okonywa.
18 Kata obedo ni Jehova samoro ok bi dwoko lamowa kaka ne waparo, wan gadier ni obiro dwokogi. Obiro miyowa gima wadwaro, kendo e sa mowinjore ndi! Kuom mano, dhi nyime bedo gi yie ni Jehova biro riti e kindegi, kendo ni e piny manyien, obiro miyo ji duto “gik ma gidwaro.”—Zab. 145:16.
Puonj Manie Wach Nyasaye
it-1-E 1058 ¶5
Chuny
Tiyo ne Nyasaye gi “Chunyi Duto.” Mondo chuny ma sie oti maber, nyaka obed oduto, kata kamano, chuny mar ranyisi to nyaloga bedo nus nus. Daudi nolemo niya: “Miya chuny achiel mondo aluor nyingi.” Mano nyiso ni chuny ng’ato nyalo bedo nus nus kaluwore gi kaka owinjo. (Za 86:11) Ng’at ma kamano nyalo bedo ng’at ma “bagni,” ma ok tine Nyasaye gi chuny achiel. (Za 119:113; Fwe 3:16) Bende, ng’ato nyalo bedo gi “chuny ariyo” (tiende ni, chuny achiel gi chuny machielo), ka otemo tiyo ne ruodhi ariyo kata wacho gimoro to kare oparo timo gima opogore. (1 We 12:33; Za 12:2, weche moler piny) Yesu notamore wuondruok ma kamano.—Mat 15:7, 8.
SEPTEMBA 23-29
MWANDU MA YUDORE E WACH NYASAYE ZABURI 88-89
Loch mar Jehova e ma Berie Moloyo
Riw Loch mar Jehova Lwedo!
5 Nitie gima chielo ma nyiso ni Jehova e ma nigi ratiro mar bedo jaloch. Olocho e yo maber kendo ong’ado bura e yo ma kare. Jehova wacho niya: “An Jehova man gi ng’wono, mang’ado bura kare, matimo tim makare e piny: ni mar gigi e mamorgo.” (Yer. 9:24) Ok oti gi chike ma dhano morem oloso mondo okonye ng’eyo gik ma kare kod ma ok kare. Nikech ong’ado bura e yo ma kare, nomiyo dhano chike ma tayogi. ‘Tim matir kod ng’ado bura gin mise mar kom ruodhe’ omiyo, wan gadier ni chikene, puonjge, kod buche mong’ado ni kare. (Zab. 89:14; 119:128) Kata obedo ni Satan nohango ni loch mar Jehova rach, en owuon lochne osebedo gi mibadhi kendo pok okonyo dhano e yo moro amora.
Riw Loch mar Jehova Lwedo!
10 Jehova ok loch gi agoko kendo ok orid ne ji ngima. Oketo ji bedo thuolo kendo otimonegi gik ma miyo gibedo ma mor. (2 Kor. 3:17) Daudi nowacho niya: “Pak gi duong’ ni e nyime: teko gi mor ni e kare.” (1 We. 16:7, 27) Jandik zaburi moro miluongo ni Ethan bende nondiko niya: “Jo mong’eyo dwol mamorni gin johawi: giwuotho, A Jehova, e ler mar wang’i. Giyil ahinya kuom nyingi pile: kendo oting’gi malo kuom timni matir.”—Zab. 89:15, 16.
11 Paro matut kaka Jehova ber biro miyo wamed bedo gadier ni lochne ber. Timo kamano bende biro miyo wabed gi paro kaka mar jandik zaburi ma nowacho niya: “Bet e laru magi kuom odiechieng’ achiel ber moloyo bet kama chielo kuom higni alufu achiel.” (Zab. 84:10, Luo New Testament, 2003) Mano en adier. Nikech Jehova e Jachuechwa, ong’eyo gik ma miyo wabedo mamor kendo omiyowa gigo e yo mogundho. Gimoro amora monyisowa ni watim konyowa kendo ka watimogi to wabedo ma mor. Mano en adier kata obedo ni seche moko nyalo dwarore ni watuonre gik moko mondo watim kaka odwaro.—Som Isaiah 48:17.
Bed gi Yie Motegno Kuom Pinyruoth
14 We koro wawuo ane e wi singruok ma Nyasaye notimo gi Daudi. (Som 2 Samuel 7:12, 16.) Jehova notimo singruogno gi Daudi e kinde ma Daudi ne locho Jerusalem, kosingone ni Mesia ne dhi wuok e kothe. (Luka 1:30-33) Omiyo Jehova nomedo nyiso maler anyuola mar kodhino, konyiso ni koth Daudi ema ne dhi bedo gi ratiro mar bedo ‘wuon’ kom Pinyruodh Mesia. (Eze. 21:25-27) Kokalo kuom Yesu, loch mar Daudi “nobed nyaka chieng’.” Kuom adier, koth Daudi “nosik nyaka chieng’ kendo kom ruodhe nobedi kaka wang’ chieng’.” (Zab. 89:34-37) Loch mar Mesia ok nobedi gi mibadhi moro amora kendo nokel gueth mosiko nyaka chieng’!
Puonj Manie Wach Nyasaye
“In Kendi Ema Imakori Chuth gi Jogi”
4 “E Ndiko mag dho-Hibrania, ‘makruok chuth gi ng’ato’ en dhi nyime kecho ng’ato ka inano kode maok ijwang’e ma nyaka chop kama weche timorene kaka dwarore. Ok en mana bedo ng’at migeno. Ng’at migeno nyalo timo mana gima dwarore mondo ochop migawo moro momiye. To mopogore gi mano, ng’at ma makore chuth gi nyawadgi timo kamano nikech ohere. E wi mano, nitie gik maonge ngima ma bende iwacho ni gin gik minyalo gen. Kuom ranyisi, nikech dwe ok bare e kindene, jandik-zaburi nowacho ni dwe en janeno migeno koluongo dwe ni “janeno ma jadimb wach e polo.” (Zaburi 89:37) Kata obedo ni dwe en gima igeno, ok nyal wach ni dwe makore gi ng’ato. Nikech ang’o? Ng’at ma makore chuth gi nyawadgi timo kamano nikech ohero nyawadgino, to onge kaka gima onge ngima nyalo hero gimoro.
5 E i Muma, makruok chuth gi ng’ato en kido ma ng’ato nyiso nikech hera. En kido ma ng’ato nyiso mana ng’at mong’eyo maber. Ng’at man gi kidono makore gi nyawadgi kinde duto. Kidono ok chal gi apaka ma biro to lal kaluwore gi yamo. Mopogore gi mano, ng’at ma omakore chuth gi nyawadgi timo kamano kata ka pek maduong’ manade oriwo e nyime.
SEPTEMBA 30–OKTOBA 6
MWANDU MA YUDORE E WACH NYASAYE ZABURI 90-91
Gen Kuom Jehova Mondo Idag Aming’a
Gik ma Dhano Osetemo Timo Mondo Gidag Aming’a
Josayans moko wacho ni thieth ma itimo ne ji mondo kik giti ok nyal miyo gidag aming’a moloyo higni ma dhano nyalo dakgo e kindegi. En adier ni chakre higni mag 1800 e ndalowagi, higni ma dhano dakgo osebedo ka medore. Mano en nikech tinde ji orito weche mag ler, nitie yore mathoth mag geng’o tuoche ma landore, kendo nitie yedhe ma tieko tuoche moko. Josayans moko wacho ni dhano ok nyal dak mokalo higni ma ginyalo dakgo e kindegi.
Higni 3,500 mokalo, Musa ma ne en achiel kuom joma nondiko Muma nowacho niya: ‘Ndalo mag hikwa gin higni 70, to samoro gichopo higni 80 nikech teko ma ng’ato nigo; to sungagi en mana chandruok gi parruok; nimar gikadho piyo.’ (Zaburi 90:10) Kata obedo ni dhano timo kinda mondo gimed higni ma ginyalo dakgo, higni ma wadakgo pod en aena mana kaka Musa nowacho.
Mopogore gi dhano, nitie le moko ma nyalo dak kuom higni miche modhuro, kendo nitie yiende moko ma nyalo dak kuom higni alufe moko. Ka wapimo higni ma dhano dakgo kod higni ma le gi yiende ma kamago dakgo, chunywa nyalo chandore mi wapenjre ni, ‘Be nochuewa mondo wadag mana kuom higni 70 kata 80 kende?’
wp19.1 5, sanduku
Nyasaye Nyinge Ng’a?
Mano penjo mosechando ji mang’eny. Samoro in be isepenjori kamano. Wanyalo keto penjono kama: Ka piny gi polo kod gik moko duto ma ni e igi ne ochue, kare Nyasaye ma nochueyogi to noa kure?
Josayans oyie ni piny kod gik ma waneno e kor polo ne nigi chakruokgi. To mano e gima wes mokwongo tik-tik e Muma bende wacho. Owacho ni: ‘Kar chakruok, Nyasaye nochueyo polo gi piny.’—Chakruok 1:1.
Piny kod gik ma waneno e kor polo ne ok ochueyore kendgi; onge kaka ne ginyalo chakore achaka ma ok olosgi. Pile, gimoro ok nyal wuok kuom gima onge. Ka po ni ne onge gimoro amora ka ne polo gi piny pok obetie, to kare di koro polo gi piny onge nyaka sani. Kata obedo ni samoro winjo tiend wachni nyalo bedo matek, mondo ne polo gi piny bedie, nyaka ne bedie ng’ato ma ok ne gi wang’ ma nolosogi. Jehova Nyasaye ma nyaka nene, wuon teko duto, kendo ma ok ne giwang’ e Jal ma noloso polo gi piny.—Johana 4:24.
Muma wacho kuom Nyasaye niya: ‘Ka ne pok ogol gode madongo e i piny, kata ka pok nisechueyo lowo gi piny, in e Nyasaye ma nyaka nene kendo nyaka chieng’.’ (Zaburi 90:2) Mano nyiso ni Nyasaye osegabetie kinde duto. Kae to, e kar chakruok, nochueyo gik ma waneno e kor polo, to kod pinywani bende.—Fweny 4:11.
Kaka Hera Konyowa Loyo Luoro
16 Satan ong’eyo ni wahero ngima ahinya. Owachoga ni wanyalo timo gimoro amora, moriwo nyaka ketho winjruokwa gi Jehova, mana ni mondo wares ngimawa ma sani. (Ayub 2:4, 5) To mano doko miriambo maduong’! Nikech Satan e “jal ma nigi nyalo mar kelo tho,” otemoga tiyo gi luoro tho mondo omi wajwang’ Jehova. (Hib. 2:14, 15) Nitie kuonde ma Satan osetiyoe gi joge e bwogo jo Jehova ni ka ok gikwedo yiegi, to gibiro negogi. Kata, Satan nyalo tiyo gi tuoche kod weche mag thieth e miyo waketh chike mag Jehova. Lakteche kod joutewa ma ok gin Joneno, nyalo thung’owa ni omedwa remo, to mano en ketho chik Nyasaye. Kata, ng’ato nyalo thung’owa mondo waluw kit thieth ma tuomore gi puonj mag Muma.
17 Kata obedo ni ok wadwar tho, wang’eyo ni Jehova ok bi weyo herowa kata ka watho. (Som Jo-Rumi 8:37-39.) Sama osiepe Jehova otho, oparogiga mana ka gima pod gingima. (Luka 20:37, 38) Ogombo ahinya chierogi. (Ayub 14:15) Jehova osechulo nengo matek ahinya mondo ‘wabed gi ngima ma nyaka chieng’.’ (Joh. 3:16) Wang’eyo ni Jehova oherowa ahinya kendo odewowa. Kuom mano, kar weyo Jehova sama watuore kata sama tho ochomowa, ber ka wagene mondo en e ma ohowa, omiwa rieko, kendo omiwa teko. Mano e gima Valérie kod jaode notimo.—Zab. 41:3.
Puonj Manie Wach Nyasaye
Be Ng’ato ka Ng’ato Nigi Malaika ma Rite?
Muma ok puonj ni ng’ato ka ng’ato nigi malaikane ma rite. En adier ni kinde moro Yesu nowacho niya: “Kik ucha achiel kuom joma tindogi [jopuonjre Kristo], nimar awachonu ni, malaike mekgi e polo neno wang’ Wuora manie polo kinde duto.” (Mathayo 18:10) Gima Yesu ne wacho kanyo en ni malaike nono ahinya gik ma timore e ngima ng’ato ka ng’ato ma en japuonjre Yesu, to ok ni ng’ato ka ng’ato nigi malaikane ma rite. Kuom mano, jotich Nyasaye madier ok tim gik ma nyalo hinyo ngimagi ka giparo ni malaika mar Nyasaye biro ritogi.
Be mano koro nyiso ni malaike ok kony dhano? Ooyo. (Zaburi 91:11) Jomoko ni gadier ni Nyasaye oseritogi kendo osetayogi kotiyo gi malaika. Achiel kuom joma neno kamano en Kenneth ma ne osewuo kuome e sula mokwongo. Kata obedo ni ok wanyal ng’ado bura, samoro mano notimorene adier. Joneno mag Jehova kinde mang’eny neno gik ma nyiso ni malaike tayogi seche ma gin e tijgi mar lando wach maber. Nikech ok wanyal neno malaika gi wang’wa, ok wanyal wacho ni Nyasaye tiyo kodgi e okang’ maromo nade mondo gikony ji. Kata kamano, wagoyo ne Nyasaye erokamano kuom tiyo gi malaike e konyowa.—Jo-Kolosai 3:15; Jakobo 1:17, 18.
OKTOBA 7-13
MWANDU MA YUDORE E WACH NYASAYE ZABURI 92-95
Tiyo ne Jehova e Ngima Maberie Moloyo!
Un Rowere, Be Un gi Chenro mag Tiyo ne Nyasaye?
5 Gima duong’ momiyo waketo chenro mag tiyo ne Jehova en ni mondo wagone erokamano nikech hera moherawago kod gik mabeyo ma otimonwa. Jandik zaburi nowacho kama: “Goyo erokamano ni Jehova ber . . . Nimar in, Jehova, isemiya mor kuom tichni: abiro wuo gi mor nikech tich lweti.” (Zab. 92:1, 4) Kaka ng’at ma pod rawera, par ane gik moko duto ma Jehova osemiyi. Jehova osemiyi ngima, yie ma in-go, Muma, kanyakla, kod geno maber mar kinde mabiro. Keto motelo gik motudore gi lamo Nyasaye en yo achiel mar goyonego erokamano kendo mano miyo wasudo machiegni kode.
En Ng’a ma Chiko Pachi?
8 Mana kaka janyuol maber, Jehova dwaro ni nyithinde obed gi ngima maber. (Isa. 48:17, 18) Nikech mano, ochiwo puonj kod chike ma tayo kaka ji onego odagi kod gik ma onego gitim ne jomamoko. E weche kaka mago, doher ni wabed gi paro ma chal gi mare. Mano ok en ridonwa ngima, kar mano, omiyo pachwa yawore mondo wabed mariek kendo watim yiero mabeyo moloyo. (Zab. 92:5; Nge. 2:1-5; Isa. 55:9) Bende, bedo gi paro ma chal gi mar Jehova miyo watimo yiero ma kelonwa mor ka e sechegogogo pod wan gi thuolo mar yiero kido ma dwaher bedogo. (Zab. 1:2, 3) Kuom adier, bedo gi paro kaka mar Jehova en gima konyo kendo mowinjore!
Jehova Nyasachi Ogeni Ahinya!
18 Kaka wamedo bedo moti, pod onego wabed gadier ni Jehova nigi tich modwaro ni watimne. (Zab. 92:12-15) Yesu nopuonjowa ni kata obedo ni koro ok wanyal timo mathoth kaka dwaher, Jehova pod mor gi gimoro amora ma wanyalo timone e chalwano. (Luka 21:2-4) Omiyo, ket pachi mana kuom gik ma pod inyalo timo. Kuom ranyisi, inyalo lando ne jomamoko wach Jehova, inyalo lemo ne Jokristo weteni, kendo inyal jiwo jomoko mondo gimed chung’ motegno. Jehova neni kaka jatich wadgi, ok nikech gik mitimo, to nikech iikori luwo kaka ochiki.—1 Kor. 3:5-9.
Puonj Manie Wach Nyasaye
‘Yaye Mwandu mar Nyasaye gi Riekone Tut Manade!’
18 Ne ane kaka jaote Paulo nonyiso kaka rieko mar Jehova en rieko makende. Nowacho niya: “Yaye mwandu mar Nyasaye, gi riekone gi ng’eyo mare! Gitut manadi! Yaye buche! Gitamo dhano fwenyo. Yaye yorene! Gidhiero dhano ng’eyo!” (Jo Rumi 11:33) Kuom chako ndikono kowacho ni “Yaye,” Paulo ne nyiso kaka ne ohum nono nikech rieko mar Nyasaye. Wach ma ne otiyogo e dho-Grik ma wacho ni ‘tut’ otudore gi “bur matut” maonge giko. Nikech mano, wechene miyo wabedo gi picha maler e pachwa. Sama waparo e wi rieko mar Jehova, chalo ka gima wang’iyo bur moro matut maonge giko, bur malach maonge tong’ne kendo ma ng’eyo chal mare ohewo pach dhano. (Zaburi 92:5) Mano kaka rieko mar Nyasaye odhiero pach dhano! Donge mano miyo wawuoro ndi?
OKTOBA 14-20
MWANDU MA YUDORE E WACH NYASAYE ZABURI 96-99
“Landuru Wach Maber”!
w11-SW 3/1 6 ¶1-2
Wach Maber En Ang’o?
JOKRISTO onego oland “wach maber mar pinyruoth” kuom nyiso jomamoko ni Pinyruodh Nyasaye en sirkal ma biro locho e yo makare e wi piny mangima. Kata kamano, “wach maber” itiyogo e yore mamoko bende e Muma. Kuom ranyisi, iwuoyo kuom ‘wach maber mar resruok’ (Zaburi 96:2); “wach maber mar Nyasaye” (Jo-Rumi 15:16); kod “wach maber e wi Yesu Kristo.”—Mariko 1:1.
E yo machuok, wach maber oriwo weche duto ma Yesu nowacho kod ma jopuonjrene nondiko. Ka ne Yesu pok odok e polo, nonyiso jopuonjrene kama: “Kuom mano, dhiuru e ogendni duto mondo ulok ji obed jopuonjrena, kubatisogi e nying Wuoro, gi Wuoyi, gi roho maler, kendo kupuonjogi timo gik moko duto ma asechikou.” (Mathayo 28:19, 20) Omiyo, tich ma Jokristo timo ok en mana nyiso ji wach Pinyruoth kende; to gitimo duto ma ginyalo mondo gilok ji obed jopuonjre.
Ang’o Mabiro Timore Chieng’ Bura?
Mana kaka picha manie bat korachwich nyiso, ji mang’eny paro ni Chieng’ Bura dhano tara gi tara biro chung’ e nyim kom duong’ Nyasaye mondo ong’adnegi bura kaluwore gi gik ma ne gitimo chon—ka moko yudo ngima mochwere e polo to moko iwang’o e mach maok tho. Kata kamano, Muma nyiso ni Chieng’ Bura en kinde ma Nyasaye biro waroe dhano kuom timbe maok kare duto. (Zaburi 96:13) Nyasaye oseyiero Yesu mondo obed Jang’ad-Bura mabiro dwoko weche obed makare ne dhano.—Som Isaiah 11:1-5; Tich Joote 17:31.
Kuwe mar Higini Gana Achiel Kadhi Nyime!
18 Winjruok majaberni ne okethore kane Satan owuondo dhano ma ong’anyo ne loch mar Jehova. Kata kamano chakre higa 1914, Pinyruodh Mesia osebedo ka kawo okang’ mar dwoko chwech duto obed e achiel. (Efe. 1:9, 10) E kinde Loch mar Higini Gana Achiel, gik mabeyo mapod ‘ok wane’ gie sani biro timore gadier. Kae to “giko” nochopi, tiende ni giko mar Loch mar Kristo mar Higini Gana Achiel. To bang’ mano, ang’o mabiro timore? Kata obedo ni Yesu ne omi “teko duto e polo gi piny,” en ok olar telo. Ok en gi paro mar kawo kar Jehova. Nikech Yesu owuon en jal mabolore, noduok loch gi teko “e bwo Jal ma noketo gik moko duto e bwoye.” Yesu biro tiyo gi duong’ gi loch makende ma ne omiyeno mondo omigo ‘Nyasaye Wuoro duong’.’—Math. 28:18; Fili. 2:9-11.
19 Gie kindego, biro yudo ka joma odak e piny osedwok e ngima makare chuth. Gibiro luwo ranyisi mar Yesu kuom bolruok kendo yie ni Jehova e Jaloch e wi gik moko duto. Gibiro bedo gi thuolo mar nyiso ni giyie gi loch mar Jehova kuom chung’ motegno e kalo tem mogik. (Fwe. 20:7-10) Bang’e, chwech duto mong’anyo tiende ni dhano kod jochiende, ibiro tiek nyakachieng’. Mano kaka kindego nobed kinde mag mor mogundho! Chwech duto manie bwo loch Jehova e polo koda e piny, biro mor pake, e kinde ma Jehova nobed “duto kuom duto.”—Som Zaburi 99:1-3.
Puonj Manie Wach Nyasaye
it-2-E 994
Wer
Zaburi mang’eny wuoyo e wi “wer manyien,” to Isaya kod jaote Johana bende ne owuoyo e wechego. (Za 33:3; 40:3; 96:1; 98:1; 144:9; 149:1; Isa 42:10; Fwe 5:9; 14:3) Ka wanono thoth ndiko molworo weche motigo ni “wer manyien,” wafwenyo ni nitie gimoro manyien motimore ma otudore gi ratiro ma Jehova nigo mar locho. Zaburi 96:10 wacho niya: “Jehova osebedo Ruoth.” Nenore ni wer manyienno wuoyo e wi yo manyien ma Jehova lochogo kod kaka mano otudore gi lochne e polo kod piny.—Za 96:11-13; 98:9; Isa 42:10, 13.
OKTOBA 21-27
MWANDU MA YUDORE E WACH NYASAYE ZABURI 100-102
Go Erokamano Nikech Hera Mosiko mar Jehova
Kaka Inyalo Ikori ne Batiso
18 Hero Jehova e gima ber mogik minyalo timo. (Som Ngeche 3:3-6.) Herano biro konyi nyagori maber sama iromo gi pek moko. Muma wacho ni Jehova ohero jotichne gi hera mosiko. Mano en hera motegno ma ok dog chien kendo ma ok jogi. (Zab. 100:5) Nochueyi e kido mar Nyasaye. (Cha. 1:26) Omiyo, ere kaka in bende inyalo bedo gi hera ma kamano?
19 Mokwongo, bed gi chuny mar goyo erokamano. (1 The. 5:18) Pile ka pile penjri kama: ‘Ere kaka Jehova osenyiso ni ohera?’ Kae to lam Jehova kigoyone erokamano achiel kachiel kuom gik mosetimoni. Mana kaka jaote Paulo, tem mondo ine yore ma Jehova nyisogo herane kaka gik motimoni in iwuon. (Som Jo-Galatia 2:20.) Penjri kama: ‘Be agombo nyise ni an bende ahere?’ Hera miherogo Jehova biro konyi mondo idhi nyime kwedo tembe, kendo nyagori maber gi pek miromogo. Hera ma kamano biro konyi mondo imakri gi chenro miseketo mar gik motudore gi lamo mondo isik kinyiso Wuonu manie polo pile ka pile ni ihere.
“Sikuru ka Urito Pachu, Kendo Nenuru!”
10 Moko kuom gik ma nyaka watang’go oriwo mila mag kisera gi ng’at ma ok wakendorego, madho kong’o mokalo tong’, chiemo mokalo tong’, wacho weche ma chwoyo jomamoko, kaachiel gi neno programbe ma nyiso timbe gero, ponografi, kod gik ma kamago. (Zab. 101:3) Jachien ma en jasikwa manyoga thuolo moro amora mondo omi waketh winjruokwa gi Jehova. (1 Pet. 5:8) Ka ok watang’, Satan nyalo pidho kido maricho e chunywa kata e pachwa. Kidogo gin kaka nyiego, miriambo, ich-lach, sigu, wich-teko, kod sadha. (Gal. 5:19-21) Mokwongo okwongo, kido marichogo samoro ok nyal chikowa, kata kamano, ka ok wagologi mapiyo ginyalo dongo ma gibed kaka buya ma nigi sum, mi gikone girwakwa e chandruok.—Jak. 1:14, 15.
Be Ibiro Winjo Siem mag Jehova Monyis Ayanga?
7 Bedo mabor gi jopuonj ma miriambo dwaro ni watim ang’o? Ok wabi rwakogi e utewa kata mosogi. Bende, ok wabi somo bugegi, ng’iyo program maggi e televison, somo wechegi e Intanet kata temo chiwo pachwa kuno. Ang’o momiyo wang’ado mar chung’ motegno kamano? En nikech hera. Wahero ‘Nyasaye ma wuon adier,’ kendo ok wadwar winjo puonj ma kwedo Wachne ma en adier. (Zab. 31:5; Joh. 17:17) Bende, wahero riwruok mar oganda Jehova, ma kokalo kuome wasepuonjore adiera mabeyo ahinya—moriwo nying Jehova koda tiend nyingno, dwaro mar Nyasaye ne piny, chal mar jomotho, koda geno mar chier. Be iparo kaka ne iwinjo kane ikwongo puonjri adierago koda mamoko mabeyo? Kare, ang’o ma dimi iwe mondo onjawi gi ng’at moro amora maketho nying riwruok ma ne omiyo ing’eyo adierago?—Joh. 6:66-69.
8 Kata jopuonj miriambo wach ang’o, ok wabi luwogi ngang’! Ang’o mad teri e sokini motwo mana mondo owuondi kendo chunyi onyosre? Kar mano, weuru mondo wang’ad mar chung’ motegno gi Jehova koda gi riwruok mare, ma kuom higini mang’eny, osebedo ka miyowa pi maler mag adiera mowuok ei Wach Nyasaye, ma tiekonwa riyo kendo duogo chunywa.—Isa. 55:1-3; Math. 24:45-47.
Puonj Manie Wach Nyasaye
it-2-E 596
Winyo Miluongo ni Mbusi
Sama mbusi oseyieng’ maber, ofuyoga kae to odhi kar kende, okulo wiye piny kendo osoyo wiye e gokene ma ok okithni, to ma nyalo miyo ng’at man mabor opar ni en kidi moro ma rachar. Winyono nyalo bedo kamano kuom seche mang’eny, to mano e momiyo jandik zaburi notiyo gi ranyisi mar winyono e lero kaka nokuyo ka nowacho niya: “Achalo gi mbusi modak e thim.” (Za 102:6) “Thim” miwuoye kae ok en mana kama otwo, to en kama dhano ok odakie kaka kuonde motimo thidhiya. Nitie kinde ma mbusi mang’eny dhiga e hoho man yo nyandwat mar Jordan. Nitie kit mbusi adek e piny Israel. Mong’ere ahinya en mbusi ma rachar (Pelecanus onocrotalus); kata kamano, mbusi miluongo ni Dalmatian (Pelecanus crispus) kod ma dende biro makwar kwar (Pelecanus rufescens) to ok nerega ahinya.
Mbusi oheroga bedo kuonde ma ok opur kendo ma dhano ok chandgie. Kuondego e ma gilose utegi, gipidhe nyithindgi, kendo gininde ka gisechiemo. Nikech winyono ohero bedo kar kende, itiyo kode e Muma e yor ranyisi kiwuoyo kuom ng’at mokuyo. Ka ne Isaya koro kethruok mar Edom, nowacho ni mbusi ne dhi dak e pinyno. (Isa 34:11) Zefania bende nokoro ni mbusi ne dhi dak e kind sirni madongo mag Nineve, konyisogo kaka ne idhi keth Nineve chuth kendo onge dhano ma ne dhi dak kuno.—Zef 2:13, 14.
OKTOBA 28–NOVEMBA 3
MWANDU MA YUDORE E WACH NYASAYE ZABURI 103-104
Jehova Ong’eyo ni “Wan Mana Buru”
Luw Ranyisi mar Jehova—Bed Ng’at Matur
5 Nikech Jehova obolore kendo okecho ji, mano chwalega mondo obed ng’at matur. Kuom ranyisi, bolruokne nonenore ayanga e kinde ma nochiegni ketho joma richo ma nodak Sodom. Jehova notiyo gi malaikene mondo onyis Lut ni oring odhi e gode. Lut noluor dhi e gode. Omiyo, nokwayo Jehova mondo oyiene dhi gi joode e taon moro matin miluongo ni Zoar ma bende ne onego okethi. Jehova ne nyalo chuno Lut mondo oluw mana kaka nosechike. Kata kamano, Jehova noyie ne Lut mondo oring odhi Zoar, kendo ne ok oketho taondno. (Cha. 19:18-22) Higni mang’eny bang’e, Jehova nokecho Jo-Nineve. Nooro janabi Jona mondo odhi oland kum ma ne dhi yudo dalano kod joma richo duto ma ne nie dalano. Kata kamano, ka ne Jo-Nineve oloko chunygi ma gia e richo, Jehova nokechogi kendo ne ok oketho dalano.—Jona 3:1, 10; 4:10, 11.
Gen Kuom Jehova Kaka Samson Notimo
16 Kata obedo ni Samson noyudo chandruoge malit nikech yiero marach ma notimo, ne ok oweyo tiyo ne Jehova. Ka po ni watimo yiero moro marach kendo omiwa siem kata walalo migawo moro ma ne wan-go, ok onego wawe tiyo ne Jehova. Par ni, Jehova ok jwang’waga. (Zab. 103:8-10) Kata obedo ni wajoketho, Jehova pod nyalo miyowa teko mar timo dwache mana kaka notimo ne Samson.
17 Ne ane ranyisi mar owadwa moro miluongo ni Michael. Ne en jakony-tich kendo painia mapile. Kata kamano, notimo yiero moro marach ma nomiyo olalo migepe ma ne en-go e kanyakla. Owacho kama: “Chop kindego, weche ne dhina maber ahinya e tij Jehova. Kae to apoya nono, nalalo migepe ma ne an-go kendo nachako neno ni onge gima nanyalo timo e tij Jehova. Nang’eyo ni Jehova ne ok nyal jwang’a, kata kamano, nawuoro ahinya ka be winjruokna kode ne dhi bedo maber kaka chon, kata ka be nanyalo tiyone kaka natiyonega chon.”
18 Gima ber en ni Michael ne ok oweyo tiyo ne Jehova. Omedo wacho kama: “Nachako loso winjruokna gi Jehova kuom wuoyo kode e lamo pile, puonjruok Muma, kendo paro matut kuom gik ma ne apuonjora.” Bang’ kinde, Michael nochako yudo migepe kendo e kanyakla. Sani koro en jaduong’-kanyakla kendo painia mapile. Owacho kama: “Kony kod jip moa kuom jodongo nomiyo aneno ni Jehova pod ohera. Sani koro anyalo timo migepe ma an-go e kanyakla gi chuny maler. Wachni nopuonja ni Jehova biro ng’wono ne ng’ato ang’ata moloko chunye gadier.” Wanyalo bedo gadier ni Jehova biro tiyo kodwa kendo obiro guedhowa kata ka watimo ketho moro, tek mana ni watimo duto ma wanyalo mondo warie yorewa kendo wadhi nyime gene.—Zab. 86:5; Nge. 28:13.
Inyalo Chopo Gombogi mag Tiyo ne Nyasaye
2 Ka po ni sani nitie gimoro migombo timo e tij Nyasaye to ok yotni chopo gombonino, kik chunyi nyosre kata matin. Thothne kata mana chopo gombo moro matin dwaroga thuolo kod kinda. Omiyo, nikech pod itimo kinda mondo ichopo gombonino, mano nyiso ni ikawo mapek winjruok ma in-go gi Jehova, kendo ni diher miye gima berie moloyo. Jehova mor ahinya gi kinda mitimo. Ok ogen ni ibiro timo mathoth mohingo nyaloni. (Zab. 103:14; Mika 6:8) Omiyo, gomb gima inyalo chopoe mayot ka luwore gi nyalo mari. Bang’ yiero gima idwaro timo, ang’o minyalo timo mondo ichope? Wawuo ane e wi paro moko ma nyalo konyi.
Puonj Manie Wach Nyasaye
Teko mar Chweyo Gik Moko—“Nochweyo Polo gi Piny”
18 Ang’o ma chwech Jehova puonjowa e wi tekone? Wahum nono ka waparo gik mopogore opogore mogundho ma Jehova ochweyo. Jandik-zaburi moro ne opako Jehova niya: “A Jehova tije magi ng’eny ahinya! . . . Mwanduni opong’o piny.” (Zaburi 104:24) Donge wechego gin adier? Kit gik mangima ma josayans osekwano e piny okalo milion achiel. Kata kamano, wachore ni ginyalo chopo milion 10, kata chopo milion 30, kata bedo mang’eny mokalo kanyo. Kata ng’at molony e loso gik moko nyalo chopo kama oneno ni riekone osechopo e giko kendo onge gimoro manyien monyalo wuokgo. Mopogore gi dhano, Jehova to riekone ok rum nimar en gi nyalo mar chweyo gik moko manyien nyaka chieng’.