Nonro mag Chenro mar Chokruok mar Ngimawa kod Tijwa
© 2024 Watch Tower Bible and Tract Society of Pennsylvania
NOVEMBA 4-10
MWANDU MA YUDORE E WACH NYASAYE ZABURI 105
“Obiro Paro Singruok ma Notimo Nyaka Chieng’”
Ang’o ma Wanyalo Timo Mondo Wamed Bedo Gadier ni Jehova Biro Kelo Piny Manyien Mosingo?
11 Ne ane moko kuom gik ma Jehova nosingo ne jotichne e kinde machon, ma gin gik ma ne nenore e wang’ dhano ni ne ok nyal chopo. Jehova nosingo ne Ibrahim gi Sara ni ne gidhi nyuolo nyathi ma wuoyi kata obedo ni ne giseti. (Cha. 17:15-17) Bende, nonyiso Ibrahim ni nyikwaye ne dhi dak e piny Kanaan. Kuom higni mang’eny ma Jo-Israel ma ne gin nyikwa Ibrahim obedoe wasumbni e piny Misri, ne nyalo nenore ka gima singono ne ok nyal chopo. Kata kamano, singono nochopo. Higni moko bang’e, Jehova nosingo ne Elizabeth ma noseti ni nodhi nyuolo nyathi. Bende, nonyiso Maria ma ne en nyako ma silili ni nodhi nyuolo wuoyi ma wachne nosesing higni alufe motelo e puodho mar Eden, kendo singono nochopo!—Cha. 3:15.
12 Wanyalo tego yie ma wan-go kuom teko ma Jehova nigo mar kelo piny manyien ka waparo kuom singo mamoko ma nochopo. (Som Joshua 23:14; Isaya 55:10, 11.) Timo kamano konyowa mondo wabed moikore konyo jomamoko neno ni singo mar piny manyien ok en aena lek kata sigana moro mochuogi. Jehova owuon nowacho kama e wi polo manyien gi piny manyien: “Wechegi gin weche migeno kendo madier.”—Fwe. 21:1, 5.
it-2-E 1201 ¶2
Wach
Chuech duto mag Nyasaye, bed ni gin gik mangima kata gik ma onge ngima, itayo gi wachne kendo onyalo tiyo kodgi e chopo dwache. (Za 103:20; 148:8) Wach Nyasaye inyalo gen; wi Nyasaye ok nyal wil gi timo gik moko duto ma osingo. (Rap 9:5; Za 105:42-45) Jehova owuon nowacho ni Wachne biro “siko nyaka chieng’”; ok obi dok ire ma ok ochopo dwache.—Isa 40:8; 55:10, 11; 1Pe 1:25.
Puonj Manie Wach Nyasaye
w86-SW 11/1 19 ¶15
Gik ma Rowere Nyalo Timo Mondo Joodgi Odag gi Kuwe kod Mor
15 “Ne girido tiendene gi nyororo, kendo ne gitweyo ng’ute gi chumbe; nyaka nochopo kinde ma weche ma nokoro nochopo kare, kendo wach Jehova e ma nopwodhe.” (Zaburi 105:17-19) Josef nosandore kuom higni 13 ka en e tuech nyaka e kinde ma Jehova nochopo singone. Gik ma ne okaloego nomedo mana pwodhe. Kata obedo ni Jehova ne ok okelone chandruogego, noweyo mondo gibedie kuom kinde. Be Josef ne dhi geno “wach Jehova” sama noromo gi tembe mang’eny kamano? Be ne odhi weyo mondo kido mabeyo ma ne en-go kaka horuok, bolruok, yie motegno, kod sinani okonye chopo migawo matek ma ne en-go? Tembe ma Josef nokaloe inyalo pim gi mach mipwodhogo dhahabu. Ne gimiyo obedo gi yie motegno, kendo Jehova nomedo here ahinya mi otiyo kode e migepe mamoko bang’e.—Chakruok 41:14, 38-41, 46; 42:6, 9 .
NOVEMBA 11-17
MWANDU MA YUDORE E WACH NYASAYE ZABURI 106
“Wigi Nowil gi Nyasaye ma Noresogi”
“Ng’a Man Kor Jehova”?
13 Boche, mil polo, kod honni mamoko ma Nyasaye notimo nomiyo Jo-Israel obedo ma luor. Ne gikwayo Musa mondo odhi owuo gi Jehova e logi e Got Sinai, kendo Musa noyie. (Wuok 20:18-21) Musa nobudho ahinya e wi got. Be dibed ni Jo-Israel ne neno ni gidiwo e pap nikech jatendgi ma ne gigeno koro ne onge? Nenore ni ne gidwa keto yiegi ahinya kuom Musa, ma ka Musa ne onge to yiegi ne dok chien. Ne gichako parore ma ginyiso Harun niya: ‘Losnwa nyasaye ma notelnwa nikech Musani, jal ma nogolowa e piny Misri, wakia kaka [wechene] obet.’—Wuok 32:1, 2.
Puonj Manie Wach Nyasaye
w06-SW 7/15 13 ¶9
Puonj Mayudore e Buk mar Adek kod mar Ang’wen mar Zaburi
106:36, 37. Ndikogi nyiso tudruok ma nitie e kind lamo sanamu kod chiwo misengni ne jochiende. Mano nyiso ni yot mondo jochiende ochik ng’at ma tiyo gi sanamu. Muma jiwowa kama: “Tang’uru ne sanamu.”—1 Johana 5:21.
NOVEMBA 18-24
MWANDU MA YUDORE E WACH NYASAYE ZABURI 107-108
“Gouru ne Jehova Erokamano Nimar Ober”
w07-SW 4/15 20 ¶2
Kanyakla Mondo Opak Jehova
2 Kanyakla ok en kama ji romoe aroma. Bende, ok en kama jogweng’ romoe mondo gigo mbaka e wechegi giwegi, kata kama ji mopogore opogore romoe mondo giwuo e wi tuke kata gik mamoko ma morogi. Kar mano, gima duong’ momiyo ji romoga e chokruok mar kanyakla en ni mondo gipak Jehova Nyasaye. Mano e wach maduong’ momiyo ji osebedo ka romo e chokruoge. Zaburi 35:18, wacho kama: “Abiro goyoni erokamano e chokruok maduong’, anapaki e dier oganda maduong’.” Bende, Zaburi 107:31, 32 jiwowa niya: “Ji mondo ogo ne Jehova erokamano nikech herane osiko, kendo nikech gik madongo mosetimo ne dhano. Onego gihul duong’ne e chokruok mar joge.”
Go ne Jehova Erokamano Kuom Gueth Mosemiyi
4 Mondo wabed gi chuny mar goyo erokamano kendo siko gi chunyno, onego wayie ni Jehova oseguedhowa ahinya kendo paro kuom wachno matut. E wi mano, onego wanon gik mosetimo ma nyiso ni oherowa. Kane jandik-zaburi moro otimo kamano, nowuoro ahinya gik mathoth kendo mabeyo ma Jehova nosetimo.—Som Zaburi 40:5; 107:43.
Puonj Manie Wach Nyasaye
it-2-E 420 ¶4
Moab
Bang’e ka ne Daudi koro locho, ne nitie lweny e kind Jo-Israel kod Jo-Moab. Jo-Israel noloyo Jo-Moab kendo ne gichuno Jo-Moab mondo ochul osuru ne Daudi. Nyalo bedo ni bang’ lwenyno, ne oneg jolweny mang’eny mag Moab. Nenore ni Daudi nochikogi mondo ginind piny ka giriedo e lainde adek, lainde ariyo mag joma noriedogo nonegi, to lain achiel ne ok onegi. (2Sa 8:2, 11, 12; 1We 18:2, 11) Samoro e lwenyno, e ma Benaya wuod Jehoyada “ne onego yawuoyi ariyo ma ne gin nyithind Ariel Ja-Moab.” (2Sa 23:20; 1We 11:22) Yo ma Daudi noloyogo Jo-Moab nochopo weche ma Balaam nokoro chiegni higni 400 niya: “Sulwe nobi koa kuom joka Jakobo, kendo ludh duong’ nobi koa kuom Jo-Israel. Obiro baro pat wang’ Moab kendo obiro baro wi jo ma rori.” (Kwa 24:17) Nenore bende ni jandik zaburi ne wuoyo e wi lwenyno, ka nowacho ni Nyasaye ne neno Moab kaka “besen [mare] mar lwok.”—Za 60:8; 108:9.
NOVEMBA 25–DESEMBA 1
MWANDU MA YUDORE E WACH NYASAYE ZABURI 109-112
Kaka Inyalo Riwo Ruodhwa Yesu Lwedo
w06-SW 9/1 13 ¶6
Puonj Mayudore e Buk mar Abich mar Zaburi
110:1, 2—En ang’o ma Yesu Kristo ma en Ruodh Daudi ne timo ka ne obet e bad Nyasaye korachwich? Bang’ ka ne osechier Yesu modhi e polo, ne orito nyaka higa mar 1914 mondo e ka ochak locho kaka Ruoth. E kindeno, Yesu ne locho e wi jolupne mowal ka otayogi e tij lendo kod loko ji obed jopuonjre, kendo ikogi mondo gibi giloch kode e Pinyruodhe.—Mathayo 24:14; 28:18-20; Luka 22:28-30.
w00-SW 4/1 18 ¶3
Joma Kedo gi Nyasaye Ok Bi Locho!
3 Osebed ka imonjo jotich Jehova chakre higni mag 1900. E pinje mang’eny, joma nigi paro maricho, osetemo geng’o tich mar lando wach maber mar Pinyruodh Nyasaye. Ichwalogi gi Jachien ma en Jasikwa maduong’ ma “wuotho koni gi koni kaka sibuor ma ruto komanyo ng’at ma dongam.” (1 Petro 5:8) Bang’ ka ‘kinde ma ne oket ne ogendni’ rumo e higa mar 1914, Nyasaye ne oketo Wuode mondo obed Ruoth manyien mar piny, kendo nochike kama: “Bed gi loch e dier wasiki.” (Luka 21:24; Zaburi 110:2) Kristo notiyo gi tekone e riembo Satan chuth e polo kendo ne ok oyiene dok kuno. Nikech Jachien ong’eyo ni odong’ mana gi kinde machuok, en gi mirima mager gi Jokristo mowal kod rombe mamoko. (Fweny 12:9, 17) Monj mag joma kedo gi Nyasayegi osekelo ang’o?
Med Lony—Tim Dongruok
Jip mar tiyo gi mich ma in-go dwaro bende ni ikaw okang’ mar timo gigo madwarore. Be ikawo okang’ mar lendo gi jomamoko? Be imanyo thuolo mag konyo jo manyien, joma hikgi tin, kata jo matuwo manie kanyaklau? Be ichiwori mar konyo timo ler e Od Romo kata konyo e yore mopogore opogore e chokruoge mag distrikt koda mag alwora? Be inyalo chiwori kinde ka kinde mondo ibed painia makonyo? Be inyalo tiyo kaka painia mapile kata konyo e kanyakla ma jolendo tinie? Kapo ni in owadwa, be itimo kinda mondo inyag kido ma Ndiko owacho ni dwarore kuom jokony tich koda jodongo? Bedo moikore konyo kata kawo ting’ nyiso ni itimo dongruok.—Zab. 110:3.
Puonj Manie Wach Nyasaye
it-1-E 524 ¶2
Singruok
Singruok mar Bedo gi Jadolo Kaka Melkizedek. Singruogni yudore e Zaburi 110:4, kendo ne oti kode e Jo-Hibrania 7:1-3, 15-17 kiwuoyo kuom Kristo. En singruok ma Jehova notimo gi Yesu Kristo kende. Nenore ni Yesu nonwoye ka ne otimo singruok mar pinyruoth gi jolupne. (Luk 22:29) Jehova nokuong’ore ni Yesu Kristo ma en Wuode manie polo, ne dhi bedo jadolo e kido mar Melkizedek. Melkizedek ne en ruoth kendo jadolo mar Nyasaye e piny. Yesu Kristo ne dhi bedo Ruoth kendo Jadolo Maduong’ e polo, to ok e piny. Ne omiye migepego bang’ ka nosedok e polo. (Hib 6:20; 7:26, 28; 8:1) Singruogno en ma siko nikech Yesu biro bedo Ruoth kendo Jadolo Maduong’ e lo Jehova nyaka chieng’.—Hib 7:3.
DESEMBA 2-8
MWANDU MA YUDORE E WACH NYASAYE ZABURI 113-118
Ang’o ma Dwachul Jehova?
w01-SW 1/1 11 ¶13
Gerreuru e Hera
13 Yesu nowacho maler ni onego wakwong waher Jehova. Kata kamano, ok nyuolwa ka wahero Jehova e okang’ malong’o chuth. Mano en gima nyaka watim kinda mondo wabedgo. Ne wahere nikech gik ma ne wakwongo winjo kuome. Mos mos, ne wapuonjore kaka noloso piny mondo dhano odagie. (Chakruok 2:5-23) Ne wapuonjore kaka ne ok ojok gi dhano ka ne gitimo richo, to ne okawo okenge ma ne dhi miyo owargi. (Chakruok 3:1-5, 15) Ne onyiso joma ne omakore kode ng’wono, kendo gikone ne ochiwo Wuode ma miderma mondo owenegi richogi. (Johana 3:16, 36) Ng’eyo wechegi nomiyo wamedo hero Jehova. (Isaya 25:1) Ruoth Daudi nowacho ni nohero Jehova nikech Jehova ogeno joge ahinya. (Zaburi 116:1-9) E kindegi, Jehova ritowa, otayowa, otegowa, kendo ojiwowa. Kaka wamedo ng’eye, e kaka wamedo here.—Zaburi 31:23; Zefania 3:17; Jo-Rumi 8:28.
Kaw gi Erokamano Chiw gi Chunyi Duto
Jandik-zaburi ne openjore kama: “Nachul Jehova ang’o kuom werene duto momiya?” (Zab. 116:12) Jehova ne owaro jandik-zaburi kuom gik mage? Jehova ne orite maber e kinde ma ne en e ‘chandruok gi parruok.’ E wi mano, Jehova ‘nogolo chunye kuom tho.’ Omiyo, koro ne odwaro yo monyalo ‘chulo’ godo Jehova. Jandik-zaburi ne nyalo timo kamano nade? Nowacho kama: “Anachul Jehova kaka ramona obet.” (Zab. 116:3, 4, 8, 10-14) Nong’ado e chunye mar rito ramone duto, tiende ni singo duto ma ne otimo ne Jehova, kendo chopo weche duto ma Jehova dwaro kuome.
In bende inyalo timo kamano. E yo mane? En kokalo kuom bedo gi kit ngima maluwo chike koda puonj mag Nyasaye kinde duto. Kuom mano, we mondo tiyo ne Jehova ema obed gima duong’ ahinya e ngimani, kendo iwe roho mar Nyasaye ema mondo otayi kuom duto mitimo. (Ekl. 12:13; Gal. 5:16-18) En adier ni ok inyal chulo Jehova kuom duto mosetimoni. Kata kamano, ‘chuny Jehova bedo mamor’ koneno ni ichiwori gi chunyi duto e tiyone. (Nge. 27:11) Mano kaka kelo ne Jehova mor e yo ma kama, en gweth maduong’!
Puonj ma Wanyalo Yudo e Bug Tim Jo-Lawi
9 Puonj mar ariyo: Watiyo ne Jehova nikech wamor gi gik motimonwa. Mondo wawinj kor wachno maber, wanon ane gima chielo ma Jo-Israel ne timo e lamo maler, ma en chiwo misengni mag kue. E bug Tim Jo-Lawi, waneno ni Ja-Israel ne nyalo golo misango mar kue kaka yo mar “goyo erokamano.” (Lawi 7:11-13, 16-18) Nogolo chiwono mana kodwaro, ma onge achune. Notimo mano nikech nohero Jehova Nyasache. Ng’at ma golo chiwono, joode, kod jodolo ne chamo ring le mochiwno kanyachiel. Kata kamano, nitie lemo moko mag leno ma nichiwo ne Jehova kende. Gin lemo mage?
10 Puonj mar adek: Wamiyo Jehova gik mabeyo mogik nikech wahere. Jehova ne neno ni boche e gik mabeyo mogik e i le. Lemo mamoko ma siro kama duong’ e ngima le be nokwano kaka lemo mabeyo, kuom ranyisi, nyiroke. (Som Tim Jo-Lawi 3:6, 12, 14-16.) Omiyo, Jehova ne morga moloyo ka Ja-Israel ochiwone lemo makendego to kod boche. Ja-Israel ma ne chiwo misangono ne nyiso ayanga ni nogombo chiwo ne Nyasaye gik mabeyo mogik. E yo ma kamano, Yesu nochiwo ne Jehova gima ber mogik, ma en tiyone gi chunye duto nikech nohere. (Joh. 14:31) Yesu ne mor ahinya timo dwach Jehova, kendo nohero chike Jehova ahinya. (Zab. 40:8) Donge nyaka bed ni Jehova ne mor matek ka noneno ka Yesu ochiwore tiyone?
11 Mana kaka misengni mag kue nichiwo ma onge achune, e kaka wan be watiyo ne Jehova ma onge achune. Wamiyo Jehova gik mabeyo mogik, tiende ni, watiyone gi chunywa duto nikech wahere gi chunywa duto. Onge kiawa ni Jehova mor ahinya sama oneno jotichne tara gi tara ka tiyone nikech gihere kendo gimor gi yorene! Ng’eyo ni Jehova neno gik ma watimo kaachiel gi gimomiyo watimo gigo hoyo chunywa ahinya. Kuom ranyisi, ka po ni iseti ma ok ditim mathoth e tij Jehova kaka diher, bed gadier ni Jehova ong’eyo maber gik minyalo kod ma ok inyal. In inyalo neno ni ok itim mang’eny, kata kamano, Jehova to neno hera miherego kod kaka herano chwali mondo itim duto minyalo e chalnino. Orwako gimoro amora mimiye ka mano e gima ber mogik minyalo gie sani.
Puonj Manie Wach Nyasaye
Penjo Moa Kuom Josombwa
Jandik-zaburi nowero kokalo kuom much Nyasaye kama: “Tho jo maler mage ni gi nengo maduong’ e nyim Jehova.” (Zab. 116:15) Ngima mar moro kamoro kuom jolamo madier mag Jehova nigi nego maduong’ e nyime. Kata kamano, tiend weche moa hul e Zaburi 116 ok wuo mana kuom tho mar ng’at achiel kende.
Sama igolo twak mar yik mar Jakristo moro motho, ok owinjore tiyo gi Zaburi 116:15 kuom jal mothono, kata kapo ni ne otho ka en jatich Jehova momakore kode. Nikech ang’o? En nikech tiend weche mag jandik-zaburino oriwo gik mamoko. Tiende wechego en ni Nyasaye kwano tho mar ogandane mangima momakore kode kaka gima nigi nengo matek ahinya maok onyal weyo mondo otimre.—Ne Zaburi 72:14; 116:8.
DESEMBA 9-15
MWANDU MA YUDORE E WACH NYASAYE ZABURI 119:1-56
“Ere Kaka Rawera Nyalo Rito Yorene Mondo Osik Koler?”
w87-SW 11/1 15 ¶10
Be Isiko Kiler e Weche Duto?
10 E Jo-Efeso 5:5, Paulo nochiwo siem kowacho niya: “Nimar ung’eyo wachni, kendo un uwegi useyango malong’o ni onge jaterruok, kata ng’at ma ok ler, kata ng’at ma iye lach, tiende ni jalam sanamu, ma noyud pok moro amora e Pinyruodh Kristo kod mar Nyasaye.” To e ma pod higa ka higa, ji alufe mang’eny imiyo siem kata igolo e kanyakla nikech terruok, ma en gima ‘ketho ringruok.’ (1 Jo-Korintho 6:18) Kinde mang’eny, mano timore sama ng’ato oweyo “rito wach [Nyasaye].” (Zaburi 119:9) Jokristo mang’eny donjoga e tem sama gidhi bayo kata yueyo. Gijwang’o tudruok ma gin-go gi owete kae to gichako mako osiep gi jopiny ma giromogo. Jokristo moko oseriwore gi jopiny e timo gik maricho ka giwacho e chunygi ni jogo beyo abeya. Jokristo moko to oseng’iyo mokalo tong’ gi jotich wetegi. Jaduong’-kanyakla moro nong’iyo ahinya gi jatichne moro ma nyako. Gikone ne ojwang’o joode mi ochako dak gi nyakono! Mano nomiyo ogole e kanyakla. Kare Muma wacho adier sama osiemowa kama: “Osiepe maricho ketho timbe mabeyo”!—1 Jo-Korintho 15:33.
w06-SW 6/15 25 ¶1
“Ahero Chikeni Ahinya”
JEHOVA miyo joge chike ma konyogi nyagore gi pek kod chandruoge mag kinde matekgi. Moko kuom chikego wayudo sama wasomo Muma kata sama ng’ato ogolo paro e chokruoge mag Jokristo. Thoth weche ma wawinjo e kinde kaka mago ok gin gik manyien. Nyalo bedo ni wasesomogi kata winjogi e kinde mokalo. Nikech wiwa wilga, dwarore ni oparnwa dwach Jehova, chikene, kod puonjge. Onego wanyis ni wamor gi chike Nyasaye. Gimiyowa teko ma konyowa dhi nyime timo dwach Nyasaye kendo giparonwa gimomiyo ne wayiero dak ka waluwo chikene. Mano e momiyo jandik zaburi nower ne Jehova kama: “Ahero chikeni ahinya.”—Zaburi 119:24.
Lok Wang’i Kuom Neno Gik Manono!
2 Kata kamano, gik mwang’iyo bende nyalo kethowa. Tudruok mantie e kind wang’wa koda pachwa otegno ahinya, ma gigo mwaneno gi wang’wa nyalo miyo wachak bedo gi gombo e chunywa. To nikech wadak e piny mopong’ gi richo kendo ma Satan Jachien oteloe, kama ji ohero mana chopo gombogi giwegi, nitie piche mang’eny koda wuond mariek manyalo miyo waba yo e yo mayot—kata ka waketo wang’wa kuom gigo mana matin nono. (1 Joh. 5:19) Omiyo, ok kawwa gi wuoro ni jandik-zaburi nosayo Nyasaye kama: “Lok wang’a kik ane weche ma kayiem, kendo miya ajiwra e yoreni.”—Zab. 119:37.
Puonj Manie Wach Nyasaye
w05-SW 4/15 10 ¶2
Gen Wach Jehova
2 Achiel kuom weche madongo ma Zaburi 119 wuoye en kaka Wach Nyasaye konyo. Nyalo bedo ni jandik zaburino ne ochane ka luwore gi nyukta mag alfabet mondo ji opargi mayot. Wes 176 duto manie zaburino, ochan ka luwore gi alfabet mag dho Hibrania. E dho Hibrania machon, moro ka moro kuom stanza 22 e zaburino nigi lainde 8 kendo giduto gichakore gi nyukta machal. Zaburini wuoyo kuom wach Nyasaye, chikene, puonjge, yorege, buchene mong’ado, kod gik moparonwa. Paro matut e wi gik ma jotich Nyasaye machon kod ma kindegi osekaloe, biro miyo wamed hero zaburino, kendo mano biro miyo wamed goyo erokamano ne Nyasaye kuom miyowa Wachne ma en Muma.
DESEMBA 16-22
MWANDU MA YUDORE E WACH NYASAYE ZABURI 119:57-120
Kaka Wanyalo Nano e Sand
w06-SW 6/15 20 ¶2
“To Mano Kaka Ahero Chikeni!”
2 Inyalo penjori niya: “Ere kaka chik Jehova ne nyalo jiwo kendo hoyo jandik zaburi?” Gima ne okonye en bedo gadier ni Jehova ne ogene. Ng’eyo ber ma nodhi yudo ka oluwo chik Jehova nomiyo obedo mamor kata obedo ni noyudo pek moko kowuok kuom joma ne kwede. Ne oneno kaka Jehova ne okonye. To e wi mano, luwo chik Jehova nomiyo obedo mariek moloyo jowasike kendo rito ngimane. Mano nomiyo obedo gi kuwe kod chuny ma ok ketne bura.—Zaburi 119:1, 9, 65, 93, 98, 165.
w00-SW 12/1 14 ¶3
Be Ihero Chike Jehova?
3 Jandik zaburi ne ohero chik Jehova ahinya, to mano e momiyo nower niya: “Areto ma ok ariwni mondo arit chikeni. Tonde mag joricho osenala, kata kamano, wiya ok nyal wil gi chikeni.” (Zaburi 119:60, 61) Chike mag Jehova konyowa nano e sand nikech wan gadier ni Wuonwa manie polo nyalo ng’ado tonde ma jowasikwa nalowago. Oresowaga e kinde mowinjore mondo wadhi nyime gi tij lando wach maber mar Pinyruoth.—Mar. 13:10.
w06-SW 9/1 14 ¶4
Puonj Mayudore e Buk mar Abich mar Zaburi
119:71—Chandruoge ma waromogo nyalo kelo ber mage? Chandruoge ma waromogo nyalo puonjowa geno kuom Jehova, lemo kinde duto, puonjore Muma e yo matut, kendo tiyo gi gik ma wapuonjore. E wi mano, gik ma watimo sama wayudo chandruoge nyalo konyowa fwenyo kuonde monego watimie lokruok. Iwa ok bi wang’ ka wayie mondo chandruoge ma wayudo opwodhwa.
“Ywaguru Kanyachiel gi Joma Ywak”
3 Onge kiawa ni Jehova Wuonwa manie polo e Nyasach hoch duto. (Som 2 Jo-Korintho 1:3, 4.) Nikech Jehova kecho joge ahinya mano e momiyo nonyisogi niya: “An awuon ema ahoyou.”—Isa. 51:12, The Bible in Luo, 1976; Zab. 119:50, 52, 76
5 Wanyalo bedo gadier ni Jehova biro hoyowa. Kuom mano, onego wanyis Jehova lit duto manie chunywa sama walemo. Wamor ahinya ni Jehova ong’eyo lit ma wabedogago kendo oikore hoyowa sama wan gi kuyo! To ere kaka Jehova hoyowa?
Puonj Manie Wach Nyasaye
w06-SW 9/1 14 ¶5
Puonj Mayudore e Buk mar Abich mar Zaburi
119:96—‘Gik malong’o chuth nigi gikogi’ e yo mane? Jandik zaburino ne wuoyo e wi bedo malong’o chuth kaluwore gi kaka dhano neno gik moko. Nyalo bedo ni nong’eyo ni dhano neno gik moko e yo morem. Mopogore gi mano, chik Nyasaye to ok orem, en chik makare chuth. Okonyo e yore duto mag ngimawa. New International Version, keto ndikono niya: “Aseneno giko mar weche duto makare, chikeni to onge gikogi.”
DESEMBA 23-29
MWANDU MA YUDORE E WACH NYASAYE ZABURI 119:121-176
Kaka Wanyalo Geng’o Gik ma Ok Ochuno ma Kelonwa Lit
Yie Mondo Chike Nyasaye kod Puonjge Otieg Chunyi
5 Mondo chike Nyasaye okonywa maber, somogi kata ng’eyogi kende ok oromo. Nyaka waher chikego kendo waluwgi. Wach Nyasaye wacho niya: “Beduru kuchayo gi marach, to uher gi maber.” (Amos 5:15) To ere kaka wanyalo timo mano? Gima duong’ en ni wapuonjre neno gik moko kaka Jehova nenogi. Wanyalo lero wachno ka watiyo gi ranyisini: Par ane ni nindo ok osebedo ka teri gotieno kaka dwarore. Ka idhi ir laktar, onyisi ni ilok chiemo ma ichamo, iriega dendi matin, kendo itim lokruoge moko e ngimani. Ka itemo tiyo gi parogo, ichako neno lokruok! Onge kiawa ni ibiro hero laktarno nikech okonyi ma ngimani obedo maber.
6 E yo ma kamano, Jachuechwa omiyowa chike ma geng’onwa moko kuom hinyruok ma wanyalo yudo nikech richo, kendo gimiyo ngimawa bedo maber. Donge wayudo ber mathoth sama waluwo chike Nyasaye ma kwero wacho miriambo, hinyo jomoko, kuo, terruok, timbe gero, kod juok! (Som Ngeche 6:16-19; Fwe. 21:8) Sama waneno kaka luwo chike Jehova konyowa, wachako here kaachiel gi chikenego.
w93-SW 4/15 17 ¶12
Rowere, Gin Ang’o ma Uketo Motelo e Ngimau?
12 E wi mago duto, nyaka isin gi gik maricho. (Zaburi 97:10) Ere kaka inyalo sin gi gima nyalo nenore ni ber? En kuom paro rach minyalo yudo bang’e! Jo-Galatia 6:7, 8 wacho niya: “Kik wuondu: Nyasaye ok en ng’at minyalo timgo oyuma. Nikech gimoro amora ma ng’ato chuoyo, mano bende e ma noka; nimar ng’at ma chuoyo kuom ringruok, enoka kethruok kuom ringrene.” Sama iromo gi tem mar timo gima rach, par kaka wachno biro chwanyo Jehova Nyasaye. (Pim gi Zaburi 78:41.) Par bende ni inyalo mako ich kata inyalo yudo tuoche kaka ayaki. Par kaka wachno nyalo miyi parruok kendo ketho nyingi. Bende, nitie chandruoge moko masiko minyalo yudo. Miyo moro wacho kama: “Ne aterora gi jaoda ka ne pok wakendore. Kata obedo ni sani wan Jokristo, ngima mar anjawo ma ne wadakie e kindeno pod kelo tungni e kend marwa nyaka kawuono.” To e wi mago, par ni inyalo lalo migepe ma in-go e tij Nyasaye kata inyalo goli e kanyakla! (1 Jo-Korintho 5:9-13) Donge en adier ni mor mar kinde machuok ok kel ber moro amora?
Puonj Manie Wach Nyasaye
Bed Gadier ni Wach Nyasaye “En Adier”
2 Wan kaka jotich Jehova, wan gadier ni Jehova e “Nyasach adiera” kendo ni kinde duto odwaronwaga mana ber lilo. (Zab. 31:5; Isa. 48:17) Wang’eyo ni wanyalo geno weche manie Muma nikech “mise mar [wach Nyasaye] en adier.” (Som Zaburi 119:160.) Wayie gi weche ma jatim nonro moro mar Muma nowacho niya: “Nyasaye pok owachoga miriambo kendo weche duto mowacho biro timore gadier. Jo Nyasaye nyalo geno gik mowacho nikech en bende gigene.”
DESEMBA 30–JANUAR 5
MWANDU MA YUDORE E WACH NYASAYE ZABURI 120-126
Ne Gichuoyo ka Giywak, To ne Gikeyo gi Ilo
w04-SW 6/1 16 ¶10
Joma Oguedhi Gin Joma Pako Nyasaye
10 Wakwedo Satan sama wayie ting’o yadh sand marwa. Jakobo 4:7 wacho kama: “Kweduru Jachien, mi noringu.” Timo kamano ok en gima yot. Tiyo ne Nyasaye dwaro kinda. (Luka 13:24) Kata kamano, Muma singonwa e Zaburi 126:5 niya: “Jo ma chuoyo kodhi ka ywak, biro keyo gi ilo.” Ee, Nyasaye biro guedho kindawa. “En jachiw-mich ne jo ma manye gi kinda,” kendo oguedhoga joma pake.—Jo-Hibrania 11:6.
Be Ibiro Nyiso Yie Motegno?
17 Dibed ni sani ikuyo nikech watni kata osiepni moro otho? Ket thuolo moro tenge mar tego yieni e wi geno mar chier. Inyalo timo kamano ka isomo weche manie Muma ma wuoyo e wi joma nochier e kinde machon. Dibed ni ikuyo nikech achiel kuom joodu nogol e kanyakla? Med kinda mari e puonjruok mondo ibed gadier ni yo ma Jehova chiwogago kum, e yo maberie mogik. Ne chandruok moro amora miromogo kaka thuolo mar medo tego yieni. Nyis Jehova weche duto ma chando chunyi. Kik ibed mabor gi jomamoko, kar mano, sik machiegni gi Jokristo weteni. (Nge. 18:1) Tim gik ma biro konyi nano, kata ka po ni samoro timo gigo nyalo miyo ichuer pi wang’i. (Zab. 126:5, 6) Kik iwe dhi e chokruoge, tij lendo, kod somo Muma. Ket pachi e wi gueth ma kinde mabiro ma Jehova osingoni. Kaka imedo neno yore ma Jehova konyigo, e kaka yieni bende biro medo bedo motegno.
w01-SW 7/15 18-19 ¶13-14
Dhi Nyime Timo Kinda e Tij Keyo!
13 Weche ma yudore e Zaburi 126:5, 6 jiwo jotich Nyasaye, to moloyo jogo ma kalo e sand. Ndikono wacho niya: “Jo ma chuoyo kodhi ka ywak, biro keyo gi ilo. Ng’at ma dhi oko ka ywak, koting’o kodhi michuoyo, biro duogo kowero wende mor, koting’o cham mochiek.” Weche ma jandik zaburi notiyogo e wi chuoyo kod keyo, nyiso kaka Jehova noguedho Jo-Israel ma noduogo koa e tuech e piny Babulon. Ne gimor ahinya ka ne ogonygi, kata kamano, nenore ni ne giywak ka ne gichuoyo kodhi e piny ma ne pok opur kuom higni 70 ka ne gin e tuech. To joma nodhi nyime gi tij chuoyo gi gedo ne mor ahinya ka ne gineno nyak mar tijgi.
14 Wanyalo ywak sama isandowa kata sama Jokristo wetewa kalo e sand nikech tim makare. (1 Petro 3:14) Chunywa nyalo nyosore mokwongo okwongo ka po ni walendo gi kinda to ok wane nyak moro amora. Kata kamano, ka wadhi nyime pidho kodhi mag adiera kendo olonegi pi, Nyasaye biro miyo gidongi moloyo kata kaka waparo. (1 Jo-Korintho 3:6) Mano nenore maler e kwan mag Muma kaachiel gi bugewa ma lero Muma ma wasebedo ka wachiwo.
Puonj Manie Wach Nyasaye
Teko mar Rito Ji—‘Nyasaye En Kar Buokwa’
15 Mokwongo, ne ane kaka Jehova rito ngimawa. Wan gadier ni Jehova biro rito oganda mar jotichne. Ka ok kamano, Satan nyalo tiekowa mayot. Par ane kuom wachni: Satan ma en “jaloch pinyni,” diher ahinya tieko lamo madier e pinyni chuth. (Johana 12:31; Fweny 12:17) Moko kuom sirkande man gi teko ahinya e pinyni osegoyo tijwa mar lendo marfuk kendo osetemo tiekowa chuth. Kata kamano, oganda Jehova osedhi nyime chung’ motegno kendo dhi nyime lendo maok giweyo! E wang’ ji, Joneno mag Jehova nenore kaka oganda moro matin maonge rit. Kata kamano, ang’o momiyo sirkande man gi teko ok osenyalo chungo tijwa? Mano en nikech Jehova oumowa gi bwombene!—Zaburi 17:7, 8.