Ne nitie taon moro ma niluongo ni Ur. Taondno ok ne ni mabor ahinya gi Babel, kendo joma ne ni e taondno ne lamo nyiseche mamoko mopogore gi Jehova. Kata kamano, ne nitie dichwo moro e taondno ma ne lamo mana Jehova. Niluonge ni Ibrahim.

Jehova nonyiso Ibrahim niya: ‘Wuog ia e pinyu kendo e kind wedeni, mondo idhi e piny ma abiro nyisi ni idhiye.’ Kae to Jehova ne osingone kama: ‘Abiro miyo ibed oganda maduong’, kendo abiro timo gik mabeyo ne ji mang’eny e piny mangima kokalo kuomi.’

Ibrahim ne ok ong’eyo ni Jehova ne dwaro ni odhi kanye, kata kamano, nong’eyo ni Jehova ne ok nyal weye. Ibrahim, Sara chiege, Tera wuon-gi, kaachiel gi Lut wuod owadgi ne ofundo gigegi mi gichako wuoth ma raborano.

Ibrahim ne jahigni 75 ka ne gichopo kama Jehova ne dwaro ni gidagie. Kanyo ne iluongo ni Kanaan. Ka gin kuno, Jehova nowuoyo gi Ibrahim kosingone niya: ‘Pinyni duto abiro miyo nyithindi.’ Kata kamano, gie kindeno Ibrahim gi Sara ne oseti kendo ne gionge nyithindo. Ere kaka Jehova ne dhi miyo gima ne osesingono otimre?

Ibrahim gi Sara nosedak kanyachiel kuom higni mang’eny. Ne giwuok e dalagi maber ma ne ni Ur kendo koro ne gidak mana e hema. Kata kamano, Sara ne ok oywagore, nikech ne en gadier ni Jehova nong’eyo gimomiyo nonyisogi ni gidar.

Sara ne gombo bedo gi nyathi ahinya ma owacho ne Ibrahim niya: ‘Ka jatichna ma Hagar nyalo nyuol, nyathineno biro chalo kaka nyathina.’ Bang’e, Hagar nonyuolo nyathi ma wuoyi. Ne gichake ni Ishmael.

Higni mang’eny bang’e ka Ibrahim ne en jahigni 99 to Sara ne en jahigni 89, welo moko adek ne olimogi. Ibrahim norwakogi mondo giyue e tie yien, kendo notedonegi chiemo. Be ing’eyo ni welogo ne gin jomage? Ne gin malaike! Ne ginyiso Ibrahim niya: ‘Higa manyien e kinde kaka magi, ubiro nyuolo nyathi ma wuoyi.’ Sara ne ochiko ite mos ka en e hema kowinjo gima jogo ne wacho. Nonyiero kowacho e chunye niya: ‘Be dayo moti kaka an kama nyalo nyuol yawa?’

E higa ma noluwo, Sara nonyuolo nyathi ma wuoyi mana kaka malaika mar Jehova nosingone. Ibrahim nochako nyathino ni Isaka, ma tiende en “Nyiero.”

Chieng’ moro ka Isaka koro ne jahigni abich kama, Sara noneno Ishmael ka kinyo Isaka. Sara ne dwaro rito wuode, omiyo ne odhi ir Ibrahim konyise mondo oriemb Hagar gi wuode ma Ishmael. Ibrahim ne ok dwar timo gima ne Sara owachoneno. Kata kamano, nikech Jehova bende ne dwaro rito Isaka, nonyiso Ibrahim niya: ‘Winj gima Sara nyisi. Abiro dhi nyime konyo Ishmael. Kata kamano, gik ma asingo to biro chopo mana kokalo kuom Isaka.’