Lut nodak e piny Kanaan gi Ibrahim owadgi wuon-gi. Mosmos Ibrahim gi Lut nobedo gi jamni mang’eny ma koro kama ne gidakieno ne ok nyal romogi. Ibrahim ne onyiso Lut niya: ‘Ok wanyal dhi nyime dak kanyachiel kama tinni. Yier kama diher dakie, kae to kama iweyo e ma abiro kawo.’ Mano nyiso ni Ibrahim ne en ng’at ma chunye ler, donge?

Lut noneno kamoro maber machiegni gi taon ma niluongo ni Sodom. Kanyo ne nitie pi mang’eny kod lum mang’ich. Noyiero kanyo mi gidakie gi joode. Gikone ne gidak Sodom.

Joma ne odak Sodom kaachiel gi joma ne odak e taon mar Gomora ne richo ahinya. Mano nomiyo Jehova ong’ado mar kethogi. Nikech Jehova ne dwaro reso Lut kaachiel gi joode, ne ooro malaike ariyo mondo odhi omigi siem. Malaikego nonyisogi kama: ‘Wuoguru mapiyo e taondni! Jehova dhi kethe.’

Lut ne ok owuok mapiyo kaka nonyise. En pod nodigni kanyo. Ka malaikego noneno mano, ne gimako lwet Lut, chiege, gi nyige ariyo kendo ywayogi ka giwuok e taondno ka ginyisogi ni, ‘Ringuru matek mondo ures ngimau! Kik ung’i chien, nikech ka ung’iyo chien to ubiro tho!’

Ka ne gichopo e taon miluongo ni Zoar, Jehova ne omiyo mach gi salfa olor koa e polo mowang’o taon mar Sodom gi Gomora. Taonde ariyogo ne oketh chuth. Chi Lut ne ok otimo kaka Jehova nonyisogi. En nong’iyo chien. Mano nomiyo olokore siro maduong’ mar chumbi. Kata kamano, Lut gi nyige ne otony nikech ne giwinjo Jehova. Nyaka bed ni ne giwinjo malit ahinya nikech chi Lut ne ok owinjo wach. To ne ok giywago ang’e nikech gin ne gitimo kaka Jehova ne onyisogi.

Ibrahim ne opuonjo wuode ma Isaka mondo oher Jehova kendo mondo oket chunye duto kuom singo mag Jehova. To ka Isaka ne ochopo jahigni 25 kama, Jehova ne okwayo Ibrahim mondo otim gimoro ma ne ok yot timo. En ang’o ma ne Jehova onyise ni otim?

Jehova nonyiso Ibrahim niya: ‘Ne, kaw wuodi achiel kende, kendo idhi kode e wi got moro ma ni Moria mondo ichiwe kaka misango.’ Ibrahim ne ok ong’eyo kata matin gimomiyo Jehova nonyise ni otim kamano. En notimo atima gima ne onyiseno.

Kinyne gokinyi mang’ich, Ibrahim, Isaka, gi jotichne moko ariyo nochako wuoth ka gidhi Moria. Bang’ wuotho ndalo adek, ne gichako neno gode moko ka neno gi kama bor. Ibrahim ne onyiso jotichne mondo oritgi matin, kae to ne giwuok gi Isaka mondo gidhi gichiw ne Jehova misango. Ibrahim ne omiyo Isaka yien mondo oting’, to en ne oting’o pala. Isaka nopenjo wuon-gi niya: ‘Baba, ere le ma wadhi chiwo kaka misango?’ Ibrahim nodwoke niya: ‘Wuoda, Nyasaye biro chiwo.’

Ka ne gichopo e wi got, ne gigero kendo mar misango. Ibrahim ne otueyo lwet Isaka kod tiendene bende, kae to noketo Isaka e wi kendo mar misangono.

Kae to Ibrahim nokawo pala. Gikanyono, dwond malaika mar Jehova ne owinjore ka nyise niya: ‘Ibrahim! Kik ihiny wuodi! Koro to ang’eyo ni in gi yie motegno kuom Nyasaye, nikech iikori chiwo wuodi kaka misango.’ Kae to Ibrahim noneno im moro komoko gi tungene e bungu ma ne ni machiegni kanyo. Nogonyo Isaka mapiyo, kae to nochiwo imno kaka misango kar chiwo Isaka.

Chakre chieng’no, Jehova ne oluongo Ibrahim ni osiepne. Be ing’eyo gimomiyo ne oluonge kamano? En nikech Ibrahim notimo gimoro amora ma Jehova nowachone ni otim, kata e seche ma ne ok ong’eyo gimomiyo Jehova nyise ni otim kamano.

Jehova nochako osingone niya: ‘Abiro guedhi, kendo abiro miyo nyithindi obed mang’eny.’ Mae nyiso bende ni joma beyo duto ne dhi yudo gueth kokalo kuom Ibrahim.