Isaka ne jahigni 40 sama ne okendo Rebeka. Nohero Rebeka ahinya. Bang’e, ne ginyuolo yawuoyi ariyo ma rude.

Wuoyi maduong’ ne nyinge Esau, to matin ne en Jakobo. Esau nohero bayo, kendo ne en jadwar mang’ula. Jakobo to noheroga bet dala.

E kindego, ka wuon dala ne otho, wuoyi maduong’ kata makayo e ma ne ipogone lowo maduong’ kaachiel gi pesa mohingo jowetene. E dala Isaka, achiel kuom pok ma ne gin-go ne en bedo gi migawo e chopo singo ma Jehova nomiyo Ibrahim. Singogo ne ok obadho Esau ahinya, kata kamano, Jakobo to nong’eyo ni singogo ne gin gik ma nonego kaw mapek.

Chieng’ moro Esau noduogo dala ka ojony marach nikech tij dwar. Nowinjo such chiemo mamit ma ne Jakobo tedo, mowacho niya: ‘Kech nega! Pognae dengu makwarno.’ Jakobo nodwoke niya: ‘Ayie tokonigo, to mana ka iyie mondo akaw kari kaka wuoyi makayo.’ Esau nowachone niya: ‘Bedo wuoyi makayo ok obadha! Kaw kidwaro. An chiemo e ma adwaro.’ Be iparo ni gima Esau notimono ne en gima nyiso rieko adier? Ooyo. Esau nowito gima duong’ kendo makende ahinya, kowile mana gi chiemo achiema.

Ka Isaka ne koro oti ahinya, nochopo kinde ma ne koro onego oguedh wuode makayo. Kata kamano, Rebeka ne okonyo Jakobo ma ne en wuoyi matin mondo e ma oyud guethgo. Ka ne Esau ofwenyo wachno, iye ne owang’ matek kendo ne ochano nego owadgi. Nikech Isaka gi Rebeka ne dwaro rito Jakobo mondo kik Esau hinye, ne ginyise niya: ‘Ring idhi idag gi neru ma Laban, nyaka chieng’ moro chuny Esau okuwe.’ Jakobo ne owinjo gima jonyuolne ne onyiseno, kendo noringo mondo ores ngimane.

Jehova nosingo ne Jakobo ni ne odhi rite mana kaka ne orito Ibrahim gi Isaka. Jakobo ne odak kama iluongo ni Haran. Ka ne en kuno, nokendo, mi obedo gi nyithindo kod mwandu mang’eny ahinya.

Bang’e, Jehova nonyiso Jakobo niya: ‘Dog thuru.’ Jakobo gi joode nomako wuoth ma dok thurgi. Ka ne gin e yo, jomoko nobiro monyiso Jakobo niya: ‘Esau owadu be biro, to en gi chwo 400!’ Luoro nomako Jakobo ahinya nikech noparo ni Esau ne dhi timonegi gima rach. Nokwayo Jehova niya: ‘Yie iresa e lwet owadwa.’ Kinyne, Jakobo nooro ne Esau mich mang’eny ma gin rombe, diek, dhok, ngamia, kod punde.

Chieng’no gotieno ka ne Jakobo ni kar kende, nopo koneno malaika moro! Malaikano nochako gore kode. Ne gii nyaka piny oru. Kata obedo ni Jakobo nohinyore, ne odhi nyime gore kode. Malaikano nonyise kama: ‘Weya adhi.’ To Jakobo nodwoke ni, ‘Ooyo, ok aweyi nyaka ikwong iguedha.’

Gikone, malaikano noguedho Jakobo. Koro Jakobo nong’eyo ni Jehova ne ok dhi yie mondo Esau otimnegi gima rach.

Okinyino, Jakobo ne oneno Esau gi ji 400 ma ne en-go gi kama bor. Jakobo ne oweyo joode gi chien matin, mi odhi okulore ne owadgi nyadibiriyo. Esau ne oringo kochomo ir Jakobo mokwako Jakobo. Owete ariyogo pi wang’gi nochuer, kendo ne giloso kuwe e kindgi. Iparo ni Jehova ne owinjo nade ka noneno yo ma ne Jakobo olosogo kuwe e kinde gi owadgi?

Bang’e, Esau nodok dalane. Jakobo gi joge bende nodhi nyime gi wuoth. Jakobo nonyuolo yawuoyi 12. Iluongogi ni Reuben, Simeon, Lawi, Juda, Dan, Naftali, Gad, Asher, Isakar, Zebulun, Josef, gi Benjamin. Jehova ne otiyo gi achiel kuom yawuoyigo, ma en Josef mondo ores ogandane. Mano notimore e yo mane? We wane ane.