Josef ne en achiel kuom yawuot Jakobo matindo. Owetene madongo nong’eyo ni Josef e ma ne Jakobo ohero ahinya moloyogi. Iparo ni ne giwinjo nade e wi wachno? Ne gibedo gi nyiego, kendo mano nomiyo koro ne ok gidware. Ka ne Josef oleko lek moko, ne onyiso owetene lekgo. Ne gineno ni lekgo ne nyiso ni kinde mabiro, ne gidhi kulore ne Josef ka gimiye duong’. Omiyo, ne gimedo mako kode sigu!

Chieng’ moro, owete Josef ne kwayo rombe but taon mar Shekem. Jakobo nooro Josef ir owetene mondo odhi one kaka tij kwath ne terogi. Ne gineno Josef gi kama bor ka biro kae to ne giwacho niya: ‘Ero jalekcha biro. Wanegeuru!’ Ne giywaye ma gibole e bugo moro matut. Kata kamano, Juda ma bende ne en achiel kuom owetene ma ne nikanyo nowacho niya: ‘Kik unege yawa! To kar mano wauseuru kaka misumba.’ Kuom mano, ne giuse e nengo ma dirom fedha 20 ne jo ohala ma Jo-Midian ma ne kalo ka dhi Misri.

Bang’e ne gikawo law Josef ma gimienoe remo kae to ne gitero ne wuon-gi lawno kendo ne giwachone niya: ‘Donge mae en law wuodi?’ Mano nomiyo Jakobo oparo ni le mag bungu ne onego Josef. Nokuyo ahinya kendo onge ng’ato ang’ata ma ne nyalo hoye.

Ka ne en Misri, ofisa moro maduong’ miluongo ni Potifar ne ong’iewo Josef kaka misumba. Jehova ne nigi Josef. Potifar noneno ka Josef tije ber kendo ne inyalo gene. Bang’ kinde matin, noweyo gik moko duto ma ne en-go e lwet Josef.

Chi Potifar noneno ka Josef ne en jachia kendo dende ne ojengo. Pile ka pile nosiko kosayo Josef mondo onind kode. Josef ne dhi timo ang’o? Notamore, kendo nonyise niya: ‘Ok anyal! Mae richo maduong’. Ruodha ogena ahinya, to in e chiege. Ka anindo kodi, abiro chwanyo Nyasaye!’

Chieng’ moro, chi Potifar notemo mako Josef githuon mondo onind kode. Nomako nanga Josef, kata kamano Josef noringo oa kanyo. Ka Potifar ne oduogo, chiege ne onyise ni Josef ne dwaro nindo kode githuon. Chi Potifar ne ok owacho adier. Potifar ne iye owang’ matek ma otueyo Josef e jela. Kata kamano, wi Jehova ne ok owil gi Josef.

E kinde ma Josef ne ni e jela, Farao ruodh Misri ne oleko lek moko ma onge ng’ama ne nyalo lero tiendgi. Achiel kuom jotij Farao ne onyise ni Josef ne nyalo lerone tiend lekgo. Mapiyo, Farao ne ooro wach mondo oluongne Josef.

Farao nopenjo Josef niya: ‘Be inyalo nyisa tiend lek ma alekogi?’ Josef nonyise niya: ‘Chiemo biro bedo mang’eny e piny Misri kuom higni abiriyo, kae to higni abiriyo ma dhi luwo, kech dhi betie. Omiyo, yier ng’at moro mariek mondo ota tij kano chiemo mondo kik ji bi tho kech.’ Farao nonyise niya: ‘In e ma ayieri! Kendo inibed jatelo mar ariyo e lochna!’ Ere kaka Josef nong’eyo tiend lek ma ne Farao olekogo? Jehova e ma ne okonye fwenyo tiendgi.

Kuom higni abiriyo mokwongo, Josef nokano chiemo. Kae to mana kaka Josef ne osewacho, higni abiriyo mag kech noluwo. Ji ne a kuonde mopogore opogore mondo ging’iew chiemo ir Josef. Jakobo wuon-gi bende noyudo ripot ni chiemo ne ng’eny Misri, omiyo, nooro yawuote apar Misri mondo gidhi ging’iew chiemo.

Ka ne yawuot Jakobo ochopo Misri, Josef nofwenyo mapiyo ni mago ne gin owetene. Kata kamano, owetene to ne ok ofwenye. Ne gikulorene, mana kaka Josef noseleko ka ne pod otin. Josef ne dwaro ng’eyo ka be owetenego chunygi ne pod richo. Omiyo, ne onyisogi niya: ‘Un joma richo. Ooru mondo ubi unon pinywa mondo ung’e kuonde ma wayomyomie!’ Ne gidwoke niya: ‘Ok kamano! Wawuok Kanaan, kendo wan yawuoyi 12. En mana ni wuoyi achiel notho, to wuoyi matin to odong’ gi wuonwa dala.’ Kae to Josef nonyisogi niya: ‘Dhiuru uom owadu matinno, eka abiro yie gi gima uwachono.’ Omiyo, ne gidok dala.

Ka chiemo norumo kendo e od Jakobo, ne ooro yawuote mondo gidog Misri ng’iewo chiemo. Wang’ni to ne gidhi gi Benjamin, wuoyi machogo. Mondo Josef otem owetenego, nokawo okombene mar fedha ma osoye e ogund Benjamin, kae to nohango ne owetenego ni ne gikwalo okombeno. Ka ne jotij Josef oyudo okombeno e ogund Benjamin, owetene nobwok ahinya. Ne gisayo Josef mondo okumgi kar kumo Benjamin.

Josef koro nong’eyo gadier ni owetenego noseloko chunygi. Koro ne ok onyal pando kaka nowinjo e chunye. Nochako ywak, kae to nowachonegi niya: ‘An owadu ma Josef. Be wuonwa pod ngima?’ Dhogi nomoko. Nowachonegi niya: ‘Kik chunyu chandu nikech gik maricho ma ne utimona. Nyasaye e ma nokela kae mondo bang’e ares ngimau. Uwinjo, ringuru ukel wuonwa.’

Ne gidok ir wuon-gi mi ginyise gima ne otimoreno, kendo ne gidok kode Misri. Bang’ hignigo duto, gikone Josef gi wuon-gi noromo kendo.