E piny Uz, ne nitie ng’at moro ma ne lamo Jehova gi kinda. Nyinge ne en Ayub. Ne omewo ahinya kendo ne en gi nyithindo mang’eny. Chunye ne ler kendo ne ohero konyo jochan, mond liete, gi nyithi kiye. Be timbene mabeyogo nyiso ni ok nonyal yudo chandruok moro amora?

Ayub ne ok ong’eyo ni Satan Jachien ne ng’iye. Chieng’ moro, Jehova nowacho ne Satan niya: ‘Iseneno jatichna ma Ayub, koso? Onge ng’ama chal kode e piny ngima. Ayub winja ahinya kendo otimo gik makare.’ Satan nodwoko niya: ‘An be ang’eyo ni Ayub winji, to mana nikech imiye rit makende kendo iguedhe. Imiye lowo maduong’ kod jamni bende. Ka imaye gigo, obiro weyo lami.’ Jehova nowachone niya: ‘Inyalo temo Ayub kidwaro. To kik inege.’ Ang’o momiyo Jehova ne oyie ne Satan otem Ayub? Ne en gadier chuth ni Ayub ne ok nyal weyo timbe makare.

Jachien nochako kelo ne Ayub tembe mopogore opogore. Mokwongo, ne ooro joma niluongo ni Jo-Sabea mondo okwal dhok gi punde mag Ayub. Kae to mach nowang’o rombe mag Ayub te. Jomoko bende miluongo ni Jo-Kaldea nobiro mokwalo ngamia mag Ayub te. Jotich mag Ayub ma ne rito jamnigo bende ne onegi. To marachie mogik, nyithind Ayub duto ne otho ka ot ma ne gitimoe nyasi nomukore molwar kuomgi. Ayub ne owinjo malit ahinya, to ne ok oweyo lamo Jehova.

Jachien ne dwaro ni Ayub ochandre moloyo kanyo. Nikech mano, ne omiyo Ayub obedo gi adhola e dende duto. Ayub ne owinjo rem ma ok nyal pim. Ne ok ong’eyo gima omiyo gigo duto ne timorene. Ne odhi mana nyime lamo Jehova. Jehova ne oneno kaka Ayub ne nyagore, kendo ne omor kode sidang’.

Kae to Satan notiyo gi chwo moko adek e temo Ayub. Ne ginyiso Ayub kama: ‘Nyaka bed ni itimo richo moro to ipando. Nyasaye e ma chwadi.’ Ayub nowacho kama: ‘Onge gima rach ma asetimo.’ Kata kamano, nochako paro ni Jehova e ma ne kelone chandruok ma ne yudego, kendo nowacho ni Nyasaye ne hinye kayiem nono to onge richo ma nosetimo.

Rawera moro ma nyinge Elihu ne ochiko ite ne weche duto ma Ayub gi osiepene ne wacho. Gikone, nowacho ne Ayub gi osiepenego niya: ‘Gik muwachogo gin miriambo te. Pach Jehova ohingo marwa mabor. Ok onyal timo gimoro amora marach. Oneno gik moko duto ma timore kendo okonyo jotichne sama gin e chandruok.’

Kae to Jehova nowuoyo gi Ayub. Nopenje kama: ‘Ne in kanye sama ne achueyo polo gi piny? Ang’o momiyo iwacho ni ahinyi? Iwuoyo awuoya, to ok ing’eyo gik moko duto.’ Ayub noyie kethone. Nowacho kama: ‘Ne awacho gik ma ok kare. Chon ne ok ang’eyi maber, koro to ang’eyi maber. Onge gima nyalo tami timo. Ago mos kuom wuoyo marach e wiyi.’

Ka ne tembego orumo, Jehova ne ochango Ayub, kendo noguedhe gi mwandu mang’eny moloyo ma ne en-go mokwongo. Ayub nomedo dak kuom higni mang’eny ka en gi mor. Jehova ne oguedho Ayub nikech Ayub ne owinje kata e seche ma weche ne tek. Be ibiro luwo ranyisi mar Ayub kuom dhi nyime lamo Jehova, bed ni weche beyo kata richo?

E piny Misri, jood Jakobo ne iluongo ni Jo-Israel. Bang’ ka Jakobo gi Josef ne osetho, Farao machielo nochako locho. Ne oluoro Jo-Israel nikech ne gisechako bedo gi huma moloyo Jo-Misri. Mano nomiyo olokogi wasumbni. Ne osandogi kochunogi mondo gilos matafari kendo giti matek e puodho. To kaka Jo-Misri ne medo sando Jo-Israel, e kaka Jo-Israel ne medo bedo mang’eny. Nikech wachno ne ok mor Farao, ne ogolo chik mondo oneg nyithind Jo-Israel duto ma yawuoyi ma e ka ne inyuolo. Nyaka bed ni luoro ne omako Jo-Israel ndi, donge?

Dhako moro ma Nya-Israel miluongo ni Jokebed ne onyuolo nyathi ma wuoyi ma jaber ahinya. Mondo kik neg nyathino, nokete e okapu kae to opande e togo ma ne ni e dho Aora Nael. Nyamin wuoyino ma ne iluongo ni Miriam ne opondo machiegni gi kanyo mondo ong’i gima ne nyalo timore.

Ka ne nyar Farao obiro lwokore e aorano, noneno okapuno. Ka ne oele, ne oyudo nyathi matin ka ywak, kendo nyathino ne litne ahinya. Miriam nosudo machiegni mopenje niya: ‘Be inyalo yiena adhi amanyni miyo moro ma nyalo ritoni nyathini maber?’ Ka ne nyar Farao oyiene, Miriam nodhi oomo mana Jokebed min-gi. Nyar Farao nonyiso Jokebed niya: ‘Kaw nyathini iritna, abiro chuliga osara.’

Ka ne nyathino osedongo, Jokebed ne otere ir nyar Farao, kendo nyar Farao ne ochake ni Musa; norito Musa mana kaka nyathine monyuolo. Musa nopon mana ka wuod ruoth, kendo nonyalo yudo gimoro amora ma nodwaro. Kata kamano, wiye ne ok owil gi Jehova. Nong’eyo ni ne en Ja-Israel, to ok Ja-Misri. Noyiero tiyo ne Jehova.

Ka Musa ne jahigni 40, ne ong’ado ni ne odwaro konyo ogandane. Ka ne oneno Ja-Misri moro ka goyo Ja-Israel, Musa ne ogoyo Ja-Misrino monege kae to opande e kuoyo. Ka ne Farao ofwenyo gima Musa ne otimono, ne otemo nego Musa. Kata kamano, Musa ne oringo nyaka Midian. Jehova ne odhi nyime rite ka en kuno.