Ka ne oor Jo-Israel moko ariyo mondo odhi onon taon mar Jeriko, ne gibet e od dhako moro ma nyinge ne Rahab. Ka ne ruodh Jeriko ofwenyo mano, nooro jolweny e od Rahab mondo gimany jogo. Rahab ne opando chwo ariyogo malo e wi tat ode, kendo ka ne jolwenygo obiro, ne onyisogi ni jogo ne osewuok e ode chon kochomo komachielo. Kae to nonyiso chwo ma Jo-Israelgo kama: ‘Adwaro konyou nikech ang’eyo ni Jehova ni kodu, kendo ubiro loyo pinywani. Singnauru mana ni ubiro resa kaachiel gi joodwa.’

Ne gidwoko Rahab niya: ‘Wasingoreni ni ng’ato ang’ata manie odi ok bi hinyore.’ Ne gimedo kama: ‘Tue tol makwar e dirisani. Mano biro miyo ores joodu.’

Rahab ne omiyogi tol mondo giridrego gie dirisa nyaka piny. Jo-Israel ariyogo ne oringo mopondo kuom ndalo adek e gode ma ne ni machiegni gi Jeriko ka pok gidok ir Joshua gini. Kae to Jo-Israel ne ong’ado Aora Jordan, kendo ne giikore mar kawo Piny Manosingi. Taon mar Jeriko e ma ne gichakogo. Jehova ne onyisogi ni gilwor taondno dichiel odiechieng’ kodiechieng’ kuom ndalo auchiel. Odiechieng’ mar abiriyo, ne gilworo taondno nyadibiriyo. Kae to jodolo nogoyo tung’, kendo jolweny ne okok gi dwol maduong’ ahinya. Ohinga mag taondno nomukore te! Kata kamano, od Rahab nodong’ kochung’ kata obedo ni odno bende ne omakore gi ohinga. Rahab gi joodgi ne otony nikech Rahab ne ogeno Jehova.

Pinje mamoko mag Kanaan nowinjo gik ma notimore ne Jeriko. Mano nomiyo ruodhi maggi oriwore e paro achiel mondo giked gi Jo-Israel. Kata kamano, Jo-Gibeon to ne otimo gima opogore gi pinje mamokogo. Ne gidhi ir Joshua ka girwako lewni moti. Ne giwacho ne Joshua niya: ‘Wawuok e piny moro mabor ahinya. Wasewinjo humb Jehova kod honni ma notimonu e piny Misri kod Moab. Wakwayo ni usingrunwa ni ok ubi monjowa, kae to wan wabiro bedo jotiju.’

Joshua ne oyie gi gima ne giwachono kendo ne gitimo winjruok ni ne ok gidhi monjogi. Bang’ ndalo adek, Joshua ne ofwenyo ni kare jogo ne oa mana machiegni, e piny Kanaan. Joshua nopenjogi niya: ‘Ang’o momiyo ne uwuondowa?’ Ne gidwoke niya: ‘Luoro e ma nomakowa! Wang’eyo ni Jehova Nyasachu e ma kedonu. Kik unegwa, kuyie.’ Joshua notimo kaka nosesingonegi motelo, omiyo ne ok oneggi.

Bang’ kinde matin, ruodhi abich mag Jo-Kanaan ne oriwore kanyachiel mondo gimonj Jo-Gibeon. Joshua gi jolwenyge ne owuotho otieno mangima mondo gidhi gires Jo-Gibeon. Kinyne, lweny ne ochakore okinyi mang’ich. Jo-Kanaan ne oringo ka gichomo kuonde mopogore opogore. Kuonde duto ma ne gitemo dhiye, Jehova ne oolo kuomgi pe madongo dongo. Kae to Joshua ne okwayo Jehova mondo ochung chieng’ kik podhi. Ang’o momiyo ne okwayo gima pok notimorega nyaka nene? En nikech ne ogeno kuom Jehova chuth. Chieng’ ne ok opodho nyaka Jo-Israel ne oloyo ruodhi duto mag Kanaan kaachiel gi jolwenjgi.