Be Igeno Yo ma Jehova Timogo Gik Moko?

1-2. (a) Ang’o momiyo tinde tek ne ji mang’eny geno joma ni e telo? (b) Ang’o ma wabiro nono e sulani?

E KINDEWAGI, en gima tek ne ji mang’eny geno joma ni e telo. Gineno ni sirkande kod chike ma tayo sirkandego dewo mana wang’ joma omewo kod joma nigi teko, to gibuono joma odhier. Muma wacho kama: “Loch dhano . . . en loch ma kelo mana hinyruok.” (Ekl. 8:9) E wi mano, nitie jotend dinde ma bende timo gik maricho ahinya. Mano osemiyo ji mang’eny oweyo geno kuom Nyasaye. Omiyo, sama ng’ato oyie puonjore Muma, pek ma wajaromogago en ng’eyo kaka wanyalo konye mondo ogen kuom Jehova kendo ogen joma Jehova oyiero mondo ota joge e piny ka.

² En adier ni ok jopuonjre mag Muma kende e monego opuonjre kaka ginyalo geno kuom Jehova kod riwruok mare. Kata mana joma osebudho e adiera be onego osik kogeno ni Jehova timo gik moko e yo maberie moloyo. Seche moko nitie gik ma nyalo timore ma nyalo temo okang’ ma wagenogo Jehova. E sulani, wabiro nono weche moko adek ma nyalo temo yiewa. Wechego gin: (1) Sama wasomo weche moko e Muma ma ok wawinj tiendgi, (2) sama onyiswa yo manyien ma itayogo gik moko e riwruok mar oganda Jehova, kod (3) pek moko ma wanyalo romogo e kinde mabiro.

GEN KUOM JEHOVA SAMA ISOMO MUMA

3. Ere kaka weche moko ma wasomo e Muma nyalo temo geno ma wan-go kuom Jehova?

³ Sama wasomo Wach Nyasaye, wanyalo wuoro kata bedo gi penjo e wi gimomiyo Jehova nong’ado wach moro e yo moro. Kuom ranyisi, e bug Kwan, wasomo e wi Ja-Israel moro ma Jehova nong’adone buch tho nikech nomodo yien chieng’ Sabato. E bug Samuel mar ariyo, wasomo ni higni moko bang’e, Jehova nong’wono ne Ruoth Daudi kata obedo ni noterore gi chi ng’ato kendo noneko. (Kwan 15:32, 35; 2 Sa. 12:9, 13) Wanyalo penjore kama: ‘Ang’o momiyo Jehova nong’wono ne Daudi kata obedo ni noneko kendo noterore gi chi ng’ato, to komachielo nong’ado ne Ja-Israelno buch tho e richo ma ne nenore ka gima tin?’ Mondo wayud dwoko mar penjono, wanonuru ane weche adek monego waket e paro sama wasomo Muma.

4. Ere kaka ndiko mar Chakruok 18:20, 21 kod Rapar mar Chik 10:17 miyo wageno buche ma Jehova ng’adoga?

⁴ Nitie sama Muma ok nyiswaga weche duto e wi wach moro ma notimore. Kuom ranyisi, wang’eyo ni Daudi noloko chunye gadier bang’ ka nosetimo richo. (Zab. 51:2-4) To nade Ja-Israel ma noketho chik Sabato? Be chunye nochande nikech richo ma notimono? Dibed ni noseketho chike Jehova e kinde mokalo? Dibed ni nosegamiye siem to nofwayo afwaya? Muma ok nyiswa wechego. Kata kamano, wanyalo bedo gadier gi wachni: Jehova “ok nyal timo ne ng’ato gima ok kare.” (Rap. 32:4) Ong’adoga bura bang’ kosenono weche duto. Ok oti gi weche mag awinjo, ok obuon ng’ato ang’ata, kendo onge gima nyalo wuondo wang’e mi ong’ad bura e yo ma ok kare. (Som Chakruok 18:20, 21; Rapar mar Chik 10:17.) Kaka wamedo puonjore e wi Jehova kod chikene, e kaka wabiro medo geno buche mong’ado. Kata obedo ni wanyalo bedo gi penjo moko sama wasomo kamoro e Muma, wang’eyo Jehova Nyasachwa maber, to mano miyo wabedo gadier ni “en kare e yorene duto.”​—Zab. 145:17.

5. Ere kaka bedowa morem nyalo miyo wang’ad bura ma ok kare? (Ne bende sanduk ma wiye wacho ni, “Wanyalo Ng’ado Bura e Yo ma Ok Kare Nikech Warem.”)

⁵ Ok wanyalga ng’ado bura makare kinde duto nikech wan joma orem. Nikech Nyasaye nochueyowa e kite, wagomboga neno kitimo ne ji gik makare. (Cha. 1:26) Kata kamano, nikech wan joma orem, wanyalo ng’adoga bura ma ok kare kata mana sama waparo ni wang’eyo weche duto e wi wach moro. Kuom ranyisi, par ane kaka Jona nowinjo marach ka ne Jehova ong’wono ne Jo-Nineve. (Jona 3:10–4:1) Kae to par ane gima notimore ka Jehova nong’wono ne jogo. Nores Jo-Nineve 120,000 ma noloko chunygi. Gikone, Jona e ma ne dwarore ni olok paro ma ne en-go, to ok Jehova.

6. Ang’o momiyo ok ochuno ni Jehova olernwa gima oseng’ado ni odwaro timo?

⁶ Ok ochuno ni Jehova oler ne dhano gimomiyo ong’ado bura e yo moro. En adier ni Jehova noyie winjo pach jotichne kendo loko pache e wi buche moko ma noseng’ado kata e wi buche ma e ka nodwaro ng’ado. (Cha. 18:25; Jona 4:2, 3) Seche moko nojanyisoga jotichne gima nodwaro timo. (Jona 4:10, 11) Kata kamano, ok ochuno ni Jehova olernwa yo mosechano ng’adogo bura moro. Nikech en Jachuechwa, ok ochuno ni owinj pachwa ka pok otimo gimoro kata bang’ kosetimo gima nochano.​—Isa. 40:13, 14; 55:9.

GEN KUOM JEHOVA SAMA ONYISWA YORE MANYIEN MITAYOGO GIK MOKO E RIWRUOKNE

7. En ang’o ma samoro nyalo bedo ma teknwa timo, to nikech ang’o?

⁷ Wayie gi chunywa duto ni Jehova timoga gik makare kinde duto. Gima nyalo bedonwa matek en geno jotichne moyiero mondo ota kanyaklane e piny ka. Wanyalo penjore ka be jogo tiyo gi dwachgi giwegi koso dwach Jehova. Paro ma kamano e ma nyalo bedo ni jomoko ne nigo e kinde ma nindiko Muma. Par ane ranyisi ma ne owuoye e paragraf mar 3. Samoro wat ng’at ma noketho chik Sabato ne nyalo penjore ka be Musa nopenjo Jehova gima nonego otim ka pok nong’ad ne ng’atno buch tho. Bende, samoro osiep Uria Ja-Hiti ma Daudi noterore gi chiege ne nyalo paro ni Daudi notiyo gi teko ma ne en-go kaka ruoth mondo kik nege nikech richo ma nosetimo. Adiera en ni onge kaka wanyalo wacho ni wageno kuom Jehova ka ok wanyal geno joma oyiero mondo ota jotichne e piny ka, ma gin joma en bende ogeno.

8. Yo ma nitayogo kanyakla mar Jokristo mokwongo kaka iwachonwa e Tich Joote 16:4, 5 chalre nade gi kaka itayo kanyakla mar Jokristo e kindewagi?

⁸ E kindewagi, Jehova tayo riwruok mar ogandane manie piny ka, kotiyo gi “jatich mogen kendo mariek.” (Mat. 24:45) Mana kaka bura matayo e kinde Jokristo mokwongo, jatich mogen kendo mariek tayo jotich Jehova manie piny ngima ka gimiyo jodong-kanyakla weche monego gitigo e tayo kanyakla. (Som Tich Joote 16:4, 5.) Kae to jodongo tiyoga gi weche momigigo. Wanyiso ni wageno yo ma Jehova tayowago ka waluwo kaka riwruok mar ogandane kod jodongo chikowa.

9. En kinde kaka mage ma samoro nyalo bedonwa matek luwo kaka jodongo chikowa, to nikech ang’o?

⁹ Seche moko nyaloga bedonwa matek yie gi paro ma jodongo ong’ado. Kuom ranyisi, e higni machiegnigi, oseriw kanyakla moko, kendo mano osemiyo oter moko kuom kanyaklago e alwora machielo. Bende, nitie kinde ma jodongo nyalo kwayo jolendo moko mondo odhi e kanyakla machielo mondo oti gi Ute Romo e yo maber. Ka di po ni okwawa mondo wadhi e kanyakla machielo, samoro nyalo bedonwa matek weyo osiepewa ma wang’iyogo kod joodwa. Be Jehova oronega jodongo wach achiel kachiel konyisogi kanyakla ma jalendo moro onego odhiye? Ooyo. Ng’eyo wachno nyalo miyo samoro obednwa matek luwo kaka gichikowa. Kata kamano, Jehova ogeno ni jodongo biro timo yiero makare e weche kaka mago, kendo wan bende onego wagen-gi.b

10. Ka luwore gi Jo-Hibrania 13:17, ang’o momiyo dwarore ni wariw lwedo paro ma jodongo ong’ado?

¹⁰ Ang’o momiyo dwarore ni wariw lwedo paro ma jodongo ong’ado kata sama ging’ado paro e yo ma ok wamorgo? Ka watimo kamano, wakonyo e rito winjruok kod kuwe manie kanyakla. (Efe. 4:2, 3) Kanyakla dhiga maber sama ji duto oriwo lwedo paro ma buch jodongo ong’ado. (Som Jo-Hibrania 13:17.) To maduong’ moloyo, sama wariwo lwedo joma Jehova oketo mondo oritwa, wanyiso ni wageno Jehova.​—Tich 20:28.

11. Ang’o ma nyalo konyowa medo geno yo ma jodongo tayowago?

¹¹ Wanyalo medo geno yo ma jodongo tayowago ka waketo e paro ni gilemoga ka gikwayo roho maler mondo otagi ka pok ging’ado paro e wi wach moro ma mulo kanyakla. Ginonoga puonj mag Muma adimba kaachiel gi weche ma riwruok mar oganda Jehova omiyogi mondo otagi. Dwachgi maduong’ en-ga moro Jehova kendo rito joge e yo maber kaka nyalore. Jodong-kanyakla ong’eyo ni Jehova okawo mapek yo ma giritogo kueth moket e lwetgi. (1 Pet. 5:2, 3) Par ane wachni: E piny ngima, ji ok winjrega nikech rangi mar pien dendgi, din, kod siasa. Jotich Jehova to nigi winjruok maber nikech gilamo Nyasaye achiel kende madier. Gima kamano nyalore mana nikech Jehova guedho riwruok mare!

12. Gin weche mage ma jodongo nyaka non sama gidwaro ng’eyo ka be ng’ato oloko chunye gadier?

¹² Jehova osemiyo jodongo ting’ mapek mondo girit kanyakla osik ka ler. Sama Jakristo moro otimo richo maduong’, Jehova dwaro ni jodongo ong’ad ka be Jakristono biro dong’ e kanyakla koso onego ogole e kanyakla. Moko kuom gik ma jodongo nonoga en ka be jarichono oseloko chunye gadier. Onyalo wacho ni oseloko chunye, to kuom adier, be osin gi richo ma notimo? Be otimo kinda mondo kik ochak onwo richono? Ka po ni osiepe maricho e ma nomiyo odonjo e richo, be oikore weyo osiepe ma kamago? Jodong-kanyakla lemoga, kendo ginono Muma sama ginono wachno. Bende, ginonoga paro ma jarichono nigo e wi gima rach ma notimono. Kae to ging’ado ka be jarichono owinjore odong’ e kanyakla. Nitie sama nyalo dwarore ni gigol jarichono e kanyakla.​—1 Kor. 5:11-13.

13. Gin weche mage ma nyalo chando pachwa sama ogol osiepwa kata watwa e kanyakla?

¹³ Ang’o ma nyalo temo okang’ ma wagenogo jodongo? Ka po ni ng’at mogol e kanyakla ok en watwa kata osiepwa machiegni, nyalo bedonwa mayot yie gi paro ma jodongo ong’ado. To nade ka ng’at mogolno en watwa kata osiepwa machiegni? Wanyalo chako paro ni jodongo ne ok onono weche duto, kata ni ne ok ging’ado bura e yo ma Jehova di nong’adogo burano. Ang’o ma nyalo konyowa riwo lwedo bura ma jodongo ong’ado e wi wachno?

14. Ang’o ma nyalo konyowa bedo gi paro makare sama jodong-kanyakla ong’ado ni ogol watwa kata osiepwa e kanyakla?

¹⁴ Onego wang’e ni golo ng’ato e kanyakla en chenro ma Jehova e moketo, kendo ni en chenro ma konyo kanyakla. Bende, chenrono nyalo konyo ng’at motimo richo. Ka po ni owe jaricho motamore loko chunye e kanyakla, onyalo miyo jomoko bende ochak timo richo. (Gal. 5:9) E wi mano, samoro ok obi neno pek mar richo motimono, kendo nyalo bedone matek loko pache kod timbene mondo olos winjruokne gi Jehova kendo. (Ekl. 8:11) Wanyalo bedo gadier ni ka pok jodongo ong’ado ni igolo ng’ato e kanyakla, ginonoga wachno matut. Kendo mana kaka jong’ad bura e piny Israel machon, jodong-kanyakla ong’eyo ni ‘ok ging’ad bura e nying dhano to ging’ado bura e nying Jehova.’​—2 We. 19:6, 7.

GENO JEHOVA SANI BIRO KONYOWA GENE E KINDE MABIRO

15. Ang’o momiyo dwarore ni wagen kuom yo ma Jehova tayowago e kindegi moloyo kinde moro amora mosekalo?

¹⁵ Kaka giko mar piny marachni medo sudo machiegni, e kaka dwarore ni wamed geno kuom yore ma Jehova timogo gik moko, moloyo kinde moro amora mosekalo. Nikech ang’o? E kinde masira maduong’, samoro ibiro nyiswa ni watim gik ma pok ne watimoga nyaka nene kendo ma nyalo bedonwa matek timo. Jehova ok bi wuoyo gi ng’ato ka ng’ato kuomwa. Nenore ni obiro tiyo gi owete moyiero mondo otawa. Mago ok e kinde monego wabi wabagni e paro ka wapenjore ni, ‘Be Jehova e ma tayo owetegi, koso gitayowa mana gi pachgi giwegi?’ Be ibiro geno kuom Jehova kod riwruok mar ogandane e kindego? Dwoko luwore gi kaka ineno yo ma Jehova tayogo riwruok mare e kindewagi. Ka iyie luwo kaka Jehova tayowa sani, mano nyiso ni ibiro yie luwo kaka obiro tayowa e kinde masira maduong’ bende.​—Luka 16:10.

16. Ere kaka ibiro tem geno ma wagenogo Jehova e kinde ma obiro ng’adoe bura?

¹⁶ Nitie wach moro machielo ma bende dwarore ni waparie matut: En yo ma Jehova biro ng’adogo bura e giko piny marachni. Gie kindegi, wageno ni joma ok ti ne Jehova, moriwo nyaka wedewa, biro riwore kodwa e lame ka pok giko ochopo. E Har–Magedon, Jehova biro tiyo gi Yesu e ng’ado ne jogo bura mogik. (Mat. 25:31-33; 2 The. 1:7-9) Ok wabi nyiso Jehova ng’at monego onyis ng’wono kod monego okethi. (Mat. 25:34, 41, 46) Be ibiro geno yo ma Jehova biro ng’adogo bura, koso ibiro chwanyori nikech bura moseng’ado? Kuom adier, dwarore ni wamed tego genowa kuom Jehova e kindegi. Mano biro konyowa geno kuome chuth e kinde mabiro.

17. Gin ber mage ma wabiro yudo bang’ ka Jehova oseng’ado bura mogik ne piny marachni?

¹⁷ Temie paro kaka ibiro winjo ka koro wan e piny manyien bang’ ka Jehova oseng’ado ne ji bura mogik. Kindego biro yudo kosetiek dinde mag miriambo, jo ohala ma joguondo, kod sirkande mag piny mosesando ji kuom higni mang’eny. Tuoche, bedo moti, kod tho ok nochak obedie kendo. Satan kod jochiendene ibiro tue kuom higni aluf achiel. Gik maricho mosebedo ka timore nikech ng’anyo maggi ok nobedie. (Fwe. 20:2, 3) To mano kaka wabiro bedo mamor nikech ne wageno yo ma Jehova timogo gik moko!

18. Gin ang’o ma wapuonjore e ranyisi mag Jo-Israel kaka onyiswa e Kwan 11:4-6 kod 21:5?

¹⁸ Samoro wabiro romo gi pek moko e piny manyien ma biro temo geno ma wan-go kuom yo ma Jehova timogo gik moko. Kuom ranyisi, par ane gima notimore ne Jo-Israel mana machuok ka ne gisewuok Misri. Moko kuomgi nochako ng’ur nikech ne gichako paro chiemo ma ne giweyo Misri kendo ne gichayo manna ma Jehova nomiyogi. (Som Kwan 11:4-6; 21:5.) Be wanyalo biro bedo gi paro ma chal kamano bang’ masira maduong’? Ok wang’eyo ni ibiro nyiswa ni watim tich mane bang’ Har–Magedon e kinde ma wabiro loso pinyni mosmos mondo obed paradiso. Nenore ni tich biro bedo mang’eny, kendo mokwongo kwongo, ngima samoro ok bi bedo mayot. Dibed ni wabiro ng’ur nikech gik ma Jehova biro miyowa e kindeno? Gimoro achiel ma wan-go gadier en ma: Ka po ni wamorga gi gik ma Jehova miyowa e kindegi, to biro bedonwa mayot bedo mamor gi gik mobiro miyowa e kindego.

19. Ler ane e yo machuok weche madongo ma wapuonjore e sulani.

¹⁹ Kinde duto Jehova timoga gik moko e yo makare. Dwarore ni wabed gadier gi wachno. Dwarore bende ni wagen joma Jehova oketo mondo ota riwruok mar ogandane. Kinde duto onego wapar weche ma Jehova nowacho kokalo kuom janabi Isaya niya: “Kugeno kuoma kendo kuhoru mos, to unuyud teko.”​—Isa. 30:15.