Jaloch ma Nigi Teko e Wi Pi kod Yamo

Hono ma Yesu otimo mar pidho ji gana mang’eny oweyo ji gi wuoro ahinya. Giwacho ni “adier, jali e Janabi ma nonego obi e piny,” Mesia ma ne okor wachne, kendo ni adier onyalo bedo jaloch maber. (Johana 6:14; Rapar mar Chik 18:18) Omiyo, ji chano mako Yesu mondo gikete obed ruoth.

Kata kamano, Yesu osefwenyo gima gichano timono. Ogonyo ogandano mondo odhi kae to ochiko jopuonjrene ni gidog e yie. Gichomo kanye? Gidwaro wuok ka gichomo Bethsaida kae to gidhi Kapernaum. Yesu to dhi e got kar kende mondo olem otieno mangima.

Ka piny chiegni ru, ler mar dwe miyo Yesu neno yie ma jopuonjrene nitiere gi kuma bor matin. Yamo mager miyo nam bedo gi apaka kendo ‘kwang’o yie bedonegi matek nikech yamo chomogi tir.’ (Mariko 6:48) Yesu lor koa e got kendo ochako wuotho e wi apakano kochomo irgi. Nyaka chop sani “gisekwang’o yie kuom kilomita ma dirom abich kata auchiel.” (Johana 6:19) Jopuonjre neno ka chalo ka gima Yesu kalogi, omiyo gikok gi luoro niya: “En ni waleko, koso?”​—Mariko 6:49.

Yesu hoyo chunygi kowacho kama: “Beduru gi chir! En an; kik uluor.” Petro to wacho kama: “Ruoth ka en in, to kare chika mondo abi iri ka awuotho e wi pi.” Yesu dwoke niya: “Bi!” Gikanyono, Petro wuok e yie kendo adier owuotho e wi pi kodhi ir Yesu. Kata kamano, ka Petro neno yamo mager, obedo maluor kendo ochako nimo. Okok niya: “Ruoth, resa!” Yesu rieyo bade kendo omako Petro kowachone kama: “In ma in gi yie matin, ang’o momiyo iriwo gi kiawa?”​—Mathayo 14:27-31.

Petro kod Yesu donjo e yie kae to yamo kue. Jopuonjre bwok ahinya. Be onego gibwog kamano? Seche moko manok motelo, Yesu nende osetiyo gi makate e pidho ji gana mang’eny e yor hono. Jopuonjrene ne onego ong’e “tiend wach makatego.” Omiyo, neno Yesu ka wuotho e wi pi kendo kueyo yamo ok dobwogogi. Koro gikulore mondo gimiye luor ka giwachone niya: “Adier in e Wuod Nyasaye.”​—Mariko 6:52; Mathayo 14:33.

Bang’ kinde machuok, gichopo Genesaret ma en alwora ma chiemo nyakie ahinya, man milambo mar Kapernaum. Gigowo yie kanyo kae to gilor. Ji fwenyo Yesu, kendo jogo kanyachiel gi joma owuok e gwenge molworo kanyo kelone joma tuo. Sama jogo mulo amula riak nanga Yesu ma oko ni i, gichango.

Gie kindeno, oganda ma nyocha oseneno ka Yesu pidho ji gana mang’eny e yor hono fwenyo ni osea. Omiyo, sama yiedhi matindo mowuok Tiberia chopo kanyo, ji donjo e yiedhigo kendo gidhi Kapernaum mondo gimany Yesu. Ka gichopo kuno, gipenjo Yesu kama: “Rabi, a ichopo kae sa adi?” (Johana 6:25) Mano miyo Yesu kwerogi matek mana kaka wabiro neno.