Dhano ma Robede Miwuoro e Piny

PAR ane ng’at mawuotho kochomo iri, to en ng’ama bor manyalo chopo e tado mar ot. Ang’o ma inyalo paro kuome? Ng’at ma kamano nyaka bed ng’at ma rabet miwuoro! E kinde moro, ne nitie ji ma ne chalo kamano e piny. Muma nyiso ni wuonegi ne gin malaike ma ne oa e polo. Ere kaka mano ne nyalo timore?

Par bende ni malaika marach Satan ne dhi nyime gi kelo chandruok. Bende ne otemo ywayo malaike moko mag Nyasaye mondo otim richo. Bang’ kinde, moko kuom malaikegi ne ochako winjo wach Satan. Ne giweyo tich ma Nyasaye ne omiyogi e polo. Kendo ne gibiro e piny kae ma giloso ringregi mag dhano. Be ing’eyo gimomiyo?

Muma wacho ni yawuot Nyasaye-gi ne otimo kamano nikech ne gineno mon mabeyo e piny, kendo ne gi gombo dak kodgi. Kuom mano, ne gibiro e piny kae ma gikendo mon-gi. Muma wacho ni mani ne ok en gima kare nikech Nyasaye ne ochweyo malaike mondo odag e polo.

Malaikego kod mondegi kane onyuolo nyithindo, nyithindogi ne opogore gi mamoko. Mokwongo ne ginyalo nenore ka nyithindo mapile. Kata kamano, ne gidhi nyime bedo madongo ahinya, ka gimedo bedo joma roteke manyaka gibedo joma rabede miwuoro.

Ne ok gin joma beyo. To nikech ne gin joma robede kendo motegno, ne gihinyo jomoko. Ne gitemo chuno jomoko mondo obed jo maricho kaka gin.

Enok ne osetho, kata kamano koro ne nitie ng’at moro ma ne ni kare e piny. Nyinge ne en Noa. Kinde duto ne otimo gima Nyasaye ne dwaro mondo otim.

Chieng’ moro, Nyasaye ne owacho ne Noa ni ndalo koro osechopo mar ketho ji duto maricho. Kata kamano, Nyasaye ne dhi reso Noa, joode, koda le mang’eny. We mondo wane kaka Nyasaye ne otimo mano.