Ji mang’eny oseweyo dhi e chokruoge mag din nikech ok giyud puonj malong’o kata hoch mawuok kuom wach Nyasaye kuno. Kare ang’o momiyo onego ibi e chokruoge mag Jokristo mochan gi Joneno mag Jehova? Gin ang’o mibiro neno kuno?

Mor mayudore kuom bedo e kind joma dewi kendo nyisi hera. E kinde Jokristo mokwongo, Jokristo ne nie kanyakla mopogore opogore, kendo ne gitimo chokruoge mondo gilam Nyasaye, gipuonjre Ndiko, kendo mondo gijiwre ng’ato gi ng’ato. (Jo-Hibrania 10:24, 25) Nikech hera ma ne gin-go e kindgi, ne giwinjo e chunygi ni gin e kind osiepe madier—owetegi kuom Kristo. (2 Jo-Thesalonika 1:3; 3 Johana 14) Wan bende waluwo ranyisi mar Jokristo mokwongo kendo wayudo mor machalo kamano.

Ber mabedoe kuom ng’eyo kendo tiyo gi puonj mag Muma. Mana kaka ne en e kinde mag Muma, chwo, mon, koda nyithindo duto ne chokore kanyachiel. Jopuonj molony konyowa ng’eyo kaka wanyalo tiyo gi puonj mayudore e Muma e ngimawa mapile. (Rapar mar Chik 31:12; Nehemia 8:8) Ji duto nyalo chiwo paro sa wuoyo moriwo jowinjo kendo ginyalo wer, to mano miyowa thuolo mar lero geno ma wan-go kaka Jokristo.—Jo-Hibrania 10:23.

Gweth mayudore kuom jiwo yie mari kuom Nyasaye. Jaote Paulo nowacho ne kanyakla moro e kindene niya: “An gi siso mar nenou . . . mondo jiwruok obedie e kindwa ka ng’ato jiwo yie mar nyawadgi, maru kod mara.” (Jo-Rumi 1:11, 12) Tudruok ma wabedogo kinde ka kinde gi Jokristo wetewa e chokruogewa, tego yie marwa kendo miyowa siso mar dak kaka Jokristo.

Donge nyalo bedo maber ka itemo biro e chokruok maluwo mar kanyaklawa mondo ine iwuon wechegi? Ibiro rwaki gi mor ahinya. Onge chudo mitimo e chokruogewa—onge sadaka moro amora.

• Chokruogewa luwo ranyisi mane?

• Gin ber mage ma wabiro yudo kuom dhi e chokruogewa mag Jokristo?

Kata obedo ni nyaka wakal e thimbe moyugno mondo wachop e chokruogewa, kata kit yamo rach machalo nade, wajodhi e chokruogewa mag Jokristo maok wabare. Ang’o momiyo Joneno mag Jehova timo kinda ahinya mondo gichokre kanyachiel gi Jokristo wetegi kata obedo ni ginyagore gi pek mapile mag ngima kendo ginyalo bedo mool bang’ tiyo matek e odiechieng’?

Konyowa timo dongruok e yore Nyasaye. Kowuoyo kuom jogo machokore e kanyakla, Paulo nondiko ni mondo ‘gidewre e kindgi.’ (Jo-Hibrania 10:24) Tiend wachni en ni “wadew ahinya” jowetewa, ma en temo ng’eyogi maber. Omiyo weche jaoteno jiwowa ni mondo wabed joma dewo jowetegi. Ka wang’eyo joot mamoko ma Jokristo, wabiro fwenyo ni moko kuomgi oseloyo maber pek moko machalo gi ma koro wanyagorego kendo ni ginyalo konyowa loyo pekgo wan be.

Konyowa loso osiepe masiko. E chokruogewa, joma waromogo ok gin mana osiepe mawiye wiye, to gin owete gi nyiminewa ma gin osiepewa machiegni ahinya. Kinde mamoko bende wabedo gi kinde mag yueyo mowinjore ka wan kanyachiel. Bedo kanyachiel e yo ma kamano konyowa e yo mane? Wapuonjore geno jowetewa, kendo mano tego hera manie kindwa. Kae to, sama jowetewa kalo e chandruok, wakonyogi mapiyo nikech yudo ka waseloso osiep motegno e kindwa. (Ngeche 17:17) Ka wabedo osiepe ji duto manie kanyaklawa, wanyiso ni ‘wadewo jowetewa.’—1 Jo-Korintho 12:25, 26.

Wajiwi ni iyier jogo matimo dwaro mar Nyasaye ema obed osiepeni. Ibiro yudo osiepe ma kamago e kind Joneno mag Jehova. Kik gimoro amora moni bedo kanyachiel kodwa.

• Ang’o momiyo wayudo ber ka wabedo kanyachiel gi jowetewa e chokruok?

• Diher ng’eyo Joneno manie kanyaklawa karang’o?

E chokruoge Jokristo machon, ne giwer, gilemo, gisomo kendo giwuoyo kuom Ndiko maok giluw tim moro amora ma gin ema giketo. (1 Jo-Korintho 14:26) Chokruogewa bende itimo kamano.

Puonj gin mawuok ei Muma kendo gin matiyo e ngima mapile. E giko juma, kanyakla ka kanyakla chokore mondo giwinj twak mar Muma migolo kuom dakika 30 manyiso kaka Ndiko mulo ngimawa koda kinde ma wadakiegi. Ijiwo ji duto mondo oluwre gi jagol-twak kuom elo Muma margi sama osomo ndiko. Bang’ twagno, wabedo gi Puonjruok mar “Ohinga mar Jarito” kuom sa achiel, kendo ijiwo jokanyo mag kanyakla mondo ochiw paro sama iwuoyo e sula moro mayudore e gocho mar puonjruok mar Ohinga mar Jarito. Puonjruogni konyowa tiyo gi puonj mag Muma e ngimawa. Ipuonjruok sula achiel machal e moro ka moro kuom kanyakla ma kwan-gi koro okalo 110,000 e piny mangima.

Ikonyowa timo dongruok e lony marwa mar puonjo. Bende, wachokore kanyachiel e odhiambo moro e kor juma e chokruok mopogi e kidienje adek miluongo ni Ngimawa kod Tijwa Kaka Jokristo, ka watiyo gi buk migoyo dwe ka dwe miluongo ni Ngimawa kod Tijwa Kaka Jokristo—Chenro mar Chokruok. Kidieny mokwongo e chokruogni iluongo ni, Mwandu ma Yudore e Wach Nyasaye, ma konyowa ng’eyo puonj ma yudore e sula moko mag Muma ma wasomo e jumano. Kidieny mar ariyo en Tiegri ne Tij Lendo, ma nitie ranyisi mopogore opogore ma nyiso kaka wanyalo tiyo gi Muma e tij lendo. Bang’ ranyisi ka ranyisi, owadwa moro chiwo paro ma nyalo konyowa timo dongruok mondo wabed molony e somo kod wuoyo gi ji. (1 Timotheo 4:13) Kidieny mar adek iluongo ni Ngimawa Kaka Jokristo, ma konyowa ng’eyo kaka wanyalo tiyo gi puonj ma yudore e Muma e ngimawa pile ka pile. Migawoni oriwo penjo gi dwoko ma konyowa ng’eyo puonj mag Muma e yo matut.

Ka ibiro e chokruogewa, ibiro mor gi kaka ipuonjo Muma e yo maber.—Isaiah 54:13.

• Ibiro winjo weche mage e chokruoge Joneno mag Jehova?

• En chokruok mane kuom chokruoge ma watimo juma ka juma ma diher biroe machiegni?

Be isefwenyo e piche manie brosuani ni Joneno mag Jehova rwakore maber sama gidhi e chokruogegi mag kanyakla? Ang’o momiyo wanono ahinya rwakruok koda bidhruok marwa sama wadhi e chokruok?

Mondo wanyis Nyasachwa luor. En adier ni Nyasaye ok ng’i mana chalwa maoko. (1 Samuel 16:7) Kata kamano, sama wachokore e lamo, wagombo gi chunywa duto ni wanyis luor ne Nyasachwa koda ne Jokristo wetewa. Donge en adier ni kapo ni wadhi chung’ e nyim jang’ad-bura e kot, wabiro nono ahinya ni chalwa maoko nyiso ni wamiyo migawone luor? Mano bende e kaka chalwa maoko sama wan e chokruogewa nyiso luor ne “Ja-ng’ad bura mar piny duto” Jehova Nyasaye, kendo nyiso luor ne karwa mar lamo. —Chakruok 18:25.

Mondo wanyis chike mwaluwo e ngimawa. Muma jiwo Jokristo mondo orwakre “ma ok gikal tong’ kendo ka ginyiso ni gin joma pachgi long’o.” (1 Timotheo 2:9, 10) Rwakruok “ma ok gikal tong’” tiende en rwako lewni maok nyis sungruok, maok mi jomoko bedo gi gombo maricho, kata maok nyis dendwa e yo maok owinjore. Bende bedo gi ‘paro ma long’o’ konyowa rwako lewni manenore maber to ok mojwang’ore kata mokalo tong’. Weche matayowagi pod weyonwa thuolo malach mar yiero wawegi lewni mamorowa. Kata ka ok wawacho gimoro amora, rwakruokwa maber kendo malombo wang’ ‘bidho puonj mar Jawarwa’ kendo ‘miyo Nyasaye duong’.’ (Tito 2:10; 1 Petro 2:12) Ka warwakore maber ne chokruogewa, wamiyo ji obed gi paro mowinjore kuom lamo mar Jehova.

Kik iwe lepi omoni biro e chokruoge mitimo e Od Romo. Ok ochuno ni lepwa obed ma nengogi tek kata mabeyo beyo ni eka gibed mowinjore, maler, koda mobidhore.

• Rwakruokwa mulo nade kaka ji kawo lamo mar Nyasaye?

• Gin puonj mage matayo yiero mwatimo korka rwakruok koda bidhruok marwa?

Kapo ni ipuonjori Muma gi achiel kuom Joneno mag Jehova, nyalo bedo ni itemo kaloe motelo sula moro amora mubiro puonjoru. Mondo chokruoge okonyi moloyo, ber mondo itim ikruok ma kamano bende kapok idhi e chokruok moro amora mar kanyakla. Wayudo ber moloyo ka wabedo gi chenro maber mar timo ikruok.

Yang seche mag timo ikruok koda kama ibiro timee. Gin kinde mage minyalo keto pachi duto e puonjruok? Be en gokinyi mang’ich kapok ichako tijeni, koso godhiambo bang’ nyithindo dhi nindo? Kata kapo ni ok inyal tiyo gi seche mang’eny e timo puonjruok, yang seche minyalo tiyogo, kae to tem mondo wach moro kik donjre gi chenrono. Many kama okuwe, kendo gol gimoro amora manyalo galo pachi, inyalo simo redio, televison, koda simb lwedo. Kwayo Nyasaye e lemo kapok itimo puonjruok biro konyi golo pachi kuom parruok mapile, kendo miyo iket pachi duto e Wach Nyasaye.—Jo-Filipi 4:6, 7.

Kiew dwoko, kendo ikri ne chiwo paro. Ng’e mawiye wiye weche ma wijno wuoyoe. Par kuom wich maduong’ mar sulano, non kaka wiye matindo otudore gi wach maduong’ miwuoyoe e sulano, kendo non piche manyalo bedoe koda penjo mag nwoyo puonj madongo. Kae to som moro ka moro kuom paragraf, kendo many dwoko mar penjo moketi. El Muma mari kendo som ndiko moketi, kendo par kuom kaka ndikogo siro weche manie sulano. (Tich Joote 17:11) Sama iyudo dwoko mar penjo, kiew kata ket alama e weche manok mag paragraf mabiro konyi paro dwoko mar penjono e chokruok. Kae to e chokruok, inyalo ting’o badi mondo ichiw paro machuok kitiyo gi weche mowuok e chunyi.

Kuom nono weche mopogore opogore miwuoyoe juma ka juma e chokruoge, ibiro medo weche manyien e ‘e kar kenoni’ mar rieko mag Muma.—Mathayo 13:51, 52.

• Inyalo loso chenro mane mar timo ikruok ne chokruoge?

• Inyalo timo ikruok nade mondo ichiw paro e chokruok?

Chakre kinde machon, Jehova osedwaro ni joot duto okaw kinde ka gin kanyachiel, ka gitego winjruok margi kode koda winjruok margi kaka joot. (Rapar mar Chik 6:6, 7) Emomiyo Joneno mag Jehova oyango kinde moro e juma ka juma mondo gitim lamo mar joot ka giwuoyo e yo mokuwe e wi wach moro sie mamulo winjruokgi gi Nyasaye. Kata kapo ni idak kendi, mago nyalo bedoni kinde mabeyo ahinya mag bedo kanyachiel gi Nyasaye kitimo puonjruok e wi wach moro miyiero timoe nonro e Muma.

En thuolo mar sudo machiegni gi Jehova. “Suduru machiegni gi Nyasaye to en bende nosud iru.” (Jakobo 4:8) Wanyalo ng’eyo Jehova maber ka wapuonjore kido mage koda gik mosetimo mayudore e Wachne mondiki. Yo mayot mar chako Lamo mar Joot en kawo kinde ka un kanyachiel mondo usom Muma gi dwol, samoro ka uluwo chenro mar somo Muma mitimo juma ka juma e Chokruok mar Ngimawa kod Tijwa Kaka Jokristo. Unyalo pogo kama usomo e kind joot te, kae to uduto unyalo wuoyo kuom weche ma upuonjoru e Ndiko.

En thuolo mar sudo machiegni gi joodwa. Chwo koda mondegi, jonyuol koda nyithindgi, tego winjruok manie kindgi ka gipuonjore Muma kaka joot. Mago onego obed kinde mag mor gi kuwe, kendo odiechieng’ ma joot gombo ahinya ni ochop. Jonyuol nyalo yiero wiye manyalo konyo nyithindgi kaluwore gi hikgi, ginyalo kata tiyo gi sula moko mayudore e Ohinga mar Jarito koda Amkeni! kata ma yudore e websaitwa mar jw.org/luo. Unyalo wuoyo e wi chandruok moro ma nyithindu kaloe e skul koda kaka ginyalo nyagore gi chandruogno. Donge, unyalo neno program moro ma yudore e JW Broadcasting (tv.jw.org) kae to uwuoye kanyachiel. Unyalo tiegoru kuom wero wende mibiro wer e chokruoge mag kanyakla, kae to bang’e ka usetimo puonjruok, unyalo chamo gimoro matin.

Kinde makendeni mar Lamo Jehova kaka joot juma ka juma, biro konyo joot oyud mor e wach Nyasaye kendo Nyasaye biro gwedho ahinya kinda ma giketo.—Zaburi 1:1-3.

• Ang’o momiyo wayango kinde mar timo lamo mar joot?

• Ang’o ma jonyuol nyalo timo mondo kinde puonjruok okel mor ne joot duto?

Ang’o momiyo jogi mor kama? Gin e chokruokwa moro maduong’. Mana kaka jotich Nyasaye machon ma ne ochik ni mondo ochokre kanyachiel didek e higa, wan bende wamor dhi e chokruogewa madongo. (Rapar mar Chik 16:16) Higa ka higa wabedo gi chokruoge madongo adek: chokruoge mag alwora ariyo ma moro ka mor kawo odiechieng’ achiel kende, koda chokruok maduong’ mar ndalo adek, makawo odiechienge adek. Gin ber mage ma wayudo e chokruogegi?

Gijiwo winjruokwa kaka owete ma Jokristo. Mana kaka Jo-Israel ne mor pako Jehova ‘ei chokruok,’ wan bende wamor lamo Jehova kanyachiel e kinde makende kaka mago. (Zaburi 26:12; 111:1) Chokruogegi miyowa thuolo mar romo kendo wuoyo gi Joneno mowuok e kanyakla mamoko kata mana mowuok e pinje mamoko. Gimoro sa auchiel modiechieng’ wabedo gi kinde mar gago kanyachiel kama itimoe chokruok, kendo mano medo mor mwabedogo e kinde ma kamagi ma gin mag gero winjruokwa gi Nyasaye. (Tich Joote 2:42) E chokruogego waneno wawegi hera matudo “riwruok duto mar owete” e piny mangima.—1 Petro 2:17.

Gikonyowa timo dongruok e winjruokwa gi Nyasaye. Jo-Israel bende noyudo ber nikech “ne giwinjo tiend” Ndiko ma ne ileronegi. (Nehemia 8:8, 12) Wan be wamor gi puonj mawuok e Muma mwayudo e chokruogewa madongo. Wach maduong’ miwuoyoe e program duto mag chokruogego otenore kuom Ndiko. Kokalo kuom twege ma ywayo paro, twege mopogi e migepe, koda ranyisi mitimo, wapuonjore timo dwaro mar Nyasaye e ngimawa. Wayudo jip kuom winjo weche mosene mag joma osenyagore maber gi pek mabedoe ka ng’ato odak e ngima mar Jokristo e kinde matekgi. E chokruok maduong’ mar ndalo adek, drama mag Muma miyo wayudo picha maler kuom weche moko ma notimore mondik e Muma, kendo wayudo puonj mwanyalo tiyogo kuom wechego. E moro ka moro kuom chokruogewa, oyang kinde mar batiso ne jogo madwaro nyiso ayanga chiwruok margi ne Nyasaye.

• Ang’o momiyo chokruoge madongo gin kinde mag mor?

• Gin ber mage minyalo yudo kuom dhi e chokruoge madongo?

Kinde matin kapok Yesu otho, nolando niya: “Wach maber mar Pinyruothni ibiro yal e piny mangima mondo ochiw neno ne ogendni duto, eka giko nobi.” (Mathayo 24:14) To ere kaka ne idhi chop tich mar lendo e piny mangima? Mana kuom luwo ranyisi ma Yesu noketo kinde ma ne en e pinyka.—Luka 8:1.

Watemo limo ji e utegi. Yesu notiego jopuonjrene mondo oland wach maber e ot ka ot. (Mathayo 10:11-13; Tich Joote 5:42; 20:20) Joland wach me kinde Jokristo mokwongo ne omi alwora sie ma ne onego gilendie. (Mathayo 10:5, 6; 2 Jo Korintho 10:13) E yo ma kamano bende e kindegi, tijwa mar lendo ochan e yo maber, kendo imiyo kanyakla ka kanyakla alwora margi mar lendo. Mano konyowa chopo wach ma ne Yesu ochikowa ni “wayal ne ji kendo wachiw neno e okang’ mong’ith chuth.”—Tich Joote 10:42.

Wadwaro lendo ne ji kamoro amora ma giyudoree. Yesu bende noketo ranyisi kuom lendo ne ji e lela, kaka e dho wath kata e dho soko ma ji duto ne umboe. (Mariko 4:1; Johana 4:5-15) Wan bende wawuoyo gi ji e wi Muma kamoro amora ma wanyalo yudogie—e wang’a yo, kuonde ohala, kuonde miyueyoe, kata kokalo e simo. Bende walendo ne jirendewa, jotich wetewa, joskul wetewa, koda ne wedewa e kinde mowinjore timo kamano. Tiyo gi yoregi duto osemiyo milionde mag ji e piny ngima owinjo ‘wach resruok.’—Zaburi 96:2.

Be nitie ng’at ma diher wuoyogo e wi wach maber mar Pinyruodh Nyasaye kinyise kaka wachno mulo kinde mabiro? Kik iling’ aling’a gi wechegi makelo geno. Nyisgi wechegi mapiyo kaka nyalore!

• En “wach maber” mane ma nyaka landi?

• Ere kaka Joneno mag Jehova luwo ranyisi mar Yesu mar lendo?

Kinde mang’eny ilero ni “japainia” en jal ma nono kuonde ma ji kiya kendo loso yo mondo jomoko bende odhi kuondego. Yesu ne en japainia mang’ula nikech ne oore e piny mondo otim tich ma ne dhi chiwo ngima kendo ma yawonwa yor resruok. (Mathayo 20:28) Kindegi, jolupne bende luwo ranyisi mare kuom tiyo gi seche mang’eny kaka ginyalo e ‘loko ji obed jopuonjrene.’ (Mathayo 28:19, 20) Moko kuomgi tiyo gi thuologi e bedo jopainia.

Japainia en ng’ama lendo kuom thuolone duto. Joneno mag Jehova duto gin jolendo mag wach maber. Kata kamano, moko kuomgi osechano ngimagi mondo giti kaka jopainia mapile, ka gitiyo gi seche 70 dwe ka dwe e tij lendo. Mondo gitim kamano, thothgi tiyo mana tije andika kuom kinde. Moko kuomgi iyiero mondo obed jopainia makende kuonde ma jolendo mag Pinyruoth dwaroree ahinya, ka dwe ka dwe gitiyo gi seche 130 kata mokalo kanyo e tij lendo. Jopainia mor dak e ngima mayot ka gigeno ni Jehova biro miyogi gik madwarore e ngima. (Mathayo 6:31-33; 1 Timotheo 6:6-8) Jolendo maok nyal bedo jopainia kuom thuologi duto, nyalo tiyo kaka jopainia makonyo e kinde mowinjorenegi kuom medo seche ma gitiyogo e tij lendo ochop seche 30 kata 50 e dwe.

Jopainia lendo kuom thuolo malach nikech gihero Nyasaye koda ji. Mana kaka Yesu, waneno kaka dwarore ahinya ni ji ong’e Nyasaye koda dwache. (Mariko 6:34) Kata kamano, wang’eyo wach manyalo konyogi gie sani kendo manyalo miyogi geno madier mar kinde mabiro. Nikech japainia ohero jowetene, mano miyo otiyo gi sechene mang’eny koda tekone e konyo ji ng’eyo wach Nyasaye. (Mathayo 22:39; 1 Jo-Thesalonika 2:8) Nikech mano, yie mare bedo motegno, obedo machiegni gi Nyasaye, kendo obedo gi mor mang’eny.—Tich Joote 20:35.

• Inyalo lero ni japainia en ng’at matimo ang’o?

• En ang’o majiwo jomoko mondo obed jopainia kuom thuologi duto?

Joneno mag Jehova osebedo ka tiego ji kokalo kuom skunde mag tij Nyasaye. Jogo mochiwore tiyo gi thuologi mang’eny e tij lando wach Pinyruoth itiego kokalo kuom skunde makende mondo ‘gitim tich mosemigi e yo maber chuth.’—2 Timotheo 4:5.

Skul mar Jopainia. Bang’ ka painia mapile osetieko higa achiel ka olendo kuom thuolone mang’eny, igwele e skul ma kawo ndalo auchiel minyalo tim e Od Romo man machiegni kode. Skundno konyo painia mondo osud machiegni gi Jehova, obed molony e yore mopogore opogore e tij Nyasaye, kendo mondo odhi nyime gi tij painia.

Skul mar Joland-Injili mar Pinyruoth. Ma en skul ma kawo dweche ariyo molos mondo otieg jopainia molony kendo moikore weyo miechgi mondo gidhi e alwora ma jolendo dwarore ahinya. Giluwo ranyisi mar Jaland-Injili maduong’ie moloyo e piny mangima ma en Yesu Kristo, ka giwacho ni, “An ka; ora.” (Isaiah 6:8; Johana 7:29) Nikech gidar e miechgi, samoro nyalo dwarore ni gipuonjre dak e ngima mayot. Timbe joma odak kuonde ma gidhiyego, chal mar kor lwasi, kod chiemo, nyalo bedo mopogore ahinya gi ma thuchegi. Bende, nyalo dwarore ni gipuonjre dhok manyien. Skundni konyo owete gi nyimine ma ok nie kend, kod joma nie kend, ma hikgi nie kind 23 nyaka 65, mondo ginyag kido ma biro konyogi chopo migepegi kod lony ma biro konyogi tiyo ne Jehova kod riwruok mare chuth.

Skul mar Gilead. E dho Hibrania, “Gilead” tiende en “Chiwo Neno Malach.” Chakre ne chak Skul mar Gilead e higa mar 1943, oseor jomisonari mokalo 8,000 mosetieg e skundni mondo gichiw neno “nyaka e tung’ piny,” kendo giseyudo nyak mang’eny. (Tich Joote 13:47) Kuom ranyisi ka ne jomisonari ohango dhi e piny Peru, ne onge kata kanyakla achiel. To sani koro nitie kanyakla mokalo 1,000. Kane jomisonari magwa ochako lendo e piny Japan, ne nitie jolendo ma ok rom apar e pinyno. To sani koro jolendo okalo 200,000. Tiegruok mar dweche abich e Gilead oriwo puonjruok Wach Nyasaye e yo mong’ith. Jogo matiyo kaka jopainia makende kata jomisonari, kata jogo manie bad ofise, kata matiyo kaka jorit-alwora, igwelo e skundni mondo giyud tiegruok mong’ith mondo okony e tego tijwa mar piny mangima.

• Ang’o momiyo ne ochak Skul mar Jopainia?

• Skul mar Joland-Injili mar Pinyruoth olos mondo otieg jomage?