Be Nyasaye En Ng’ato Madier?
Dwoko ma ji hinyo chiwo:
◼ “En kamoro amora, e gimoro amora. En kaka yamo.”
◼ “Ok en ng’ato madier, to mana teko mariek.”
Yesu to nowacho ang’o?
◼ “E dala Wuora nitie udi mang’eny.” (Johana 14:2) Yesu nowuoyo e yor ranyisi ni Nyasaye nigi ot, kata kar dak.
◼ “Naa ka Wuoro, kendo nabiro e piny; kendo koro aweyo piny, adhi ka Wuoro.” (Johana 16:28) Yesu ne oyie ni Nyasaye en Ng’ato madier modak kamoro masie.
YESU ne ok owuoyo ngang’ ni Nyasaye en mana teko moro. Mopogre gi mano, nowuoyo gi Nyasaye kendo kwaye e lamo. Pile noluongo Jehova ni Wuon-gi me polo, to mano nyiso winjruok matut ma ne en-go gi Nyasaye.—Johana 8:19, 38, 54.
En adier ni, “onge ng’a moseneno Nyasaye” kendo en adier ni, “Nyasaye en Roho.” (Johana 1:18; 4:24) Kata kamano, mani ok nyis ni oonge gi ringruok e yo moro amora. Muma wachonwa kama: “Ka nitie ringruok mar dhano, nitie ringruok mar chuny.” (1 Jo Korintho 15:44) Kuom mano, be Jehova nigi ringruok mar chuny?
Ee. Bang’ kane osechier Yesu, “nodonjo e polo wuon, mondo koro onere e nyim Nyasaye nikech wan.” (Jo Hibrania 9:24) Wachni puonjowa weche ariyo madongo e wi Nyasaye. Mokwongo, en gi kama odakie. Mar ariyo, en Ng’ato, to ok mana teko moro mayudore kamoro amora.
To kare, ere kaka teko mar Nyasaye nyalo chiko gik moko kamoro amora? Nyasaye nyalo oro roho mare maler, ma en tekone, kamoro amora e piny gi polo. Mana kaka wuoro nyalo rieyo lwete mondo oho kendo ojiw nyithinde, e kaka Nyasaye tiyo gi roho mare maler e chopo dwaro mare.—Zaburi 104:30; 139:7.
Nikech Nyasaye en Ng’ato madier, en bende en gi kido manyiso gik mohero koda maok ohero—kendo onyalo nyiso kaka owinjo e chunye. Muma nyisowa ni ohero oganda joge, oyil kuom tichne, osin gi lamo nyiseche manono, kendo owinjo malit e chunye kuom timbe maricho. (Chakruok 6:6; Rapar mar Chik 16:22; 1 Ruodhi 10:9; Zaburi 104:31) Ei 1 Timotheo 1:11 (New World Translation), iluonge ni “Nyasaye mamor.” Kare mano emomiyo Yesu nowacho ni wanyalo puonjore hero Nyasaye gi chunywa duto!—Mariko 12:30.a
[Weche moler piny]
a Mondo iyud weche momedore kuom wachni ne sula 1 mar buk miluongo ni Ang’o ma Muma Puonjo Kuom Adier? mogo gi Joneno mag Jehova.
[Weche manie ite mar 5]
Mana kaka wuoro mako lwet nyathine, Nyasaye bende konyowa gi roho mare maler mondo ochop dwarone