Be Nyasaye Nigi Nying’?
Dwoko ma ji hinyo chiwo:
▪ “Nyinge en Ruoth.”
▪ “Oonge gi nying’ masie.”
Yesu to nowacho ang’o?
▪ “Un to lemuru kama eri: ‘Wuonwa manie polo, Nyingi mondo obed maler.’” (Mathayo 6:9) Yesu nong’eyo ni Nyasaye nigi nying’.
▪ “Nanyisogi nyingi, kendo nanyisgi; mondo herano miherago obedi e igi, an bende abedi e igi.” (Johana 17:26) Yesu nomiyo nying’ Nyasaye mondo ong’ere.
▪ “Ok ununena, nyaka chop chieng’ ma unuwachie niya, ‘En ng’a moguedhi ma biro e nying [Jehova, NW].’” (Luka 13:35; Zaburi 118:26) Yesu noluongo Nyasaye gi nyinge.
NYASAYE owuon hulonwa nyinge. Nyasaye wacho kama ei Muma: “An Jehova; ma e nyinga.”a (Isaiah 42:8) Jehova e nying’ mong’ere maber chuth gi dho-Luo, kaka nying’ ma Nyasaye nomiyore owuon e dho-Hibrania. Inyalo wuoro kuom ng’eyo ni nying’ makendeni e dho-Hibrania yudore nyadi gana mang’eny ei ndiko machon mag Muma. Kuom adier, nying’no yudore nyading’eny maloyo nying’ moro amora manie Muma.
Kopenj jomoko ni, “Nying’ Nyasaye en ng’a?” ginyalo dwoko ni, “Ruoth.” Kata kamano, kuom adier, dwokono ok chiw ler mana kaka kopenj ng’ato ni, “Ng’ano ma ne oyombo e yiero ma ne otim?” to odwoko ni “jal ma ne ochung’.” Dwoko ma kamago ok chiw ler kuom gima ipenjo nimar “Ruoth” kata “jal ma ne ochung’ ” ok gin nyinge masie.
Ang’o momiyo Nyasaye nofwenyonwa nyinge? Ne otimo kamano mondo wamed ng’eye maber. Kuom ranyisi, inyalo luongo ng’ato ni Jatelo, Jaduong’, Baba, kata Kwara, kaluwore gi chalne. Nyinge mag telo kaka magi, gin malero chal mare. Kata kamano, nying ng’ato sie paronwa gik moko duto ma wang’eyo kuome. Kamano bende, nyinge mag telo kaka Ruoth, Nyasaye Manyalo Duto, Wuoro, koda Jachwech nyisowa gik mopogore ma Nyasaye osetimo. To nyinge owuon mar Jehova, ema paronwa gik moko duto ma wang’eyo kuome. Be wanyalo wacho ni wang’eyo Nyasaye ka kuom adier ok wang’eyo nyinge?
Gima duong’ ahinya, ok en mana ng’eyo nyingno, to tiyo kod nyingno bende. Nikech ang’o? Nikech Muma wachonwa niya: “Ng’ato ka ng’ato ma luongo nying [Jehova, NW], norese.”—Jo Rumi 10:13; Joel 2:32.
[Weche moler piny]
a Mondo iyud weche malero tiend nying’ Nyasaye, kaachiel gi gimomiyo loko moko mag Muma ok ti kod nying’no, inyalo ng’iyo ite mag 195-197 ei buk miluongo ni Ang’o ma Muma Puonjo Kuom Adier? mogo gi Joneno mag Jehova.
[Weche manie ite mar 6]
Inyalo luongo ng’ato ni Jatelo, Jaduong’, Baba, kata Kwara, kaluwore gi chalne. Kata kamano, nying ng’ato sie paronwa gik moko duto ma wang’eyo kuome