Be Nyasaye Oyie gi Kit Lamo Duto?

Dwoko ma ji hinyo chiwo:

▪ “Dinde duto gin yore matero ji ka Nyasaye.”

▪ “Onge tiende dewo din milemoe, nimar gima duong’ en bedo gi chuny maler.”

Yesu to nowacho ang’o?

▪ “Donjuru e rangach madiny; nikech rangano duong’, kendo yorno lach ma dhi e kethruok, kendo ging’eny ma donjoe. To rangano tin, kendo yorno diny ma dhi e ngima, kendo ginok ma nwang’e.” (Mathayo 7:​13, 14) Yesu ne ok opuonjo ni dinde duto tero ji ka Nyasaye.

▪ “Ji mathoth nowachna chieng’ono niya, ‘Ruoth, Ruoth, ne ok wakoro wach e nyingi koso, kendo e nyingi ne ok wagolo jochiende, kendo e nyingi ne ok watiyo tije madongo mang’eny?’ Eka anawachnigi niya, ‘Ok nang’eyou ngang’: auru kuoma, un jo ma timo richo.’” (Mathayo 7:​22, 23) Yesu ok orwako jogo duto mawacho ni giluwe.

JI MANG’ENY mohero lemo, omakore ahinya kod puonj koda timbe mag dindegi. Kata kamano, to nade kapo ni puonj koda timbe mag dindegi ok owinjore gi gima Muma, ma en Wach Nyasaye wacho? Yesu nonyiso kaka luwo puonj kod timbe mag dhano nyalo kelo hinyruok, kane owacho ne jotend din e ndalone niya: “Useketho chik Nyasaye nikech timu.” Bang’e ne onwoyo weche ma Nyasaye nondiko e Muma niya: “Ogandani paka gi dhogi, to chunygi bor koda. Gilama kayiem, ka gipuonjo chik dhano ka puonj mag Nyasaye!”—Mathayo 15:​1-9; Isaiah 29:⁠13.

Timbe mabeyo bende dwarore ahinya, to ok mana wacho ni wan-gi yie. Muma wacho kama kuom jomoko ma ne wacho ni gilamo Nyasaye: “Giwacho ni ging’eyo Nyasaye, to gik ma gitimo nyiso ni gidage.” (Tito 1:​16) Kuom adier, Muma wuoyo kuom joma odak e kindewagi ni gin: “Jo mohero mor mar piny moloyo hero Nyasaye. Kitgi maoko nenore ka jo moluoro Nyasaye, to ngimagi odagi tekone. Aye kuom jo ma kamago.”—2 Timotheo 3:​4, 5.

Bedo gi chuny maler en gima dwarore mondo lamo marwa omor Nyasaye, to kata kamano mano kende ok oromo. Nikech ang’o? Nikech ng’ato nyalo bedo gi chuny maler e lamo mare, to din mare ok puonj adier. Omiyo, ng’eyo adiera e wi Nyasaye en gima dwarore ahinya. (Jo Rumi 10:​2, 3) Puonjruok adiera kendo timo kaluwore gi gima Muma wacho biro konyowa bedo joma miyo chuny Nyasaye obed mamor. (Mathayo 7:​21) Kuom adier, din mar adier en din mitimoe gik moko gi chuny maler, kendo ma nigi puonj madier koda timbe makare. To timbe makare tiende en timo dwaro mar Nyasaye pile ka pile!—1 Johana 2:​17.

Ka diher ng’eyo weche momedore kuom gima Muma wacho e wi Nyasaye, tudri kod Joneno mag Jehova, mondo gipuonji Muma e dalani ma onge chudo.

[Weche manie ite mar 9]

Din mar adier en din mitimoe gik moko gi chuny maler, kendo ma nigi puonj madier, koda timbe makare