Musa Nonyiso Yie

YIE EN ANG’O?

Kaluwore gi Muma, “yie” en bedo maonge kiawa kuom wach moro nikech nitie gik masiro wachno gadier. Ka ng’ato nigi yie kuom Nyasaye, en gadier ni Nyasaye biro chopo gigo duto ma osesingo.

ERE KAKA MUSA NONYISO YIE?

Kit ngima Musa nonyiso ni oyie motegno kuom singo mag Nyasaye.(Chakruok 22:15-18) Ne en gi thuolo mar dak e ngima mayom mar Jo-Misri, to “noyiero ni mondo osande kod oganda Nyasaye, kar bedo gi mor mar richo ma rumo bang’ ndalo matin.” (Jo Hibrania 11:25) Be notimo yierono maok oparo ma oywago ang’e bang’e? Ooyo, nikech Muma wacho ni Musa nosiko ‘kodhil ka ng’a maneno Nyasaye ma ok ne.’ (Jo Hibrania 11:27) Musa ne ok oywago ang’e nikech yiero ma notimo kuom yie.

Musa notemo tego yie mar jomoko. Kuom ranyisi, tem ane paro gima notimore kane nenore ni odin ne Jo-Israel e kind jolweny mag Farao kod Nam Makwar. Jo-Israel ne oywak ne Jehova koda ne Musa nikech masira ma koro ne nenore ni ochomogi. Musa ne dhi timo ang’o?

Nyalo bet ni Musa ne ok ong’eyo ni Nyasaye ne chiegni pogo Nam Makwar mondo Jo-Israel oyud yo mar tony. Kata kamano, Musa ne ni gadier ni Nyasaye ne dhi timo gimoro mondo okony joge. Kendo Musa ne dwaro ni Jo-Israel wetene obed gadier ma kamano. Wasomo kama: “Musa nowacho ni ji, kik uluor, chunguru mos, une warruok mar Jehova, ma enotimnu tinende.” (Wuok 14:13) Be Musa ne otego yie mar Jo-Israel wetene? Ee, nimar Muma wuoyo, ok mana kuom Musa, to kuom Jo-Israel duto niya: ‘Kuom yie, ne ging’ado Nam Makwar kaka e lowo motwo.’(Jo Hibrania 11:29) Yie mar Musa ne okonye kaachiel gi ji duto ma ne opuonjore kuome.

GIN PUONJ MAGE MWAYUDO?

Wanyalo luwo ranyisi mar Musa kuom nyiso e ngimawa ni wayie kuom singo mag Nyasaye. Kuom ranyisi, Nyasaye singo ni ka waketo tiyone ema obed gimaduong’ e ngimawa, obiro miyowa gige ringruok madwarore. (Mathayo 6:33) En adier ni nikech e kindewagi gima ji jiwo ahinya en manyo gige ringruok, yot mondo wadonj e obadho mar manyo mwandu. Kata kamano, wanyalo bedo gadier ni ka watimo kar nyalowa mondo waket ngimawa obed mayot kendo ka waketo pachwa duto e tiyo ne Nyasaye, Jehova biro miyowa gigo duto madwarore e ngima. Osingonwa kama: “Ok anajwang’i ngang’, kendo ok anaweyi ngang’.”​—Jo Hibrania 13:5.

Wan bende, watimo kinda mondo wakony jomoko obed gi yie motegno. Kuom ranyisi, jonyuol mariek ong’eyo ni gin gi thuolo maduong’ mar konyo nyithindgi obed gi yie kuom Nyasaye. A e tin-gi, dwarore ni jonyuol opuonj nyithindgi ni Nyasaye nitie kendo ni omiyowa chike makonyowa pogo ber gi rach. E wi mano, onego gibed gadier ni dak kaluwore gi chike Nyasaye e ngima maber moloyo. (Isaiah 48:17, 18) Ka jonyuol okonyo nyithindgi mondo obed gi yie ni Nyasaye “nitie, kendo ni en gi mich momiyo jogo ma dware,” gimiyo nyithindgi mich maber moloyo.​—Jo Hibrania 11:6