Musa Nonyiso Bolruok

BOLRUOK EN ANG’O?

Bolruok oriwo bedo maonge ng’ayi kata sunga. Ng’at mobolore ok par ni ober moloyo jomoko. Ng’ato ang’ata ma obolore ong’eyo ni orem e yore moko.

ERE KAKA MUSA NONYISO BOLRUOK?

Musa ne onge sunga kata obedo ni ne omiye telo. Kinde mang’eny, ka ng’ato oyudo telo nenore mapiyo kabe en ng’at mobolore kata ooyo. Jandiko moro miluongo ni Robert G. Ingersoll ma ne odak higni 200 mokalo nowacho kama: “Thoth ji nyalo nano e bwo masira. Kata kamano, kidwaro ng’eyo kit ng’ato gadier to miye telo.” Ka watiyo gi wechego, wanyalo wacho ni Musa noketo ranyisi maber ahinya e nyiso bolruok. E yo mane?

Jehova nomiyo Musa migawo maduong’ mar tayo Jo-Israel. Kata kamano, telo ma ne omiyeno ne ok omiyo obedo jasunga. Kuom ranyisi, ne ane kaka nonyiso bolruok kane openje wach ma kore tek motudore gi yudo gikeni. (Kwan 27:1-11) Ne en wach mapek nimar tienge mabiro ne dhi luwo chik ma ne odhi keto.

Musa ne dhi timo ang’o? Be ne odhi paro ni onyalo ng’ado wachno mana nikech en jatelo mar Jo-Israel? Be ne odhi ng’ado wachno kaluwore gi riekone, koso kaluwore gi lony ma ne en-go kuom dak aming’a, kata kaluwore gi ng’eyone matut e wi Jehova?

Dine obed jasunga, ne onyalo timo kamano. Musa to ne ok en jasunga. Muma nyisowa niya: ‘Musa nokelo wachno e nyim Jehova.’ (Kwan 27:5) Parie wachno! Kata bang’ tayo oganda Jo-Israel kuom higni 40, Musa ne ok otiyo gi pache owuon, to ne otenore kuom Jehova. Ranyisini nyiso maler ni Musa ne en ng’at mobolore ahinya.

Musa ne ok par ni en kende ema ne onyalo tayo Jo-Israel. Ne omor ka Jehova ne oyie ne Jo-Israel mamoko mondo oti kaka jonabi kaachiel kode. (Kwan 11:24-29) Kane wuon chiege okone ni oyier jomoko okonye tich, Musa ne orwako parono kobolore. (Wuok 18:13-24) Kendo kane thone chiegni, Musa nokwayo Jehova oyier ng’at ma ne dhi bedo jatelo bang’e, kata obedo ni pod ne en-gi teko. To ka Jehova noyiero Joshua, jal ma hike ne tin ne Musa, Musa noriwo Joshua lwedo gi chunye duto kojiwo ji mondo oluw kaka Joshua ne dhi tayogi donjo e Piny Manosingi. (Kwan 27:15-18; Rapar mar Chik 31:3-6; 34:7) Musa noneno tich mar tayo Jo-Israel e lamo kaka migawo makende. Kata kamano, ne ok oweyo duong’ ma ne en-go omi obed ng’at maok dew jomoko.

GIN PUONJ MAGE MWAYUDO?

Ok wadwar ni telo kata nyalo moro amora ma wan-go, omi wabed gi sunga. Ket wachni e paro: Mondo Jehova oti kodwa, gimaduong’ madwarore en bolruok to ok mana nyalo ma wan-go. (1 Samuel 15:17) Ka wan joma obolore gadier, wabiro temo ahinya mondo waluw puonj mariek mar Muma mawacho ni: “Gen Jehova gi chunyi duto, kendo kik iketri kuom lony gi weche mayoreyore ma ingo iwuon.”​—Ngeche 3:5, 6.

Ranyisi mar Musa bende puonjowa ni ok onego wasungre nikech duong’ kata telo moro ma wan-go.

Be nitie ber mwayudo kuom luwo ranyisi mar Musa mar bolruok? Ee, nitie! Ka wabolore, wamiyo jogo mwatudorego tich mayot kendo wamiyo giherowa. To moloyo duto, Jehova Nyasaye manyiso kido majaber mar bolruokni, bedo mamor kodwa. (Zaburi 18:35) “Nyasaye tamo josunga, to omiyo jo mamuol ng’wono.” (1 Petro 5:5) Donge ber ka waluwo ranyisi mar Musa