Musa Nonyiso Hera

HERA EN ANG’O?

Hera oriwo dewo ji kendo bedo mamor kodgi. Ng’at ma nigi hera nyiso e wechene koda e timbene ni odewo jogo mogeno kata ka timo kamano dwaro ni ochiwre.

ERE KAKA MUSA NONYISO HERA?

Musa nonyiso ni ohero Nyasaye. E yo mane? Par ane weche mondik e bug 1 Johana 5:3 mawacho niya: “Hero Nyasaye en mako chikne.” Musa noluwo puonjno e ngimane. Notimo gik moko duto ma ne Nyasaye okone mondo otim, bed ni ne en gima tek kaka dhi e nyim Farao, kata gima yot kaka rieyo ludhe e wi Nam Makwar. Omiyo, gik moko duto ma ne idwaro ni otim, obed gima tek kata mayot, mano “e kaka notimo.”​—Wuok 40:16.

Musa nohero Jo-Israel wetene. Jo-Israel nong’eyo ni Jehova tiyo gi Musa mondo otagi, omiyo ne gitero ne Musa chandruogegi. Wasomo niya: ‘Ji nochung’ ka gilworo Musa nyaka a okinyi nyaka odhiambo.’ (Wuok 18:13-16) Par ane kaka Musa ne jony kuom winjo odiechieng’ mangima chandruoge ma Jo-Israel ne kelone! Kata kamano, Musa ne mor konyo jogo nikech ne oherogi.

Mopogore gi chikonegi ite, Musa ne lemonegi bende. Parie ni nolemo kata ne jogo ma ne otimone marach! Kuom ranyisi, kane Miriam, ong’ur nikech Musa, Jehova ne ogoye gi tuwo mar dhoho. Kar bedo mamor nikech ne okum Miriam, Musa ne olemone gikanyono kowacho niya: “Change, yaye Nyasaye, asayi.” (Kwan 12:13) Hero ji gadier ema nomiyo Musa olemo e yo ma kamano.

GIN PUONJ MAGE MWAYUDO?

Wanyalo luwo ranyisi mar Musa kuom hero Nyasaye gadier. Hera ma kamano miyo waluwo chikene kowuok e ‘chunywa.’ (Jo Rumi 6:17) Ka wawinjo Jehova kowuok e chunywa, wamiyo obedo mamor. (Ngeche 27:11) Wan be wayudo ber. Donge tiyo ne Nyasaye nikech wahere gadier miyo watimo gik makare kendo watimogi kwamor?​—Zaburi 100:2.

Yo machielo ma wanyalo luwogo ranyisi mar Musa en kuom chiwore chuth e nyiso hera. Ka osiepewa kata joodwa obironwa gi chandruogegi, hera miyo (1) wachikonegi itwa adimba; (2) watemo winjo lit ma giwinjo; kendo (3) wanyiso ni wadewogi gadier.

Wanyalo lemo ne jogo mwahero mana kaka Musa notimo. Samoro, ka gisenyisowa chandruogegi, chunywa nyalo chandowa kapo ni onge kaka wanyalo konyogi. Nyalo bet ni wanyalo mana wachonegi kama: “Mos yawa, anyalo mana lemoni.” Ng’e niya: “Lemo mar ng’at makare ni gi teko ahinya.” (Jakobo 5:16) Ka walemo ne ng’ato, mano nyalo miyo Jehova otimne gima ok dine otimone. Kuom adier, be nitie gimaber mwanyalo timo ne jowetewa moloyo lemonegi?a

Donge en adier ni wanyalo puonjore weche mang’eny kuom Musa? Kata obedo ni ne en mana dhano kaka wan, ne oketonwa ranyisi maber ahinya e nyiso kido kaka yie, bolruok, koda hera. Ka watimo kinda mondo waluw ranyisi mar Musa, mano biro kelonwa ber kendo biro miyo wakony jomoko bende.​—Jo Rumi 15:4.