“Ne Gidwaro ni Ane Awuon gima Muma Puonjo Gadier”

NGIMANA MACHON:

Ne onyuola Santo Domingo, piny mar Dominican Republic, to an ema ne an chogo kuom nyithindo ang’wen. Jonyuolna ne gin joma osomo kendo ne gidwaro ni wadong e kind joratiro mondo wabed jomabeyo. Higni ang’wen kapok onyuola, jonyuolna ne oromo gi jomisonari mag din mar Jo-Momon. Nikech jonyuolna ne mor gi rwakruok, bidhruok, koda dimbruok mar jogo, ne ging’ado ni joodwa odonj e din mar jomisonarigo, din miluongo ni Church of Jesus Christ of Latter-day Saints, kata Mormon Church, ma eka nobiro e chulano.

Ne adongo ka ahero gik ma Jo-Momon timo kendo ne akawo gi pek gik ma ne gipuonjo e wi ngima joot koda timbe mabeyo. Bedo ja kanisa mar Jo-Momon ne mora ahinya kendo ne adwaro bedo jamisonari.

Kane an jahigni 18, ne wadar mwadhi e piny Amerka mondo asom e yunivasiti maber kuno. Bang’ higa achiel kama, nyamin mamawa kod jaode ma ne gin Joneno mag Jehova ne obiro limowa e taon mar Florida. Ne gigwelowa mondo wadhi kodgi e chokruok moro maduong’ ma ne ipuonjoe Muma. Gima ne omora ahinya en ni ji ne elo Muma kendo ne ndiko weche ma ne gipuonjore. Omiyo ne akwayo kalam gi kalatas kendo an be ne achako ndiko.

Bang’ chokruogno, nyamin mamawano gi jaode ne onyisa ni nikech ne agombo bedo jamisonari, ne ginyalo puonja Muma. Ne arwako wachno nikech gie kindeno ne asesomo Book of Mormon moloyo kaka ne asesomo Muma.

KAKA MUMA NOLOKO NGIMANA:

Kinde ka kinde ma ne nyamin mamawano gi jaode wuoyo koda e wi Muma e simu, ne gijiwa ni apim puonj mag dindwa koda puonj mag Muma. Ne gidwaro ni ane awuon gima Muma puonjo gadier.

Ne ayie gi puonj mang’eny mag Jo-Momon, kata kamano, ne ok ang’eyo gadier kabe Muma siro puonjgo. Nyamin mamawano ne oorona gaset mar Amkeni! mar Novemba 8, 1995, mogo gi Joneno mag Jehova, ma noting’o sula moko ma ne wuoyo e wi puonj mag Jo-Momon. Ne adhier nono kaka ne ok ang’eyo puonj mang’eny mag Jo-Momon. Mano ne omiyo adhi e Websait mar Jo-Momon mondo ane ka gik ma ne owach e gasedno ne gin adier. Gasedno ne wacho adier, kendo kane adhi e museum mar Jo-Momon e taon mar Utah ne ayudo ni wechego ne gin kare.

Ne asebedo ka aparo ni Book of Mormon kod Muma ne ok tuomre. To kane achako somo Muma adimba, ne afwenyo ni puonj mag Jo-Momon tuomore gi weche moko mayudore e Muma. Kuom ranyisi, Ezekiel 18:4 e loko mar New World Translation, wacho ni chuny tho. Kata kamano, Book of Mormon, e Alma 42:⁠9, wacho ni: “Chuny ok nyal tho ngang’.”

E wi puonj mag miriambogo, chunya ne chandore gi kaka Jo-Momon ne jiwo ni ogendini moko beyo moloyo moko. Kuom ranyisi, Jo-Momon puonjo ni puodho mar Eden ne nitie e Jackson County, Missouri, e piny Amerka. Kendo jonabi mag kanisano wacho ni Pinyruodh Nyasaye biro locho kokalo kuom sirkal mar Amerka.

Ne awuoro ni ka en kamano, ang’o ma ne dhi timore ne pinje mamoko moriwo nyaka piny ma ne onyuolae. Kane rawera moro ma ne itiego mondo obed jamisonari ogochona, ne apenje penjono. Ne apenje achiel kachiel kabe ne onyalo kedo gi Jo-Momon manie piny machielo kapo ni pinygi gore gi pinyno. Dhoga ne omoko kane owachona ni ne onyalo kedo! Ne anono matut puonj mag dindno, kendo ne apenjo jotend kanisa weche mang’eny. Ne ginyisa ni dwoko mag penjona ne korgi tek, kendo gibiro mana yudore kaka ler medo bedoe.

Nikech chunya ne onyosore gi dwoko ma ne gichiwo, ne aparo matut gimomiyo ne adwaro bedo jamisonari mar Jo-Momon. Ne afwenyo ni ne adwaro bedo jamisonari nikech ne agombo konyo ji. Ne adwaro bende ni omiya luor ma ne jomisonari yudo. To kodok korka Nyasaye, ne ok ang’eyo gik mang’eny. Kata obedo ni ne ajasomo Muma kinde ka kinde, ne ok akawe mapek. Ne ok ang’eyo gimomiyo Nyasaye ne ochweyo piny kata mana dhano.

KAKA MUMA OSEKONYA:

Kuom puonjruok Muma gi Joneno mag Jehova, ne apuonjora gik mang’eny kaka nying Nyasaye, gima timore ka ng’ato otho, koda migawo ma Yesu nigo e chopo dwaro mar Nyasaye. Bang’ kinde ne achako ng’eyo Muma, ma en buk majaber ahinya kendo ne amor nyiso jomoko gik ma ne apuonjora. Kinde duto ne asebedo ka ang’eyo ni Nyasaye nitie, kata kamano, gie sani to anyalo wuoyo kode e lamo kaka Osiepna maduong’. Ne obatisa Julai 12, 2004 ma abedo Janeno mar Jehova, kendo dweche auchiel bang’e ne achako tiyo ne Nyasaye kuom thuolona duto.

Kuom higni abich, ne amor tiyo e ofis maduong’ mar Joneno mag Jehova man Brooklyn, New York ka akonyo e tij goyo Muma koda buge malero Muma makonyo ji milionde e piny mangima kendo gie sani adhi nyime konyo ji opuonjre e wi Nyasaye.