Buk mokwongo e Muma, miluongo ni Chakruok lero wachno e yo machuok kowacho niya: “Kar chakruok Nyasaye nochweyo polo gi piny.” (Chakruok 1:1) Bang’ kane Nyasaye osechweyo yiende kod le, nochweyo dhano mokwongo, Adam gi Hawa. Ne gipogore gi le nikech dhano nigi kido mag Nyasaye e okang’ moro, to mano oriwo nyalo ma gin-go mar timo yiero margi giwegi. Nikech mano, yiero ma ne gidhi timo ne nyalo miyo giyud ber kata rach. Kane gidhi winjo chike ma Nyasaye nomiyogi, gin ema ne gidhi bedo jonyuol ma ne dhi chopo dwaro mar Nyasaye ni oganda dhano opong’ piny kendo odag e ngima makare man gi kuwe nyaka chieng’.
Kata kamano, malaika moro nokawo okang’ mar tiyo gi dhano e chopo dwache owuon. Mano nomiyo obedo Satan, ma tiende en “Ja akwede.” Satan ne otiyo gi thuol e wuondo Hawa, konyise ni ngimane ne dhi bedo maber moloyo ka ok oluwo kaka Nyasaye ne taye. Adam gi Hawa noluwo Satan kendo mano nomiyo giketho winjruokgi gi Jachwechgi. Nikech ne gitimo yiero marach, jonyuolwa mokwongo nolalo thuolo mar dak nyaka chieng’ kendo ne gikelo ne dhano duto richo kod tho.
Kanyo gi kanyo, Nyasaye nonyiso okang’ ma ne odhi kawo mondo orie wachno kendo miyo nyithind Adam thuolo mar yudo ngima mochwere. Nyasaye nokoro ni nitie ‘kodhi’—ng’at moro makende—ma ne dhi ketho Satan chuth kendo tieko chandruoge duto ma Satan, Adam, gi Hawa nokelo ne dhano. (Chakruok 3:15) ‘Kodhino’ ne dhi bedo ng’a? Mano en wach ma ne dhi fwenyore e kinde mowinjore.
Kapok mano otimore, Satan ne siko temo ketho dwaro maber ma ne Nyasaye nigo. Richo kod timbe maricho nolandore mapiyo. Nyasaye nokawo okang’ mar ketho joma richo kotiyo gi ataro mar pi. Nonyiso Noa mondo oger yie—ma ne chalo sanduk marang’ongo ma ne nyalo lewore e wi pi—mondo ores Noa gi joode kaachiel gi le ma ne onyise ni orwak e i yie.
Bang’ bedo e yie kuom higa achiel nyaka a kinde ma ne Ataro ochakoree, Noa gi joode nowuok e yie moyudo ka piny ler. Kata kamano, ‘kodhi’ ma ne osingi ne pok obiro.
