Bed gi Yie Motegno Kuom Pinyruoth
“Yie en bedo gi adiera e chuny kuom gi mikiyo.”—HIB. 11:1.
1, 2. Ang’o mabiro konyowa wamed bedo gadier ni Pinyruoth biro chopo dwach Nyasaye ne dhano, to nikech ang’o? (Ne picha manie chak sulani.)
WAN Joneno mag Jehova, wajapuonjo ji ni Pinyruodh Nyasaye kende ema biro tieko chandruogewa duto kendo wanyisoga ji gi siso adiera makende mayudore e Mumani. Geno ma wan-go e wi Pinyruodhno bende miyowa hoch mang’eny. Kata kamano, wan gi yie motegno maromo nade ni Pinyruodhno en gima nitie, kendo ni obiro chopo dwach Nyasaye duto? Gin ang’o mamiyo wabedo gi yie motegno e wi Pinyruodhno?—Hib. 11:1.
2 Pinyruodh Mesia en chenro ma Nyasaye Manyalo duto nochako mondo ochopgo dwaro mage ne chuechne. Pinyruodhno ogurore e mise motegno, ma miseno en ratiro ma Jehova nigo mar locho. En Pinyruoth ma nigi ruoth, joma konye locho, kaachiel gi raia to giduto gintie nikech singruoge mopogore opogore ma ne otim ma achiel kuom joma nie singruogego en Nyasaye kata Wuode Yesu Kristo. Nono singruogegi biro medo konyowa ng’eyo kaka dwach Nyasaye biro timore adier kendo konyowa neno kaka chenro mar Pinyruodhno ogurore motegno.—Som Jo Efeso 2:12.
3. Wabiro puonjore ang’o e sulani kod sula maluwo mae?
3 Muma wuoyo e wi singruoge madongo auchiel motudore gi Pinyruodh Mesia manie lwet Kristo Yesu. Singruogego gin (1) singruok ma Nyasaye notimo gi Ibrahim, (2) singruok mar Chik, (3) singruok ma Nyasaye notimo gi Daudi, (4) singruok mar bedo gi jadolo kaka Melkizedek, (5) singruok manyien, kod (6) singruok mar Pinyruoth. We wanon ane kaka moro kamoro kuom singruogegi otudore gi wach Pinyruoth kendo kaka gikonyo e chopo dwach Nyasaye ne piny kod dhano duto.—Ne chat ma wiye wacho ni “Kaka Nyasaye Biro Chopo Dwache.”
SINGO MAFWENYONWA KAKA NYASAYE BIRO CHOPO DWACHE
4. Kaluwore gi bug Chakruok, gin gik mage ma Jehova nowacho motudore gi dhano?
4 Bang’ loso piny obed kama ber ma dhano nyalo dakie, Jehova nowacho gik moko adek e wi dhano: Ne odhi chueyo dhano e kite owuon, dhano ne dhi yaro tong’ mag Paradiso mondo okwak piny ka ginyuolore kendo pong’o piny gi nyithindo makare, kendo ne okwergi ni kik gicham olemo makelo ng’eyo ber gi rach. (Chak. 1:26, 28; 2:16, 17) Weche adekgo noromo aroma. Bang’ chueyo dhano, weche ariyo modong’go ne dwarore ahinya mondo dwach Nyasaye otimre. Ka en kamano, to kare ang’o momiyo ne ochak tim singruoge?
5, 6. (a) Ere kaka Satan notemo thiro dwach Nyasaye? (b) Akwede ma Satan nochako e puoth Eden nomiyo Jehova otimo ang’o?
5 Kotemo thiro dwach Nyasaye kik timre, Satan Jachien nochako tim ng’anyo. Notimo kamano kotiyo gi chik ma nong’eyo ni yot mondo dhano oketh—chik ma ne dwaro ni dhano oluw gima Nyasaye nonyisogi. Nowuondo Hawa mondo ocham olemo ma nokwergi, olemb yath makelo ng’eyo ber gi rach. (Chak. 3:1-5; Fwe. 12:9) Kuom timo kamano, Satan nokwedo ratiro ma Nyasaye nigo mar locho e wi chuechne duto. Bang’e, nochako keto kiawa kuom gimomiyo jotich Nyasaye mogene tiyone.—Ayub 1:9-11; 2:4, 5.
6 Jehova ne dhi timo ang’o nikech akwede ma Satan nochako e puodho mar Eden? En adier ni ketho jong’anyogo ne dhi tieko tim ng’anyo ma nosechakoreno. Kata kamano, timo mano ne dhi nyiso ni dwaro ma Nyasaye nosechano mondo piny opong’ gi nyithind Adam gi Hawa maluwo chik Nyasaye kik timre. Kar mondo oneg joma nong’anyogo kanyo gi kanyo, Jachuechwa mariek notimo singo miluongo ni singruok mar Eden mondo onyisgo kaka weche duto ma nosewacho ne dhi chopo kare.—Som Chakruok 3:15.
7. Singruok mar Eden miyo wabedo gadiera mane e wi thuol kaachiel gi kothe?
7 Kotiyo gi singruok mar Eden, Jehova nong’ado bura ne thuol gi kothe, ma tiende ni Satan Jachien gi jogo mariwe lwedo e kwedo ratiro ma Nyasaye nigo mar locho. Nyasaye nomiyo koth dhako manie polo nyalo mar tieko Satan. Kuom mano singruok mar Eden nyisowa ni chuech ma nochako tim ng’anyo e puodho mar Eden kod chandruok duto ma nobedoe nikech ng’anyono ne ibiro tieki, kendo singruogno nyiso yo mibiro tiekgigo.
8. Wanyalo wacho ang’o e wi dhako kod kothe?
8 Koth dhako ne dhi bedo ng’awa? Nikech kodhino ne dhi ‘ketho’ wi thuol ma tiende ni Satan Jachien ma en chuech mar roho, kodhino ne nyaka bed chuech mar roho bende. (Hib. 2:14) Omiyo dhako ma ne dhi nyuolo kodhino bende ne ok dhi bedo dhako mineno gi wang’. Kata obedo ni koth thuol ne omedore ahinya, dhako kaachiel gi kothe ne ok ong’ere ni dhi bedo ng’a gini kuom chiegni higini 4,000 bang’ ka Jehova nosechiwo singruok mar Eden. Kata kamano, Jehova notimo singruoge mamoko ma ne dhi fwenyo kodhino konyisogo jotichne ni kodhino ema ne odhi tiyogo e tieko masiche ma Satan nokelo ne dhano.
SINGRUOK MA FWENYONWA KOTH DHAKO
9. Singruok ma Nyasaye notimo gi Ibrahim nochako tiyo karang’o?
9 Higini madirom aluf ariyo bang’ Jehova ng’ado ne Satan bura, Jehova nochiko Ibrahim mondo owuog dalagi Ur ma ne ni Mesopotamia mondo odhi e piny Kanaan. (Tich 7:2, 3) Jehova noluwone niya: “A e pinyu, kendo e kind libambau, e od wuoru, idhi e pinyno ma ananyisi: kendo anatimi oganda maduong’, kendo anagwedhi, ma nami nyingi duong’; kendo inibedi hawi: nagwedh jogo magwedhi, kendo nakwed jalo mokwedoi: kuomi dhoudi duto mag piny noyud hawi.” (Chak. 12:1-3) Mago e weche ma nokwong ondik e wi singruok ma Nyasaye notimo gi Ibrahim. Ok ong’ere ni en karang’o ma Jehova nokwongo timo singruok gi Ibrahim. Kata kamano singruogno nochako tiyo e higa mar 1943 Ka Ndalowa Podi kane Ibrahim owuok Haran mong’ado Aora Efrati ka ojahigini 75.
10. (a) Ere kaka Ibrahim nonyiso yie motegno e wi singo mag Nyasaye? (b) Gin weche mage ma Jehova noelo mos mos e wi koth dhako?
10 Jehova nomedo nwoyo singono ne Ibrahim komedo lero weche mamoko motudore gi singruogno. (Chak. 13:15-17; 17:1-8, 16) To kane Ibrahim onyiso ni en gi yie motegno kuom ikore chiwo wuode achiel kende, Jehova nomedo jiwo singruogno ka nonyiso Ibrahim ni gik ma nosingogo ne nyaka timre adier. (Som Chakruok 22:15-18; Jo Hibrania 11:17, 18.) Kane singruok ma Nyasaye notimo gi Ibrahim ochako tiyo, Jehova nomedo elo mos mos weche moko madongo e wi koth dhako. Kodhino ne dhi wuok kuom Ibrahim, ne odhi medore mobed mang’eny, ne odhi tiyo kaka ruoth, ne odhi ketho wasigu duto, kendo ji mang’eny ne dhi yudo gueth nikech en.
Ibrahim nonyiso ni en gi yie motegno kuom singo mag Nyasaye (Ne paragraf mar 10)
11, 12. Ndiko nyiso nade ni singruok ma Nyasaye notimo gi Ibrahim ne dhi chopo e okang’ malach, to wachno morowa e yo mane?
11 Kata obedo ni singo ma Nyasaye notimo gi Ibrahim nokwongo chopo kane koth Ibrahim odonjo e Piny Manosingi, Ndiko nyiso ni singruogno ne dhi kelo gueth moko mang’eny ne jomamoko. (Gal. 4:22-25) Jaote Paulo lero kotelne gi roho mar Nyasaye ni bat maduong’ mar koth Ibrahim en Kristo, to bat matin mar kodhino en kueth mar Jokristo mowal kuom roho ma kwan-gi en 144,000. (Gal. 3:16, 29; Fwe. 5:9, 10; 14:1, 4) Dhako manyuolo kodhino en “Jerusalem man malo” tiende ni bad riwruok mar oganda Nyasaye manie polo moting’o chuech mag roho momakore gi Nyasaye. (Gal. 4:26, 31) Mana kaka singruok ma Nyasaye notimo gi Ibrahim nonyiso, koth dhako ne dhi kelo gueth mogundho ne dhano.
12 Singruok ma Nyasaye notimo gi Ibrahim wuoyo e wi Ruoth kod joma obiro lochogo e Pinyruodh Nyasaye, kendo singruogno ema keto mise mar loso Pinyruoth manie polo. (Hib. 6:13-18) Singruogni ne dhi tiyo kuom kinde marom nade? Chakruok 17:7 wacho ni en “singruok mosiko.” Obiro tiyo nyaka chop kinde ma Pinyruodh Mesia biro tieko wasik Nyasaye duto kendo kelo ne dhano gueth mathoth. (1 Kor. 15:23-26) Joma biro dak e piny e kindego biro yudo gueth ma nyaka chieng’. Singruok ma Nyasaye notimo gi Ibrahim nyiso adier ni Jehova oikore chuth mar chopo dwache ne dhano makare mondo ‘opong’ piny.’—Chak. 1:28.
SINGRUOK MANYISO NI PINYRUOTH DHI SIKO
13, 14. Singruok ma Nyasaye notimo gi Daudi nyisowa adiera mane kuom wach loch mar Mesia?
13 Singruok ma ne otim Eden kod ma ne otim gi Ibrahim, nyiso gadier ni ratiro ma Jehova nigo mar locho e wi gik moko duto kokalo kuom Pinyruodh Mesia, osir motegno gi chikene makare. (Zab. 89:14) Be nitiere kinde ma sirkand Mesiano biro bedo gi mibadhi mamiyo ikethe kata iwile gi machielo? Nitie singruok machielo manyiso ni gima kamano ok nyal timore.
14 We koro wawuo ane e wi singruok ma Nyasaye notimo gi Daudi. (Som 2 Samuel 7:12, 16.) Jehova notimo singruogno gi Daudi e kinde ma Daudi ne locho Jerusalem, kosingone ni Mesia ne dhi wuok e kothe. (Luka 1:30-33) Omiyo Jehova nomedo nyiso maler anyuola mar kodhino, konyiso ni koth Daudi ema ne dhi bedo gi ratiro mar bedo ‘wuon’ kom Pinyruodh Mesia. (Eze. 21:25-27) Kokalo kuom Yesu, loch mar Daudi “nobed nyaka chieng’.” Kuom adier, koth Daudi “nosik nyaka chieng’ kendo kom ruodhe nobedi kaka wang’ chieng’.” (Zab. 89:34-37) Loch mar Mesia ok nobedi gi mibadhi moro amora kendo nokel gueth mosiko nyaka chieng’!
SINGRUOK MAR BEDO GI JADOLO
15-17. Kaluwore gi singruok mar bedo gi jadolo kaka Melkizedek, koth dhako ne dhi bedo gi migawo mane momedore, to nikech ang’o?
15 Singruok ma Nyasaye notimo gi Ibrahim kod Daudi nyiso maler ni kodhi mar dhako ne dhi locho ka en ruoth. Kata kamano, tij bedo ruoth kende ne ok dhi kelo gueth ne ogendini duto. Mondo ogendini duto oyud gueth gadier, nonego ogonygi giwuog e tuech mar richo kendo orwakgi gibed jood Jehova moriwo chuech manie polo gi piny. Mondo mano otimre, kodhino bende ne nyaka bed jadolo. Jachuechwa noloso chenro mar bedo gi jadolo kokalo kuom singruok mar bedo gi jadolo kaka Melkizedek.
16 Jehova nonyiso kokalo kuom Ruoth Daudi ni ne odhi timo singruok makende gi Yesu ma ne dhi chopo gik moko ariyo. Mokwongo, en keto Yesu ‘obed e bad Nyasaye korachwich’ nyaka olo jowasike, kendo mar ariyo en bedo “jadolo nyaka chieng’ kaka kit Melkizadek obet.” (Som Zaburi 110:1, 2, 4.) Ang’o momiyo nonego obed jadolo e “kit Melkizadek”? Nikech higini mang’eny kapok koth Ibrahim moro amora odonjo e Piny Manosingi, Melkizedek ruodh Salem notiyo kaka “jadolo mar Nyasaye Mamalo Chutho.” (Hib. 7:1-3) Jehova ne oyiere achiel kachiel mondo obed jadolo. En kende ema iwuoyo kuome e Ndiko mag dho-Hibrania kaka jal ma nobet ruoth kendo jadolo kanyachiel. E wi mano, nikech ne onge ng’at ma notelone kata ng’at ma noluwe e migepego, inyalo luonge ni “jadolo mosiko” kata ma nyaka chieng’.
17 Kokalo kuom singruogni ma Jehova notimo gi Yesu, Jehova noyiere mondo obed “jadolo nyaka chieng’ e kido mar Melkizedek.” (Hib. 5:4-6) Mano nyiso maler ni Jehova osekuong’ore owuon ni obiro tiyo gi Pinyruodh Mesia mondo ochopgo dwaro ma nokwongo bedogo ne dhano e piny.
SINGRUOGE MIYO WABEDO GADIER NI PINYRUOTH NITIE
18, 19. (a) Singruoge mwasenono nyisowa ang’o e wi Pinyruoth? (b) En ang’o ma wabiro nono e sula maluwo?
18 Kaluwore gi singruoge ma wasenonogo, wanyalo neno kaka gitudore gi wach Pinyruodh Mesia kod kaka chenro mar bedo gi Pinyruoth en gima ogurore motegno e singruoge mopogore opogore ma ne otim. Singruok ma ne otim Eden chuno ni nyaka Jehova chop dwache ne piny kod dhano kokalo kuom koth dhako. Singruok ma Nyasaye notimo gi Ibrahim osefwenyonwa ni kodhi mar dhako en ng’a kod migawo mobiro chopo.
19 Singruok ma Nyasaye notimo gi Daudi medo nyisowa ni bat maduong’ mar kodhino en ng’a, kendo miye ratiro mar locho e wi piny mondo gueth mag Pinyruoth obi osik nyaka chieng’. Singruok mar bedo jadolo kaka Melkizedek keto mise mar miyo kodhino oti kaka jadolo. Yesu ok nobed kende ka okonyo dhano mondo obed joma kare chuth. Nitie jomamoko ma bende iwalo mondo obed ruodhi kod jodolo. Jogi ne dhi a kanye? Mano e gima wabiro wuoyo kuome e sula maluwo.