Mich ma Onge Minyalo Pimgo

KA NE omi Jordan masin mar yiedho pensil molos ka meli, masindno nomore ahinya. Masindno en achiel kuom gik mogeno ahinya e ngimane. Jordan wacho kama: “Russell, ma ne en jaduong’ ma hike noseniang’ kendo ma nohero limowaga, e ma nomiya masindno ka ne pod atin ahinya.” Ka ne Russell osetho, Jordan nofwenyo ni Russell nokonyo kwar mare kod jonyuolne e kinde ma ne gin e chandruok. Jordan wacho niya: “Nikech sani koro aseng’eyo gik mathoth e wi Russell, mano miyo sani amedo geno mich ma nomiyani ahinya.”

Mana kaka waseneno ranyisi mar Jordan, nitie jomoko ma ok ogeno mich ma omigi. Kata kamano, joma nigi chuny mar goyo erokamano to ogeno ahinya mich ma omigi. Muma wuoyo e wi mich moro ma ok nyal pim gi mich moro amora kowacho kama: “Nyasaye nohero piny ahinya mi nochiwo Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.”​—Johana 3:16.

Michno en mich ma nyalo miyo ng’ato oyud ngima ma nyaka chieng’! Be nitie mich maber maloyo mano? Kata obedo ni nitie joma ok ne ber mar michno, Jokristo madier ogeno michno kendo ginene kaka gima nigi “nengo matek.” (Zaburi 49:8; 1 Petro 1:18, 19) Kata kamano, ang’o momiyo Nyasaye nochiwo ngima mar Wuode kaka mich ne dhano?

Jaote Paulo chiwo dwoko mar penjono kowacho niya: “Richo nodonjo e piny kokalo kuom ng’ato achiel, kendo tho nobiro kokalo kuom richo, tho nolandore kuom ji duto.” (Jo-Rumi 5:12) Adam, ma ne en dhano mokwongo notimo richo kuom ketho chik Nyasaye goyiem, omiyo notho. Kokalo kuom Adam, dhano duto sani tho.

“Misach richo en tho, to mich ma Nyasaye chiwo en ngima ma nyaka chieng’ kokalo kuom Kristo Yesu Ruodhwa.” (Jo-Rumi 6:23) Mondo Nyasaye ne gol dhano kuom kwong’ mar tho, ne ooro wuode ma Yesu Kristo e piny mondo obi otho ne dhano duto. Kokalo kuom misangono ma Muma luongo ni rawar, jogo duto ma keto yie kuom Yesu biro yudo ngima ma nyaka chieng’.​—Jo-Rumi 3:24.

Ka ne Paulo wuoyo e wi gueth ma Nyasaye ne dhi miyo jotichne kokalo kuom Yesu Kristo, nowacho kama: “Erokamano odhi ne Nyasaye nikech michne ma ochiwo nono mokalo awacha.” (2 Jo-Korintho 9:15) En adier ni misango en mich maber ma onge gima wanyalo pimogo. Ang’o momiyo misango mar Yesu Kristo e mich maberie ahinya e kind mich duto ma Nyasaye osemiyo dhano? Ere kaka opogore gi mich mamoko ma Nyasaye osemiyowa?a To onego watim ang’o nikech michno? Wakwai isom dwoko ma Muma chiwo e wi penjogo e sula ariyo ma luwo mae.