Nyukta Matinie Mogik e Dho Hibrania Puonjowa Wach Maduong’

Be wanyalo bedo gadier ni gik moko duto ma Nyasaye osingo biro timore? Yesu ne ni gadier gi wachno, kendo gik ma nopuonjo nojiwo yie mar joma ne winje. Ne ane ranyisi ma notiyogo e Mathayo 5:18 ka ne opuonjo e got: “Adier awachonu ni, kata ka polo gi piny okalo, onge kata nyukta achiel matinie mogik mar Chik ma biro kalo nyaka chop wechego duto timre.”

Nyukta matinie mogik e dho Hibrania en י (yod). Yod e nyukta mokwongo e kind nyukta ang’wen miluongo ni Tetragrammaton, mochung’ ne nying Nyasaye madier, Jehova.a Jondiko kod Jo-Farisai ne neno weche duto kod nyukta ka nyukta manie chik Musa kaka gima duong’ ahinya.

Yesu ne wacho ni kata ka polo gi piny okalo, onge kata nyukta achiel matinie mogik mar Chik ma ok bi timore. Kata kamano, Muma nyisowa ni polo kod piny ma wadakieni biro siko nyaka chieng’. (Zaburi 78:69) Mano nyiso ni kata mana wach matinie mogik ma yudore e chik biro timore.

Be Jehova Nyasaye dewoga weche ma nenore ni tindo tindo? Mano en adier. Par ane wachni: Nonyis Jo-Israel ni kik gitur chogo moro amora kuom rombo ma ne giyang’o chieng’ Pasaka. (Wuok 12:46) Mano ne nyalo nenore ka wach matin. Be ne ging’eyo gimomiyo ne ok onego gitur chogo moro amora kuom rombono? Samoro ne ok ging’eyo. Jehova Nyasaye to nong’eyo ni timo kamano ne nyiso gima ne dhi timore ne Mesia nikech ne ok dhi tur kata chogo achiel kuome e kinde ma ne idhi gure e yadh sand.—Zaburi 34:20; Johana 19:31-33, 36.

Weche ma Yesu nowacho e Mathayo 5:18 puonjowa ang’o? Wan bende wanyalo bedo gadier ni weche duto ma Jehova Nyasaye nokoro bende biro timore duto kata bed ni gitindo tindo ma nade. To mano kaka nyukta matinie mogik e dho Hibrania puonjowa wach maduong’!