Pinyruodh Nyasaye Biro Tieko Ang’o?

1, 2. (a) Pinyni inyalo pim gi jamahundu ma oseng’adne buch tho e yo mane? (Ne picha man malo.) (b) Malaike gi dhano biro winjo nade ka oseketh piny marachni?

PARIE wachni. Polise wuotho gi jamahundu moro e jela ka gikok niya: “Mae osetho to pod wuotho!” Ang’o momiyo giwacho kamano? Kata obedo ni jamahunduno pod ngima, oseng’adne buch tho kendo idhi nege. Chal mana ka gima osetho.a

² Piny marachni bende chal mana gi jamahundu ma oseng’adne buch tho. Oseng’adne pinyni bura kendo kethruok mare chiegni. Muma wacho ni “piny kadho.” (1 Joh. 2:17) Giko mar pinyni biro chopo gadier. Kata kamano, nitie pogruok maduong’ e kind giko mar pinyni kod tho mar jamahunduno. Sama idhi neg jamahunduno, jomoko nyalo pingo wachno ka giwacho ni ok ong’adne bura makare, ka gigeno ni inyalo chor wach nekno nyime matin. Kata kamano, pinyni to oseng’adne bura makare chuth, kendo onge kaka obiro tony nikech jang’ad bura en Jaloch mar piny ngima. (Rap. 32:4) Kethruokne ok bi deko ngang’ kendo onge ng’at ma biro bedo gi kiawa ni ok ong’adne bura e yo makare. Ka oseketh pinyni, malaike gi dhano duto moluoro Nyasaye biro bedo mamor ni ong’adne bura e yo makare. To mano kaka chuech duto biro winjo maber!

3. Wadwaro nono gik mage ang’wen ma Pinyruodh Nyasaye biro golo?

³ Kata kamano, piny ma biro kadho oriwo ang’o gini? Thoth gik ma ji neno ni biro siko nyaka chieng’ ema ibiro tiek chuth. Be mano en wach marach? Ooyo! Mano en achiel kuom “wach maber mar Pinyruoth” ma wanyiso ji. (Mat. 24:14) Koro, wanonuru ane gik ma Pinyruodh Nyasaye biro golo. Wadwaro nono gik moko ang’wen madongo ma gin: Joma richo, riwruoge mopong’ gi mibadhi, timbe maricho, kod chandruoge mopong’o piny. E moro ka moro kuom wechego, wadwaro neno (1) kaka gimiyo ngimawa bedo matek sani, (2) gima Jehova biro timo, kod (3) gik mabeyo ma Jehova biro kelo mondo okaw kargi.

JOMA RICHO

4. Ere kaka joma richo miyo ngimawa bedo matek e kindegi?

⁴ Ere kaka joma richo miyo ngimawa bedo matek e kindegi? Ka ne jaote Paulo osekoro ni ngima ne dhi bedo matek ahinya e kindegi, nomedo niya: “Joma richo gi joma pando kitgi ka giwuondorego biro medo bedo maricho moloyo.” (2 Tim. 3:1-5, 13) Be ineno ka weche ma nokorgo timore e kindegi? Thothwa oseyudo chandruoge nikech joma kwiny mohero lweny kod jomahundu. Moko kuomgi timo gik maricho ayanga, ka moko to wuondore ni gin joma beyo, to kare gitimo gik maricho apiny piny. Kata bed ni joma richogo pok ohinyowa achiel kachiel, timbegigo pod miyo ngimawa bedo matek. Wawinjo malit ahinya e chunywa sama gitimo gik marichogo. Kaka jomahundugo sando nyithindo, jomoti, kod jomamoko kelonwa luoro mang’eny. Joma richogo nigi chuny marach ka mar le kendo ka mar jochiende. (Jak. 3:15) Gima ber en ni Wach Jehova oting’o wach maber ma miyowa geno.

5. (a) Jehova pod omiyo joma richo thuolo mar timo ang’o? (b) Ang’o ma biro timore ne joma richo ma otamore lokore?

⁵ Jehova biro timo ang’o? Gie sani, Jehova pod omiyo joma richo thuolo mondo gilokre giwe timbegi maricho. (Isa. 55:7) Onge ng’ato ang’ata kuom joma richogo ma Jehova oseng’adone bura mogik. Piny marachni e ma Nyasaye oseng’adone bura. To nade joma otamore lokore kendo ma biro dhi nyime riwo pinyni lwedo nyaka chop e masira maduong’? Jehova osesingo ni obiro golo joma richo duto e piny. (Som Zaburi 37:10.) Joma richo nyalo paro ni ginyalo tony ne bura ma Nyasaye oseng’adonegi. Ji mang’eny ong’eyo pando gik maricho ma gitimo to mano osemiyo pok okawnegi okang’ moro amora, kendo onge rach moro amora ma oseyudogi. (Ayub 21:7, 9) Kata kamano, Muma paronwa kama: ‘Wang’ Nyasaye ng’iyo yore mag dhano, oneno wuodhe duto. Onge kar mudho kata kar tho, kama joma timo mamono dipondie.’ (Ayub 34:21, 22) Onge ng’ato ang’ata ma nyalo pondo ne Jehova Nyasaye. Onge ng’ama nyalo wuonde, bende onge mudho mandiwa ma nyalo mono wang’ Jehova neno gik ma timore. Bang’ Har–Magedon, wabiro rango koni gi koni kama joma richo ne nitie, to ok wabi nenogi. Ibiro tiekgi chuth!​—Zab. 37:12-15.

6. Gin jomage ma biro dong’ ka oseketh joma richo, to ang’o momiyo mano en wach maber?

⁶ Gin jomage ma biro dong’ ka oseketh joma richo? Jehova singonwa niya: “Jo mamuol ginicham piny; kendo ginimor moloyo kuom kwe mang’eny.” Zaburino medo wacho kama: “Jo matir ginicham piny, mi ginidagie nyaka chieng’.” (Zab. 37:11, 29) Joma muol gi joma tir gin jomage? Joma muol gin joma oyie luwo puonj mag Jehova kod kaka otayogi; to joma tir gin joma ohero timo gik makare e wang’ Jehova Nyasaye. E piny ma sani, joma richo ng’eny moloyo joma tir. Kata kamano, joma muol gi joma tir kende e ma nobedie e piny manyien. Jogo e ma biro loso piny duto obed paradiso!

RIWRUOGE MOPONG’ GI MIBADHI

7. Ere kaka riwruoge mopong’ gi mibadhi miyo ngimawa bedo matek e kindegi?

⁷ Ere kaka riwruoge mopong’ gi mibadhi miyo ngimawa bedo matek e kindegi? Thoth gik maricho ma timore e kindegi ok tim gi ng’ato achiel, to itimo gi riwruoge mopogore opogore. Dinde mang’eny osebedo ka wuondo ji modhuro. Kuom ranyisi, gipuonjo miriambo e wi Nyasaye, giwacho ni Muma ok en buk minyalo gen, ok ginyis ji adiera kaka ngima biro chalo e kinde ma biro, kod puonj mamoko mang’eny mag miriambo ma gipuonjo. Nitie sirkande moko ma miyo ngima bedo matek ne joma odhier, ma jiwo lweny kod sigu e kind ogendini, kendo ma choko mwandu mang’eny nikech mibadhi? To nade riwruoge mamoko ma nigi kembe ma ketho alwora, aoche, bunge, kor lwasi kod gik mamoko mana mondo joma tin e ma oyud pesa mang’eny ka ji mathoth to dong’ kodhier? Onge kiawa ni riwruoge mopong’ gi mibadhigo e ma osekelo ne ji chandruoge mathoth ma waneno e piny sani.

8. Muma wacho ang’o e wi riwruoge ma ji mathoth neno ni biro siko nyaka chieng’?

⁸ Jehova biro timo ang’o? Masira maduong’ biro chakore ka sirkande mag piny monjo dinde duto mag miriambo ma Muma luongo ni Babilon Maduong’. (Fwe. 17:1, 2, 16; 18:1-4) Dindego ibiro tiek chuth. To nade riwruoge mamoko ma bende opong’ gi mibadhi? Muma tiyo gi gode kod chulni e yor ranyisi sama owuoyo e wi riwruoge mathoth ma dhano neno ni ogurore motegno kendo ma giparo ni biro siko nyaka chieng’. (Som Fweny 6:14.) Muma wacho ni sirkande mag dhano kod riwruoge duto mogenogi ibiro keth te. Masira maduong’ biro rumo ka iketho sirkande duto mag pinyni kod riwruoge duto ma riwore kodgi e kwedo Pinyruodh Nyasaye. (Yer. 25:31-33) Bang’ mano, riwruoge mag mibadhi ok nobedie kendo!

9. Ang’o momiyo wan gadier ni piny manyien ibiro chan e yo maber?

⁹ Ang’o ma biro kawo kar riwruogego? Be nitie riwruok moro amora ma biro bedo e piny bang’ Har–Magedon? Muma wacho niya: “Nitie polo manyien gi piny manyien ma warito ka luwore gi kaka nosesingo, kendo ma tim makare nobedie.” (2 Pet. 3:13) Polo machon gi piny machon, mochung’ ne sirkande mopong’ gi mibadhi kod dhano ma gilocho e wigi, ibiro keth chuth. Ang’o ma biro kawo kargi? Weche motigo e Muma ni “polo manyien gi piny manyien” nyiso ni wabiro bedo gi sirkal manyien kod joma beyo ma sirkandno biro locho e wigi. Pinyruodhno ma ruodhe en Yesu Kristo, biro locho e yo makare chuth mana kaka Jehova dwaro nikech en Nyasaye ma ochanore. (1 Kor. 14:33) Omiyo, “piny manyien” biro bedo kama ochan maber. Wabiro bedo gi chwo ma beyo ma biro tayo weche. (Zab. 45:16) Kristo kaachiel gi joloch wetene 144,000 biro konyogi mondo giti tijno. Parie kinde ma piny duto biro bedo mana gi riwruok achiel kende ma onge mibadhi!

TIMBE MARICHO

10. Gin timbe kaka mage mopong’o piny sani, to ere kaka timbego miyo ngimawa bedo matek?

¹⁰ Ere kaka timbe maricho miyo ngimawa bedo matek e kindegi? Wadak e piny mopong’ gi timbe maricho. Chode, miriambo, kod timbe gero opong’o piny sani. Jonyuol nyaka ked matek mondo orit nyithindgi kik odonj e timbe marichogo. Thumbe, sinembe, tuke, kod gik mamoko ma ji timo mondo gibed mamor temo nyiso ni timbe marichogo beyo abeya, ka konchiel to gitemo nyiso ni chike kod puonj mag Jehova e ma richo. (Isa. 5:20) Jokristo madier kwedo paro ma kamago. Gitemo matek mondo girit winjruokgi gi Jehova kata obedo ni wadak e piny ma ji kethee chike Jehova goyiem.

11. En puonj mane ma wayudo e yo ma Jehova nokethogo Sodom gi Gomora?

¹¹ Jehova biro kawo okang’ mane nikech timbe maricho? Ne ane okang’ ma ne okawo ka ne timbe maricho opong’o Sodom gi Gomora. (Som 2 Petro 2:6-8.) Timbe marichogo ne ojogo Lut gi joode ahinya. Jehova ne oketho Sodom gi Gomora mondo otiek gik maricho ma ne onya kuro. Kuom timo kamano, noketo “ranyisi mar gik ma nobi kuom joma ok oluoro Nyasaye.” Mana kaka Jehova notieko timbe maricho e kindego, e kaka obiro tieko timbe maricho ma ji timo e kindegi sama oketho piny marachni.

12. Diher timo tije mage e kinde mabiro ka koro oseketh piny marachni?

¹² Ang’o ma biro kawo kar timbe maricho? Tije ma beyo ema biro pong’o Paradiso. Parie tich ma jaber ma wabiro timo mar loko pinyni obed paradiso kod gero ute ma wabiro dakie gi wedewa. Parie kaka wabiro bedo mamor rwako joma ibiro chier kod kaka wabiro puonjogi chike Jehova gi kaka Jehova osebedo ka tayo dhano. (Isa. 65:21, 22; Tich 24:15) Wabiro bedo modich gi tije ma kelonwa mor kendo ma miyo Jehova duong’!

CHANDRUOGE MOPONG’O PINY

13. Ng’anyo ma Satan, Adam, kod Hawa nong’anyonego Jehova osekelo chandruoge mage?

¹³ Ere kaka chandruoge mopong’o piny miyo ngimawa bedo matek e kindegi? Joma richo, riwruoge mopong’ gi mibadhi, kod timbe maricho osemiyo ngima dhano obedo matek ahinya. Waduto ngimawa bedo matek nikech lweny, dhier, kod mibadhi. E wi mano, tuoche kod tho bende opong’o piny. Gigo yudowa nikech Satan, Adam, kod Hawa nong’anyo ne Jehova. Dhano duto yudo chandruok nikech ng’anyono.

14. Jehova biro timo ang’o ka luwore gi chandruoge momakowa sani? Chiw ane ranyisi.

¹⁴ Jehova biro timo ang’o mondo otiek chandruogego? Wane ane ranyisi moko. Jehova osingo ni obiro tieko lwenje. (Som Zaburi 46:8, 9.) To nade tuoche kod midekre? Mago bende obiro tieko pep! (Isa. 33:24) To nade tho? Jehova biro golo tho nyaka chieng’! (Isa. 25:8) Dhier bende biro bedo ma onge. (Zab. 72:12-16) Obiro golo nyaka chandruoge mamoko duto ma miyo ngima dhano bedo matek e kindegi. Jehova biro tieko chuny marach ma Satan kod jochiendene osemiyo ji obedogo e pinyni.​—Efe. 2:2.

15. Bang’ Har–Magedon, gin chandruoge mage ma ibiro tiek chuth?

¹⁵ Par ane ni idak e piny ma onge lweny, tuoche, kod tho. Piny ma onge jolweny, gige lweny, kod kuonde moger kiparogo joma notho e lweny. Onge osiptal, lakteche, mochari, kod kuonde miyike jomotho. To nikech njore gi timbe mahundu biro bedo ma onge, ok bi chuno ni wabed gi askeche kod polise ma ritowa, kata mana kifunde ok wabi bedogo. Par ane bende kaka ok wabi bedo gi parruok mang’eny mag ngima ma biro nyoso chunywa.

16, 17. (a) Joma otony e Har–Magedon biro dak e ngima machalo nade? Ler ane. (b) Wanyalo timo ang’o mondo wabi watony sama iketho piny marachni?

¹⁶ Ngima biro chalo nade ka osetiek chandruoge duto? Mano ok en gima yot wacho. Dhano osebedo e chandruok kuom higni mang’eny ma ging’iyo gi chandruoge mopong’o piny e kindegi. Kuom ranyisi, joma odak machiegni gi ndara kama mtokni mang’eny kalee, nyalo ng’iyo gi koko mag mtoknigo ma chop kama koro ok gifweny kokono. Bende joma odak machiegni gi kama ipukee taka nyalo ng’iyo gi tik marach ma chop kama koro ok giwinj tikno. To mano kaka piny biro bedo maber ka koro gik marichogo duto orumo. Wabiro bedo gi yueyo mar adier!

¹⁷ Ang’o ma biro kawo kar gik mang’eny ma chandowa sani? Zaburi 37:11 dwoko ka wacho ni jo mamuol nobed ‘mamor moloyo kuom kwe mang’eny.’ Donge mago weche ma duogo chuny? Mano e ngima ma Jehova dwaro ni mondo wadagie. Omiyo, tim duto minyalo mondo ibed machiegni gi Jehova Nyasaye kaachiel gi riwruok mar ogandane e kinde matek mag gikogi. Mak matek geno ma in-go, kaw thuolo mar paro matut kuom genono, kendo lande ne jomamoko. (1 Tim. 4:15, 16; 1 Pet. 3:15) Ka itimo kamano, to ok bi kethi ka iketho piny marachni. Kar mano, ibiro dak nyaka chieng’ ka imor!