Dak e Ngima Mayot Kelo Mor Mogundho

DANIEL GI MIRIAM nokendore e higa mar 2000 e dwe mar Septemba. Ne gidak Barcelona e piny Spain. Daniel wacho niya: “Ne wadak maber. Ne watiyo tije mabeyo, omiyo ne wanyalo chiemo e otende mabeyo, bayo e pinje mamoko, kendo rwako lewni mabeyo. Tij lendo bende ne wadhiye ma ok wabare.” Kata kamano, gimoro notimore.

E chokruok maduong’ ma notim e higa mar 2006, jagol-twak moro nopenjo penjo moro ma nomulo chuny Daniel ahinya. Nopenjo kama: “Be watimo duto ma wanyalo mondo wares jogo ‘mitero kar tho’ mondo giwuoth e yo ma dhi e ngima mochwere?” (Nge. 24:11) Twagno nojiwo gimomiyo onego watim kinda ahinya mondo waland ne ji wach Nyasaye ma reso ngima. (Tich 20:26, 27) Daniel wacho kama: “Naneno ni an e ma Jehova ne wuoyo koda.” Twagno bende nolero kaka lendo e okang’ momedore miyo ng’ato bedo mamor e ngimane. Daniel nong’eyo ni mano en adier. Noyudo Miriam osebedo painia mapile kendo nosechako yudo gueth mang’eny ma ne kelone mor mogundho.

Daniel wacho niya: “Nafwenyo ni nonego atim lokruok maduong’ ahinya e ngimana.” To notimo kamano. Nochako tiyo kuom seche matin, nobedo painia, kendo nochako paro kaka en gi Miriam ne ginyalo bedo mamor ka gichiwore dhi lendo e alwora ma jolendo dwaroree moloyo.

PEK MA NE GIBEDOGO KOD MOR MA NE GIYUDO

Ka nochopo Mei 2007, Daniel gi Miriam noweyo tijegi mag andika ma gidhi Panama, ma en piny ma noyudo giselimo motelo. Alwora ma ne gidhiye ne nigi chulni mang’eny miluongo ni Bocas del Toro Archipelago ma yudore e Caribbean Sea. Thoth joma odak kono gin Jo-Guaymi. Daniel gi Miriam nong’eyo ni ne ginyalo lendo Panama kuom dweche aboro kaluwore gi pesa ma ne gin-go.

Ne giwuotho e chulnigo ka gitiyo yie kod ndiga kendo ginyalo paro maber odiechieng’ ma ne gikwongo riembee ndiga kuom kilomita 32 e gode ka chieng’ rieny mager. Daniel nodwa sim nikech nool ahinya. Kata kamano, Jo-Guaymi ma nodak machiegni gi ndara ne rwakogiga maber, to ahinya ahinya bang’ ka ne Daniel gi Miriam osepuonjore weche moko matin e dho Jo-Guaymi. Mapiyo nono, ne gitayo jopuonjre Muma 23.

Ka ne pesagi orumo, morgi nodok chien. Daniel wacho kama: “Ne wachako paro kaka ne wadwaro dok Spain ka pi wang’wa chuer. Ne wakuyo ahinya, kendo ne litwa ni ne wachiegni weyo jopuonjrewa mag Muma.” Dwe achiel bang’e, ne giyudo wach ma nomorogi ahinya. Miriam wacho niya: “Nomiwa migawo mar bedo jopainia makende. Ne wamor ahinya dhi nyime lendo e alwora ma ne wantiereno!”

GIMA MOROGI MOLOYO

Nikech lokruoge moko ma notim e higa mar 2015, nokwa Daniel gi Miriam ni gibed jopainia mapile. Koro ne gidhi konyore nade? Ne gin gadier ni Jehova ne dhi timonegi mana kaka osingo e Zaburi 37:5 ma wacho niya: “Kwa Jehova mondo oriti e yori; gen kuome bende, mi notimni kaka ikwaye.” Ne giyudo tij andika ma ne nyalo konyogi yudo gik mochuno ka gidhi nyime bedo jopainia. Sani gin e kanyakla moro ma yudore e provins mar Veraguas e piny Panama.

Daniel wacho niya: “Kinde ma ne wan Spain, ne ok wapar ni wanyalo dak e ngima mayot. Sani to mano e kaka wadak, kendo onge gima wachando.” En ang’o ma morogi moloyo? Giwacho niya: “Konyo joma muol mondo ong’e Jehova e gima morowa moloyo!”