MOA E GIWA MACHON

‘Kinda kod Hera Moloyo ma ne Wasebedogo’

NE EN chieng’ Tich Abich okinyi, Septemba 1922. Ot ma ne watimee chokruok ne osechako bedo maliet nikech ji 8,000 ne osepong’e. Jakom mar program nolando ni ng’ato ang’ata ne nyalo wuok oko kodwaro, mak mana ni ok oyiene duogo e ot.

Ne wawero wende mogwaro mag Pinyruoth. Bang’ mano, Joseph F. Rutherford nobiro e ndiri. Thoth jowinjo ne rito gi siso gima nodwa wacho. Jomoko ne wuotho koni gi kocha nikech ot ne liet. Owadwa Rutherford nonyisogi ni gibed piny mondo gichik itgi. Sama twak ne chakore, onge ng’ato ang’ata ma nofwenyo ni nitie otamba moro maduong’ ma nodol maber mong’aw malo e wi ot.

Owadwa Rutherford nogolo twak ma wiye ne wacho ni “Pinyruodh polo osekayo machiegni.” Kuom sa achiel gi nus kama, Owadwa Rutherford nowacho kaka jonabi machon nolendo gi chir ni Pinyruoth ne dhi biro. Ka koro twak ne iye otedore, nopenjo jowinjo kama, “Be uyie ni Ruoth man gi teko osechako locho?” Jowinjo nodwoko gi duol maduong’ niya: “Ee!”

Owadwa Rutherford nowacho gi dwol maduong’ niya: “Kare dhiuru nyime lendo gi kinda un nyithind Nyasaye ma malo chutho! Neuru, Ruoth koro locho! Un e jootene. Omiyo landuru, landuru, landuru, Ruoth kod Pinyruodhe.”

Gie sechego, otamba ma ne oban malocha noriere ka en gi weche ma ondik niya: “Landuru Ruoth kod Pinyruoth.”

Ray Bopp wacho kama: “Jowinjo ne mor sipwap.” Anna Gardner wacho ni “ji nopamo ma ot oyiengni.” Fred Twarosh wacho ni “ji duto nochung’ riat.” Evangelos Scouffas nowacho niya: “Ne chal mana ka gima teko moro opudhowa e kombe ma ne wabetie ma wachung’ malo ka pi wang’wa chuer.”

Ng’eny joma ne nie chokruogno ne landoga wach maber mar Pinyruoth. Kata kamano, nojiwgi mondo gidhi nyime kendo nonyisgi gimomiyo nonego gitim kamano. Ethel Bennecoff nowacho ni Jopuonjre mag Muma nowuok e chokruogno ka “gin gi kinda kod hera moloyo ma ne gisebedogo.” Odessa Tuck, ma ne jahigni 18, nowuok e chokruogno kong’ado mar timo kaka nopenj ni ‘ng’a ma nodhi?’ Owacho niya: “Ne ok ang’eyo kuma ne adhi lendee, kaka nadhi lendo, kod gima ne adhi alando. Gima ne ang’eyo en ni ne adwa bedo kaka Isaya ma ne owacho ni, ‘An ka; ora.’” (Isa. 6:8) Ralph Leffler wacho ni “odiechieng’ maduong’no e ma ne en chakruok mar timo kampen mar lando Pinyruoth ma sani okwako piny ma ngima.”

Mano e momiyo chokruok maduong’ ma ne otim Cedar Point, Ohio e higa mar 1922, pod waparo nyaka chil kawuono! George Gangas nowacho kama: “Chokruogno nomiyo ang’ado ni ok abi bara ne chokruok moro amora.” To adier, notimo kamano. Julia Wilcox nondiko niya: “Sa asaya ma bugewa wuoyo e wi chokruok ma ne otim Cedar Point e higa mar 1922, awinjo mana ka mor nega. Kinde duto agone Jehova erokamano nikech nayudo thuolo mar bedo e chokruogno.”

Nyalo bedo ni nitie chokruok moro maduong’ ma waparo ma nojiwowa ahinya mondo wadhi nyime lendo gi kinda kendo ma nomiyo wamedo hero Nyasachwa kod Ruoth ma oseyiero. Sama waparo chokruok ma kamano, wan bende wanyalo wacho e chunywa ni, “Erokamano Jehova kuom miya thuolo mar bedo e chokruogno.”

Kaka Jehova Nodwoko Lamo Moro

Arthur gi Nellie Claus nochopo chon e chokruok mondo giyud kombe kama bernegi. Arthur wacho niya: “Nachiko ita maber mondo kik wach moro amora okala.” Apoya nono, iye nochako kaye. Nowuok e od chokruok kong’eyo ni ok nodhi duogo kendo. Jarwak welo moro nopenje kama: “Ere kaka inyalo wuok oko e seche machalo kama?” Arthur to nong’eyo ni nyaka nowuogi.

Ka noduogo, nowinjo ka ji pamo matek e od chokruok. Nomanyo kamoro ma nonyalo winjogo maber gima dhi nyime e ot. Noyudo kama nonyalo idhogo malo e wi tado, kama borne hawo mita 5. Kae to nochopo kama nitie otuchi ma kelo ler e ot.

Ka ne Arthur ochopo kanyo, noyudo owete moko ma ne chunygi chandore ka ging’iyo jagol-twak. Nonego ging’ad tonde motweyo otamba moro modol, ka gitimo kamano riat mondo otambano olier e nyim jowinjo. To ne ok ginyal ng’ado tondego riat, nikech ne giremo pala achiel. Be Arthur ne nigi pala moro matin ma ne nyalo konyogi? Gimiwuoro en ni ne en gi pala ma kamano, to mano nokonyo owetego. Arthur kod owete mamokogo nochung’ kuonde ma notweye tondego ka girito mondo sa ochopi mar ng’ado tondego. Ka ne Owadwa Rutherford owacho ni “Landuru!” mar ariyo, nonego ging’ad tondego.

Jowinjo nowacho kaka ne gineno ka otamba ma nigi rangi adek mopogore opogore noriere mamit. Ne nitie picha mar Yesu e dier otambano.

Bang’e owetego nonyiso Arthur ni ne giyudo ka ng’ato ogolo ngas ma ne giidhogo wi tado. Omiyo ne ok ginyal lor mondo gidhi gidwar pala machielo. Kuom mano, ne gikwayo Jehova mondo oornegi ng’at machielo man gi pala. Owetego ne nigi adier ni Jehova nodwoko lamogi e yo miwuoro.