Penjo Moa Kuom Josombwa

Ang’o momiyo Joneno mag Jehova goroga jaote Paulo ka en rabondo kata ka en gi yie wich ma ok ng’eny ahinya?

E kindewagi, onge ng’ato ang’ata mong’eyo kaka Paulo ne chalo gadier Pichni mag jaote Paulo ma yudore e bugewa gin mana mogor to ok ginyis kaka ne en gadier.

Kata kamano, nitie gik ma nyiso kaka samoro Paulo ne chalo. Kuom ranyisi, gaset mar Zion’s Watch Tower ma Mach 1, 1902, nowuoyo e wi achiel kuom gik ma konyowa ng’eyo kaka Paulo ne chalo kowacho niya: “Buk moro miluongo ni ‘Acts of Paul and Thecla’. . . ma nondik e higa mar 150 bang’ Kristo e ma nenore ni lero e yo maber kaka Paulo ne chalo kendo ji mang’eny oyie gi kaka oler wachno. Bugno wacho ni ne en ng’at ma ‘nyadundo, rabondo, ragwel, ng’at ma dende otegno, ma yie wang’e ng’eny; kendo ma ume osuomore.’”

The Oxford Dictionary of the Christian Church (ma ne ogo e higa mar 1997) wuoyo e wi bugno kowacho kama: “Nenore ni bugno wacho adier e wi weche moko machon.” Buk mar The Acts of Paul and Thecla en buk ma ji nogeno ahinya e kinde machon, to mano en adier nikech kopi 80 mag bugno yudore e dho Grik kod dhok mamoko bende. Omiyo wagoroga pichni mag jaote Paulo e bugewa ka luwore gi kaka buge machon lero kaka jaoteno ne chal.

Kata kamano, nitie gik madongo monego wang’e e wi Paulo moloyo kata kaka nochal. E kinde ma Paulo ne lendo, nitie joma ne wacho ni “en owuon ka entiere, oyomyom kendo wechene ji ochayo.” (2 Kor. 10:10) Wiwa ok onego owil ni nobedo Jakristo ka ne Yesu oyalone e yor hono. E wi mano, onego wapar tich maber ma Paulo notimo ka ne Yesu oyiere mondo obed ‘gire mar tich mondo oting’ nyinge kolande ne ogendni.’ (Tich 9:3-5, 15; 22:6-8) Bende, par ane ber ma wanyalo yudo sama wasomo buge mag Muma ma Jehova notelo ne Paulo gi rohone mondo ondik.

Paulo ne ok opakore kuom gik ma notimo ka ne pok obedo Jakristo, to bende ne ok ochako nyiso jomoko kaka nochalo. (Tich 26:4, 5; Fil. 3:4-6) Nowacho niya: “An e ma atinie mogik kuom joote, kendo ok awinjora mondo oluonga ni jaote.” (1 Kor. 15:9) Bang’e nondiko kama: “An, ma ok arom kata gi ng’at matinie mogik kuom joma ler duto, Nyasaye ne onyisa ng’wono mogundhono ni mondo ayal ne ogendni mamoko wach maber e wi mwandu ma ok nyal pim mag Kristo.” (Efe. 3:8) Lando wachno e gima duong’ie moloyo kata kaka Paulo ne chalo.