Yud Ber Chuth Kuom Puonjruok ma Mari Iwuon
1. Ber mage ma wayudo kuom timo puonjruok kaachiel gi paro matut?
1 Wayudo ber mathoth ka ‘waketo pachwa duto moloyo kaka pile’ seche ma watimo puonjruok ma marwa wawegi kod paro matut. (Hib. 2:1, NW) Somo Muma kod bugewa mag Jokristo kendo paro matut kuomgi biro miyowa thuolo maber mar rwako adiera mag Wach Nyasaye e chunywa. Mano biro chiko yo ma waparogo kod gik mwatimo. Kuom adier, mano biro miyo wayud mor e timo dwaro mar Jehova. (Zab. 1:2; 40:8) Omiyo dwarore ni watem matek mondo wabed gi nyalo mar keto pachwa duto e puonjruok mondo wamak gik mwapuonjore. Yot ahinya mondo pachwa ogalre! Gik moko matindo tindo kaka simo maywak kata koko moro nyalo chocho pachwa. Samoro bende nyalo bedo ni wan gi nyalo mar keto pachwa kuom gimoro mana kuom kinde matin. Wanyalo bet piny mondo wapuonjre, to mapiyo nono wapo ka pachwa chako kwayo mabor. Ere kaka wanyalo ‘keto pachwa duto moloyo kaka pile’ sama wapuonjore Wach Nyasaye wan wawegi?
2. (a) Ang’o momiyo ber mondo walos thuolo mar timo puonjruokwa wawegi? (b) Ere kaka in iwuon iseloso thuolo mar puonjori Wach Nyasaye?
2 Nyalo bedo maber ka waloso chenro kae to wayiero kamoro mokuwe ma wanyalo timoe puonjruok. Ok en gima yot mondo thothwa oyud thuolo mar timo gimoro ka gin kar kendgi. Seche moko wanyalo winjo ka gima dich mapile terowa ng’wech ahinya mana ka oboke moro ma pi mang’eny tero. Kuom adier, dwarore ni waked matek gi pigno kendo wamany chula mokuwe e yor ranyisi. Ok wanyal bet abeta ka warito ni mondo thuolo mar puonjruok oyudre kende. Kar mano, nyaka wakaw okang’ mar loso thuolo mar puonjruok. (Efe. 5:15, 16) Jomoko ketoga tenge seche moko mag okinyi ka piny pod okuwe. Moko to oseyudo ni seche mag odhiambo e maber kodgi. Gima duong’ en ni ok onego wakaw mayot wach yudo ng’eyo madier e wi Nyasaye kod Wuode. (Joh. 17:3) Kuom mano, nyalo bedo maber ka waloso chenro mar timo puonjruokwa wawegi kae to waluw chenrono.
3. Ere kaka paro matut kuom gima wapuonjore nyalo konyowa?
3 Paro matut kuom gima wapuonjore nyalo konyowa ahinya. Okonyowa kawo weche Nyasaye e buk kendo rwakogi e chunywa. Paro matut konyowa neno kaka wanyalo tiyo gi puonj mag Muma mondo wabed ‘joma winjo wach kendo timo.’ (Jak. 1:22-25) E wi mano, paro matut konyowa sudo machiegni moloyo gi Jehova nikech omiyo wabedo gi kido kaka mag Jehova kendo neno kaka kidogo oler e weche ma wapuonjore.
4. Mondo paro matut okonywa, ang’o ma dwarore?
4 Mondo omi puonjruok kod paro matut okonywa chuth, nyaka watang’ gi gik manyalo galo pachwa. Ka wadwaro ni weche manyien mwapuonjore odonjnwa sama waparo matut kuomgi, dwarore ni kik wayie mondo paro mag ngima mapile ochochwa. En adier ni mano dwaro kinde kod thuolo ma wanie kendwa, to kata kamano, donge wayudo mor kuom chamo chiemb chuny gi modho pi mar adiera mayudore e Wach Nyasaye?
5. (a) Ang’o mosekonyo jomoko keto pachgi duto e puonjruok ma margi giwegi? (b) Paro mane mowinjore wabedgo e wi wach puonjruok, to ber mage ma wanyalo yudo?
5 To nade ka pachwa ochako kwayo mapiyo bang’ chako puonjruok? Jomoko oseyudo ni ginyalo keto pachgi chuth e puonjruok ka gichako time kuom kinde machuok kae to bang’e gimedo thuolo mosmos kaka ndalo medo kalo. Gimaduong’ ma wadwaro chopo en timo puonjruok matut, to ok somo asoma buk. Onego wabed gi ilo mar ng’eyo weche momedore e wi wach ma wapuonjore. Wanyalo bende timo nonro matut ka watiyo gi gik puonjruok mang’eny ma kweth mar jatichno mogen kendo mariek miyowa. Wayudo nyak maber ahinya kuom nono “gik matut mag Nyasaye.” (1 Kor. 2:10) Mano miyo wamedo ng’eyo ma wan-go e wi Nyasaye kod nyalo ma wan-go mar pogo weche. (Hib. 5:14) Ka wapuonjore Wach Nyasaye gi kinda, wabiro bedo bende gi ‘nyalo mar puonjo jomamoko.’—2 Tim. 2:2.