Sik Kilamo Nyasaye Mondo Oguedhi

Nyasaye nomiyo dhano mich moro makende, ma en thuolo mar wuoyo kode e lamo ka wanyise kaka wawinjo e chunywa. Janabi Daudi nolamo kama: “A Nyasaye, ji duto nobi iri nimar in e Jawinj lamo.” (Zaburi 65:2) Ere kaka wanyalo lemo e yo ma Nyasaye biro winjo mi oguedhwa?

LAM KIBOLORI KENDO KOA E CHUNYI

Sama ilamo in iwuon, iyudo thuolo mar nyiso Nyasaye weche duto ma ni e chunyi. (Zaburi 62:8) Nyasaye Manyalo Duto mor gi lamo ma kamago.

TI GI NYING NYASAYE SAMA ILEMO

Kata obedo ni nitie nyinge mang’eny ma wanyalo tiyogo e pako Nyasaye, en gi nying achiel kende. En owuon owacho kama: “An Jehova. Mano e nyinga.” (Isaya 42:8) Nying Jehova yudore nyadi 7,000 kama e Ndiko Maler. Jonabi mang’eny noluongo Nyasaye gi nyingeno. Ibrahim nowacho niya: “A Jehova, akwayi . . . yiena apenji.” (Chakruok 18:30) Wan be onego wati gi nying Nyasaye ma en Jehova sama walemo.

LEM KITIYO GI DHOK MING’EYO MABER

Nyasaye nyalo winjowa sama wawuoyo kode bed ni watiyo gi dhok mane kata mane. Wachne nyisowa kama: “Nyasaye ok buon ng’ato ang’ata, to e oganda moro amora, ng’at moluore kendo ma timo gik makare, oyiego.”​—Tich Joote 10:34, 35.

Mopogore gi lamo, nitie gik mamoko ma dwarore ni watim ka wadwaro ni Nyasaye oguedhwa. E sula ma luwogi, wabiro neno gigo.