Sik Kiikori ne Odiechieng Jehova

1. Ang’o ma nyaka watim mondo wabi watony e odiechieng Jehova?

SAMA Muma wuoyo e wi “odiechieng’ mar Jehova,” owuoyo e wi kinde ma Jehova kethoe jowasike to oreso joge. E kinde machon, nitie ogendni moko ma ne Jehova okumo. (Isa. 13:1, 6; Eze. 13:5; Zef. 1:8) E kindewagi, “odiechieng’ mar Jehova” biro chakore sama omonj Babulon Maduong’, to obiro rumo e lweny mar Har–Magedon. Mondo wabi watony e odiechieng’no, nyaka waikre sani. Yesu ne ok owacho mana ni waikre ne “masira maduong’,” to nowacho ni “beduru moikore.” (Mat. 24:21; Luka 12:40) Mano puonjowa ni nyaka wasik ka waikore ne odiechieng’no.

2. Ang’o momiyo weche ma yudore e 1 Jo-Thesalonika nyalo konyowa?

² E barua mokwongo ma Paulo nondiko ne Jo-Thesalonika, notiyo gi ranyisi moko mondo okony Jokristo omed bedo moikore ne odiechieng Jehova. Paulo nong’eyo ni odiechieng Jehova ne ok dhi chopo gie sano. (2 The. 2:1-3) Kata kamano, pod nomedo jiwo owetene mondo gimed bedo moikore ne odiechieng’no mana ka gima odiechieng’no ne dhi biro kinyne. Wan bende onego wabed moikore kamano. We wanon ane kaka nolero weche ma luwogi: (1) Kaka odiechieng Jehova biro chopo, (2) joma ok bi tony e odiechieng’no, kod (3) kaka wanyalo ikore mondo wabi watony.

ERE KAKA ODIECHIENG JEHOVA BIRO CHOPO?

3. Ere kaka odiechieng Jehova biro chopo mana kaka jakuo biro gotieno? (Ne picha bende.)

³ “Mana kaka jakuo biro gotieno.” (1 The. 5:2) Ma en achiel kuom ranyisi adek mitiyogo e Muma e lero biro mar odiechieng Jehova. Jokuoge kweloga piyo-piyo e mudho mandiwa sama ji kia ni ikwalogi. Mano be e kaka odiechieng Jehova biro poyo thoth ji. Kata mana Jokristo madier biro wuoro kaka gik moko biro timore mapiyo, en mana ni gin to gibiro tony sama itieko joma richo.

4. Ere kaka odiechieng Jehova biro chalo gi muoch ma kayo dhako ma nigi ich?

⁴ “Mana kaka muoch ma kayo dhako ma nigi ich.” (1 The. 5:3) Dhako ma nigi ich ok ong’eyo odiechieng’ sie ma muoch biro chako kayee. Gima en-go gadier en ni mano nyaka timre. Muoch chakorega apoya nono, olit, kendo ok nyal geng’e. E yo ma kamano, wan bende ok wang’eyo odiechieng’ kata sa ma odiechieng Jehova biro chakoree. Kata kamano, wan gadier ni odiechieng’ ma Jehova biro ng’adoe ne joma richo bura biro chopo apoya kendo ok nyal geng’e.

5. Ere kaka masira maduong’ biro chalo gi ler mar odiechieng’?

⁵ “Mana kaka ler mar odiechieng’.” Ranyisi mar adek ma Paulo wuoye bende mulo jokuoge ma kwelo gotieno. Kata kamano, koro Paulo wuoyo e wi wach moro mopogore kendo opimo odiechieng Jehova gi ler mar odiechieng’. (1 The. 5:4) Jokuoge ma kweloga gotieno nyalo bedo modich ahinya gi kwelo mi wigi wil gi ng’iyo sa. Ler mar odiechieng’ nyalo poyogi ma jomoko fwenygi. E yo ma kamano, masira maduong’ biro elo jogo ma dhi nyime timo gik ma ok mor Nyasaye, mana kaka ler mar odiechieng’ eloga jokuoge mohero timo tijegi e mudho. Mopogore kodgi, wan to wanyalo ikore ne odiechieng Jehova kuom kwedo timbe duto ma ok mor Jehova kendo medo luwo “timbe mabeyo duto gi tim makare kod adiera.” (Efe. 5:8-12) Ranyisi ariyo ma luwo ma Paulo wuoye otudore, kendo giwuoyo kuom joma ok bi tony e odiechieng Jehova.

GIN JOMAGE MA OK BI TONY E ODIECHIENG JEHOVA?

6. Ere kaka thoth ji e kindewagi nyiso ni ginindo? (1 Jo-Thesalonika 5:6, 7)

⁶ “Jo ma nindo.” (Som 1 Jo-Thesalonika 5:6, 7.) Paulo nopimo joma ok bi tony e odiechieng Jehova gi joma nindo. Ok ging’eyo gik ma timore e alworagi kata kaka kinde medo kalo. Nikech ok ginyal fwenyo gimomiyo gik madongo timore e piny, onge gimoro amora ma gitimo e wachno. Thoth ji e kindewagi nindo e yor ranyisi. (Rumi 11:8) Ok giyie gi gik ma nyiso ayanga ni wadak e “ndalo mag giko,” kendo ni masira maduong’ okayo machiegni. Gik madongo ma timore e piny nyalo miyo moko kuom joma nindo ochak winjo wach maber mar Pinyruoth. Kata kamano, thothgi dokga e nindo, kar mondo gisik ka gineno. Kata mana joma oyie ni nitie odiechieng’ ma ibiro ng’adnee ji bura paroga ni odiechieng’no pod ni mabor. (2 Pet. 3:3, 4) Kata kamano, wang’eyo ni kaka ndalo medo sudo, e kaka dwarore ni wamed winjo siem ma dwaro ni wasik ka waneno.

7. Ang’o momiyo inyalo pim joma Nyasaye biro ketho gi joma omer?

⁷ “Jo ma mer.” Jaote Paulo nopimo joma Nyasaye biro kumo gi joma omer. Joma omer ok ong’eyoga gik ma timore e alworagi kendo gitimoga yiero maricho. E yo ma kamano bende, joma richo ok winjga siem mag Nyasaye. Gitimoga mana gik ma biro miyo okethgi. Jokristo to ijiwoga ni girit pachgi. (1 The. 5:6) Jasomo moro nolero ni rito paro en “bedo gi nyalo mar pimo weche kendo timo yiero makare.” Ang’o momiyo mano en gima dwarore? En nikech mano biro konyowa mondo kik wadonjre e weche siasa kod ywaruok mag pinyni. Kaka odiechieng Jehova medo sudo machiegni, e kaka ibiro med thung’wa mondo wadonjre e weche kaka mago. Kata kamano, ok onego waparre ni wabiro timo ang’o ka waromo gi wechego. Roho mar Nyasaye biro konyowa bedo gi paro ma ok bagni, mondo watim yiero makare.​—Luka 12:11, 12.

ANG’O MA WANYALO TIMO MONDO WAIKRE NE ODIECHIENG JEHOVA?

8. Ere kaka 1 Jo-Thesalonika 5:8 lero kido ma biro konyowa siko ka waneno kendo rito pachwa? (Ne picha bende.)

⁸ ‘Rwakuru rageng’ mar akor kod ogudu.’ Paulo pimowa gi jolweny moikore maber ne lweny. (Som 1 Jo-Thesalonika 5:8.) Dwarore ni jalweny manie tich obed moikore ne lweny seche duto. Mano bende e kaka onego wabed. Wasiko ka waikore ne odiechieng Jehova kuom rwako yie gi hera kaka rageng’ mar akor kod geno kaka ogudu. Kidogo nyalo konyowa ahinya.

9. Ere kaka yie ritowa?

⁹ Rageng’ mar akor ne ritoga chuny jalweny. Yie kod hera rito chunywa mar ranyisi. Kido ariyogo biro konyowa dhi nyime tiyo ne Nyasaye kendo luwo ranyisi mar Yesu. Yie miyo wabedo gadier ni Jehova biro guedhowa ka wamanye gi chunywa duto. (Hib. 11:6) Bende, yie konyowa makore gi jatendwa ma en Yesu kata ka waromo gi pek moko. Wanyalo tego yiewa kuom nono ranyisi mag Jokristo ma kindewagi mosemakore motegno gi Nyasaye kata obedo ni gikalo e sand kod pek mag yuto. Wanyalo bedo motang’ gi obadho mar manyo mwandu kuom luwo ranyisi mag jogo modak e ngima mayot mondo giket weche Pinyruoth obed mokwongo e ngimagi.b

10. Ere kaka hero Jehova kod hero ji konyowa nano?

¹⁰ Hera bende en gima dwarore mondo okonywa siko ka waneno kendo rito pachwa. (Mat. 22:37-39) Hero Nyasaye konyowa nano e tijwa mar lendo kata obedo ni wanyalo romo gi pek moko. (2 Tim. 1:7, 8) Nikech wahero nyaka joma ok ti ne Jehova, walendonegiga e alworawa duto kendo watimoga kamano nyaka gi simu kod barupe. Wan gi geno ni chieng’ moro ginyalo lokore mi gichak tiyo ne Jehova.​—Eze. 18:27, 28.

11. Ere kaka hero Jokristo wetewa konyowa? (1 Jo-Thesalonika 5:11)

¹¹ Wahero bende Jokristo wetewa. Wanyiso herano kuom ‘jiwore kendo gerore.’ (Som 1 Jo-Thesalonika 5:11.) Mana kaka jolweny ma kedo kanyachiel, wajiworega. Seche moko jalweny nyalo po mana ka ohinyo nyawadgi ka ok ong’eyo, kata kamano, ok otim mano goyiem. E yo ma kamano bende, ok wachwanyga owetewa gi nyiminewa goyiem kata chulo kuor sama gichwanyowa. (1 The. 5:13, 15) Bende, wanyiso hera kuom miyo owete ma tayo kanyakla luor. (1 The. 5:12) Ka ne Paulo ondiko barua mokwongo ne Jo-Thesalonika, kanyaklano ne pok otieko higa achiel nyaka ne chake. Nyalo bedo ni joma noket mondo ota kanyaklano ne pod onge lony, kendo nitie gik ma ne ok gitim maber. Kata kamano, pod ne dwarore ni omigi luor. Kaka masira maduong’ medo kayo machiegni, biro dwarore ni wamed geno yo ma jodong-kanyakla tayowago moloyo kaka watimo sani. Samoro gie kindeno biro bedo matek yudo weche ma tayowa kowuok e ofiswa maduong’ kata e bad ofis, omiyo, dwarore ahinya ni wapuonjre hero jodong-kanyaklawa kendo miyogi luor sani. Kata bed ni ang’o ma timre, wadhiuru nyime rito pachwa kendo kik waket pachwa e nyawogi, to kar mano, waket pachwa e yo ma Jehova tayogigo kokalo kuom Kristo.

12. Ere kaka geno ma wan-go rito pachwa?

¹² Mana kaka ogudu ritoga wi jalweny, e kaka genowa mar warruok rito pachwa. Nikech wan gi geno motegno, wang’eyo maler ni onge gimoro amora maber ma pinyni nyalo miyowa. (Fil. 3:8) Geno ma wan-go konyowa bedo gi chuny mokuwe kendo siko ka wagurore motegno e yie. Mano e gima notimore ne Owadwa Wallace kod Laurinda jaode. Gitiyo ne Jehova e Afrika. Kuom jumbe adek kende, min Laurinda notho to wuon Wallace bende notho. To nikech tuo mar korona ne landore, ne ok ginyal dok thurgi mondo gibed gi joodgi. Wallace nondiko kama: “Geno mar chier konyaga mondo aket pacha kuom kaka jonyuolwa biro chalo ka gichier e piny manyien, to ok kaka ne gichalo kinde machuok ka ne pok githo. Genono miyo chunya bedo mokuwe kendo konyaga nyagora maber gi kuyo kod lit ma samoro abedogago.”

13. Ang’o ma wanyalo timo mondo wayud roho maler?

¹³ “Kik uneg mach mar roho mar Nyasaye.” (1 The. 5:19) Paulo nopimo roho maler gi mach maliel e iwa. Sama wan gi roho mar Nyasaye, wabedo jokinda e timo gik makare kendo bedo moil e tiyo ne Jehova. (Rumi 12:11) Ang’o ma wanyalo timo mondo wayud roho maler? Wanyalo kwayo Nyasaye rohone e lamo, wasom Wachne mokudh gi roho, kendo wariwre gi joma itayo gi rohone. Timo kamano biro konyowa bedo gi “olembe ma roho nyago.”​—Gal. 5:22, 23.

14. Mondo wadhi nyime yudo roho maler, gin ang’o ma nyaka watang’go? (Ne picha bende.)

¹⁴ Bang’ ka Nyasaye osemiyowa rohone maler, onego wabed motang’ mondo ‘kik waneg mach mar roho mar Nyasaye.’ Nyasaye chiwoga rohone mana ne joma pachgi long’o kendo timbegi ler. Ok onyal miyowa rohone ka wadhi nyime paro gik mochido kendo timo gigo. (1 The. 4:7, 8) Bende, mondo wadhi nyime yudo roho maler, ok onego wacha “weche ma ne okor.” (1 The. 5:20) ‘Weche ma ne okorgo’ gin ote mochiw kokalo kuom roho mar Nyasaye, moriwo nyaka weche ma wuoyo kuom odiechieng Jehova kod kaka odiechieng’no okayo machiegni. Ok waket odiechieng’no mabor kendo chako paro ni Har–Magedon ok bi biro e ndalowa. Kar mano, wanyiso ni wang’eyo ni odiechieng’no chiegni kuom dhi nyime bedo gi timbe mabeyo kendo bedo modich gi ‘timbe ma nyiso ni waluoro Nyasaye.’​—2 Pet. 3:11, 12.

“BEDURU GADIER KUOM WECHE DUTO”

15. Ere kaka wanyalo tang’ mondo miriambo mag jochiende kik wuondwa? (1 Jo-Thesalonika 5:21)

¹⁵ Machiegnini, joma kwedo Nyasaye biro lando niya: “Kuwe nitie kendo weche beyo!” (1 The. 5:3) Miriambo mag jochiende biro pong’o piny kendo wuondo ji mang’eny. (Fwe. 16:13, 14) To nade wan? Ka ‘wabedo gadier kuom weche duto,’ ok bi wuondwa. (Som 1 Jo-Thesalonika 5:21) Wach molok e dho Grik ni “beduru gadier kuom” nitiyogago sama inono kite ma nengogi tek. Kuom mano, onego wanon gik ma wawinjo kata ma wasomo mondo wang’e ka be gin adier. Ne dwarore ni Jo-Thesalonika otim kamano, to wan bende onego watim kamano kaka masira maduong’ medo kayo machiegni. Kar yie ayieya gi weche ma jomoko wacho, onego wati gi nyalowa mar paro mondo wapim gik ma wasomo kod ma wawinjo, gi gik ma Muma wacho kod ma riwruokwa nyisowa. Ka watimo kamano, ok bi wuondwa gi miriambo kata riekni maricho mag jochiende.​—Nge. 14:15; 1 Tim. 4:1.

16. En geno mane ma wan-go gadier, to mano chwalowa mondo watim ang’o?

¹⁶ Jotich Nyasaye biro tony e masira maduong’ kaka oganda. Kata kamano, ok wang’eyo gik ma nyalo timore ne ng’ato ka ng’ato kuomwa ka pok masira maduong’ ochopo kata e kinde masirano. (Jak. 4:14) Bed ni watony e masira maduong’ kata watho ka pok masirano ochakore, Jehova biro guedhowa gi ngima ma nyaka chieng’ ka wasiko ka wamakore kode. Jokristo mowal biro bedo gi Kristo e polo. Rombe mamoko to biro bedo e paradiso e piny kae. Mad wadhi nyime keto pachwa kuom geno ma jaber ma wan-go kendo wasik ka waikore ne odiechieng Jehova!