Kik Idek Kawo Okang’ mar Batiso

1. Gin weche mage monego omi ng’ato okaw okang’ mar batiso?

BE IHERO Jehova Nyasaye mosemiyi gik mabeyo duto midwaro moriwo nyaka ngima? Be igombo nyiso ni ihere? Yo maberie mogik minyalo nyisogo Jehova ni ihere en kuom chiworine kendo nyiso chiwruoknino kokalo kuom batiso mar pi. Kawo okengego biro miyo ibed achiel kuom jood Jehova. To mano biro miyo Jehova ma en Wuonu kendo Osiepni otayi kendo oriti nikech koro in achiel kuom joode. (Zab. 73:24; Isa. 43:1, 2) Chiwruok kod batiso bende miyi geno mar dak nyaka chieng’.​—1 Pet. 3:21.

2. Ang’o ma wadwaro nono e sulani?

² Dibed ni nitie gima moni kawo okang’ mar batiso? Ka en kamano, ng’eni ok in kendi. Nitie ji mang’eny mosetimo lokruoge e timbegi kod e pachgi mondo e ka obatisgi. Sani koro gitiyo ne Jehova gi kinda kendo ka gimor. Ang’o minyalo puonjori kuom jomoko ma nobatis e kinde Jokristo mokwongo? Wane ane moko kuom pek ma nyaka ne gilo kod gik ma wanyalo puonjore kuom ranyisigi.

NOBATIS JO-SAMARIA

3. Gin pek mage ma moko kuom Jo-Samaria ne nyaka lo mondo e ka obatisgi?

³ E kinde ma Yesu ne nie piny kae, Jo-Samaria ne nie grup moro mar din ma nodak e taon mar Shekem kod Samaria ma ne ni yo nyandwat mar Judea. Ka ne pok obatis Jo-Samaria, ne dwarore ni opuonjgi e yo matut. Jo-Samaria noyie kuom buge abich mokwongo mag Muma ma gin Chakruok nyaka Rapar mar Chik, to nyalo bedo ni ne giyie gi bug Joshua bende. Kata kamano, ne ging’eyo ni Mesia nonego obi ka luwore gi singo ma yudore e Rapar mar Chik 18:18, 19. (Joh. 4:25) Mondo ne batisgi, ne nyaka giyie ni Yesu e Mesia ma nosingi. “Thoth Jo-Samaria” notimo mana kamano. (Joh. 4:39) Moko kuomgi ne nyaka lo sigu ma ne nie kindgi gi Jo-Yahudi.​—Luka 9:52-54.

4. Ka luwore gi Tich Joote 8:5, 6, 14, ere kaka Jo-Samaria norwako wach ma Filipo ne yalonegi?

⁴ Ang’o ma nokonyo Jo-Samaria kawo okang’ mar batiso? Ka ne Filipo jayal-injili olando ne Jo-Samaria “wach Kristo,” moko kuomgi ‘norwako wach Nyasaye.’ (Som Tich Joote 8:5, 6, 14.) Kata obedo ni Filipo ne en Ja-Yahudi, pod ne gichikone itgi. Samoro ne giparo weche ma ne yudore e buge abich mag Muma ma nyiso ni Nyasaye ok buon ji. (Rapar 10:17-19) Ne giyie “winjo” Filipo sama nopuonjogi e wi Kristo kendo ne gifwenyo maler ni notimo gik moko gi teko mar Nyasaye. Filipo notimo honni mang’eny moriwo chango joma tuo kendo golo jochiende.​—Tich 8:7.

5. Ang’o ma wanyalo puonjore kuom ranyisi mar Jo-Samaria?

⁵ Jo-Samaria ne nyalo tamore winjo Filipo nikech ne en Ja-Yahudi kata nikech nokelonegi puonj manyien ma ne pok ging’eyoga. Kata kamano, ne ok giyie mondo mano omon-gi winje. Ne ok gideko kawo okang’ mar batiso bang’ ka ne giseyie ni Filipo ne puonjogi adiera. Muma wacho kama: “Ka ne giyie gi Filipo ma ne lando wach maber e wi Pinyruodh Nyasaye kendo e wi nying Yesu Kristo, ne obatisgi giduto chwo gi mon.” (Tich 8:12) Be iyie ni Wach Nyasaye en adiera kendo ni Joneno mag Jehova timo matek mondo gilo tim mar buono ji kendo nyiso jowetegi hera ma en e kido mifwenyogo Jokristo madier? (Joh. 13:35) Ka en kamano, to kaw okang’ ma dwarore ka in gi chir ni Jehova biro guedhi.

6. Ere kaka ranyisi mar Ruben nyalo konyi?

⁶ Ruben ma wuok Germany nopon e od Joneno mag Jehova. Kata kamano, ka ne en rawera, ne en gi kiawa ka be Jehova nitie adier. Ang’o ma notimo mondo owe bedo gi kiawa? Nofwenyo ni noonge gi ng’eyo malong’o, omiyo nokawo okang’ ma dwarore. Owacho kama: “E puonjruok ma mara awuon, nang’ado ni nadhi medo puonjora adiera e wi Nyasaye. Natimo nonro nyadinwoya e wi puonj ma wacho ni gik moko nosieko kendgi.” Nosomo buk miluongo ni, Je, Kuna Muumba Anayekujali? Bugno nokonyo Ruben ahinya. Nowacho e chunye kama: ‘Adier! Jehova nitie.’ Kendo bang’ limo ofiswa maduong’ man Amerka, Ruben nomedo hero riwruok mar owete manie piny ngima. Ka nodok Germany, Ruben nobatisi ka ojahigni 17. Ka po ni in gi kiawa e wi gik mipuonjori, inyalo timo nonro kitiyo gi bugewa mopogore opogore. Wanyalo loyo kiawa ma wan-go ka wabedo gi “ng’eyo malong’o chuth.” (Efe. 4:13, 14) Bende, kaka imedo neno ripode ma nyiso hera manie kind jotich Jehova manie piny mangima kendo neno adiera mar wechego e kanyaklau, e kaka ibiro medo hero riwruok mar owete e piny mangima.

NOBATIS SAULO MA JA-TARSO

7. En paro mane ma ok owinjore ma Saulo ne nigo ma ne dwarore ni oloki?

⁷ Wanon ane ranyisi mar Saulo ma ne en Ja-Tarso. Ne en gi lony ahinya e wi chike mag Jo-Yahudi kendo humbe ne lach ahinya e ogandano. (Gal. 1:13, 14; Fil. 3:5) Nitie kinde ma Jo-Yahudi mang’eny ne neno Jokristo kaka joma ong’anyo, kendo mano nomiyo Saulo osando Jokristogo ahinya. Notimo kamano koparo ni nochopo dwach Nyasaye. (Tich 8:3; 9:1, 2; 26:9-11) Saulo nong’eyo ni ka oyie kuom Yesu mobatise kaka Jakristo, to en bende ne idhi sande.

8. (a) Ang’o ma nokonyo Saulo mondo okaw okang’ mar batiso? (b) Ka luwore gi Tich Joote 22:12-16, ere kaka Anania nokonyo Saulo? (Ne picha bende.)

⁸ Ang’o ma nokonyo Saulo mondo okaw okang’ mar batiso? Ka ne Ruoth Yesu ofwenyore ne Saulo, ler moro ma norieny nomiyo obedo muofu. (Tich 9:3-9) Ne ok ochiemo kuom ndalo adek samoro koparo gima notimoreno. Saulo noyie ni Yesu e Mesia kendo ni jolup Yesu ne nie din madier. Nyaka bed ni Saulo nowinjo malit ahinya nikech noriwo lwedo nek mar Stefano. (Tich 22:20) Japuonjre Yesu miluongo ni Anania nodhi ir Saulo kendo nochango wangene mochako neno, kae to nojiwe mondo okaw okang’ mar batiso ma ok odeko. (Tich Joote 22:12-​16.) Saulo nobolore moyie gi weche ma Anania nonyise kendo nobatise.​—Tich 9:17, 18.

9. Ang’o minyalo puonjori kuom ranyisi mar Saulo?

⁹ Wanyalo puonjore gik mathoth kuom ranyisi mar Saulo. Nonyalo miyo ng’ayi kata luoro dhano omone kawo okang’ mar batiso. Kata kamano, ne ok oyie mondo gima kamano otimrene. Saulo nobolore moyie loko kit ngimane mondo obed Jakristo. (Tich 26:14, 19) Saulo noyie bedo Jakristo kata obedo ni nong’eyo ni nidhi sande. (Tich 9:15, 16; 20:22, 23) Bang’ ka nosebatise, nodhi nyime geno kuom Jehova mondo okonye nano e bwo tembe mopogore opogore ma noromogo. (2 Kor. 4:7-10) In bende, bang’ kosebatisi mibedo Janeno mar Jehova, inyalo romo gi tembe mopogore opogore. Kata kamano, bed gadier ni Jehova gi Yesu biro konyi kendo ok gibi jwang’i.​—Fil. 4:13.

10. Ere kaka ranyisi mar Anna nyalo konyi?

¹⁰ Jonyuol Anna gin Jo-Kurdi kendo ne gidak yo Eastern Europe. Bang’ ka nosebatis min-gi, Anna ne dwaro ni mondo en bende opuonjre Muma ka ne en jahigni 9 kendo wuon-gi noyiene. Kata kamano, wedegi ma ne gidakgo nokwede ahinya. Ne gineno ng’at moweyo din mar anyuola kaka ng’at mondhogogi. Ka ne Anna ochopo higni 12, nopenjo wuon-gi ka be nonyalo yiene mondo obatise. Wuon-gi ne dwaro ng’eyo ka be mano yiero ma en owuon e ma notimo koso dibed ni nitie ng’ama ne chwale mondo otimo kamano. Anna nonyiso wuon-gi kama: “Ahero Jehova.” Kuom mano, wuon-gi noyie mondo obatise. Bang’ ka nosebatis Anna, noromo gi akwede mager kod ajara. Achiel kuom wedene nowachone kama: “Ne nyalo bedo maber ka idak e ngima mar anjawo kendo madho ndawa kar bedo achiel kuom Joneno mag Jehova.” Ere kaka Anna nonyagore gi wechego? Anna nowacho kama: “Jehova nomiya teko mar nano kendo minwa gi wuon-wa nokonya ahinya.” Anna ndikoga list mag gik mosetimore e ngimane kendo mosenenoe kaka Jehova osebedo ka konye. Ojang’iyoga listno kinde ka kinde mondo wiye kik wil gi yo ma Jehova osebedo ka konyego. Ka po ni iluor ni ibiro kwedi, ng’e ni in bende Jehova biro konyi.​—Hib. 13:6.

NOBATIS KORNELIO

11. Ang’o ma ne nyalo mono Kornelio kawo okang’ mar batiso?

¹¹ Wanyalo puonjore weche moko bende kuom Kornelio. Kornelio ne en jatend-jolweny ma ne nigi “jolweny 100” mag Jo-Rumi e bwoye. (Tich 10:1, weche moler piny) Nikech mano, nyalo bedo ni ne en ng’at ma nong’ere ahinya kendo ma nomi luor. “Ne ohero chiwo mich mogundho mag konyo jochan.” (Tich 10:2) Jehova nooro jaote Petro mondo olandne wach maber. Be telo ma ne Kornelio ne nigo nomone kawo okang’ mar batiso?

12. Ang’o ma nokonyo Kornelio mondo okaw okang’ mar batiso?

¹² Ang’o ma nokonyo Kornelio mondo okaw okang’ mar batiso? Ndiko wacho ni Kornelio gi ‘joode duto noluoro Nyasaye’ kendo nosiko kosayo Nyasaye e lamo. (Tich 10:2) Ka ne Petro oyalone Kornelio wach maber, en kaachiel gi joode ne gibedo Jokristo kendo ne giyie mondo obatsgi ma ok gidigni. (Tich 10:47, 48) Kornelio noyie timo gimoro amora ma ne dwarore mondo olam Jehova kaachiel gi joode.​—Jos. 24:15; Tich 10:24, 33.

13. Ranyisi mar Kornelio puonji ang’o?

¹³ Mana kaka Saulo, Kornelio bende ne nigi telo kendo mano ne nyalo mone bedo Jakristo. Kata kamano, ne ok oyie mondo telo ma ne en-go omone kawo okang’ ma dwarore. Dibed ni dwarore ni itim lokruoge moko madongo mondo e ka obatisi? Ka en kamano, to ng’e ni Jehova oikore konyi. Obiro guedho yiero moro amora minyalo timo mondo idag ka luwore gi puonj mag Muma.

14. Ere kaka ranyisi mar Tsuyoshi nyalo konyi?

¹⁴ Owadwa miluongo ni Tsuyoshi, ma wuok Japan ne nyaka tim lokruoge moko e tije mondo e ka obatise. Ne en jalup jatend skul moro ma nong’ere ma nipuonjoe ji kaka ichano maua. Ka ne liel otimore to jatendeno ne ok nyal dhi, en e ma nodhiga e loye kendo notimoga kweche ma Jo-Budha ne timoga e liel. Kata kamano, ka Tsuyoshi nopuonjore adiera e wi jomotho, timbego koro ne dhi mone kawo okang’ mar batiso. Nong’ado ni ok obi donjore e timbe mag anyuola kod kweche mag Jo-Budha. (2 Kor. 6:15, 16) Tsuyoshi nowuoyo gi jatend skul e wi wachno. Weche nobedo nade? Tsuyoshi nodhi nyime gi tije ma ok ochuno ni odonj e timbe kod kwechego. Nobatise higa achiel bang’ ka nosechako puonjore.a Ka po ni dwarore ni itimo lokruoge moko e tiji mondo imor Jehova, bed gadier ni obiro riti in kaachiel gi joodi.​—Zab. 127:2; Mat. 6:33.

NOBATIS JO-KORINTHO

15. Gin timbe mage ma ne nyalo mono Jo-Korintho kawo okang’ mar batiso?

¹⁵ Joma nodak e taon mar Korintho machon nong’ere kaka joma nohero mwandu kod timbe mag terruok. Thothgi nodak e ngima ma ne ok mor Nyasaye. Nenore maler ni timbe kaka mago ne nyalo miyo obed ne ng’ato matek timo dwach Nyasaye. To e ma pod ka ne jaote Paulo oyalonegi wach maber e wi Kristo, “thoth Jo-Korintho ma nowinjo wach nochako rwako yie mi ne obatisgi.” (Tich 18:7-11) Kae to bang’e, Ruoth Yesu Kristo nofwenyore ne Paulo monyise niya: “An gi ji mang’eny e dalani.” Omiyo, Paulo nodhi nyime lendo kanyo kuom higa achiel gi nus.

16. Ang’o ma nokonyo Jo-Korintho mondo giwe timbe ma ne nyalo monogi kawo okang’ mar batiso? (2 Jo-Korintho 10:4, 5)

¹⁶ Ang’o ma nokonyo Jo-Korintho kawo okang’ mar batiso? (Som 2 Jo-Korintho 10:4, 5.) Teko mar Wach Nyasaye kod roho maler nokonyogi timo lokruoge madongo e ngimagi. (Hib. 4:12) Jo-Korintho ma norwako wach e wi Yesu Kristo nyaka ne we timbe maricho ma ne gitimo kaka mer, kuo, kod nindruok e kind chwo gi chwo kata mon gi mon.​—1 Kor. 6:9-11.b

17. Ang’o minyalo puonjori kuom ranyisi mar Jo-Korintho?

¹⁷ Kata obedo ni Jo-Korintho moko ne timo gik maricho kendo timbego nosegurore ahinya e chunygi, ne giweyo timbego ma gibedo Jokristo. Ne gitimo kinda duto ma ne dwarore mondo giwuoth e yo madiny ma tero ji e ngima ma nyaka chieng’. (Mat. 7:13, 14) Dibed ni ikedo mondo ilo tim moro marach ma nyalo moni kawo okang’ mar batiso? Ka en kamano, to kik chunyi nyosre! Kwa Jehova mondo omiyi roho mare maler ma biro konyi kwedo timbe maricho ma nyalo bedo ni osegurore ahinya e chunyi.

18. Ere kaka ranyisi mar Monika nyalo konyi?

¹⁸ Mondo ne batis Monika ma wuok piny Georgia, ne nyaka otem matek mondo owe tiyo gi weche maricho kod yore mag manyo mor ma ok owinjore. Nowacho kama: “E kinde ma ne an rawera, lamo ne konyaga ahinya. Jehova nong’eyo ni agombo timo gima ber, to noikore konya kendo taya.” Nobatis Monika ka en jahigni 16. Be nitie timbe moko ma dwarore ni iwe mondo iti ne Jehova e yo moyiego? Dhi nyime kwayo teko mar timo lokruoge ma dwarore. Jehova biro miyi roho mare maler e yo mogundho.​—Joh. 3:34.

YIENI NYALO DARO GODE

19. Ang’o ma nyalo konyi loyo pek minyalo pim gi gode madongo? (Ne picha bende.)

¹⁹ Bed gadier ni Jehova oheri kendo odwaro ni ibed achiel kuom joode. Mano en adier bed ni en wach mane minyagorigo ma pod moni kawo okang’ mar batiso. Yesu nowacho ne jopuonjrene kama: “Ka un gi yie ma rom gi koth karadali, ubiro wacho ne godni ni, ‘Dar idhi kacha,’ to obiro dar, kendo onge gima biro tamou.” (Mat. 17:20) Joma nowinjo weche ma Yesu nowachogo nosebedo kode mana kuom higni matin. Omiyo, pod ne dwarore ni gimed tego yiegi. Kata kamano, Yesu nonyisogi ni ka gibedo gi yie e okang’ moro, to Jehova ne dhi konyogi loyo pek ma ne inyalo pim gi gode madongo. In bende Jehova nyalo konyi mondo itim kamano!

20. Ere kaka ranyisi ma wasenono mag Jokristo ma kinde mokwongo kod ma kindegi nyalo jiwi?

²⁰ Ka po ni ifwenyo ni nitie gik ma moni kawo okang’ mar batiso, tim matek mondo iweri kodgi ma ok ideko. Ranyisi mag Jokristo ma kinde mokwongo kod ma kindegi nyalo jiwi ahinya. Mad ranyisigo ochwali mondo ichiwri ne Jehova kendo obatisi. Mano e yiero maberie mogik minyalo timo!