Luka Ziak

8 A hnu lawkah, Isua chuan thu hril leh Pathian Ram chanchin ṭha puang chungin khaw lian leh khaw tête a fang zêl a. A hnênah Sâwm Pahnihte pawh an awm a, 2 hmeichhe ṭhenkhat ramhuai lak aṭanga chhuah zalen tâkte leh dam lo tih dam tâkte pawh an tel bawk a: A kawchhûng aṭanga ramhuai pasarih lo chhuak, Magdalini an tih Mari te, 3 Heroda in enkawltu Chuza nupui Joani te, Susani te leh, an thil neiha an rawngbâwlsaktute chu.

4 Khaw tin aṭanga a hnêna lo kalte leh mipui tam tak an lo pung khâwm a; tichuan, tehkhin thu hmangin a zirtîr a: 5 “Lo neitu pakhat a buh chî theh tûrin a feh a. A theh laiin a ṭhen kawngsîrah a tla a, miin an rap a, chunglêng savate’n an rawn ei zo ta a. 6 A ṭhen lung hmun lei panah a tla a, a ṭo hnuah a hnâwn loh avângin a ro leh ta mai a. 7 A ṭhen hnimhlîngnei zîngah a tla a, an ṭo rualpui hlîngte chuan a dîp ral ta a. 8 Nimahsela, a ṭhen chu lei ṭhaah a tla a, an lo ṭo hnuin a lêt 100-tein rah an chhuah a,” a ti a. Tin, chûng thute a sawi zawh chuan: “Beng nei tawh phawt chuan hre rawh se,” tiin ring takin a sawi a.

9 Tichuan, a zirtîrte’n chu tehkhin thu awmzia chu an zâwt a. 10 Ani chuan: “Pathian Ram thurûk thianghlim chu in tân zawng hriat phal a ni a; nimahsela, mi dang tân chuan tehkhin thu mai a ni; en mah sela, an hmuh lohna tûr leh ngaithla mah sela, a awmzia an hriat lohna tûrin. 11 Tehkhin thu awmzia chu hei hi a ni: Buh chî chu Pathian thu a ni a. 12 Kawng sîra tlate chu thu hre tawhte an ni a; mahse, an rin loh va, chhandam an nih lohna tûrin Diabola a lo kal a, an thinlung aṭangin thu chu a lâksak ṭhîn. 13 Lung hmun lei pana tlate chu thu an hriat veleha lâwm taka pawmtute chu an ni; nimahsela, zung an kaih lo. Rei lo te chhûng an ring a; mahse, fiahna an tawhin an bânsan mai ṭhîn. 14 Hlîng zînga tlate chu thu hre tawhte an ni; nimahsela, nuna lungkhamna te, hausakna te leh, nawmsaknate chuan a dîp ral a, an puitling ta ṭhîn lo a ni. 15 Lei ṭhaa mite erawh chu hêng mite hi an ni, thinlung ṭha tak pu-a an ngaihthlâk hnua vawng reng a, chhel taka rah chhuah ṭhînte hi.

16 “Tu mahin khâwnvâr an chhit hnuin bêlin an khuh ngai lo, khum hnuaiah pawh an dah ngai hek lo, ina lo lût apiangin a êng an hmuh theihna tûrin a dahna hmunah an dah zâwk ṭhîn. 17 Puan chhuah loh tûra thuhrûk eng mah a awm lo va, fîmkhur taka thup pawh hriat chhuah loh tûr leh lang chhuak lo tûr pakhat mah a awm hek lo. 18 Chuvângin, in ngaihthlâk dânah fîmkhur rawh u, tu pawh a nei apiang chu pêk belh an ni ang a; nimahsela, tu pawh a nei lo apiang chu neia an inhriat chhun pawh lâksak an ni ang,” a ti a.

19 Tin, a nu leh a unaute a hnênah an lo kal a; nimahsela, mipui avângin a bul hnai an thleng thei lo va. 20 Tin, a hnênah: “Nangmah hmu duhin i nu leh i unaute pâwnah an ding reng asin,” tiin an rawn hrilh a. 21 Ani chuan: “Hêng Pathian thu hriaa zâwmte hi ka nu leh ka unaute an ni,” tiin anni chu a chhâng a.

22 Ni khat chu a zirtîrte nên lawngah an chuang a, an hnênah: “Dîl râl lehlamah sâwn i kai ang u,” a ti a. Lawng chuan an kal ta a. 23 Nimahsela, an kal lai chuan ani chu a lo muhîl a. Thâwklehkhatah, dîlah chuan thlipui na tak a lo tleh a, an lawng chu tuiin a khat dâwn ta mai a, dinhmun hlauhawm takah an ding a. 24 Tichuan, Isua chu an va kai tho va, a hnênah: “Zirtîrtu, Zirtîrtu, kan boral tak ngial dâwn e!” an ti a. Tin, a tho va, thlî leh tuifâwn nasa tak chu a hau va; tichuan, a bâng a, a reh ta ṭhuap mai a. 25 Ani chuan an hnênah: “Khawiah nge in rinna a awm?” a ti a. Nimahsela, anni chuan an hlauvin mak an ti hle a: “He mi hi tu nge maw a nih le? Thlî leh tuite hial pawh thu a pe a, a thu an âwih hi!” an ti hlawm a.

26 Tin, Galili râl lehlama awm Gerasin ram vaukam chu an thleng a. 27 Isua khawmuala a chhuah chuan, khuaa mi ramhuaiin a man pakhatin ani chu a rawn tâwk a. Hun rei tak chhûng thawmhnaw ha lovin a awm tawh a, inah awm lovin thlânmualahte a awm zâwk a ni. 28 Isua a hmuh veleh ṭapin a hmaah a bawkkhup a: “Isu, Pathian Chungnungbera Fapa, nang leh kei hian eng inzawmna nge kan neih? Ka ngên a che, min sawisa lul suh,” tiin ring takin a au va. 29 (Isua’n chu pa kawchhûng aṭang chuan ramhuai chu chhuak tûrin thu a lo pe tawh si a. Ramhuai chuan vawi tam tak a man tawh a, ani chu khaidiata thlungin kawl an buntîr ṭhîn a, an vêng reng ṭhîn; nimahsela, an phuarnate chu ti chatin, ramhuai chuan hmun fianrialahte a hruai ṭhîn.) 30 Isua’n ani chu: “Tu nge i hming?” tiin a zâwt a. A kawchhûnga ramhuai tam tak an luh avângin, ani chuan: “Legion-a,”* a ti a. 31 Tichuan, leilâwta* kal tûra thu pe lo tûrin nasa takin an ngên a. 32 Tin, tlângah chuan vawk rual an tla a, anni chuan vawk kawchhûnga luh phalsak tûrin an ngên a; tichuan, a phalsak ta a. 33 Ramhuaite chu, chu pa kawchhûng aṭang chuan an lo chhuak a, vawk kawchhûngah chuan an lût a. Tin, vawk rualte chu dîl kam âwih pang lam panin chak takin an tlân a, dîlah chuan an tla hlum ta a. 34 Nimahsela, a vulhtute’n thil thleng chu an hmuhin an tlân a, khawpuiah leh a chhehvêlahte chuan an va sawi a.

35 Tin, mipuite chu thil thleng en tûr chuan an kal chhuak a, Isua hnên an lo thleng a. Ramhuai tam takin an chhuahsan tâka kha thawmhnaw inbel leh rilru pângngai tak puin Isua ke bula a ṭhu an rawn hmu a; tin, an hlau ta hle a. 36 Thil thleng hmutute chuan an hnênah ramhuaiin a man pa tih dam a nih dân chu an lo hrilh a. 37 Tichuan, Gerasene ram chhehvêla mi tam tak chuan an hlauh êm avângin, Isua chu an hnên aṭanga kal bo tûrin an ngên a. Tin, Isua chu kal chhuak tûrin lawngah a chuang ta a. 38 Nimahsela, ramhuaite’n an chhuahsan tâk pa khân a hnêna awm zêl a ngên chiam a, Isua erawh chuan a phal lo va, a hnênah: 39 “I inah haw la, Pathianin thil a tihsak che hi mite hnênah va hrilh rawh,” a ti a. Tichuan, a kal ta a, Isua’n a tâna a tihsakte chu khawpui chhûng zawng zawngah a tlângaupui ta a.

40 Isua a lo lêt leh chuan, amah lo nghâk rengtu mipuite chuan ṭha takin an lo lâwm a. 41 Nimahsela, ngai teh! Inkhâwmna ina hotu Jaira an tih chu a lo kal a. Isua ke bulah bawkkhupin a ina kal tûrin a ngên a, 42 a fanu neih chhun kum 12 mi vêl chu a thi lek lek si a.

Isua a kal laiin mipuite chuan an nêk huai huai a. 43 Chutah chuan, hmeichhe pakhat kum 12 lai thi pûta dam lo a awm a, ani chu tu man an ti dam thei lo. 44 Hnung lam aṭanga panin, Isua kawrfual hmâwr chu a dek a; tichuan, chawplehchilhin a thi pût chu a reh ta nghâl a. 45 Tin, Isua’n: “Tu nge mi dek?” a ti a. An deh loh thu an vaia an sawi chuan Petera’n: “Zirtîrtu, mipuiin an hual vêl che a, an nêk huai huai che alâwm,” a ti a. 46 Mahse, Isua chuan: “Tu emawin mi dek a ni, keimah aṭangin thiltihtheihna a chhuak tih ka hria,” a ti a. 47 Hmeichhia chuan a inthup thei dâwn lo tih a hriatin, khûr chunga lo kalin Isua hmaah chuan a ṭhingṭhi a. Tichuan, Isua a deh chhan leh chawplehchilha a lo dam tâk dân chu mi zawng zawng hmaah chuan a puang ta a. 48 Nimahsela, Isua’n a hnênah: “Ka fanu, i rinnain a ti dam che a ni. Thlamuang takin kal rawh,” a ti a.

49 A la ṭawng lai mêkin, Jaira in aṭang chuan mi pakhat a lo kal a: “I fanu a thi ta, zirtîrtu hi ti buai duh tawh suh,” a ti a. 50 Isua’n chu thu a hriat chuan Jaira hnênah: “Hlau suh, ring mai rawh; tichuan, a nung leh ang,” a ti a. 51 In a va thlen chuan Petera, Johana, Jakoba leh, hmeichhe naupang nu leh pate chauh lo chu tu mah a ruala luh ve a phal lo va. 52 Mite chuan naupang chu an ṭah a, an âwm an chûm a. Ani erawh chuan: “Ṭap tawh suh u, naupang hi a thi lo va, a muhîl a ni zâwk e,” a ti a. 53 Chu veleh, naupang chu a thi tawh tih an hriat avângin Isua chu deusawh takin an nuih a. 54 Nimahsela, naupang kut chu vuanin: “Bawihte, tho rawh!” a ti a. 55 Tichuan, a lo nung leh a, a tho ta nghâl a; tin, Isua chuan ei tûr eng emaw pe tûrin thu a pe a. 56 A nu leh pate chu an hlim hle a, ani erawh chuan thil thleng chu tu mah hrilh lo tûrin a ti tlat a.