Juda Lehkhathawn

1 Kei Juda, Isua Krista bâwih, Jakoba unaupa hian Pa Pathianin a hmangaih leh Isua Krista tâna vênhim Pathianin a kohte hnênah he lehkhathawn hi ka ziak a ni:

2 Zahngaihna te, thlamuanna* te leh, hmangaihnate in chungah tih punin awm rawh se.

3 Duh takte u, kan vaia kan dawn chhandamna chungchâng kha in hnênah ziah tumin theih tâwp chhuah mah ila, mi thianghlimte hnêna chatuan atâna vawi khat hlan tawh rinna atâna ṭhahnemngai taka in beih theihna tûrin fuihna lehkha in hnêna ziah hmasak a ṭûlin ka hria a ni. 4 A chhan chu, Pathian Lehkha Thuin hmân aṭanga a lo sawi tawh anga rorêlsaka awm tûr mi ṭhenkhat in hriat lohva in zînga an lo luh tâk vâng a ni; anni chu Pathian ngaihsak lo mi, kan Pathian khawngaihna nasa tak chu remchânga laa tîmna nei lova thil sual tih* nâna hmangtu, kan hotu leh kan Lalpa neih chhun Isua Krista chunga rinawm lote an ni.

5 Chûng thil zawng zawng chu hre vek mah ula, Jehova’n* Aigupta ram aṭanga a mite chhan chhuak a, a hnua rinna lantîr lotute a tih boral thu kha hriat nawntîr che u ka duh a ni. 6 Tin, an chanvo chelh reng lova an awmna hmun pângngai kalsantu vântirhkohte kha, rorêlna ni ropui tak atân thim chhah takah chatuana phuarnaa phuar chungin a khêk a. 7 Chutiang bawkin, Sodom leh Gomorra leh an chhehvêla khuate chu nungchang bawlhhlawhnaa* inhmang pumhlûm leh tisa châkna pângngai lo tak ûmin an awm a; anni chuan meia chatuana hremna an tuar a, kan tân vaukhânna ni tûra târ chhuahin an awm a ni.

8 Chu bâkah, chûng mite chuan thil ṭha lo hlîr an suangtuah ṭhîn a, tisa an ti bawlhhlawh a, thuneitute an hmusit a, mi ropuite an sawichhe bawk. 9 Nimahsela, Mosia ruang chungchânga vântirhkoh chungnungber Mikaela leh Diabola an inhnial khân, Mikaela chuan Diabola rorêlsak chu a tih tûrah a ngai lo va, ani chu a sawichhe hek lo; chu aiin, “Jehova’n* i chungthu rêl rawh se,” a ti zâwk a ni. 10 Chûng mite chuan an thil hriatthiam loh apiang an sawichhe ṭhîn. Anni chu ngaihtuahna nei lo ramsate ang mai an ni a, an thil tih apiang ramsate angin an ti a, chutiang chuan mahni an inti chhe ṭhîn a ni.

11 An chunga thil thleng chu a va pawi tak êm! Kaina kawng an zawh a, hlawh hmu tûrin Balaama kawng zawh kha hmanhmawh takin an zawh bawk a, Kora anga an chunga thuneitute an sawisêl avângin* an boral ta a ni. 12 Chûng mite chuan hmangaihna lantîr nâna in ruai buatsaihah in zîngah an ṭheh ve a; nimahsela, anni chu tui hnuaia lung inphûm ru an ni a, Pathian ṭihna nei lova mahni inchâwm ṭhîn berâm vêngtute an ni; chhûm tui pai lo, thlîin a len a len kualte an ni bawk a; favâng tâwp dâwn pawha rah chhuah lo thing, vawi hnih thi tawh leh a zung chawpa phawite an ni. 13 Anni chu tuifinriat fâwn na tak ang an ni a, an nungchang zahpuiawm tak chu tuifâwn phuan ang a ni; arsi vâkvai ang mai an ni a, Pathianin thim chhah berah a dah a, chutah chuan chatuanin an awm reng ang.

14 Tin, Adama aṭanga a pasarihna Enoka pawh khân chûng mite chungchâng chu heti hian a lo sawi lâwk bawk: “Ngai teh u! Jehova* chu a mi thianghlim chhiar sên lohte nên a lo kal a, 15 mi zawng zawng chunga rorêl tûr leh amah chawimawi lotu mi sual zawng zawngte thil tih dik loh puang tûrin a lo kal a ni. Chutianga a tih chhan chu thil sual tinrêng an tih vâng leh amah an sawichhiat vâng a ni,” tiin.

16 Chûng mite chu phunnawi chîng, an thil neiha lungawi lo, mahni châkna anga awmte an ni a, chapo tak takin thute an sawi ṭhîn a; chutih rualin, mahni hlâwkna tûrin mi dangte an fakder ṭhîn.

17 Duh takte u, nangni erawh chuan kan Lalpa Isua Krista tirhkohte thu lo sawi tawhte* kha hre reng rawh u: 18 “Hun hnuhnûngah chuan nuihsawhtu, mahni châkna sual ang zêla awmte an lo chhuak ang,” tia an hrilh ṭhin che u kha. 19 Chûng mite chu inṭhen hranna thlentu, ramsa ang mai,* Pathian thlarau kaihhruaia awm lote an ni. 20 Nimahsela, duh takte u, nangni chu in rinna thianghlim ber chungah chuan inti chak ula, thlarau thianghlim ṭanpuinain ṭawngṭai rawh u, 21 chatuan nunnaa hruaitu kan Lalpa Isua Krista zahngaihna in nghah lai hian Pathian hmangaihnaa in awm reng theihna tûrin. 22 Tin, mi ṭhenkhat rinhlelhna neite chungah chuan zahngaihna lantîr zêl bawk ula; 23 mei aṭanga pawt chhuakin anni chu chhan chhuak rawh u. Mi dangte chungah zahngaihna lantîr ula; nimahsela, hlau chungin lantîr rawh u, an chhûng lam inthuamna chu tisa thil tihte’n a ti bawlhhlawh si a. Chuvângin, an chunga zahngaihna in lantîr hunah, an thawmhnaw bawlhhlawh kai lak aṭanga hla takah awm ang che u.

24 Tlu lo tûra vêng theitu che u leh a ropuina hmaa sawisêl bo leh lâwmna nasa tak nêna dintîr theitu che u Pathian, 25 kan Lalpa Isua Krista hmanga min Chhandamtu Pathian awm chhun hnênah chuan hun kal tawh zawng zawngah leh tûnah leh chatuan thlengin ropuina te, lalna te, chakna te, thuneihnate awm rawh se. Amen.