Thessalonika Khuaa Mite Hnêna Lehkhathawn Pahnihna
3 A tâwp berah chuan unaute u, min ṭawngṭaisak reng rawh u, Jehova* thu chak taka a darh zêl theihna tûr te, in zînga chawimawi a nih anga chawimawia a awm theihna tûr te leh, 2 mi tih nat hmangte leh mi sualte lak aṭanga chhan chhuah kan nih theihna tûrtein; rinna hi mi zawng zawngin an nei vek si lo. 3 Nimahsela, Lalpa chu a rinawm a ni, ani chuan a ti chak ang che u a, mi sual* lak aṭangin a vênghim ang che u. 4 Chu bâkah, kaihhruainate kan pêk che u kha in zâwm a, in zâwm zêl ang tih pawh Lalpaah chuan kan ring nghet tlat a ni. 5 Lalpa chuan in thinlungte chu Pathian hmangaihna leh Krista tâna chhelnaah chuan hlawhtling takin kaihruai zêl rawh se.
6 Tin, unaute u, kan hnên aṭanga in* dawn thurochhiah* zâwm lo, dâwngdah taka awm unau zawng zawngte laka inthiar fihlîm tûrin kan Lalpa Isua Krista hmingin kaihhruainate kan pe a che u. 7 Nangmahni ngeiin min entawn dân tûr in hre si a, in zîngah dâwngdah takin kan awm ngai lo va, 8 tu chaw mah a thlâwnin* kan ei ngai hek lo. Chutih ahnêkin, in zînga tu tân mah phurrit tak kan nih lohna tûrin, a chhûn a zânin hah tak leh rim taka kan thawh zâwk kha. 9 In ṭanpuina dîl tûrin dikna nei mah ila, in entawn atân keimahni ngei entawn tûra insiam kan duh a ni. 10 A nihna takah chuan, in hnêna kan awm lai khân: “Tu pawhin hna a thawh duh loh chuan ei pawh ei suh se,” tih thu hi kan pêk che u kha. 11 In zînga ṭhenkhat dâwngdah takin an awm a, hna rêng thawk lovin, an inrawlh lohna tûrah an inrawlh ṭhîn tih kan lo hria a. 12 Chutiang mite chu ngawi renga hna thawk a, anmahni thawh chhuah ngei ei tûrin Lalpa Isua Kristaah chuan thu kan pein kan fuih a ni.
13 Unaute u, nangni erawh chuan thil ṭha tih bânsan suh u. 14 Nimahsela, tu pawhin he lehkhathawna kan thu hi a zawm loh chuan, ani chu chhinchhiah ula, a zah theihna tûrin kâwm tawh suh u. 15 Amaherawhchu, hmêlma ang chuan ngai lo ula, unau angin zilhhau zêl zâwk ang che u.
16 Tin, remna* Lalpa ngei chuan kawng tinrêngah remna pe reng che u rawh se. Lalpa chu in vaia hnênah awm rawh se.
17 Hei hi kei Paula’n ka kut ngeia ka ziah chibai ka bûkna che u a ni. Ka lehkhathawn zawng zawngah hetiang hian ka ziak ṭhîn, ka ziah a ni tih in hriat theihna tûrin.
18 Kan Lalpa Isua Krista khawngaihna nasa tak chu in vaia hnênah awm rawh se.