Matthaia Ziak

8 Tlâng aṭanga a chhuk hnu chuan mipui tam takin ani chu an zui a. 2 Tin, phâr pakhat a lo kal a, bawkkhupin chibai a rawn bûk a, a hnênah: “Lalpa, i duh chuan mi ti thianghlim thei e,” tiin a ngên a. 3 Tichuan, a ban a, a khawih a: “Ka duh e! Lo thianghlim tawh ang che,” a ti a. Chu veleh a phâr chu a dam ta nghâl a. 4 Tin, Isua’n a hnênah: “Tu hnênah mah sawi suh ang che; mahse, kal la, puithiam hnênah va inentîr la, i dam tawh tih an hriat theihna tûrin Mosia ruat thilpêk chu va hlân ang che,” tiin a hrilh a.

5 Kapernaum khua a luh chuan sipai za hotu pakhat a hnênah lo kalin, heti hian a ngên a ni: 6 “Ka pu, ka chhiahhlawh pakhat zengin inah a mu reng a, a tuar nasa êm êm a ni,” tiin. 7 Isua’n a hnênah: “Ka lo kal ang a, ka ti dam ang,” tiin a hrilh a. 8 Sipai za hotu chuan: “Ka pu, ka in chhûng i luhna tlâk a ni lo ve, thu chauh sawi la, ka chhiahhlawh hi a dam mai ang. 9 Kei pawh mi thuhnuaia awm ve tho ka ni a, ka hnuaiah sipaite an awm a, pakhat hnênah, ‘Kal rawh!’ ka tih chuan a kal a, mi dang hnênah, ‘Lo kal rawh!’ ka tih chuan a lo kal a, ka bâwih hnênah, ‘Hei hi ti rawh!’ ka tih chuan a ti ṭhîn,” tiin a chhâng a. 10 Isua’n chu thu a hriat chuan mak a ti hle a, amah zuitute hnênah: “Tih tak meuhvin ka hrilh a che u, Israelte zîngah hetiang khawpa rinna nasa nei hi tu mah ka hmu lo. 11 Nimahsela, ka hrilh a che u, chhak leh thlang aṭangin mi tam tak an lo kal ang a, vân Ramah Abrahama te, Isaaka te leh, Jakoba te nên dawhkân an kîlho vang. 12 Chutih rualin, Ram fate* erawh chu pâwn khaw thimah paih chhuah an ni ang a, chutah chuan ṭap leh ha ṭhialin an awm ang,” tiin a hrilh a. 13 Tin, Isua’n sipai za hotu hnênah chuan: “Kal tawh rawh le. Rinna i lantîr avângin i ngen ang chiahin lo thleng rawh se,” a ti a. Tichuan, a chhiahhlawh chu a dam ta nghâl a.

14 Tin, Isua chu Petera inah a lo kal a, a pizawn* khawsika lo mu chu a hmu a. 15 A kut a vawnsak a, a khawsik chu a reh ta a; tin, ani chu a tho va, ei tûr a buatsaihsak a. 16 Mahse, tlai lamah chuan ramhuai man tam tak an rawn hruai a; thuin ramhuaite chu a lo hnawt chhuak hlawm a, dam lo zawng zawngte pawh a ti dam a. 17 Zâwlnei Isaia kal tlanga: “Ani chuan kan dam lohnate leh kan natnate chu a la bo va,” tia lo sawi tawh kha a thlen famkim theih nân.

18 Isua’n a vêla mipuite a hmuh chuan, a zirtîrte chu dîl râl lehlama kai tûrin a hrilh a. 19 Dân hre mi pakhat a hnênah lo kalin: “Zirtîrtu, i kalna apiangah ka zui ang che,” a ti a. 20 Isua erawh chuan a hnênah: “Sihalte’n kua an nei a, chunglêng savate pawhin bu an nei a, mihring Fapa erawh hi chuan lu nghahna tûr a nei lo,” a ti a. 21 Tichuan, zirtîrte zînga pakhatin a hnênah: “Lalpa, ka pa a thih thlenga a bula awm tûrin min kaltîr hmasa phawt rawh. Tichuan, ka vui liam zawhah ka zui ang che,” a ti a.* 22 Isua erawh chuan a hnênah: “Mi zui zêl rawh, mitthite’n* an mitthite chu vui rawh se,” tiin a hrilh a ni.

23 Tin, lawngah a chuang a, a zirtîrte chuan an zui a. 24 Dîlah chuan thli na tak a rawn tleh ta a! Tuifâwnte chuan lawng chu a khuh hlup hlup mai a; nimahsela, Isua chu a la muhîl reng a. 25 Tichuan, an va kai tho va, a hnênah: “Lalpa, min chhanhim rawh, kan boral tak ngial dâwn e!” an ti a. 26 Nimahsela, ani chuan an hnênah: “Rinna nei tlêmte u, engati nge in hlauh êm êm?” a ti a. Tichuan, a tho va, thlî leh dîl chu a hau va, a reh ta ṭhuap mai a. 27 Zirtîrte chuan mak an ti hle a: “He mi hi tu nge maw a nih le? Thlî leh dîlte hial pawhin a thu an âwih hi!” an ti a.

28 Râl lehlam Gadarin ram a thlen chuan, ramhuai man pahnih thlânmual aṭanga lo chhuak chuan ani chu an tâwk a. An hlauhawm êm avângin chumi kawnga kal ngam chu tu mah an awm lo. 29 Anni chuan: “Pathian Fapa, nang nên hian eng inzawmna nge kan neih? Hun ruat thlen hmain min nghaisa tûrin i lo kal em ni?” tiin Isua chu an au va. 30 An awmna aṭanga hla takah chuan vawk rual an tla a. 31 Tichuan, ramhuaite chuan: “Min hnawh chhuah dâwn chuan vawk rual kawchhûngah sâwn min luhtîr rawh,” tiin an ngên a. 32 Ani chuan: “Va lût rawh u!” a ti a. Tichuan, an chhuak a, vawk kawchhûngah chuan an lût a; tin, vawk rualte chu dîl kam âwih pang lam panin chak takin an tlân a, dîlah chuan an tla hlum ta a. 33 Nimahsela, vawk vulhtute chu khawpui chhûngah tlân lûtin, mite hnênah chuan ramhuai mante chungchâng pawh tiamin, thil thleng zawng zawng chu an va sawi a. 34 Tin, ngai teh, khawpuia mi zawng zawng chu Isua hmu tûrin an lo chhuak a, amah an hmuh chuan an ram chhuahsan tûrin an ngên chiam a.