Matthaia Ziak

23 Tichuan, Isua’n mipuite leh a zirtîrte hnênah thu a sawi a: 2 “Dân hre mite leh Pharisaite chuan Mosia thuneihna ang neiah an inngai a. 3 Chuvângin, an hrilh apiang che u chu ti ula; nimahsela, an thil tih ang erawh chuan ti ve suh u, sawi zawng an sawi ṭhîn a, an sawi ang erawh chuan an ti ṭhîn si lo. 4 Phurrit takte siamin mite an phurhtîr ṭhîn a, anni erawh chuan an kutzungṭang pawhin an khawih duh si lo. 5 An thil tih zawng zawng chu mi hmuh atâna ti an ni a, an chala an hrên ṭhin bâwm tê* chu an ti lianin, an bân vei lama an veh ṭhinte chu an ti hlai a, an kawrfual hmâwr fêmte pawh an ti sei lehzual bawk. 6 Ruai ṭhehnaa hmun ṭha bera ṭhut leh inkhâwmna inah a hma lama* ṭhut an duh ṭhîn. 7 Bazâra chibai bûk leh mite’n Rabbi* tia an kohte an duh ṭhîn. 8 Nimahsela, nangni erawh chu Rabbi tia kohvin awm suh u, in Zirtîrtu chu pakhat chauh a ni, nangni zawng zawng hi chu unau in ni si a. 9 Chu bâkah, leiah hian ‘Ka pa,’ tiin tu mah ko suh u, in Pa chu pakhat chauh a ni, vâna Mi khi. 10 ‘Hruaitute’ tia kohvin awm hek suh u, in Hruaitu chu pakhat chauh a ni, Krista chu. 11 In zînga ropui ber chu in rawngbâwltuah a awm tûr a ni. 12 Tu pawh mahni inchawimawi chu tih mualphovin a awm ang a, tu pawh inngaitlâwm chu chawimawiin a awm ang.

13 “Dân hre mite leh Pharisai vervêkte u, mite vân Ram luhna kawngkâ in khârsak avângin in chunga thleng tûr chu a va râpthlâk dâwn êm! Nangni lah in lût duh lo va, mite an luh pawh in phal bawk hek lo. 14* ——

15 “Dân hre mite leh Pharisai vervêkte u, mi pakhat Juda sakhuaa inlehtîr* tûrin tuifinriat leh khawmualah in zin kual ṭhîn a, a inleh hnuin Gehenna* luhna kawng in hawnsak a, nangmahni aia a lêt hniha suala in siam tâk avângin in chunga thleng tûr chu a va râpthlâk dâwn êm!

16 “‘Tu pawh biak in chhâla chhechham chuan a hlen a ngai lo ve; nimahsela, tu pawhin biak ina rangkachak chhâla chhia a chham erawh chuan a hlen ngei tûr a ni,’ titu hruaitu mitdelte u, in chunga thleng tûr chu a va râpthlâk dâwn êm! 17 Mi â leh mitdelte u! A khawi hi nge ropui zâwk, rangkachak nge ni a, rangkachak ti thianghlimtu biak in chu? 18 Chu bâkah, ‘Tu pawhin maichâm chhâla chhia a chham chuan a hlen a ngai lo ve; nimahsela, tu pawhin maichâma thilhlan chhâla chhia a chham erawh chuan a hlen ngei tûr a ni,’ tiin in sawi bawk ṭhîn. 19 Mitdelte u! A eng nge ropui zâwk, thilhlan nge ni a, thilhlan ti thianghlimtu maichâm chu? 20 Chuvângin, tu pawh maichâm chhâla chhechham chuan maichâm leh a chunga thil awm zawng zawng chhâlin chhia a chham a ni. 21 Tin, tu pawh biak in chhâla chhechham chuan biak in chauh ni lovin, a chhûnga chêng Pathian hming chhâlin chhia a chham a ni. 22 Tu pawh vân chhâla chhechham chuan Pathian lalṭhutthlêng leh chuta Ṭhua hming chhâlin chhia a chham a ni.

23 “Dân hre mite leh Pharisai vervêkte u, pudina te, mohuri te, zîra-te* sâwma pakhat in pe ṭhîn a; nimahsela, Dân thu pawimawh zâwk rorêlna dik te, zahngaihna te leh, rinawmnate in ngaihthah leh si. Sâwma pakhat chu in pe tûr a ni ngei mai; nimahsela, chu chu thil dangte ngaihthah phah nân in hmang tûr a ni lo. 24 In thil in tûra vaihmitê thli fai si a, sanghâwngsei lem tel leh si ṭhîn hruaitu mitdelte in nih hi!

25 “Dân hre mite leh Pharisai vervêkte u, no leh thlêng pâwn lam in sil fai a, a chhûng lam erawh chu duhâmna leh insûm lohnaa a khah avângin in chunga thleng tûr chu a va râpthlâk dâwn êm! 26 Nangni Pharisai mitdelte u, no leh thlêng chhûng lam sil fai hmasa phawt rawh u; tichuan, a pâwn lam pawh a lo fai thei ang.

27 “Dân hre mite leh Pharisai vervêkte u, thlân hnawih vâr a pâwn lam mawi taka lang, a chhûng lam erawh chu mitthi ruh leh thil bawlhhlawh tinrênga khat ang in nih avângin, in chunga thleng tûr chu a va râpthlâk dâwn êm! 28 Chutiang chiahin, pâwn lamah chuan mite mit hmuhah fel tak angin in lang a, chhûng lamah erawh vervêkna leh suahsualnain* in khat si.

29 “Dân hre mite leh Pharisai vervêkte u, in chunga thleng tûr chu a va râpthlâk dâwn êm! Zâwlneite thlân siamin mi felte thlân* in cheimawi a; 30 ‘Kan pi leh pute hun lai khân awm ve ila chuan, zâwlneite thisen an chhuahnaah khân kan tel ve tawp lo vang,’ tiin in sawi ṭhîn. 31 Chutichuan, zâwlneiho thattute thlah in ni tih nangmahni ngeiin in târ lang a ni. 32 Chuvângin, in pi leh pute bul lo ṭan tawh chu thawk zo rawh u.

33 “Rûlte u, rûl tûr nei thlahte u, engtin nge Gehenna* rorêlna chu in pumpelh theih tehlul ang? 34 Chuvângin, in hnênah zâwlnei te, mi fing te leh, zirtîrtute ka rawn tîr ang. Ṭhenkhat in ti hlum ang a, ṭhenkhat banah in khêngbet ang a, an zînga ṭhenkhat chu in inkhâwmna inah savun hruihrualin in vua ang a, khaw tinah in ti duhdah ang. 35 Chutichuan, leia mi fel thisen chhuak zawng zawng, mi fel Abela thisen aṭanga biak in leh maichâm inkâra in tih hlum tâk Barakia fapa Zakaria thisen thlengin a mawh in phur ang. 36 Tih tak meuhvin ka hrilh a che u, chûng zawng zawng mawh chu he chhuan hian a la phur ang.

37 “Jerusalem, Jerusalem, zâwlneite ti hlumtu leh i hnêna tirhte lunga dêng hlumtu, âr puiin a note a thla hnuaia a awp khâwm angin vawi eng zât nge i fate awp khâwm ka tum kha! Nimahsela, i duh si lo. 38 Ngai teh! Pathianin he in* hi a kalsan ang. 39 Ka hrilh a che, ‘Jehova* hminga lo kal chu malsâwmin awm rawh se!’ tia i sawi hma loh chuan, tûn aṭang hian min hmu leh tawh lo vang,” a ti a.