Johana Hnêna Thu Puan Chhuah

11 Tin, tiang* ang tak luang pêk ka ni a; tichuan, awin: “Tho la, Pathian biak ina hmun thianghlim leh maichâm chu teh la, a chhûnga Pathian betute chu chhiar rawh. 2 Biak in tualzâwl hmun thianghlim pâwn lam erawh chu zuah la, teh suh; hnam dangte hnênah pêk a ni tawh si a, anni chuan khawpui thianghlim chu thla 42 chhûng an rap bet ang. 3 Ka thuhretu pahnihte chu saiip puan sinin ni 1,260 chhûng Pathian thuchah ka sawitîr ang,” tiin min hrilh a. 4 Anni chuan lei Lalpa hmaa ding oliv thing pahnih leh khâwnvâr dahna pahnihte kha an entîr a ni.

5 Tu pawhin anni chu tih nat an duh chuan, an kâ aṭangin mei a lo chhuak ang a, an hmêlmate chu a kâng ral ang. Tu pawhin anni chu tih nat an duh chuan, chu chu tih hlum an nih dân tûr chu a ni. 6 Anni chuan Pathian thuchah an sawi chhûng zawnga ruah a sûr loh nân, vân ti ping tûra thiltihtheihna an nei a, tui thisena chantîr tûr leh an duh hun huna leia thil ṭha lo chi hrang hrangte thlentîr tûrin thiltihtheihna an nei bawk.

7 Thu an hriattîr zawh hunah chuan, leilâwt aṭanga lo chhuak sakawlh chuan anni chu a do vang a, a hneh ang a, a ti hlum ang. 8 An Lalpa bana tih hlum a nihna khawpui ropui kawtthlêrah chuan an ruangte chu a awm ang, chu khawpui chuan Sodom leh Aigupta a entîr a ni. 9 Tin, chûng mi te, chî te, ṭawng te leh, hnamte chuan an ruang chu ni thum leh a chanve an en ang a, thlâna zalh an phal lo vang. 10 Leia awmte chuan an thihna chu hlim takin an lâwm ang a, thilpêkte an inthawn tawn ang, zâwlnei pahnihte chuan anni chu an tih hrehawm ṭhin avângin.

11 Ni thum leh a chanve hnuah chuan Pathian hnêna mi, nunna thlarau anmahniah a lût a; tichuan, an kêin an ding a, a lo hmutute chuan an hlau hle a. 12 Tin, vân aṭangin aw ring takin an hnênah: “Hetah hian lo chho rawh u,” a tih an hria a. Chhûm zîngah chuan vânah an chho ta a, an hmêlmate chuan an hmu a. 13 Chutih lai tak chuan* lîr nasa tak a lo nghîng a, khawpui hmun sâwma ṭhena hmun khat a chim a; lîrnghîng avâng chuan mi 7,000 an thi a, a la dam zawngte chuan hlauvin vân Pathian chu an chawimawi ta a.

14 Thil râpthlâk pahnihna chu a liam ta a. Ngai teh! Thil râpthlâk pathumna chu a lo thleng thuai ang.

15 Vântirhkoh pasarihnain a tawtawrâwt a han ham chuan: “Khawvêl lalram chu kan Lalpa leh a Krista Lalram a lo ni ta, ani* chuan lal niin chatuanin ro a rêl ang,” tiin vânah chuan aw ring takte a lo chhuak a.

16 Pathian hmaa an lalṭhuthlênga ṭhu upa 24-te chuan bawkkhupa Pathian chibai bûkin: 17 “Engkimtithei, Pathian Jehova,* awm mêka leh awm tawha, i thiltihtheihna ropui tak i hman avâng leh lal nia ro i rêl ṭan tâk avângin i chungah kan lâwm e. 18 Hnamte chu an thinur a, i thinurna pawh a lo thleng a, mitthite rorêlsak tûr te, i rawngbâwltu zâwlneite leh mi thianghlimte leh i hming ṭihtu mi lian leh mi tête lâwmman pe tûr te leh, lei ti chhetute tih chhiat lêt vena tûra hun ruat chu a lo thleng ta,” an ti a.

19 Tin, vâna Pathian biak in hmun thianghlim chu a lo inhawng a, a biak in hmun thianghlima thuthlung bâwm chu ka hmu a. Tichuan, kâwlte a lo phe a, aw rite leh khawpui rite a lo chhuak a, lîr a nghîng a, rial nasa takin a tla bawk a.