Petera Lehkhathawn Pahnihna

1 Isua Krista bâwih leh tirhkoh ni bawk kei Simon Petera hian, kan Pathian leh min Chhandamtu Isua Krista felna avânga rinna hlu tak kan neih ang nei vete hnênah he lehkhathawn hi ka ziak a ni:

2 Pathian leh kan Lalpa Isua hriatna dik tak in neih avângin, khawngaihna nasa tak leh thlamuanna* in chungah tih punin awm rawh se. 3 Pathian ngaihsaka nung tûra kan mamawh zawng zawng chu Pathian thiltihtheihna avânga dawng kan ni a, chu chu a ropuina leh ṭhatna avânga min Kotu hriatna dik tak kan neih vâng a ni. 4 A ropuina leh ṭhatna avângin Pathian chuan thutiam hlu leh ropui takte phal takin min pe a, chûng thutiamte avâng chuan thlarau thil siam angin Pathian ropuina neih chu in ṭâwmpui ve thei ang. Chutianga thutiam min pêk chhan chu, châkna ṭha lovin a thlen he khawvêl nungchang ṭha lo kan tlân chhiatsan tawh vâng a ni.

5 Chumi avâng chuan, theih tâwp chhuahin in rinnaah chuan ṭhatna belh ula, in ṭhatnaah chuan hriatna belh ula, 6 in hriatnaah chuan insûmtheihna belh ula, in insûmtheihnaah chuan chhelna belh ula, in chhelnaah chuan Pathian ngaihsakna belh ula, 7 Pathian in ngaihsaknaah chuan unaute ngainatna belh ula, unaute in ngainatnaah chuan hmangaihna belh rawh u. 8 Chûngte chu nangmahnia a awma a khah liam chuan, kan Lalpa Isua Krista hriatna dik nunpuina kawnga thatchhe lo tûr leh rah chhuah lova awm lo tûrin a vêng ang che u.

9 Tu pawh chûng thilte nei lo chu, êng a hmuh duh loh avângin mitdel* a ni, tûn hma lama a sual tlen fai tawhte chu a theihnghilh ta si a. 10 Chuvângin, unaute u, koh leh thlan in nihna chanvo hlu tak chu nghet taka vuan tûrin taihmâk chhuah lehzual rawh u, chûng thilte in tih reng chuan in hlawhchham ngai lo vang. 11 Chutiang chuan, nasa taka malsâwm in ni ang a, kan Lalpa leh Chhandamtu Isua Krista chatuan Lalramah chuan in lût thei ang.

12 Chuvângin, chûng thilte in hre chung leh nangmahnia awm thutaka nghet taka in awm chung pawhin chûng thilte chu hriat nawntîr che u ka tum reng ṭhîn. 13 He biak bûka* ka awm chhûng zawng hian hriat nawntîrnatea nangmahni chawh phûr hi ka tih tûrah ka ngai a ni. 14 Kan Lalpa Isua Krista’n chiang taka min hriattîr angin, he biak bûk hi ka chhuahsan thuai dâwn tih ka hre si a. 15 Ka kal chhuah hnu pawha nangmahni ngeiin chûng thilte chu in hriat chhuah leh theihna tûrin theih tâwp ka chhuah reng ang.

16 Kan Lalpa Isua Krista thiltihtheihna leh lo awm lehna chungchâng kan hriattîr che u kha, mihringte thawnthu phuah chawp ṭanchhana hriattîr che u kan ni lo va, a ropuizia mit ngeia kan hmuh ṭanchhana hriattîr che u kan ni zâwk. 17 Ropuina nasa takin a hnêna: “Hei hi ka Fapa, ka duh tak, min ti lâwm êm êmtu a ni,” tia a sawi lai khân, Pa Pathian hnên aṭangin chawimawina leh ropuina a dawng si a. 18 Ni e, chûng thute chu tlâng thianghlima a hnêna kan awm lai khân, awin vân aṭanga a sawi kan hria a ni.

19 Chuvângin, hrilh lâwknate chu a thleng famkim ang tih kan hre chiang lehzual a ni; thim zînga khâwnvâr êng ang hrilh lâwkna thute in ngaihven chu in ti ṭha e. Chu chu in thinlungah khua a vâr hma leh vârparh arsi a lo lan hma thlengin êng rawh se. 20 Pathian Lehkha Thua hrilh lâwkna rêng rêng hi mihringte aṭanga lo chhuak a ni lo tih hre hmasa phawt rawh u. 21 Hrilh lâwkna thu rêng rêng hi mihring duh dâna sawi a ni ngai lo, thlarau thianghlimin a kaihhruai angin mite’n Pathian hnên aṭangin an sawi zâwk ṭhîn a ni.