Johana Lehkhathawn Pathumna

1 Kei kum upa tawh tak hian ka duh tak, ka hmangaih êm êm Gaia tân he lehkhathawn hi ka ziak a ni.

2 Duh tak, tûna i hausak ang hian hrisêlna ṭha neia kawng tinrênga i hausak zawm zêl theih nân ka dîlsak ṭhîn che a. 3 Unau ṭhenkhat lo kalin thutak kawng i zawh zêl ruala thutaka i nghehzia min hrilh a, ka lâwm tak zet a ni. 4 Ka fate’n thutak kawng an zawh zêl tih ka hriatna aia lâwmna nasa zâwk* ka nei lo.

5 Duh tak, i hmêlhriat loh unaute tân pawh i thil tihin i rinawmzia i lantîr a. 6 Chûng unaute chuan kohhran hmaah i hmangaihna an hriattîr tawh a. An kal chhuah hunah Pathian lâwm zâwnga anmahni ṭanpui tûrin theih tâwp chhuah ang che.* 7 Pathian hminga kal chhuak an ni a, hnam dangte lak aṭangin eng mah dawn an inbeisei si lo. 8 Chuvângin, thutaka an hnathawhpuite kan nih theihna tûrin, chutiang mite chunga khual chhâwn thiamna lantîr chu kan bat a ni.

9 Kohhran hnênah lehkha ka thawn a; nimahsela, an zînga hotu nih duh ṭhîn Diotrepha khân kan thusawi eng mah a zah lo. 10 Chuvângin, ka lo kal a nih chuan, dâwta min puhna thute* hi ani chu ka la hriattîr ang. Chutianga tih chu duh tâwk mai lovin, unaute a zah lo va, a lâwm hek lo; lo lâwm duhtute pawh dan a tum a, kohhran aṭanga hnawh chhuah a tum bawk.

11 Duh tak, thil ṭha lo chu entawn lo la, thil ṭha chu entawn zâwk ang che. Thil ṭha titu chu Pathian aṭanga chhuak a ni. Thil ṭha lo titu chuan Pathian a hre lo. 12 Demetria chuan mi zawng zawng fak a hlawh a, chu chu thutak nêna inmila a nunna chuan a nemnghet a ni. Keini pawhin a chungchâng kan sawi ṭhîn a, chûng kan thusawite chu a dik tih i hria e.

13 I hnênah sawi tûr tam tak ka nei; nimahsela, lehkha ziakna leh lehkhatuia i hnêna ziah ka duh lo. 14 Hmuh thuai che ka beisei a; tichuan, hmaichhanah kan la inbe dâwn nia.

I chungah thlamuanna* awm rawh se.

Unaute’n chibai an bûk a che. Unaute kha a mal malin chibai min bûksak ang che.