Jakoba Lehkhathawn
5 Nangni mi hausate u, in chunga chhiatna lo thleng tûr avângin ṭapin, rûm rawh u. 2 In hausaknate a ral ta a, in thawmhnawte pawh rannungin a ei zo ta. 3 In rangkachak leh tangkaruate chu a tuiêk zo ta a, a tuiêk chu in dik lohna târ langtu a ni ang a, in tisa a ei ral ang. Ni hnuhnûngahte chuan in thil khâwl khâwmte chu mei ang a ni ang. 4 Ngai teh u! In lova buh leh bâl sengtute chu an hlawh in pêk duh loh avângin ṭapin an au va, ṭanpui an dîlna au thâwm chu sipaihote Jehova* beng a lo thleng ta. 5 Leiah hian nuamsa taka nungin, in châk zâwng apiang in ti a. An talh nî thlenga an châwm thau ran angin, in eiin in lo thau ta a. 6 Mi fel* chu thiam loh chantîrin in ti hlum a, ani* chuan a dodâl che u a ni.
7 Chuvângin, unaute u, Lalpa lo awm leh hma loh chu dawhthei takin awm rawh u. Ngai teh u! Lo neitu chuan ruah hmasa leh ruah hnuhnûng a tlâk hma loh chuan lei rah hlu tak chu dawhthei takin a nghâk reng ṭhîn. 8 Nangni pawhin dawhtheihna lantîr rawh u; Lalpa lo awm lehna chu a hnaih tawh avângin in thinlung ti nghet rawh u.
9 Unaute u, insawisêl* tawn suh u, sawisêla in awm loh nân. Ngai teh u! Rorêltu chu kawngka hmaah a ding reng tawh a ni. 10 Unaute u, Jehova* hminga thu sawitu zâwlneite hrehawm tawrhna leh dawhtheihna an lantîrna chu entawn rawh u. 11 Ngai teh u! Chhel taka tuartute chu an hlim kan ti a ni. Joba chhelzia kha in hria a, Jehova’n* mal a sâwmzia pawh kha in hria e, Jehova* chu khawngaihna leh zahngaihnain a khat si a.
12 Ka unaute u, a bîk takin vân chhâlin emaw, lei chhâlin emaw thil dang rêng rêng chhâlin emaw chhia chham tawh suh u. Amaherawhchu, rorêl saka in awm lohna tûrin “A Ni” in tih chu ni, “Ni Lo” in tih chu ni lo ni ngawt rawh se.
13 In zîngah harsatna tâwk an awm em? Ṭawngṭai zawm zêl rawh se. Hlim an awm em? Fakna hla sa rawh se. 14 In zîngah dam lo an awm em? An awm chuan, ani chuan kohhran upate ko sela, upate chuan ani chu ṭawngṭaisak sela, Jehova* hmingin hriak thih rawh se. 15 Rinnaa ṭawngṭaina chuan dam lo* chu a ti dam ang a, Jehova’n* ani chu a kai tho vang. Thil sual a lo ti a nih pawhin ngaihdam a ni ang.
16 Chutichuan, tih dama in awm theih nân zêp nei lovin in sualte inhrilh tawn ula, in ṭawngṭaisak tawn rawh u. Mi fel ngenna chuan thil nasa tak a ti thei a ni. 17 Elija kha keimahni ang bawka mihring ve mai* a ni a; nimahsela, ruah sûr lo tûra ṭhahnemngai taka a ṭawngṭai khân, kum thum leh thla ruk chhûng ruah a sûr ta lo va. 18 Tichuan, a ṭawngṭai leh a, vân aṭangin ruah a lo sûr a, leiin rah a chhuah ta a ni.
19 Ka unaute u, in zînga tu emaw thutak aṭanga hruai bova awmin, mi dangin hruai kîr leh sela, 20 a kawng sual zawh aṭanga hawi kîrtîrtu chuan, thil sual titu chu thihna aṭangin a chhanhim ang a, Pathianin a sual tam tak chu a ngaihdamsak ang tih hria ang che u.