Timothea Hnêna Lehkhathawn Pakhatna
5 Putarte chu na takin hau lo la, pa angin zaidam takin zilhhau zâwk rawh. Ṭhalai mipate chu unaupa angin, 2 pitar deuhte chu nu angin, ṭhalai hmeichhiate chu thianghlim takin farnu angin en ang che.
3 Hmeithai, hmeithai tak takte* chu ngaihtuah* rawh. 4 Nimahsela, hmeithai tu pawhin fate emaw, tûte emaw a neih chuan, chûngte chuan an in chhûng ngeiah Pathian ngaihsaka awm leh, an nu leh pate leh an pi leh pute laka an bat rulh lêt dân zir hmasa phawt rawh se, chu chu Pathian mit hmuhin a pawm tlâk si a. 5 Tin, tlachhama awm hmeithai tak tak chuan Pathianah beiseina a nghat a, a chhûn a zânin ngennate leh ṭawngṭainate a hlân ṭhîn. 6 Amaherawhchu, mahni nawmsakna chauh zawngtu hmeithai chu a dam lai reng pawhin a thi a ni. 7 Chuvângin, sawisêl kai lova an awm theih nân chûng kaihhruainate* chu pe zêl rawh. 8 Tu pawh a chhûngkhatte, a bîk takin a chênpui a chhûngte châwm lo chuan rinna a phatsan a ni, ring lotu aiin a sual zâwk.
9 Hmeithai kum 60 chuang tawh chu chhiar tel tûr a ni a, ani chu a pasal laka rinawm,* 10 thil ṭha tih kawnga hming ṭha, fate enkawl seilian tawh, khual chhâwn thiamna lantîr ṭhîn, mi thianghlimte kê silsak ṭhîn, mi mangangte ṭanpui ṭhîn, thil ṭha tinrêng tih kawnga mahni inpe mi a ni tûr a ni.
11 Chutih rualin, hmeithai la naupang deuhte chu chhiar tel suh, an tisa châkna chu Krista rawngbâwlna dâltu a lo nih hian pasal neih an duh leh mai ṭhîn. 12 An thu lo tiam tawh* an bawhchhiat avângin thiam loh an chang ang. 13 Chu bâkah, hnathawk lova awm an chîng a, in tinah an lêng lâwr ṭhîn; hnathawk lovin an awm mai pawh a ni lo, mi an rêl a, an sawi loh tûrte sawiin mi dangte nunah an inrawlh ṭhîn. 14 Chuvângin, hmeithai la naupang deuhte chu pasal nei a, fate nei a, chhûngkua enkawl a, dodâltute’n an sawisêlna tûr hun remchâng pe lo tûrin ka duh a ni. 15 A nihna takah chuan, hmeithai ṭhenkhatin thutak kalsanin Setana an zui ta si a. 16 Ringtu hmeichhia tu pawhin hmeithai chhûngkhat an nei a nih chuan, kohhran tâna phurrit an nih lohna tûrin anni chu ṭanpui rawh se. Tichuan, kohhranin hmeithai tak takte* chu a ṭanpui thei ang.
17 Kohhran upa, ṭha taka kohhran kaihruaitu, a bîk takin thusawi leh zirtîr kawnga thawkrimte chu a lêt hniha chawimawi tlâka ngaih ni rawh se. 18 Pathian Lehkhathuin, “Bâwng pain buh a chîl laiin a hmui i phuar tûr a ni lo,” tih leh, “Hnathawktu chu a hlawh hmu tlâk a ni,” tih a sawi si a. 19 Kohhran upa an hêkna chu thuhretu pahnih emaw, pathum emaw tal an awm loh chuan pawm suh. 20 Thil sual titute chu mi dangte vaukhânna* tûrin a hmutu zawng zawngte hmaah zilh rawh. 21 Hêng kaihhruainate hi ngaih dân nei sa lo leh duhsak bîk nei lova zâwm tûrin, Pathian leh Krista Isua leh vântirhkoh thlante hmaah tih tak zetin thu ka pe a che.
22 Tu chungah mah hmanhmawh takin i kut nghat lo la,* mi dangte sualnaah tel ve hek suh; nungchang thianghlim tak vawng zâwk ang che.
23 Tui chauh in tawh lo la, i pum avâng leh i dam loh fo avângin uain tlêm in ṭhîn ang che.
24 Mi ṭhenkhat sualna chu a langsâr a, rorêlsak an ni nghâl bawk ṭhîn; mi dangte sualna erawh chu a hnuah chauh a lang chhuak ṭhîn. 25 Chutiang bawkin, thil ṭha tih langsâr a awm a, lang nghâl lote pawh thup reng theih a ni lo.