Tita Hnêna Lehkhathawn
2 Nang erawh chuan zirtîrna ṭha nêna inmilin zirtîr reng rawh. 2 Putarte chu kawng engkima inthunun tûr te, zahawm taka awm tûr te, rilru fîm tak pu tûr te, rinnaa nghet tûr te, mi dangte hmangaih tûr te leh, chhel tûrtein fuih rawh. 3 Chutiang bawkin, pitarte chu zahawm taka nung tûr te, sawichhiat chîng lo tûr te, uain bâwiha tâng lo tûr te, thil ṭha zirtîrtu ni tûrtein fuih rawh. 4 Chutiang chuan, la nula deuhte chu an pasalte hmangaih tûr te, an fate hmangaih tûrtein thurâwn* an pe thei ang a; 5 rilru fîm tak pu tûr te, thianghlim tûr te, in lam hna thawk tûr te,* nungchang ṭha nei tûr te leh, an pasalte laka intulût tûrtein thurâwn* an pe thei bawk ang, Pathian thu sawichhiata a awm lohna tûrin.
6 Chutiang bawkin, tlangvâlte chu rilru fîm tak pu tûrin fuih zêl la, 7 hna ṭha tinrêng thawh kawngah entawn tûr ni ang che. Thil thianghlim chu tih tak zetin zirtîr la,* 8 sawisêl tûr awm lo ṭawngkam ṭha hmang ṭhîn ang che; tichuan, dodâltute’n a ṭha lo zâwngin kan chanchin sawi tûr eng mah an nei lo vang a, tih zahin an awm thei ang. 9 Bâwihte chu kawng engkimah an pute lakah intulût sela, tih lâwm tum sela, rêl lo sela, 10 an thil ru hek suh se; chu aiin, rin tlâk an nihzia lantîr zâwk rawh se. Chutiang chuan, kawng engkimah min Chhandamtu Pathian zirtîrna mawizia an lantîr thei ang.
11 Mi chi tinrêngte hnêna chhandamna rawn thlenin, Pathian khawngaihna nasa tak chu a lo lang ta si a. 12 Chu chuan, he khawvêla* kan awm chhûng hian Pathian ngaihsak lohna leh khawvêl châknate hnâwl tûr leh, rilru fîm tak leh fel tak pu-a Pathian ngaihsaka nung tûrin min zirtîr a; 13 tin, beiseina hlimawm thlen famkimna bâkah, Pathian ropui leh min Chhandamtu Isua Krista ropui taka lo lanna chu kan nghâk a ni. 14 Krista chu dân bawhchhiatna tinrêng lak aṭanga min chhuah zalên tûr* leh, hna ṭhate ṭhahnemngai taka thawk tûra ama rochan bîkte ti thianghlim tûrin a inpe a ni.
15 Chûng thilte chu zirtîr reng la, chutianga ti tûra thuneihna pumhlûm i neih avângin mi dangte chu fuihin zilh rawh. Tu man ngainêp che suh se.