Korinth Khuaa Mite Hnêna Lehkhathawn Pahnihna

7 Chuvângin, duh takte u, chûng thutiamte chu kan neih avângin, tisa leh thlarau bawlhhlawhna zawng zawngah inti thianghlimin, Pathian ṭihna nên kan thianghlimna i ti famkim ang u.

2 In thinlungah hmun min siamsak rawh u. Tu chungah mah thil kan ti sual lo va, tu mah kan ti chhe lo va, kan hlâwkna tûrin tu mah kan bum ngai hek lo. 3 Chu chu nangmahni dem nâna sawi ka ni lo. Thih leh thi tlâng a, dam leh dam tlâng tûrin kan thinlungah in awm tih ka sawi tawh kha. 4 In lakah chuan zalên taka thu sawi theihna ka nei a ni. In chungchângah ka inchhuang hle bawk. Thlamuannain ka khat a; kan hrehawmna zawng zawngah hian lâwmnain ka khat liam a ni.

5 A nihna takah chuan, Makedonia ram kan thlen khân kan taksain hahdamna rêng rêng a hmu lo va, kawng tinrêngah kan hrehawm zawm zêl zâwk a, pâwn lamah min bei an awm a, chhûng lamah hlauhnate a awm bawk a ni. 6 Nimahsela, mi lungngaite thlamuantu Pathian chuan Tita lo kalna hmangin min thlamuan a, 7 a lo kalna chauh ni lovin, nangmahni avânga a neih thlamuanna pawhin min thlamuan a ni. Min hmuh in châkzia te, in lungngaihzia te leh, min ngaihtuahziate* min hrilh a, chu chuan min ti lâwm lehzual a ni.

8 Ka lehkhathawn avâng khân lungngai mah ula, ka inchhîr lo ve. A ti lungngai che u tih ka hriat avângin a tîrah inchhîr mah ila, rei lo te chhûng chauh a tih lungngaih che u avângin, 9 tûnah chuan ka lâwm a ni. Tih lungngaiha in awm vâng ni lovin, sim tûra in lungngaih avângin. Keimahni avânga nâ in tawrh lohna tûrin Pathian ti lâwm zâwngin in lungngai si a. 10 Pathian ti lâwm zâwnga lungngaihna chuan chhandamna tûra simna a thlen a, chu chu inchhîrawm lo tak a ni, khawvêl lungngaihna erawh chuan thihna a thlen thung. 11 Pathian duh zâwnga tih lungngaihin in awm a ni tih a chiang hle; chumi avâng chuan, thil dik ti tûrin theih tâwp in chhuah a ni. In hming chhiatna in thai reh a, thil dik lo tihnain a ti lungngai che u a, Pathian in ṭih a, sim in duh a, thinlung takin Pathian rawng in bâwl a, thil dik lo tihte chu in siamṭha a. He harsatna chingfel tûr hian engkim fel taka tih a ni. 12 In hnêna ka ziah hi thil sual titu tâna ziak ka ni lo va, thil sual tih tuartu tâna ziak lah ka ni hek lo, Pathian mit hmuhah kan tâna in ṭhahnemngaihna in zînga a lan chian theih nâna ziak ka ni zâwk. 13 Chumi avâng chuan kan thla a muang a.

Kan thla a muan mai bâkah, Tita lâwmnaah kan lâwm lehzual a ni, in vaia amah in tih chak avângin. 14 A hnênah hian ka chhuang ṭhîn che u a, chu chuan min ti zak si lo; in hnêna kan thusawi zawng zawng kha a dik angin, Tita hnêna kan chhuanna che u pawh kha a dik ngei a ni. 15 In vaia in thuawihnate leh hlau leh khûr chunga in lo lawmnate a hriat reng avângin, nangmahni a ngainatna che u a nasa lehzual a ni. 16 Kawng tinrênga ka rin theih che u avâng hian* ka lâwm a ni.