Kolossa Khuaa Mite Hnêna Lehkhathawn
1 Kei Paula, Pathian duh zâwng anga Krista Isua tirhkoh leh kan unaupa Timothea hian, 2 Kolossa khuaa Krista nêna inpumkhat mi thianghlimte leh unau rinawmte hnênah he lehkhathawn hi kan ziak a ni:
Pathian kan Pa hnên aṭanga khawngaihna nasa tak leh thlamuanna* in hnênah awm rawh se.
3 In tâna kan ṭawngṭai apiangin Pathian, kan Lalpa Isua Krista Pa hnênah lâwmthu kan sawi fo ṭhîn. 4 Chu chu Krista Isua in rin thu leh mi thianghlim zawng zawngte in hmangaih thu kan hriat vâng a ni. 5 Vânah in tân beiseina dahsak in ni tih in hriat avânga chutianga ti chu in ni si a. A hmain chanchin ṭha thutak thu hmangin, chu beiseina chungchâng chu in hria a, 6 in hnênah a lo thlen tawh kha. Chanchin ṭhain rah a chhuah a, khawvêl puma a darh zau zêl angin, chanchin ṭha in hriat nî aṭangin in zîngah pawh chutiang chuan a thleng a, Pathian khawngaihna nasa tak nihna dik tak chu in hre tawh e. 7 Chu chu kan aiawha Krista rawngbâwltu rinawm, kan bâwihpui duh tak Epaphra hnên aṭanga in hriat kha a ni. 8 Ani chuan hmangaihna lantîr tûrin thlarau thianghlimin a ṭanpui che u tih min hrilh bawk.
9 Chuvângin, chumi kan hriat nî aṭang chuan finna zawng zawng leh thlarauva hriatthiamnaah Pathian duh zâwng hriatna dik taka in lo khah theihna tûrin, in tâna ṭawngṭai leh dîlsak che u kan bâng lo. 10 Hna ṭha tinrêng thawka rah in chhuah zawm zêl rual leh Pathian dik hriatna in neih chhoh zêl rual a, Jehova* ti lâwm tûra a hming phûa in nun theihna tûr leh, 11 dawhtheihna leh lâwmna nên in tawrh chhuah theihna tûrin, a ropuina chakzia ang zêla thiltihtheihna zawng zawnga tih chaka in awm theih nân kan ṭawngṭai a ni. 12 Tin, ênga awm mi thianghlimte rochan ṭâwmpui tlâka siamtu che u Pa chu lâwmthu hrilh ang che u.
13 Ani chuan thim thuneihna lak ata min chhan chhuakin, a Fapa duh taka lalramah chuan min hruai lût ta a. 14 A Fapa chu tlanna avânga zalenna kan neihna a ni, kan sualte ngaihdamna chu. 15 Ani chu hmuh theih loh Pathian anpui, thil siam zawng zawnga piang hmasa ber a ni. 16 Amah hmangin thil dang zawng zawng vâna awm te, leia awm te, thil hmuh theih te, thil hmuh theih loh te leh, lalṭhutthlêngte emaw, lalnate emaw, sawrkârnate emaw, thuneihnate emaw chu siam a ni a. Chûng thil zawng zawngte chu amah kal tlanga siam leh ama ta tûr bawka siam a ni. 17 Chu bâkah, ani chu thil dang zawng zawng awm hmain a awm tawh a, thil dang zawng zawngte chu amah hmanga siam vek a ni. 18 Tin, ani chu kohhran lû a ni a, kohhran chu a taksa a ni. Ani chu thil engkim inṭanna, thihna ata piang hmasa ber a ni, thil zawng zawnga a hmasa ber a lo nih theihna tûrin. 19 Pathianin a Fapaah chuan engkim famkimtîr a duh si a. 20 Tin, nghaisakna bana* Krista thisen chhuak hmanga thil dang zawng zawng, vâna awmte leh leia awmte amah* nên inremtîr leh chu a duh bawk a ni.
21 Tûn hma khân thil sual tih lam ringawt in ngaihtuah avângin Pathian nêna inmihran leh a hmêlmate in ni a. 22 Tûnah erawh chuan a hmaah thianghlim tak, sawisêl bo leh, hêkna tûr awm lova in din theihna tûrin, a Fapa taksa thihna hmangin ani chuan amah nên a inremtîr leh che u a ni. 23 Nimahsela, rinnaah chuan in awm reng tûr a ni a. Beiseina chanchin ṭha in hriat, vân hnuaia thil siam zawng zawngte hnêna puan chhuah tawh lak aṭang khân hruai pêna awm lovin, rinna lungphûma dina awmin nghet takin awm rawh u. Kei Paula hi, chu chanchin ṭha chu puang tûra rawngbâwltua ruat ka ni.
24 Tûna in tâna ka hrehawm tawrhnaahte hian ka lâwm a, Krista taksa pêng ka nih angin chu chu tawrh zawm zêl ka inhuam a ni. Chu tawrhna chuan Krista taksa ṭhatna tûr a thlen dâwn si a. A taksa chu Kohhran hi a ni. 25 In tâna Pathian thu a kima hril tûra Pathianin enkawltu nihna min pêk ang zêlin, he kohhran rawngbâwltu hi ka lo ni ta a. 26 Thurûk thianghlim chu hun kalta* leh chhuan kaltaahte khân thupin a awm a, tûnah erawh chuan a mi thianghlimte hnênah tih lanin a awm ta a ni. 27 Chu bâkah, hnam dangte zînga hriattîr, chu thurûk thianghlim ropui tak chu Pathianin a mi thianghlimte hnênah hriattîr a duh rêng a ni. Chu thurûk chu Krista nên pumkhat in nihna, a ropuina ṭâwmpui beiseina hi a ni. 28 Mi tin Krista nêna inpumkhata mi puitling ni tûra kan ṭanpui theihna tûr leh, Pathian hnêna kan hruai theihna tûrin, ani chu mi tin zilh nân leh zirtîr nâna finna zawng zawng nêna a chanchin kan puan chhuaha chu a ni a. 29 Chuvângin, keimaha thawk a thiltihtheihna hmanga theih tâwp chhuaha beiin rim takin ka thawk a ni.